Explainer: ಹೀಗಾದರೆ ಸೆಮೀಸ್​ನಲ್ಲಿ ಮತ್ತೆ ಮುಖಾಮುಖಿಯಾಗಲಿವೆೆ ಭಾರತ-ಪಾಕಿಸ್ತಾನ; ಇದಕ್ಕೇನು ಪವಾಡ ನಡೆಯಬೇಕಿಲ್ಲ!

ಏಕದಿನ ವಿಶ್ವಕಪ್ (ICC ODI World Cup 2023) ಸೆಮಿಫೈನಲ್​ಗೆ ಟೀಮ್ ಇಂಡಿಯಾ (Team India) ಪ್ರವೇಶಿಸಿದೆ. ವಿಶ್ವಕಪ್​​ನಲ್ಲಿ ಮೊದಲ ತಂಡವಾಗಿ ಸೆಮೀಸ್​ಗೆ ಕಾಲಿಟ್ಟಿದೆ. ಉಳಿದ ಮೂರು ಸ್ಥಾನಗಳಿಗೆ ಇನ್ನೂ ಹೊರಬಿದ್ದಿರುವ ಬಾಂಗ್ಲಾದೇಶ ಹೊರತುಪಡಿಸಿ 8 ತಂಡಗಳ ನಡುವೆ ಪೈಪೋಟಿ ಏರ್ಪಟ್ಟಿದೆ. ಮುಂಬೈನ ವಾಂಖೆಡೆ ಮೈದಾನದಲ್ಲಿ ದ್ವೀಪರಾಷ್ಟ್ರ ಶ್ರೀಲಂಕಾವನ್ನು ಮಣಿಸಿದ ಭಾರತ, ಸತತ 7ನೇ ಗೆಲುವು ದಕ್ಕಿಸಿಕೊಂಡಿತು.

ಸದ್ಯ ಸೆಮಿಫೈನಲ್​ ಲೆಕ್ಕಾಚಾರಗಳು ಜೋರಾಗಿದೆ. ಆದರೆ ಹೀಗಾದರೆ, ಮತ್ತೊಮ್ಮೆ ಭಾರತ-ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗುವ ಸಾಧ್ಯತೆಯೂ ಇದೆ. ಹೌದು, ಸೆಮಿಫೈನಲ್​​​ನಲ್ಲಿ ಸಾಂಪ್ರದಾಯಿಕ ಎದುರಾಳಿ ತಂಡಗಳಾದ ಇಂಡೋ-ಪಾಕ್ ಎದುರಾಗುವ ಸಾಧ್ಯತೆ ಇದೆ. ಇದಕ್ಕೆ ಪವಾಡಗಳು ನಡೆಯಬೇಕಿಲ್ಲ. ಉಳಿದ ತಂಡಗಳ ಸೋಲು, ತನ್ನ ತಂಡದ ಗೆಲುವಿನ ಮೇಲೆ ಪಾಕ್ ಭವಿಷ್ಯ ನಿರ್ಧಾರವಾಗಲಿದೆ.

ಪಾಕ್ ಸೆಮೀಸ್​ ಲೆಕ್ಕಾಚಾರ ಹೇಗಿದೆ?

ಭಾರತ 14 ಅಂಕಗಳೊಂದಿಗೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದ್ದು, ನವೆಂಬರ್​​ 5ರಂದು ತನ್ನ ಮುಂದಿನ ಪಂದ್ಯದಲ್ಲಿ 2ನೇ ಸ್ಥಾನದಲ್ಲಿರುವ ದಕ್ಷಿಣ ಆಫ್ರಿಕಾ ತಂಡವನ್ನು ಮಣಿಸಬೇಕು. ಆಗ ಮೆನ್ ಇನ್​ ಬ್ಲೂ ಹೆಚ್ಚು ಕಡಿಮೆ ಅಗ್ರಸ್ಥಾನದಲ್ಲೇ ಉಳಿಯಲಿದೆ. ನವೆಂಬರ್​ 15ರಂದು ವಾಂಖೆಡೆ ಮೈದಾನದಲ್ಲಿ ನಡೆಯುವ ಮೊದಲ ಸೆಮಿಫೈನಲ್​​ನಲ್ಲಿ ಅಗ್ರಸ್ಥಾನಿ ತಂಡವು, ಅಂಕಪಟ್ಟಿಯಲ್ಲಿ 4ನೇ ಸ್ಥಾನ ಪಡೆದಿರುವ ತಂಡವನ್ನು ಎದುರಿಸಲಿದೆ.

ಅಫ್ಘಾನಿಸ್ತಾನವೂ ಸೋಲಬೇಕು

ಪ್ರಸ್ತುತ ಪಾಕಿಸ್ತಾನ 7 ಪಂದ್ಯಗಳಲ್ಲಿ 4 ಸೋಲು, 3 ಗೆಲುವು ಸಾಧಿಸಿ ಅಂಕಪಟ್ಟಿಯಲ್ಲಿ 5ನೇ ಸ್ಥಾನದಲ್ಲಿದೆ. ಹೀಗಾಗಿ ಪಾಕ್ ನಾಲ್ಕನೇ ಸ್ಥಾನ ಭದ್ರಪಡಿಸಿಕೊಳ್ಳಲು ಉಳಿದ ಎರಡೂ ಪಂದ್ಯಗಳಲ್ಲಿ ಗೆಲ್ಲಲೇಬೇಕು. ಆಗ 10 ಅಂಕಗಳೊಂದಿಗೆ 4ನೇ ಸ್ಥಾನಕ್ಕೆ ಲಗ್ಗೆ ಇಡಲಿದೆ. ಪಾಕ್​ ಗೆಲುವು ಸಾಧಿಸುವುದರ ಜೊತೆಗೆ ಉಳಿದ ತಂಡಗಳ ಫಲಿತಾಂಶ ಮೇಲೂ ಅವಲಂಬಿತವಾಗಬೇಕು. ರೇಸ್​​​ನಲ್ಲಿರುವ ಅಫ್ಘಾನಿಸ್ತಾನ ತನ್ನ ಮುಂದಿನ 3 ಪಂದ್ಯಗಳಲ್ಲಿ ಕನಿಷ್ಠ ಎರಡನ್ನಾದರೂ ಸೋಲಬೇಕು.

ಕಿವೀಸ್-ಇಂಗ್ಲೆಂಡ್ ಎದುರು ಪಾಕ್ ಗೆಲ್ಲಬೇಕು

ಮತ್ತೊಂದೆಡೆ ನ್ಯೂಜಿಲೆಂಡ್ ತಂಡವು ತನ್ನ ಉಳಿದ ಎರಡೂ ಪಂದ್ಯಗಳನ್ನೂ ಕಳೆದುಕೊಳ್ಳಬೇಕು. ಮತ್ತೊಂದೆಡೆ ಪಾಕ್​​ಗೆ ಉತ್ತಮ ಅವಕಾಶ ಕೂಡ ಇದೆ. ಏಕೆಂದರೆ ನ್ಯೂಜಿಲೆಂಡ್ ತಂಡವನ್ನು ಮಣಿಸುವ ಅವಕಾಶ ಪಾಕಿಸ್ತಾನಕ್ಕೆ ಸಿಕ್ಕಿದೆ. ನವೆಂಬರ್ 4ರಂದು ನ್ಯೂಜಿಲೆಂಡ್ - ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗುತ್ತಿವೆ. ಹಾಗಾಗಿ ಈ ಪಂದ್ಯದಲ್ಲಿ ಕಿವೀಸ್​ ತಂಡವನ್ನು ಪಾಕ್ ಮಣಿಸಲೇಬೇಕು.

ಭಾರಿ ಅಂತರದ ಗೆಲುವು ಅನಿವಾರ್ಯ

ಈ ಪಂದ್ಯವನ್ನು ಸೋಲಿಸಿದರೆ, ಉತ್ತಮ ನೆಟ್​ ರನ್ ರೇಟ್​ ಪಡೆಯಲು ಸಾಧ್ಯವಾಗುತ್ತದೆ. ಆ ಬಳಿಕ ತನ್ನ ಕೊನೆಯ ಪಂದ್ಯದಲ್ಲಿ ಬಾಬರ್ ಪಡೆ, ಕಳಪೆ ಪ್ರದರ್ಶನ ನೀಡುತ್ತಿರುವ ಇಂಗ್ಲೆಂಡ್ ತಂಡವನ್ನು ಮಣಿಸಬೇಕು. ಭಾರಿ ಅಂತರದ ಗೆಲುವು ದಾಖಲಿಸಿ ರನ್ ರೇಟ್​ ಹೆಚ್ಚಿಸಿಕೊಳ್ಳಬೇಕು. ಮತ್ತೊಂದೆಡೆ ನ್ಯೂಜಿಲೆಂಡ್ ತನ್ನ ಕೊನೆ ಪಂದ್ಯದಲ್ಲಿ ಲಂಕಾವನ್ನು ಎದುರಿಸಲಿದೆ. ಆದರೆ, ಕಿವೀಸ್​ ಗೆಲ್ಲುವ ಸಾಧ್ಯತೆ ಇದೆ.

ಹೀಗಲೂ ಆಗಬಹುದು

ಒಂದು ವೇಳೆ ಪಾಕ್ ತನ್ನ ಮುಂದಿನ ಎರಡೂ ಪಂದ್ಯಗಳನ್ನು ಗೆದ್ದರೆ 10 ಅಂಕ ಪಡೆಯಲಿದೆ. ಕಿವೀಸ್ ತನ್ನ ಕೊನೆಯ ಪಂದ್ಯದಲ್ಲಿ ಗೆದ್ದರೆ, ಅದು ಕೂಡ 10 ಅಂಕ ಪಡೆಯಲಿದೆ. ಇದರೊಂದಿಗೆ ನೆಟ್​ ರನ್​ ರೇಟ್​ ಆಧಾರದ ಮೇಲೆ ಉಭಯ ತಂಡಗಳಲ್ಲಿ ಒಂದು ಸೆಮೀಸ್​ಗೆ ಅರ್ಹತೆ ಪಡೆಯುವುದು ಖಾಯಂ. ಒಂದು ಪಾಕಿಸ್ತಾನಕ್ಕೆ ಈ ಅವಕಾಶ ಸಿಕ್ಕರೆ, ಅಂಕಪಟ್ಟಿಯಲ್ಲಿ ಕೊನೆಯ ಸ್ಥಾನ ಪಡೆಯಲಿದೆ.

ಇದೆಲ್ಲಾ ಸಾಧ್ಯವಾದರೆ, ಸೆಮೀಸ್​ನಲ್ಲಿ ಇಂಡೋ-ಪಾಕ್ ಮುಖಾಮುಖಿ ಖಚಿತ

ಭಾರತ ಅಂಕಪಟ್ಟಿಯಲ್ಲಿ ಮೊದಲ ಸ್ಥಾನ ಮತ್ತು ಪಾಕಿಸ್ತಾನ 4ನೇ ಸ್ಥಾನ ಗಳಿಸಿದರೆ, ನವೆಂಬರ್ 15ರಂದು ಮುಂಬೈನ ವಾಂಖೆಡೆ ಮೈದಾನದಲ್ಲಿ ಉಭಯ ತಂಡಗಳು ಮೊದಲ ಸೆಮಿಫೈನಲ್​​ನಲ್ಲಿ ಮುಖಾಮುಖಿಯಾಗಲಿವೆ. ಈ ಹೈವೋಲ್ಟೇಜ್​ ಕದನಕ್ಕೆ ಇಡೀ ವಿಶ್ವವೇ ಸಾಕ್ಷಿಯಾಗಲಿದೆ. 2011ರ ಏಕದಿನ ವಿಶ್ವಕಪ್​​ನಲ್ಲಿ ಈ ಉಭಯ ತಂಡಗಳು ಸೆಮಿಫೈನಲ್​​ನಲ್ಲಿ ಕೊನೆಯದಾಗಿ ಎದುರಾಗಿದ್ದವು. ಈ ಪಂದ್ಯದಲ್ಲಿ ಗೆದ್ದ ಭಾರತ ಫೈನಲ್ ಪ್ರವೇಶಿಸಿತ್ತು. ಇನ್ನು ಈ ಲೀಗ್​​ನಲ್ಲಿ ಪಾಕ್ ತಂಡವನ್ನು ಭಾರತ ಮಣಿಸಿತ್ತು.