Virat Kohli: ಕೊಹ್ಲಿ ಹಸಿರು ಅಖಾಡಕ್ಕೆ ಧುಮುಕಿ ಇಂದಿಗೆ 15 ವರ್ಷ; ಬ್ಯಾಟ್ ಝಳಪಿಸುತ್ತಾ ಏಟಿಗೆ ಎದಿರೇಟು ನೀಡುತ್ತಾ ರಾಜನಾದ ರೋಚಕ ಜರ್ನಿ ಇದು

ಟೀಮ್ ಇಂಡಿಯಾ ಮಾಜಿ ನಾಯಕ, ಸೂಪರ್​ ಸ್ಟಾರ್​ ಕ್ರಿಕೆಟಿಗ, ಕಿಂಗ್​ ಎಂದೇ ಖ್ಯಾತಿ ಪಡೆದಿರುವ ವಿರಾಟ್​​ ಕೊಹ್ಲಿಗೆ (Virat Kohli) ಇಂದು ಐತಿಹಾಸಿಕ ದಿನ. ಅವಿಸ್ಮರಣೀಯ ದಿನ. ಇಂದು ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದಿಸಿರುವ ಕೊಹ್ಲಿ, ಕ್ರಿಕೆಟ್​​ ಲೋಕದಲ್ಲಿ ದಾಖಲೆಗಳ ಸರದಾರನಾಗಿ ಹೊರ ಹೊಮ್ಮಲು ಕಾರಣವಾದ ದಿನ. ಹೌದು, ಅವತ್ತಿನ ಇದೇ ದಿನ ಅಂದರೆ ಆಗಸ್ಟ್​​ 18, 2008ರಂದು ಅಂತಾರಾಷ್ಟ್ರೀಯ ಕ್ರಿಕೆಟ್​​​ಗೆ ಪದಾರ್ಪಣೆ ದಿನ. ಕೊಹ್ಲಿ ಕ್ರಿಕೆಟ್​​ ಜಗತ್ತಿಗೆ ಕಾಲಿಟ್ಟು ಇಂದಿಗೆ 15 ವರ್ಷ ಪೂರ್ಣಗೊಂಡಿದೆ.

ಕೊಹ್ಲಿಯ ಈ ದಿನವನ್ನು ಅಭಿಮಾನಿಗಳು ಒಂದು ಹಬ್ಬವೆಂಬಂತೆ ಆಚರಿಸುತ್ತಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ವಿರಾಟ್​​​ರ ಫೇವರಿಟ್​ ಇನ್ನಿಂಗ್ಸ್​​ಗಳನ್ನು, ಫೋಟೋಗಳನ್ನು, ಹಾಗೆಯೇ ಬಗೆಬಗೆಯ ಪೋಸ್ಟ್​​ಗಳ ಮೂಲಕ ಶುಭ ಕೋರುತ್ತಿದ್ದಾರೆ. ಮತ್ತೊಂದೆಡೆ ಮಾಜಿ-ಹಾಲಿ ಕ್ರಿಕೆಟರ್​​ಗಳಿಂದಲೂ ಕೊಹ್ಲಿಯ ನೂತನ ಮೈಲಿಗಲ್ಲಿಗೆ ಶುಭಾಶಯಗಳ ಹೂಮಳೆ ಹರಿದುಬರುತ್ತಿದೆ. ಆಟಗಾರನಾಗಿ, ಉಪನಾಯಕನಾಗಿ, ನಾಯಕನಾಗಿ ತಂಡಕ್ಕೆ ಅಮೋಘ ಕೊಡುಗೆ ನೀಡಿರುವ ಕೀರ್ತಿಗೆ ಕೊಹ್ಲಿಗೆ ಸಲ್ಲುತ್ತದೆ.

ಅಂದು ಸಾಮಾನ್ಯ ಹುಡುಗನಾಗಿ ಹಸಿರು ಅಖಾಡಕ್ಕೆ ಕಾಲಿಟ್ಟ ಕೊಹ್ಲಿ, ಇಂದು ಹೆಮ್ಮರವಾಗಿ ಬೆಳೆದುನಿಂತಿದ್ದಾರೆ. ರನ್​​ ಶಿಖರ ನಿರ್ಮಿಸಿದ್ದಾರೆ. ದಾಖಲೆಗಳ ಸರದಾರನಾಗಿ ಮೆರದಾಡುತ್ತಿದ್ದಾರೆ. ಅಸಾಧ್ಯ ಎನ್ನುವ ದಾಖಲೆಗಳನ್ನೂ ಬ್ರೇಕ್​ ಮಾಡುತ್ತಾ ಸಾಗುತ್ತಿದ್ದಾರೆ. ಅವರ ಕರಿಯರ್​​ನಲ್ಲಿ ಅಸಾಧಾರಣ ಇನ್ನಿಂಗ್ಸ್​​ಗಳನ್ನು ಕಟ್ಟಿದ್ದೆಷ್ಟೋ, ಸೋಲುತ್ತೇವೆ ಎನ್ನುವ ಲೆಕ್ಕಾಚಾರಗಳನ್ನೇ ತಲೆಕೆಳಗಾಗುವಂತೆ ಮಾಡಿದ ಇನ್ನಿಂಗ್ಸ್​​ಗಳೆಷ್ಟೋ.. ಹೀಗೆ ಹೇಳಿದಷ್ಟೂ ಇದೆ ಕೊಹ್ಲಿ ಬಗ್ಗೆ.

ಶ್ರೀಲಂಕಾ ವಿರುದ್ಧ ಪದಾರ್ಪಣೆ ಮಾಡಿದ ಕೊಹ್ಲಿ

2008ರ ಆಗಸ್ಟ್ 18ರಂದು ಇದೇ ದಿನ ಅಂತಾರಾಷ್ಟ್ರೀಯ ಕ್ರಿಕೆಟ್​​​ಗೆ ಕೊಹ್ಲಿ ಕಾಲಿಟ್ಟಿದ್ದರು. ಡಂಬುಲ್ಲಾ ಮೈದಾನದಲ್ಲಿ ನಡೆದ ಏಕದಿನ ಪಂದ್ಯದಲ್ಲಿ ಪದಾರ್ಪಣೆ ಮಾಡಿದ ಕೊಹ್ಲಿ, ಇಂದು ಕ್ರಿಕೆಟ್​​​​ ಲೋಕವನ್ನೇ ಆಳ್ವಿಕೆ ಮಾಡುತ್ತಾರೆಂದು ಯಾರೂ ಊಹಿಸಿರಲಿಲ್ಲ. ಮೊದಲ ಪಂದ್ಯದಲ್ಲಿ ಗೌತಮ್ ಗಂಭೀರ್​ ಅವರೊಂದಿಗೆ ಇನ್ನಿಂಗ್ಸ್​ ಆರಂಭಿಸಿದ್ದ ಕೊಹ್ಲಿ, ಕೇವಲ 12 ರನ್ ಗಳಿಸಿ ನಿರಾಸೆ ಮೂಡಿಸಿದ್ದರು. ಈ ಪಂದ್ಯದಲ್ಲಿ ಭಾರತ 8 ವಿಕೆಟ್​ಗಳ ಸೋಲು ಕಂಡಿತ್ತು. ಅಂದು 12 ರನ್​ಗಳಿಂದ ಆರಂಭವಾದ ಇಂದು 25 ಸಾವಿರಕ್ಕೂ ಹೆಚ್ಚು ರನ್ ಕಲೆ ಹಾಕುವಷ್ಟರ ಮಟ್ಟಿಗೆ ಬೆಳೆದು ನಿಂತಿದೆ.

76 ಶತಕ ದಾಟಿದ ಕೊಹ್ಲಿ

ಅಂತಾರಾಷ್ಟ್ರೀಯ ಕ್ರಿಕೆಟ್​​​ನಲ್ಲಿ ಅತಿ ಹೆಚ್ಚು ಶತಕಗಳ ಸಾಧನೆ ಮಾಡಿದವರ ಪಟ್ಟಿಯಲ್ಲಿ ಸಚಿನ್ ತೆಂಡೂಲ್ಕರ್​ ಮುಂದಿದ್ದಾರೆ. ಆದರೆ ಅವರನ್ನು ಹಿಂದಿಕ್ಕುವ ಸಾಮರ್ಥ್ಯ ಕೊಹ್ಲಿಗಿದೆ ಎಂಬುದು ತಜ್ಞರ ಅಭಿಪ್ರಾಯ. ಏಕೆಂದರೆ ಕೊಹ್ಲಿ 24 ಶತಕ ಸಿಡಿಸಿದರೆ ಸಾಕು ಸಚಿನ್​ರ ಸಾಧನೆ ಸರಿಗಟ್ಟಲಿದ್ದಾರೆ. ಈಗಾಗಲೇ 76 ಅಂತಾರಾಷ್ಟ್ರೀಯ ಶತಕ ಸಿಡಿಸಿದ ದಾಖಲೆ ಬರೆದಿರುವ ಕೊಹ್ಲಿ, ಮುಂದಿನ ಪಂದ್ಯಗಳಲ್ಲಿ ಇನ್ನಷ್ಟು ಶತಕಗಳನ್ನು ದಾಖಲಿಸಲಿದ್ದಾರೆ ಎಂಬ ನಿರೀಕ್ಷೆ ಇದೆ. ಏಕದಿನದಲ್ಲಿ 46 ಶತಕ, ಟೆಸ್ಟ್​​​ನಲ್ಲಿ 29 ಶತಕ, ಟಿ20ಯಲ್ಲಿ 1 ಶತಕ ಸಿಡಿಸಿದ್ದಾರೆ.

ನಾಯಕನಾಗಿ ಕೊಹ್ಲಿ ಸಾಧನೆ

ಬ್ಯಾಟ್ಸ್​​​ಮನ್​ ಆಗಿ ಅಲ್ಲ, ನಾಯಕನಾಗಿಯೂ ಅಮೋಘ ಸಾಧನೆ ಮಾಡಿದ್ದಾರೆ. ಟೆಸ್ಟ್​​ ಕ್ರಿಕೆಟ್​​ನಲ್ಲಿ ಅತ್ಯಂತ ಯಶಸ್ವಿ ನಾಯಕರಲ್ಲಿ ಒಬ್ಬರು ಎನಿಸಿದ್ದಾರೆ. ಇದನ್ನು ನಾವು ಹೇಳುತ್ತಿಲ್ಲ. ಅವರ ಅಂಕಿ-ಅಂಶಗಳೇ ಸಾಕ್ಷಿ. ಭಾರತ ತಂಡ ಕಂಡ ಅತ್ಯಂತ ಯಶಸ್ವಿ ನಾಯಕರಲ್ಲಿ ಕೊಹ್ಲಿ ಒಬ್ಬರು. ವಿದೇಶಿ ನೆಲದಲ್ಲಿ ಟೆಸ್ಟ್​ ಗೆಲ್ಲುತ್ತಿದ್ದದ್ದೇ ಕಷ್ಟ. ಅಂತಹದರಲ್ಲಿ ಇಂಗ್ಲೆಂಡ್, ದಕ್ಷಿಣ ಆಫ್ರಿಕಾ, ಆಸ್ಟ್ರೇಲಿಯಾ, ವೆಸ್ಟ್ ಇಂಡೀಸ್‌ ನೆಲದಲ್ಲಿ ಅವಿಸ್ಮರಣೀಯ ಟೆಸ್ಟ್​ ಗೆದ್ದುಕೊಂಡಿದ್ದಾರೆ.

• 68 ಟೆಸ್ಟ್​ ಪಂದ್ಯಗಳನ್ನು ಮುನ್ನಡೆಸಿರುವ ಕೊಹ್ಲಿ, ಬರೋಬ್ಬರಿ 40 ಗೆಲುವು ದಾಖಲಿಸಿದ್ದಾರೆ. ಕೇವಲ 17 ಪಂದ್ಯಗಳಲ್ಲಿ ಸೋತಿದ್ದಾರೆ. ಅವರ ನಾಯಕತ್ವದಲ್ಲಿ ಭಾರತ 11 ಪಂದ್ಯಗಳಲ್ಲಿ ಡ್ರಾ ಸಾಧಿಸಿದೆ. ಗೆಲುವಿನ ಪ್ರಮಾಣ ಶೇಕಡಾ 58.82 ರಷ್ಟಿದೆ.
• ಏಕದಿನ ಕ್ರಿಕೆಟ್​​ನಲ್ಲೂ 95 ಪಂದ್ಯಗಳಿಗೆ ನಾಯಕತ್ವ ವಹಿಸಿದ್ದಾರೆ. 65 ಪಂದ್ಯಗಳಲ್ಲಿ ಗೆಲುವು, ಕೇವಲ 27 ಸೋಲು ಕಂಡಿದ್ದಾರೆ. ಗೆಲುವಿನ ಪ್ರಮಾಣ 68.42ರಷ್ಟಿದೆ.
• ಇನ್ನು 50 ಟಿ20 ಪಂದ್ಯಗಳಿಗೆ ನಾಯಕತ್ವ ವಹಿಸಿದ ಕೊಹ್ಲಿ, 30 ಪಂದ್ಯ ಗೆಲ್ಲಿಸಿಕೊಟ್ಟಿದ್ದಾರೆ. 16 ಪಂದ್ಯಗಳಲ್ಲಿ ಸೋಲು ಕಂಡಿದ್ದು, 60ರಷ್ಟು ಗೆಲುವಿನ ಪ್ರಮಾಣ ಹೊಂದಿದ್ದಾರೆ.

ಕೊಹ್ಲಿಗೆ ಅಭಿಮಾನಿಯಾಗಲು ಕಾರಣ?

ಭಾರತೀಯ ಕ್ರಿಕೆಟ್​​ನಲ್ಲಿರುವ ಆಟಗಾರರ ಪೈಕಿ ಅತಿಹೆಚ್ಚು ಅಭಿಮಾನಿ ಬಳಗ ಹೊಂದಿರುವ ಆಟಗಾರ ಎಂದರೆ ಅದು ವಿರಾಟ್ ಕೊಹ್ಲಿ ಮಾತ್ರ. ಯಾಕೆಂದರೆ, ಮೈದಾನದಲ್ಲಿ ಅವರ ಆಕ್ರಮಣಕಾರಿ ವರ್ತನೆ, ಏಟಿಗೆ ಎದಿರೇಟು ಸ್ವಭಾವ, ಆಟಗಾರರಿಗೆ ಪ್ರೋತ್ಸಾಹ, ವಿಭಿನ್ನ ಆ್ಯಟಿಟ್ಯೂಡ್, ಮೈದಾನದ ಹೊರತಾಗಿ ಅವರ ನೆರವಿನ ಕಾರ್ಯ.. ಹೀಗೆ ಎಲ್ಲಾ ಅಂಶಗಳಿಂದ ಕೊಹ್ಲಿ ನೆಚ್ಚಿನ ಆಟಗಾರನಾಗಿ ಹೊರಹೊಮ್ಮಿದ್ದಾರೆ.

ಕೊಹ್ಲಿ ವೃತ್ತಿಜೀವನ

• 2008 ರಿಂದ ಒಟ್ಟು ಈವರೆಗೂ 275 ಏಕದಿನ ಪಂದ್ಯಗಳನ್ನು ಆಡಿರುವ ಕೊಹ್ಲಿ, 57.32ರ ಸರಾಸರಿಯಲ್ಲಿ, 46 ಶತಕಗಳ ಸಹಾಯದಿಂದ 12,898 ರನ್ ಗಳಿಸಿದ್ದಾರೆ. 65 ಅರ್ಧಶತಕಗಳೂ ಸೇರಿವೆ.
• ಟೆಸ್ಟ್​ ಕ್ರಿಕೆಟ್​​ನಲ್ಲಿ 111 ಪಂದ್ಯಗಳಲ್ಲಿ 29 ಶತಕ, 7 ದ್ವಿಶತಕ, 29 ಅರ್ಧಶತಕಗಳ ನೆರವಿನಿಂದ 8676 ರನ್ ಗಳಿಸಿದ್ದಾರೆ. ಅವರ ಗರಿಷ್ಠ ಸ್ಕೋರ್​ 254 ರನ್.
• 115 ಅಂತಾರಾಷ್ಟ್ರೀಯ ಟಿ20 ಪಂದ್ಯವನ್ನು ಆಡಿರುವ ಕಿಂಗ್, 4008 ರನ್ ಬಾರಿಸಿದ್ದಾರೆ. ಇದರಲ್ಲಿ 37 ಅರ್ಧಶತಕ, 1 ಶತಕ ಸೇರಿದೆ.

ವಿಶ್ವಕಪ್​ನಲ್ಲಿ ಕೊಹ್ಲಿ ಮೇಲೆ ನಿರೀಕ್ಷೆ

ಐಸಿಸಿ ಟೂರ್ನಮೆಂಟ್​​​ನಲ್ಲಿ ಕೊಹ್ಲಿ ಅದ್ಭುತ ಟ್ರ್ಯಾಕ್​ ರೆಕಾರ್ಡ್​ ಹೊಂದಿದ್ದಾರೆ. ಅಕ್ಟೋಬರ್ 5ರಿಂದ ಭಾರತದಲ್ಲಿ ಶುರುವಾಗುವ ಏಕದಿನ ವಿಶ್ವಕಪ್ ಟೂರ್ನಿಗೆ ಭಾರಿ ಸಿದ್ಧತೆ ನಡೆಸುತ್ತಿದ್ದಾರೆ. ಐಸಿಸಿ ಈವೆಂಟ್​​​ಗಳಲ್ಲಿ ಆರ್ಭಟಿಸುವ ಕೊಹ್ಲಿ ಮೇಲೆ ಬೆಟ್ಟದಷ್ಟು ನಿರೀಕ್ಷೆ ಇದೆ. ಕಳೆದ ಟಿ20 ವಿಶ್ವಕಪ್ ಟೂರ್ನಿಯಲ್ಲಿ ಅವರೇ ಟಾಪ್​ ಸ್ಕೋರರ್​ ಆಗಿದ್ದರು. ಈಗಲೂ ಅದನ್ನೇ ಅಭಿಮಾನಿಗಳು ನಿರೀಕ್ಷಿಸುತ್ತಿದ್ದಾರೆ.

ನಾಯಕನಾಗಿ ಐಸಿಸಿ ಟ್ರೋಫಿ ಗೆದ್ದಿಲ್ಲ ಎಂಬ ಕೊರಗು

ನಾಯಕನಾಗಿ ಅದ್ಭುತ ದಾಖಲೆಗಳನ್ನು ಹೊಂದಿದ್ದಾರೆ. ಆದರೆ ತನ್ನ ನಾಯಕತ್ವದಲ್ಲಿ ಒಂದೇ ಒಂದು ಐಸಿಸಿ ಟ್ರೋಫಿ ಗೆದ್ದಿಲ್ಲ ಎಂಬ ಕೊರಗು ಕಾಡುತ್ತಿದೆ. ದೇಶ-ವಿದೇಶಗಳಲ್ಲಿ ದ್ವಿಪಕ್ಷೀಯ ಸರಣಿಗಳಲ್ಲಿ ಧೂಳೆಬ್ಬಿಸಿದ ಕಿಂಗ್​ ಕೊಹ್ಲಿ, ಎರಡು ಬಾರಿ ಭಾರತ ತಂಡವನ್ನು ಐಸಿಸಿ ಫೈನಲ್​ಗೇರಿಸಿದ್ದರು. 2017ರ ಚಾಂಪಿಯನ್ಸ್ ಟ್ರೋಫಿ ಮತ್ತು 2021ರ ಐಸಿಸಿ ಟೆಸ್ಟ್​ ಚಾಂಪಿಯನ್​ಶಿಪ್​ ಫೈನಲ್​​​ನಲ್ಲಿ ಭಾರತ ಮುಗ್ಗರಿಸಿತ್ತು. ಇನ್ನುಳಿದಂತೆ ಸೆಮಿಫೈನಲ್​​​ನಲ್ಲಿ ಹೆಚ್ಚಾಗಿ ಐಸಿಸಿ ಟೂರ್ನಿಗಳಲ್ಲಿ ಸೋಲು ಕಂಡಿದೆ. 2013ರ ಬಳಿಕ ಭಾರತ ಐಸಿಸಿ ಟ್ರೋಫಿ ಗೆದ್ದಿಲ್ಲ. ಇದೀಗ ಕೊಹ್ಲಿಯಿಂದಾದರೂ ಐಸಿಸಿ ಟ್ರೋಫಿ ಗೆಲ್ಲಲಿ ಎನ್ನುವುದೇ ನಮ್ಮೆಲ್ಲರ ಆಶಯ.