ರೋಹಿತ್ ಕೊನೆಗೂ ಸೇಡು ತೀರಿಸಿಕೊಂಡು, ಪಾಕ್ ಬೌಲರ್​ಗಳ ಅಹಂ ಕುಗ್ಗಿಸಿದರು; ಹಿಟ್​ಮ್ಯಾನ್ ಆಟ ಕೊಂಡಾಡಿದ ಅಖ್ತರ್

ಭಾರತ-ಪಾಕಿಸ್ತಾನ (India vs Pakistan) ನಡುವಿನ ಹೈವೋಲ್ಟೇಜ್​ ಕದನದಲ್ಲಿ ರೋಹಿತ್​ ಶರ್ಮಾ (Rohit Sharma) ಅವರ ಮಾಸ್ಟರ್​ಕ್ಲಾಸ್​ ಇನ್ನಿಂಗ್ಸ್​ ಕಂಡು ಬೆರಗಾದ ಪಾಕ್ ತಂಡದ ಮಾಜಿ ಆಟಗಾರ ಶೋಯೆಬ್ ಅಖ್ತರ್ (Shoaib Akhtar), ಕೊಂಡಾಡಿದ್ದಾರೆ. ಅದರಲ್ಲೂ ಶಾಹೀನ್ ಶಾ ಅಫ್ರಿದಿ (Shaheen Afridi) ಬೌಲಿಂಗ್ ದಾಳಿಯಲ್ಲಿ ರನ್ ಮಳೆ ಹರಿಸಿದ ಹಿಟ್​ಮ್ಯಾನ್​ರನ್ನು ಶ್ಲಾಘಿಸಿದ ಅಖ್ತರ್​, ಸೇಡು ತೀರಿಸಿಕೊಂಡರು ಎಂದು ಹೇಳಿದ್ದಾರೆ.

ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯ 12ನೇ ಪಂದ್ಯದಲ್ಲಿ ಪಾಕಿಸ್ತಾನ ಮೊದಲು ಬ್ಯಾಟಿಂಗ್ ನಡೆಸಿತು. 42.5 ಓವರ್​​​ಗಳಲ್ಲಿ 191 ರನ್​​ಗಳಿಗೆ ಆಲೌಟ್​ ಆಯಿತು. ಈ ಗುರಿ ಬೆನ್ನಟ್ಟಿದ ಭಾರತ ಸ್ಫೋಟಕ ಆರಂಭ ಪಡೆಯಿತು. ರೋಹಿತ್​ ಶರ್ಮಾ ಬಿರುಸಿನ ಬ್ಯಾಟಿಂಗ್​ ನಡೆಸಿದರು. ಪಾಕ್ ಬೌಲರ್​ಗಳ ದಾಳಿಯನ್ನು ಹಿಮ್ಮೆಟ್ಟಿಸಿ ಬೌಂಡರಿ-ಸಿಕ್ಸರ್​​ಗಳ ಸುರಿಮಳೆಗೈದರು. 30.3 ಓವರ್​​ಗಳಲ್ಲಿ ಭಾರತ ಜಯಿಸಿತು.

ರೋಹಿತ್​ಗೆ ಕಾಡಿದ್ದ ಶಾಹೀನ್ ಅಫ್ರಿದಿ

ಅದರಲ್ಲೂ ಮಾರಕ ವೇಗಿ ಶಾಹೀನ್ ಶಾ ಅಫ್ರಿದಿ ಅವರ ಬೌಲಿಂಗ್​ನಲ್ಲಿ ರೋಹಿತ್​​, ಅಕ್ಷರಶಃ ರೌದ್ರಾವತಾರ ತೋರಿದರು. ಬೌಂಡರಿ-ಸಿಕ್ಸರ್​​ಗಳಿಂದಲೇ ಡೀಲ್ ಮಾಡುವ ಮೂಲಕ ಸೇಡು ತೀರಿಸಿಕೊಂಡರು. ಏಕೆಂದರೆ ಕಳೆದ ಎರಡು ವರ್ಷಗಳಿಂದ ರೋಹಿತ್​ರನ್ನು ಶಾಹೀನ್ ಅಫ್ರಿದಿ ಸಿಕ್ಕಾಪಟ್ಟೆ ಕಾಡಿದ್ದರು. 2021ರ ವಿಶ್ವಕಪ್, 2022ರ ಏಷ್ಯಾಕಪ್, 2022ರ ಟಿವಿಶ್ವಕಪ್, 2023ರ ಏಷ್ಯಾಕಪ್​ನಲ್ಲಿ ರೋಹಿತ್​ರನ್ನು ಸಿಂಗಲ್ ಡಿಜಿಟ್​ಗೆ ಶಾಹೀನ್ ಅಫ್ರಿದಿ ಔಟ್​ ಮಾಡಿದ್ದರು.

‘ಸೇಡು ತೀರಿಸಿಕೊಂಡರು’

ಈ ಹೈ-ಪ್ರೋಫೈಲ್ ಪಂದ್ಯದಲ್ಲಿ ರೋಹಿತ್​ ಘರ್ಜಿಸಿದ್ದರ ಕುರಿತು ಮಾತನಾಡಿದ ಶೋಯೆಬ್ ಅಖ್ತರ್, ರೋಹಿತ್​ರನ್ನು ಒನ್​​-ಮ್ಯಾನ್ ಆರ್ಮಿ ಎಂದು ಶ್ಲಾಘಿಸಿದ್ದಾರೆ. ಟೀಮ್ ಇಂಡಿಯಾ ನಾಯಕ ಆಡಿದ ರೀತಿಯ ಇನ್ನಿಂಗ್ಸ್, ಪಾಕಿಸ್ತಾನದ ಬೌಲಿಂಗ್ ದಾಳಿಗೆ ಅವಮಾನಿಸಿದರು. ಅಲ್ಲದೆ, ಕಳೆದ ಎರಡು ವರ್ಷಗಳಿಂದ ಆ ಬೌಲರ್​​ಗಳ ವಿರುದ್ಧ ರನ್ ಗಳಿಸದೇ ಇದ್ದಾಗ ಬೇಗನೇ ಔಟಾಗುತ್ತಿದ್ದ ರೋಹಿತ್​ ಕೊನೆಗೂ ಸೇಡು ತೀರಿಸಿಕೊಂಡರು. ಅವರು ಫಾರ್ಮ್​ಗೆ ಬಂದಿರುವುದು ಸಂತಸ ತಂದಿದೆ ಎಂದರು.

‘ಪಾಕ್ ಬೌಲರ್​​ ಅಹಂ ಕುಗ್ಗಿಸಿದರು’

ರೋಹಿತ್​ ಅವರು ಕೇವಲ ಸೇಡು ತೀರಿಸಿಕೊಂಡಿಲ್ಲ, ಬೌಲರ್​ಗಳ ಕಳಪೆ ಪ್ರದರ್ಶನ ಬಡಿದೆಬ್ಬಿಸಿದರು. ಅವರಲ್ಲಿದ್ದ ಅತಿಯಾದ ಆತ್ಮ ವಿಶ್ವಾಸವನ್ನು ಓಡಿಸಿದರು. ಈ ಹಿಂದೆ ನಾವು ರೋಹಿತ್​​ರನ್ನು ಬೇಗನೇ ಔಟ್ ಮಾಡಿದ್ದೆವು ಎಂಬ ಅಹಂ ಅನ್ನು ಕುಗ್ಗಿಸಿದರು. ಮುಂದಿನ ಪಂದ್ಯಗಳಲ್ಲಾದರೂ ಇದನ್ನು ತಗ್ಗಿಸಿಕೊಳ್ಳುವಂತೆ ರೋಹಿತ್​ ಮಾಡಿದ್ದಾರೆ. ಇದು ಖುಷಿಯ ವಿಚಾರ ಎಂದು ಶೋಯೆಬ್ ಅಖ್ತರ್​ ಹೇಳಿದ್ದಾರೆ. ರೋಹಿತ್​ ಶರ್ಮಾ ಈ ಪಂದ್ಯದಲ್ಲಿ 63 ಎಸೆತಗಳಲ್ಲಿ 6 ಬೌಂಡರಿ, 6 ಸಿಕ್ಸರ್ ಸಹಿತ 86 ರನ್ ಚಚ್ಚಿದರು.

ನಿರಾಶಾದಾಯಕ ಎಂದ ಅಖ್ತರ್​

ರೋಹಿತ್ ನಾಯಕತ್ವದಲ್ಲಿ ಭಾರತ ತಂಡವು 2023ರ ವಿಶ್ವಕಪ್‌ನಲ್ಲಿ ಪಾಕಿಸ್ತಾನಕ್ಕೆ ತನ್ನ ಮೊದಲ ಸೋಲನ್ನು ನೀಡಿತು. ಏಕದಿನ ವಿಶ್ವಕಪ್​ ಇತಿಹಾಸದಲ್ಲಿ ಪಾಕಿಸ್ತಾನ ಎದುರಿನ 8 ಪಂದ್ಯದಲ್ಲೂ ಭಾರತ ಜಯ ಸಾಧಿಸಿದೆ. ಆ ಮೂಲಕ 8-0ರಲ್ಲಿ ಅಜೇಯ ಓಟ ಮುಂದುವರೆಸಿದೆ. ಪಾಕ್ ಪ್ರದರ್ಶನದ ಕುರಿತು ಮಾತನಾಡಿದ ಅಖ್ತರ್, ನಿರಾಶಾದಾಯಕ ಪ್ರದರ್ಶನ. ಅತ್ಯಂತ ನಿರಾಶಾದಾಯಕ ಪ್ರದರ್ಶನ. ಒಂದೊಳ್ಳೆ ಅವಕಾಶವನ್ನು ಗೆಲ್ಲುವ ಅವಕಾಶವನ್ನು ಕಳೆದಕೊಂಡಿತು ಎಂದು ತಮ್ಮ ತಂಡವನ್ನು ಅಖ್ತರ್ ಟೀಕಿಸಿದರು.