ರೋಹಿತ್​ ಶರ್ಮಾ ಟೆಸ್ಟ್ ಶತಕದ ಸಂಖ್ಯೆ 11, ಇಂಗ್ಲೆಂಡ್ ವಿರುದ್ಧವೇ ಮೂರು; ಭರ್ಜರಿ ಸೆಂಚುರಿ ಸಿಡಿಸಿದ ಹಿಟ್​ಮ್ಯಾನ್

ಮೊದಲ ಎರಡು ಟೆಸ್ಟ್ ಪಂದ್ಯಗಳ ನಾಲ್ಕು ಇನ್ನಿಂಗ್ಸ್​​ಗಳಲ್ಲಿ 50ರ ಗಡಿ ದಾಟಲು ವಿಫಲವಾಗಿದ್ದ ಟೀಮ್ ಇಂಡಿಯಾ ನಾಯಕ ರೋಹಿತ್​ ಶರ್ಮಾ (Rohit Sharma), ಮೂರನೇ ಟೆಸ್ಟ್​ ಪಂದ್ಯದಲ್ಲಿ ಭರ್ಜರಿ ಶತಕ ಸಿಡಿಸಿದ್ದಾರೆ. ತನ್ನ 57ನೇ ಟೆಸ್ಟ್​ ಕ್ರಿಕೆಟ್​ ಪಂದ್ಯದಲ್ಲಿ 11ನೇ ಸೆಂಚುರಿ ಬಾರಿಸಿ ಮಿಂಚಿದ್ದಾರೆ. ಸಂಕಷ್ಟದಲ್ಲಿದ್ದ ತಂಡಕ್ಕೆ ಆಸರೆಯಾದ ನಾಯಕ ಚೇತರಿಕೆ ನೀಡುವಲ್ಲಿ ಯಶಸ್ವಿಯಾಗಿದ್ದಾರೆ.

ಇದನ್ನೂ ಓದಿ: Sarfaraz Khan: ಸರ್ಫರಾಜ್ ಖಾನ್ ಕನಸು ಕೊನೆಗೂ ಈಡೇರಿದ ಕ್ಷಣ; ಮಗನನ್ನು ತಬ್ಬಿ ಆನಂದಭಾಷ್ಪ ಸುರಿಸಿದ ತಂದೆ

ಸಂಕಷ್ಟದಲ್ಲಿ ಭರ್ಜರಿ ಹಿಟ್​ಮ್ಯಾನ್ ಶತಕ

ಮೂರನೇ ಪಂದ್ಯದ ಮೊದಲ ಇನ್ನಿಂಗ್ಸ್​ನಲ್ಲಿ ಭಾರತ 33ಕ್ಕೆ 3 ವಿಕೆಟ್ ಕಳೆದುಕೊಂಡು ಸಂಕಷ್ಟದಲ್ಲಿತ್ತು. ಈ ಹಂತದಲ್ಲಿ ಜವಾಬ್ದಾರಿಯುತ ಬ್ಯಾಟಿಂಗ್ ನಡೆಸಿದ ರೋಹಿತ್​, ರವೀಂದ್ರ ಜಡೇಜಾ ಜೊತೆಗೂಡಿ ಭರ್ಜರಿ ಜೊತೆಯಾಟವಾಡಿದರು. ಅಲ್ಲದೆ, 52.3ನೇ ಓವರ್​​ನಲ್ಲಿ 157 ಎಸೆತಗಳನ್ನು ಎದುರಿಸಿದ ಕ್ಯಾಪ್ಟನ್, ತಮ್ಮ ಶತಕವನ್ನು ಪೂರೈಸಿದರು. ಇದು ಅವರ 11ನೇ ಟೆಸ್ಟ್​ ಶತಕವಾಗಿದೆ.

11ನೇ ಟೆಸ್ಟ್ ಶತಕ, ಇಂಗ್ಲೆಂಡ್ ವಿರುದ್ಧವೇ ಮೂರು

57 ಪಂದ್ಯಗಳ 97 ಇನ್ನಿಂಗ್ಸ್​​ಗಳಲ್ಲಿ ಹಿಟ್​ಮ್ಯಾನ್ 11ನೇ ಬಾರಿಗೆ ನೂರರ ಗಡಿ ದಾಟಿದ್ದಾರೆ. ಅಲ್ಲದೆ, ಇಂಗ್ಲೆಂಡ್​ ವಿರುದ್ಧವೇ ಮೂರು ಸಲ ಮೂರಂಕಿ ( ಇಂದಿನ ಶತಕವೂ ಸೇರಿ) ಸಿಡಿಸಿರುವುದು ವಿಶೇಷ. 2021ರಲ್ಲಿ ಭಾರತದ ಪ್ರವಾಸದಲ್ಲೂ ಇಂಗ್ಲೆಂಡ್​ ವಿರುದ್ಧದ ಚೆನ್ನೈನಲ್ಲಿ 161 ರನ್ ಗಳಿಸಿದ್ದರು. ಅದೇ ವರ್ಷ ದಿ ಓವಲ್​​ ಮೈದಾನದಲ್ಲಿ ಆಂಗ್ಲರ ಎದುರು 127 ರನ್ ಬಾರಿಸಿದ್ದರು.

ಇದನ್ನೂ ಓದಿ: ಇಂಗ್ಲೆಂಡ್ ಅನ್ನು ಸೋಲಿಸುವುದು ದೊಡ್ಡ ವಿಷಯವೇ ಅಲ್ಲ: ರಾಜ್‌ಕೋಟ್ ಟೆಸ್ಟ್‌ಗೆ ಮುನ್ನ ರವೀಂದ್ರ ಜಡೇಜಾ ವಿಶ್ವಾಸ

ಅಂತಾರಾಷ್ಟ್ರೀಯ ಕ್ರಿಕೆಟ್​ನಲ್ಲಿ ಅತಿ ಹೆಚ್ಚು ಶತಕ

ಅಂತಾರಾಷ್ಟ್ರೀಯ ಕ್ರಿಕೆಟ್​ನ ಮೂರು ಫಾರ್ಮೆಟ್​​ನಲ್ಲೂ ರೋಹಿತ್​ ಒಟ್ಟಾರೆ 47ನೇ ಶತಕ ಸಿಡಿಸಿದ್ದಾರೆ. ಟೆಸ್ಟ್​ನಲ್ಲಿ 11, ಏಕದಿನದಲ್ಲಿ 31, ಟಿ20 ಕ್ರಿಕೆಟ್​ನಲ್ಲಿ 5 ಶತಕಗಳು ದಾಖಲಾಗಿವೆ. ಆ ಮೂಲಕ 47 ಶತಕ ಸಿಡಿಸಿದ ಎಬಿ ಡಿವಿಲಿಯರ್ಸ್ ದಾಖಲೆಯನ್ನು ಸರಿಗಟ್ಟಿದ್ದಾರೆ. ಸಕ್ರಿಯ ಆಟಗಾರರ ಪೈಕಿ ಅತ್ಯಧಿಕ ಅಂತಾರಾಷ್ಟ್ರೀಯ ಸೆಂಚುರಿ ಬಾರಿಸಿದವರಲ್ಲಿ ವಿರಾಟ್ ಕೊಹ್ಲಿ (80), ಡೇವಿಡ್ ವಾರ್ನರ್ (49) ನಂತರ ರೋಹಿತ್ ಸ್ಥಾನ ಪಡೆಯುವಲ್ಲಿ ಯಶಸ್ವಿಯಾಗಿದ್ದಾರೆ. ಜೋ ರೂಟ್​ 46 ಶತಕ ಸಿಡಿಸಿ ನಾಲ್ಕನೇ ಸ್ಥಾನದಲ್ಲಿದ್ದಾರೆ.

ಜಡೇಜಾ-ರೋಹಿತ್ ಜುಗಲ್ಬಂದಿ

ರಾಜ್​ಕೋಟ್​ನ ನಿರಂಜನ್ ಶಾ ಕ್ರಿಕೆಟ್ ಮೈದಾನದಲ್ಲಿ (ಮೊದಲು ಸೌರಾಷ್ಟ್ರ ಕ್ರಿಕೆಟ್ ಅಸೋಸಿಯೇಷನ್ ಎಂಬ ಹೆಸರಿತ್ತು) ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಭಾರತ 33 ರನ್​ಗಳಿಗೆ ಪ್ರಮುಖ 3 ವಿಕೆಟ್ ಕಳೆದುಕೊಂಡಿತ್ತು. ಯಶಸ್ವಿ ಜೈಸ್ವಾಲ್ 10, ಶುಭ್ಮನ್ ಗಿಲ್ 0, ರಜತ್ ಪಾಟೀದಾರ್ 5 ರನ್ ಗಳಿಸಿ ನಿರಾಸೆ ಮೂಡಿಸಿದರು. ಈ ವೇಳೆ ಜೊತೆಗೂಡಿದ ರೋಹಿತ್​ - ಜಡೇಜಾ ಭರ್ಜರಿ ಜೊತೆಯಾಟವಾಡಿದರು. (ಈ ವರದಿ ಪ್ರಕಟಿಸುವ ವೇಳೆ 200ಕ್ಕೂ ಅಧಿಕ ರನ್​ಗಳ ಜೊತೆಯಾಟವಾಡಿದ್ದರು)

ಇದನ್ನೂ ಓದಿ: ಸಲಾರ್ ಸಾಂಗ್​ನೊಂದಿಗೆ ಸ್ಮೃತಿ ಮಂಧಾನ ಸಖತ್ ಎಂಟ್ರಿ; ಆರ್​ಸಿಬಿಗೆ ಸಪೋರ್ಟ್ ಮಾಡಿ ಎಂದು ಕನ್ನಡದಲ್ಲೇ ಹೇಳಿದ ನಾಯಕಿ, VIDEO

ಭಾರತ ಆಡುವ 11ರ ಬಳಗ

ಯಶಸ್ವಿ ಜೈಸ್ವಾಲ್, ರೋಹಿತ್ ಶರ್ಮಾ (ನಾಯಕ), ಶುಭ್ಮನ್ ಗಿಲ್, ರಜತ್ ಪಾಟೀದಾರ್, ಸರ್ಫರಾಜ್ ಖಾನ್, ರವೀಂದ್ರ ಜಡೇಜಾ, ಧ್ರುವ್ ಜುರೆಲ್ (ವಿಕೆಟ್ ಕೀಪರ್), ರವಿಚಂದ್ರನ್ ಅಶ್ವಿನ್, ಕುಲ್ದೀಪ್ ಯಾದವ್, ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಸಿರಾಜ್.