ಸೂಪರ್ ಓವರ್​ನಲ್ಲೂ ಪಂದ್ಯ ಟೈ; 'ಮೋಯೆ ಮೋಯೆ' ಹಾಡಿಗೆ ಸಿಗ್ನೇಚರ್ ಸ್ಟೆಪ್ಸ್ ಹಾಕಿದ ಕೊಹ್ಲಿ, ವಿಡಿಯೋ ವೈರಲ್

ಬೆಂಗಳೂರಿನ ಎಂ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ನಡೆದ ಮೂರನೇ ಟಿ20 ಪಂದ್ಯದಲ್ಲಿ ಅಫ್ಘಾನಿಸ್ತಾನ ವಿರುದ್ಧ ಭಾರತ ಭರ್ಜರಿ ಗೆಲುವು (India Vs Afghanistan 3rd T20I) ಸಾಧಿಸಿತು. 2ನೇ ಸೂಪರ್​​ ಓವರ್​​ನಲ್ಲಿ 10 ರನ್​​ಗಳಿಂದ ಗೆದ್ದ ರೋಹಿತ್​ ಪಡೆ 3-0 ಅಂತರದಿಂದ ಸರಣಿಯನ್ನು ಕ್ಲೀನ್​ಸ್ವೀಪ್ ಮಾಡಿಕೊಂಡಿತು. ಆದರೆ ಪಂದ್ಯ ಟೈ ಆದ ಬಳಿಕ ಸೂಪರ್​ ಓವರ್​ಗೆ ಸಿದ್ಧತೆ ನಡೆಸುತ್ತಿದ್ದ ವೇಳೆ ಮೊಯೆ ಮೊಯೆ ಹಾಡಿಗೆ ವಿರಾಟ್ ಕೊಹ್ಲಿ (Virat Kohli) ಸಿಗ್ನೇಚರ್​ ಸ್ಪೆಪ್ಸ್ ಹಾಕಿದ್ದಾರೆ.

ಇದನ್ನೂ ಓದಿ: ಹೇ ವೀರು, ನಾನು ಈಗಾಗ್ಲೇ ಎರಡು ಸಲ ಡಕೌಟ್ ಆಗಿದ್ದೀನಿ; ಅಂಪೈರ್ ಜೊತೆ ರೋಹಿತ್ ಹಾಸ್ಯ ಚಟಾಕಿ

ಸೂಪರ್​ ಓವರ್​ನಲ್ಲಿ ಸೂಪರ್ ಗೆಲುವು

ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ ತಂಡ, 20 ಓವರ್​​ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 212 ರನ್​​ಗಳ ಬೃಹತ್ ಮೊತ್ತ ಪೇರಿಸಿತು. ರೋಹಿತ್​ ಶರ್ಮಾ ಮತ್ತು ರಿಂಕು ಸಿಂಗ್​ ಜೋಡಿ ಐದನೇ ವಿಕೆಟ್​ಗೆ 190 ರನ್​ಗಳ ಜೊತೆಯಾಟವಾಡಿ ಅಫ್ಘನ್​ ಎದುರು ದೊಡ್ಡ ಮೊತ್ತ ಸಿಡಿಸಲು ಸಾಧ್ಯವಾಯಿತು. ಆದರೆ ಈ ಗುರಿ ಬೆನ್ನಟ್ಟಿದ ಅಫ್ಘನ್, 6 ವಿಕೆಟ್ ನಷ್ಟಕ್ಕೆ ಅಷ್ಟೇ ರನ್​ಗಳನ್ನು ಗಳಿಸಿ ಪಂದ್ಯವನ್ನು ಟೈಗೊಳಿಸಿತು.

ಮೊದಲ ಸೂಪರ್​ ಓವರ್​ನಲ್ಲಿ ಭರ್ಜರಿ ಬ್ಯಾಟಿಂಗ್ ನಡೆಸಿದ ಅಫ್ಘಾನಿಸ್ತಾನ ಭರ್ಜರಿ 16 ರನ್ ಗಳಿಸಿತು. ಈ ಗುರಿ ಬೆನ್ನಟ್ಟಿದ ಭಾರತ, ರೋಹಿತ್​ ಶರ್ಮಾ 2 ಸಿಕ್ಸರ್​ ಸಿಡಿಸಿದ ಹೊರತಾಗಿಯೂ ಮತ್ತೆ ಟೈನಲ್ಲಿ ಅಂತ್ಯವಾಯಿತು. ಹಾಗಾಗಿ, ಫಲಿತಾಂಶ ನಿರ್ಧರಿಸಲು ಮತ್ತೊಂದು ಸೂಪರ್ ಓವರ್​ ಮೊರೆ ಹೋಗಬೇಕಾಯಿತು. ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ 11 ರನ್ ಗಳಿಸಿತು. ಅಫ್ಘನ್ 1 ರನ್ ಗಳಿಸಿ 10 ರನ್​ಗಳಿಂದ ರೋಹಿತ್ ಪಡೆಗೆ ಶರಣಾಯಿತು.

ವಿರಾಟ್ ಡ್ಯಾನ್ಸ್ ವಿಡಿಯೋ ವೈರಲ್

ಪಂದ್ಯದ ನಂತರ ಮೊದಲ ಸೂಪರ್​ ಓವರ್​​ನಲ್ಲೂ ಫಲಿತಾಂಶ ಬಾರದ ಕಾರಣಕ್ಕೆ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಡಿಜೆಯಲ್ಲಿ ವಿಶಿಷ್ಟವಾದ 'ಮೋಯೆ ಮೋಯೆ' ಹಾಡನ್ನು ಹಾಕಲಾಯಿತು. ಇದು ನಿರ್ದಿಷ್ಟ ವ್ಯಕ್ತಿ ಅಥವಾ ತಂಡಕ್ಕೆ ತಪ್ಪಾಗಿರುವ ಸನ್ನಿವೇಶವನ್ನು ಗೇಲಿ ಮಾಡಲು ಸಾಮಾಜಿಕ ಜಾಲತಾಣದಲ್ಲಿ ಹಾಡನ್ನು ಬಳಸಲಾಗುತ್ತದೆ. ಈ ಹಾಡನ್ನು ಪ್ಲೇ ಮಾಡಿದ ನಂತರ ವಿರಾಟ್ ಕೊಹ್ಲಿ ಈ ಐಕಾನಿಕ್ ಮೀಮ್​​ಗೆ ಡ್ಯಾನ್ಸ್ ಮಾಡಿ ಇನ್ನಷ್ಟು ತಮಾಷೆ ಮಾಡಿದ್ದಾರೆ.

ಮೈದಾನದಲ್ಲಿ ನೆರೆದಿದ್ದ ಅಭಿಮಾನಿಗಳು ಈ ಹಾಡಿಗೆ ನಿಂತಲ್ಲೇ ಕೂತಲ್ಲೇ ಸ್ಟೆಪ್ಸ್ ಹಾಕಿದರು. ಮೊಯೆ ಮೊಯೆ ಎಂದು ಇಡೀ ಮೈದಾನವೇ ಪ್ರತಿಧ್ವನಿಸಿತು. ಹಾಡನ್ನು ಪ್ಲೇ ಮಾಡುತ್ತಿದ್ದಂತೆ ಕೊಹ್ಲಿ ಕಣ್ಮುಚ್ಚಿಕೊಂಡು ಸೊಂಟ ಬಳುಕಿಸಿದ್ದಾರೆ. ಈ ಹಾಡಿಗೆ ಸೊಂಟ ಬಳುಕಿಸುವುದೇ ಸಿಗ್ನೇಚರ್​ ಸ್ಟೆಪ್ಸ್​ ಆಗಿದೆ. ಸಹ ಆಟಗಾರರು ಸಹ ಈ ಡ್ಯಾನ್ಸ್​ ನೋಡಿ ಬಿದ್ದು ಬಿದ್ದು ನಕ್ಕರು. ವಿರಾಟ್ ಡ್ಯಾನ್ಸ್ ಮಾಡಿರುವ ವಿಡಿಯೋ ಸಖತ್ ವೈರಲ್ ಆಗುತ್ತಿದೆ. ಅಭಿಮಾನಿಗಳು ವಿಭಿನ್ನ ಕಮೆಂಟ್​ಗಳ ಮೂಲಕ ಪ್ರತಿಕ್ರಿಯಿಸುತ್ತಿದ್ದಾರೆ.

ಇದನ್ನೂ ಓದಿ: ಧೋನಿ ದಾಖಲೆ ಹಿಂದಿಕ್ಕಿದ ರೋಹಿತ್​; ಭಾರತದ ನಾಯಕನಾಗಿ ಹೊಸ ಮೈಲಿಗಲ್ಲು ಸ್ಥಾಪಿಸಿದ ಹಿಟ್​ಮ್ಯಾನ್

ಭಾರತ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತ್ತು. ಒಂದು ಹಂತದಲ್ಲಿ ಮೆನ್ ಇನ್ ಬ್ಲೂ 22 ರನ್​ಗಳಿಗೆ 4 ವಿಕೆಟ್ ಕಳೆದುಕೊಂಡಿತು. ಆ ಬಳಿಕ ರೋಹಿತ್ ಶರ್ಮಾ ಮತ್ತು ರಿಂಕು ಸಿಂಗ್ ಅವರು ದಾಖಲೆ 190 ರನ್​ಗಳ ಜೊತೆಯಾಟವಾಡಿದರು. ಇದು ಭಾರತದ ಪರ ಟಿ20 ಕ್ರಿಕೆಟ್​ನಲ್ಲಿ ದಾಖಲಾದ ಗರಿಷ್ಠ ಜೊತೆಯಾಟ. ಮತ್ತೊಂದೆಡೆ 5ನೇ ಟಿ20 ಶತಕ ಸಿಡಿಸಿದ ರೋಹಿತ್​, ನಾಯಕನಾಗಿ ಹಲವು ದಾಖಲೆ ಬರೆದಿದ್ದಾರೆ.

---

'ಮನೆ-ಮನದಲ್ಲಿ ಶ್ರೀರಾಮ' ಸರಣಿಗೆ ನೀವೂ ಬರೆಯಿರಿ. ಇಮೇಲ್: ht.kannada@htdigital.in