ಅಫ್ರಿದಿಯಂತಹ ವಿಶ್ವಶ್ರೇಷ್ಠ ಬೌಲರ್​ ಎದುರು ಅರಿತು ಆಡಬೇಕು; ಲೈವ್ ಕಾಮೆಂಟರಿಯಲ್ಲೇ ಕೊಹ್ಲಿಯನ್ನು ಟೀಕಿಸಿದ ಗಂಭೀರ್

ಬಹುನಿರೀಕ್ಷಿತ ಏಷ್ಯಾಕಪ್ ಟೂರ್ನಿಯಲ್ಲಿ (Asia Cup 2023) ನಡೆದ ಭಾರತ-ಪಾಕಿಸ್ತಾನ (India vs Pakistan) ನಡುವಿನ ಹೈವೋಲ್ಟೇಜ್ ಕದನ ಮಳೆಯಿಂದ ರದ್ದುಗೊಂಡಿತು. ಮೊದಲ ಇನ್ನಿಂಗ್ಸ್​​ನಲ್ಲಿ ಇಶಾನ್ ಕಿಶನ್ (82) ಮತ್ತು ಹಾರ್ದಿಕ್ ಪಾಂಡ್ಯ (87) ಅವರ ಅರ್ಧಶತಕದ ನೆರವಿನಿಂದ ಭಾರತ 266 ರನ್​ ಗಳಿಸಿತ್ತು. ಆದರೆ ಈ ಗುರಿ ಬೆನ್ನಟ್ಟಲು ಸಿದ್ಧಗೊಂಡ ಪಾಕಿಸ್ತಾನಕ್ಕೆ ವರುಣ ಅಡ್ಡಿಪಡಿಸಿತು. ಪಂದ್ಯ ಫಲಿತಾಂಶ ಕಾಣದೆ ಅಂತ್ಯಗೊಂಡ ಕಾರಣ ಪಾಕ್ ಸೂಪರ್​​-4 ಹಂತಕ್ಕೆ ಪ್ರವೇಶ ಪಡೆಯಿತು.

ಲೈವ್ ಕಾಮೆಂಟರಿಯಲ್ಲಿ ಕೊಹ್ಲಿ ಟೀಕಿಸಿದ ಗಂಭೀರ್

ಹೆಚ್ಚಿನ ನಿರೀಕ್ಷೆಯನ್ನು ಹುಟ್ಟು ಹಾಕಿದ್ದ ಭಾರತದ ಅಗ್ರ ಕ್ರಮಾಂಕದ ಬ್ಯಾಟರ್​​​ಗಳು ಭಾರಿ ನಿರಾಸೆ ಮೂಡಿಸಿದರು. ಅದರಲ್ಲೂ ವಿರಾಟ್​ ಕೊಹ್ಲಿ (Virat Kohli) ಬೇಗನೇ ಔಟಾಗಿದ್ದು ಮತ್ತಷ್ಟು ನಿರಾಸೆ ಮೂಡಿಸಿತು. 6ನೇ ಓವರ್​​ನ 3ನೇ ಎಸೆತದಲ್ಲಿ ಶಾಹೀನ್ ಶಾ ಅಫ್ರಿದಿ ಬೌಲಿಂಗ್​​ನಲ್ಲಿ ಇನ್​ಸೈಡ್​ ಎಡ್ಜ್​ ಮೂಲಕ ಕ್ಲೀನ್ ಬೋಲ್ಡ್​ ಆದರು. ಆದರೆ ವಿರಾಟ್ ಕೊಹ್ಲಿ ಔಟಾದ ಬೆನ್ನಲ್ಲೇ ಭಾರತದ ಮಾಜಿ ಕ್ರಿಕೆಟಿಗ, ಕಾಮೆಂಟೇಟರ್​ ಗೌತಮ್ ಗಂಭೀರ್ (Gautam Gambhir)​, ಲೈವ್​ ಕಾಮೆಂಟರಿಯಲ್ಲೇ ಕೊಹ್ಲಿಯನ್ನು ಟೀಕಿಸಿದ್ದಾರೆ.

ಲೈವ್​ ಕಾಮೆಂಟರಿಯಲ್ಲಿ ಕೊಹ್ಲಿಯನ್ನು ಮನಬಂದಂತೆ ಟೀಕಿಸಿರುವ ಗಂಭೀರ್​ ವಿರುದ್ಧ ಅಭಿಮಾನಿಗಳು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸ್ಟಾರ್​ಸ್ಪೋರ್ಟ್ಸ್​ ಕಾಮೆಂಟೇಟರ್​ಗಳಲ್ಲಿ ಗಂಭೀರ್ ಕೂಡ ಒಬ್ಬರು. ಆದರೆ ತಮ್ಮ ನೆಚ್ಚಿನ ಆಟಗಾರರನ್ನು ಟೀಕಿಸಿದ್ದಕ್ಕೆ ಕೊಹ್ಲಿ ಅಭಿಮಾನಿಗಳು ಕೆಂಡಕಾರುತ್ತಿದ್ದಾರೆ. ಒಂದು ಪಂದ್ಯದಲ್ಲಿ ಔಟಾಗುತ್ತಿದ್ದಂತೆ ಅದೇ ದೊಡ್ಡ ತಪ್ಪು ಎನ್ನುವಂತೆ ಬಿಂಬಿಸುವಂತೆ ಮಾತನಾಡುವುದು ಎಷ್ಟು ಸರಿ. ಐಪಿಎಲ್ ಸೇಡು ತೀರಿಸಿಕೊಳ್ಳಲು ಬರಬೇಡಿ ಎಂದು ಗಂಭೀರ್​ಗೆ ಪ್ರಶ್ನೆ ಮಾಡುತ್ತಿದ್ದಾರೆ.

ಗಂಭೀರ್​ ಹೇಳಿದ್ದೇನು?

ಕಾಮೆಂಟರಿ ಪ್ಯಾನಲ್​ನಲ್ಲಿದ್ದ ಗಂಭೀರ್, ಕೊಹ್ಲಿ ಔಟಾದ ತಕ್ಷಣವೇ ಈ ಎಸೆತವನ್ನು ಆಡುವ ಅವಶ್ಯಕತೆಯೇ ಇರಲಿಲ್ಲ ಎಂದು ಹೇಳಿದ್ದರು. ಈ ಬಾಲ್​ಗೆ ಬೀಸುವ ಅವಶ್ಯಕತೆಯೇ ಇರಲಿಲ್ಲ. ವಿಕೆಟ್​​ನಿಂದ ಹೊರ ಭಾಗದಲ್ಲಿ ಇತ್ತು. ಅದರಲ್ಲೂ ವಿಶ್ವಶ್ರೇಷ್ಠ ಬೌಲರ್​​ಗಳಲ್ಲಿ ಒಬ್ಬರಾದ ಶಾಹೀನ್ ಅಫ್ರಿದಿಯಂತಹ ಬೌಲರ್​​ಗಳ ಎದುರು ಮುಂದೆ ಹೋಗಬೇಕೋ ಬೇಡವೋ ಎಂಬುದನ್ನು ಅರಿತಿರಬೇಕು ಎಂದು ಹೇಳಿ ಕೊಹ್ಲಿಯನ್ನು ಟೀಕಿಸಿದ್ದಾರೆ.

ಐಪಿಎಲ್​​ನಲ್ಲೂ ಇಬ್ಬರ ನಡುವೆ ಜಗಳ

16ನೇ ಆವೃತ್ತಿಯ ಐಪಿಎಲ್​ನ ಲಕ್ನೋ ಸೂಪರ್ ಜೈಂಟ್ಸ್ ಮತ್ತು ರಾಯಲ್ ಚಾಲೆಂಜರ್ಸ್​ ಬೆಂಗಳೂರು ನಡುವಿನ ಪಂದ್ಯದಲ್ಲೂ ಕೊಹ್ಲಿ-ಗಂಭೀರ್ ಗಲಾಟೆ ಮಾಡಿಕೊಂಡಿದ್ದರು. ಲಕ್ನೋ ತಂಡದ ಮೆಂಟರ್​ ಆಗಿದ್ದ ಗಂಭೀರ್, ಕೊಹ್ಲಿ ನಡುವೆ ವಾಕ್ಸಮರ ತೀವ್ರವಾಗಿ ಕೈಕೈ ಮಿಲಾಯಿಸುವ ಹಂತಕ್ಕೆ ಹೋಗಿತ್ತು. ಹಾಗಾಗಿ ಇಬ್ಬರಿಗೂ ದಂಡ ವಿಧಿಸಲಾಗಿತ್ತು. ಕೊಹ್ಲಿ ಶೇಕಡಾ 100ರಷ್ಟು, ಗಂಭೀರ್​ಗೆ 75ರಷ್ಟು ದಂಡ ಬಿದ್ದಿತ್ತು.

ಅಂದು ಏನಾಗಿತ್ತು?

ಐಪಿಎಲ್​ ಲೀಗ್​ನ ಪಂದ್ಯದಲ್ಲಿ ಚಿನ್ನಸ್ವಾಮಿ ಮೈದಾನದಲ್ಲಿ ಜರುಗಿದ್ದ ಪಂದ್ಯದಲ್ಲಿ ಲಕ್ನೋ ಗೆದ್ದಿತ್ತು. ಆವೇಶ್ ಖಾನ್ ಹೆಲ್ಮೆಟ್ ಬಿಸಾಕಿ ಗೆಲುವನ್ನು ಸಂಭ್ರಮಿಸಿದ್ದರು. ಹಾಗಾಗಿ ಅಭಿಮಾನಿಗಳು ಜೋರಾಗಿ ಕಿರುಚಿದ್ದರು. ಈ ವೇಳೆ ಗಂಭೀರ್, ಸುಮ್ಮನಿರುವಂತೆ ಕೈ ಸನ್ನೆ ಮೂಲಕ ಎಚ್ಚರಿಸಿದ್ದರು. ಬಳಿಕ ಮೇ 1ರಂದು ಲಕ್ನೋದಲ್ಲಿ ನಡೆದ ಪಂದ್ಯದಲ್ಲಿ ಆರ್​​ಸಿಬಿ ಜಯಿಸಿತ್ತು. ಲಕ್ನೋ ಆಟಗಾರರ ವಿರುದ್ಧ ಸೇಡು ತೀರಿಸಿಕೊಂಡಿದ್ದರು. ಆದರೀದು ಗಂಭೀರ್​​ ಕೋಪಕ್ಕೆ ಕಾರಣವಾಗಿತ್ತು.

ಪಂದ್ಯದ ಬಳಿಕ ಉಭಯ ತಂಡಗಳ ಆಟಗಾರರು ಹಸ್ತಲಾಘವ ಮಾಡುವ ಸಂದರ್ಭದಲ್ಲಿ ನವೀನ್ ಉಲ್​ ಹಕ್ ಮತ್ತು ಕೊಹ್ಲಿ ನಡುವೆ ಮಾತಿನ ಚಕಮಕಿ ನಡೆಯಿತು. ಆದರೆ ಪೋಸ್ಟ್​ ಮ್ಯಾಚ್​ ಪ್ರಸೆಂಟೇಷನ್ ವೇಳೆ ಕೈಲ್ ಮೇಯರ್ಸ್​ ಮತ್ತು ಕೊಹ್ಲಿ ನಡುವೆ ವಾಕ್ಸಮರ ನಡೆಯಿತು. ಆಗ ಮಧ್ಯ ಪ್ರವೇಶಿಸಿದ ಗಂಭೀರ್​, ನಮ್ಮ ಆಟಗಾರರನ್ನು ಗುರಾಯಿಸಿ ನೋಡುವುದೇಕೆ ಎಂದು ಕೋಪದಲ್ಲಿ ಮಾತನಾಡಿದ್ದರು.

ಇದು ನನ್ನ ಕುಟುಂಬ. ಅವರಿಗೆ ಏನೆ ಅಂದರೂ ನನಗೆ ಅಂದಂತೆ ಎಂದು ಗಂಭೀರ್ ಹೇಳಿದ್ದರು. ನಿಮ್ಮ ಕುಟುಂಬ ಹುಷಾರಾಗಿ ನೋಡಿಕೊಳ್ಳಿ ಎಂದು ಗಂಭೀರ್​ಗೆ ಕೊಹ್ಲಿ ಕೌಂಟರ್ ಕೊಟ್ಟಿದ್ದರು. ಇದು ದೊಡ್ಡ ವಾಕ್ಸಮರಕ್ಕೆ ಕಾರಣವಾಗಿತ್ತು. ಬಳಿಕ ಸಹ ಆಟಗಾರರ ಇಬ್ಬರನ್ನು ಸಮಾಧಾನಗೊಳಿಸಿದರು. ಮುಂದಿನ ಹಂತಕ್ಕೆ ಹೋಗುತ್ತಿದ್ದ ಗಲಾಟೆಯನ್ನು ನಿಲ್ಲಿಸಿದ್ದರು. ಆದರೆ ಇವರಿಬ್ಬರ ಗಲಾಟೆ ಇಂದು ನಿನ್ನೆಯದ್ದಲ್ಲ, ಹಲವು ವರ್ಷಗಳಿಂದ ನಡೆಯುತ್ತಲೇ ಇದೆ.