ಪರ್ಸ್​​ನಲ್ಲಿ ಇದ್ದಿದ್ದೇ 23.25 ಕೋಟಿ; ಆದರೂ ಕಮಿನ್ಸ್​​ಗೆ 20.25 ಕೋಟಿವರೆಗೂ ಬಿಡ್ ನಡೆಸಿ ವಿರೋಚಿತ ಸೋಲು ಕಂಡ ಆರ್​ಸಿಬಿ

ಐಪಿಎಲ್ ಮಿನಿ ಹರಾಜಾದರೂ (IPL Auction 2024) ಸಾಕಷ್ಟು ರೋಚಕತೆ ಸೃಷ್ಟಿಸಿದೆ. ನಿರೀಕ್ಷೆಯಂತೆ ಸ್ಟಾರ್ ಆಟಗಾರರು ದೊಡ್ಡ ಮೊತ್ತವನ್ನು ಜೇಬಿಗಿಳಿಸಿಕೊಂಡಿದ್ದರೆ, ಇನ್ನೂ ಕೆಲವರಿಗೆ ಭಾರಿ ನಿರಾಸೆಯಾಗಿದೆ. ಅದರಲ್ಲೂ ಏಕದಿನ ವಿಶ್ವಕಪ್ ಗೆದ್ದ ಆಸ್ಟ್ರೇಲಿಯಾದ ಆಟಗಾರರಾದ ಮಿಚೆಲ್ ಸ್ಟಾರ್ಕ್, ಪ್ಯಾಟ್ ಕಮಿನ್ಸ್ ಮತ್ತು ನ್ಯೂಜಿಲೆಂಡ್ ತಂಡದ ಡೇರಿಲ್ ಮಿಚೆಲ್​​ಗೆ ಹಣ ಹೊಳೆಯನ್ನೇ ಹರಿಸಲಾಗಿದೆ.

ಇದನ್ನೂ ಓದಿ : ಐಪಿಎಲ್ ಹರಾಜು ಇತಿಹಾಸದಲ್ಲಿ ಟಾಪ್-10 ದುಬಾರಿ ಆಟಗಾರರ ಪಟ್ಟಿ; ಸ್ಟಾರ್ಕ್ ನಂ.1, ಭಾರತದ ಇಬ್ಬರಿಗಷ್ಟೇ ಸ್ಥಾನ

ಮಿಚೆಲ್ ಸ್ಟಾರ್ಕ್ 24.75 ಕೋಟಿಗೆ ಕೋಲ್ಕತ್ತಾ ನೈಟ್​ ರೈಡರ್ಸ್ ತಂಡದ ಪಾಲಾದರೆ, ಪ್ಯಾಟ್ ಕಮಿನ್ಸ್ 20.50 ಕೋಟಿಗೆ ಸನ್​ರೈಸರ್ಸ್ ಹೈದರಾಬಾದ್ ತಂಡವನ್ನು ಸೇರಿಕೊಂಡಿದ್ದಾರೆ. ಅಲ್ಲದೆ, ವಿಶ್ವಕಪ್​ನಲ್ಲಿ ಅದ್ಭುತ ಪ್ರದರ್ಶನ ನೀಡಿದ ಆಟಗಾರರಿಗೆ ಉತ್ತಮ ಮೊತ್ತವೇ ಸಿಕ್ಕಿದೆ. ಆದರೆ ಹರಾಜಿನ ವೇಳೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (Royal Challengers Bangalore) ನಡೆಸಿದ ಬಿಡ್​ ಸಾಕಷ್ಟು ಅಚ್ಚರಿ ಮೂಡಿಸಿತ್ತು.

ಇದ್ದಿದ್ದೇ 23.25 ಕೋಟಿ, ಬಿಡ್ ನಡೆಸಿದ್ದು 20.25 ಕೋಟಿ

ದುಬೈನಲ್ಲಿ ನಡೆದ ಐಪಿಎಲ್ ಮಿನಿ ಹರಾಜಿಗೂ ಮುನ್ನ ಆರ್​ಸಿಬಿ ಪರ್ಸ್​​ನಲ್ಲಿ 23.25 ಕೋಟಿ ಇತ್ತು. ಆದರೆ, ಒಬ್ಬರಿಗಾಗಿ ಬಿಡ್​ನಲ್ಲಿ ಪೈಪೋಟಿ ನಡೆಸಿದ್ದು 20.25 ಕೋಟಿವರೆಗೆ. ಹೌದು, ಏಕದಿನ ವಿಶ್ವಕಪ್ ಗೆದ್ದ ಆಸ್ಟ್ರೇಲಿಯಾ ನಾಯಕ ಪ್ಯಾಟ್ ಕಮಿನ್ಸ್​ ಖರೀದಿಗೆ ಭಾರಿ ಪೈಪೋಟಿ ನಡೆಸಿತು. ಸನ್​ರೈಸರ್ಸ್ ಹೈದರಾಬಾದ್​ ಜೊತೆಗೆ ಜಿದ್ದಾಜಿದ್ದಿನ ಪೈಪೋಟಿ ನಡೆಸಿದ್ದು, ಅಚ್ಚರಿ ಮೂಡಿಸಿತ್ತು.

ಪ್ಯಾಟ್ ಕಮಿನ್ಸ್ 2 ಕೋಟಿ ಮೂಲ ಬೆಲೆ ಹೊಂದಿದ್ದರು. ಆಸೀಸ್​ ನಾಯಕ ಪ್ಯಾಟ್ ಕಮಿನ್ಸ್ ಖರೀದಿಗೆ ಒಟ್ಟು ನಾಲ್ಕು ತಂಡಗಳು ಪೈಟೋಟಿ ನಡೆಸಿದವು. ಚೆನ್ನೈ ಸೂಪರ್ ಕಿಂಗ್ಸ್​, ಮುಂಬೈ ಇಂಡಿಯನ್ಸ್​, ಫ್ರಾಂಚೈಸಿಗಳು ಬಿಡ್ಡಿಂಗ್ ಆರಂಭಿಸಿದರೆ, ಬಳಿಕ ರೇಸ್​​ಗಿಳಿದ ಆರ್​ಸಿಬಿ ಮತ್ತು ಸನ್​ರೈಸರ್ಸ್ ಜಿದ್ದಾಜಿದ್ದಿನ ಪೈಪೋಟಿ ನಡೆಸಿದವು. ಒಂದು ಹಂತದವರೆಗೂ ಹೋರಾಟ ನಡೆಸಿದ ಸಿಎಸ್​ಕೆ, ಮುಂಬೈ ಬಳಿಕ ಬಿಡ್​ನಿಂದ ಹಿಂದೆ ಸರಿದವು.

ಆದರೆ ತಮ್ಮ ಪರ್ಸ್​​ನಲ್ಲಿ 23.25 ಕೋಟಿ ಹೊಂದಿದ್ದ ಆರ್​ಸಿಬಿ, ತಾನು ಪೈಪೋಟಿಯಿಂದ ಹಿಂದೆ ಸರಿಯಲ್ಲ ಎನ್ನುವಂತೆ ಮುನ್ನುಗ್ಗಿತು. ಆ ಕಡೆ ಹೈದರಾಬಾದ್ ಸಹ ಜಿದ್ದಾಜಿದ್ದಿನ ಬಿಡ್ ನಡೆಸಿ ಗಮನ ಸೆಳೆಯಿತು. ನೋಡ ನೋಡುತ್ತಲ್ಲೇ 20 ಕೋಟಿ ದಾಟಿತು. ಆದರೂ ಸುಮ್ಮನಿರದ ಆರ್​ಸಿಬಿ 20.25 ಕೋಟಿಗೆ ಬಿಡ್ ನಡೆಸಿ ಎಲ್ಲರನ್ನೂ ದಂಗು ಬಡಿಸಿತು. ಮತ್ತೆ ಯೋಚಿಸಿದ 20.25 ಕೋಟಿಗೆ ಎಸ್​ಆರ್​ಎಚ್ ಬಿಡ್ ನಡೆಸಿತು.

20.25 ಕೋಟಿವರೆಗೂ ಬಿಡ್ ನಡೆಸಿದ ಆರ್​ಸಿಬಿ ಕೊನೆಯ ಹಂತದಲ್ಲಿ ಹಿಂದೆ ಸರಿಯಿತು. ಆ ಮೂಲಕ ಬಿಡ್ಡಿಂಗ್​ನಲ್ಲೂ ವಿರೋಚಿತ ಸೋಲು ಅನುಭವಿಸಿತು. ಆರ್​ಸಿಬಿ ಫ್ರಾಂಚೈಸಿ ವಿರುದ್ಧ ಸಾಕಷ್ಟು ಆಕ್ರೋಶ ವ್ಯಕ್ತವಾಗಿದೆ. ಅಭಿಮಾನಿಗಳಂತೂ ಕೆಂಡಾಮಂಡಲರಾಗಿದ್ದಾರೆ. ಪ್ರಮುಖರ ಮೇಲೆ ಬಿಡ್ ನಡೆಸದೆ, 23.25 ಕೋಟಿ ಇಟ್ಕೊಂಡು 20.25 ಕೋಟಿವರೆಗೂ ಬಿಡ್ ನಡೆಸುವ ಅಗತ್ಯ ಏನಿತ್ತು ಎಂದು ಪ್ರಶ್ನಿಸಿದ್ದಾರೆ.

ಜೋಸೆಫ್, ಯಶ್ ದಯಾಳ್​ಗೆ ಮಣೆ

ವಿಶ್ವಕಪ್​ನಲ್ಲಿ ಮಿಂಚಿದ ರಚಿನ್ ರವೀಂದ್ರ ಮತ್ತು ಆರ್​​ಸಿಬಿ ಪರವೇ ಆಡಿದ್ದ ವನಿಂದು ಹಸರಂಗ ಅವರ ಮೇಲೆ ಬಿಡ್ ಮಾಡುವ ಅವಕಾಶ ಇತ್ತು. ರಚಿನ್ ಕೇವಲ 1.80 ಕೋಟಿಗೆ ಸಿಎಸ್​ಕೆ ಪಾಲಾದರೆ, ಹಸರಂಗ ಅವರನ್ನು 1.50 ಕೋಟಿಗೆ ಸನ್​ರೈಸರ್ಸ್ ಖರೀದಿಸಿದೆ. ಆದರೆ ಇವರ ಮೇಲೆ ಬಿಡ್ ನಡೆಸಲೂ ಆರ್​​ಸಿಬಿ ಮುಂದಾಗಲಿಲ್ಲ.

ಅಷ್ಟೇ ಅಲ್ಲದೆ, 5 ಕೋಟಿಗೆ ಮುಂಬೈ ಸೇರಿದ ಗೆರಾಲ್ಡ್ ಕೊಯೆಟ್ಜಿಗೂ ಬಿಡ್​ ನಡೆಸಲಿಲ್ಲ. ಇನ್ನೂ ಹಲವರ ಕಡೆ ಮುಖವೆತ್ತಿ ನೋಡಲೂ ಇಲ್ಲ. ಆರ್​ಸಿಬಿ ವೆಸ್ಟ್ ಇಂಡೀಸ್​ನ ಅಲ್ಜಾರಿ ಜೋಸೆಫ್ ಮತ್ತು ರಿಂಕು ಸಿಂಗ್​ 5 ಸಿಕ್ಸರ್ ಹೊಡೆದಿದ್ದ ಯಶ್ ದಯಾಳ್​ರನ್ನು ಖರೀದಿಸಿದೆ. ಜೋಸೆಫ್​ಗೆ 11.50 ಕೋಟಿ ನೀಡಿದರೆ, ದಯಾಳ್​ಗೆ 5 ಕೋಟಿ ಕೊಟ್ಟು ಖರೀದಿಸಿದೆ.