ಸೂಪರ್​ ಓವರ್​​ನಲ್ಲಿ 'ಸೂಪರ್' ಗೆಲುವು ಸಾಧಿಸಿದ ಯುಎಸ್​ಎ; ಪಾಕಿಸ್ತಾನ ಸೋಲಿಸಿ ಇತಿಹಾಸ ಸೃಷ್ಟಿಸಿದ ಅಮೆರಿಕ

ಐಸಿಸಿ ಟಿ20 ವಿಶ್ವಕಪ್ 2024 ಟೂರ್ನಿಯಲ್ಲಿ 11ನೇ ಲೀಗ್ ಪಂದ್ಯದಲ್ಲಿ ಬಲಿಷ್ಠ ಪಾಕಿಸ್ತಾನ ತಂಡದ ಎದುರು ಪ್ರಬಲ ಪೈಪೋಟಿ ನೀಡಿದ ಯುನೈಟೆಡ್ ಸ್ಟೇಟ್ಸ್ ತಂಡವು​ ಸೂಪರ್​ ಓವರ್​​ನಲ್ಲಿ ರೋಚಕ ಗೆಲುವು ಸಾಧಿಸಿ ಇತಿಹಾಸ ಸೃಷ್ಟಿಸಿದೆ. ವಿಶ್ವಕ್ರಿಕೆಟ್​ನಲ್ಲಿ ಇದೇ ಮೊದಲ ಬಾರಿಗೆ ಅಮೆರಿಕ, ಪಾಕಿಸ್ತಾನ ತಂಡವನ್ನು ಮಣಿಸಿದೆ. ಬಾಂಗ್ಲಾದೇಶ ಸೋಲಿಸಿದ ನಂತರ ಟೆಸ್ಟ್ ಆಡುವ ಎರಡನೇ ತಂಡವನ್ನು ಮಣಿಸಿದ ಹೆಗ್ಗಳಿಕೆಗೆ ಯುಎಸ್​ಎ ಪಾತ್ರವಾಗಿದೆ. ಘಟಾನುಘಟಿ ಆಟಗಾರರನ್ನೇ ಹೊಂದಿರುವ ಬಾಬರ್​ ಪಡೆ, ಸೂಪರ್​ ಓವರ್​​ನಲ್ಲಿ 5 ರನ್​ಗಳ ಹೀನಾಯ ಸೋಲಿನೊಂದಿಗೆ ವಿಶ್ವಮಟ್ಟದಲ್ಲಿ ತೀವ್ರ ಮುಖಭಂಗಕ್ಕೆ ಒಳಗಾಯಿತು. ಅಲ್ಲದೆ, ಸೋಲಿನೊಂದಿಗೆ ವಿಶ್ವಕಪ್ ಅಭಿಯಾನ ಆರಂಭಿಸಿತು. ಮತ್ತೊಂದೆಡೆ ಯುಎಸ್​​ಎ ಸತತ ಎರಡನೇ ಗೆಲುವು ದಾಖಲಿಸಿ ಸೂಪರ್​​-8 ಕನಸಿಗೆ ಹತ್ತಿರವಾಗಿದೆ.

ಡಲ್ಲಾಸ್​ನ ಗ್ರ್ಯಾಂಡ್ ಫ್ರೈರಿ ಸ್ಟೇಡಿಯಂನಲ್ಲಿ ನಡೆದ ವಿಶ್ವಕಪ್​ನ ಎ ಗುಂಪಿನ ಪಂದ್ಯದಲ್ಲಿ ಟಾಸ್ ಸೋತು ಪಾಕ್ ಮೊದಲು ಬ್ಯಾಟಿಂಗ್ ಮಾಡಿತು. ಅಮೆರಿಕ ಬೌಲರ್​ಗಳ ದಾಳಿಗೆ ಬೆದರಿದ ಬಾಬರ್ ಪಡೆ 20 ಓವರ್​​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 159 ರನ್​ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು. ಈ ಗುರಿ ಹಿಂಬಾಲಿಸಿದ ಯುಎಸ್​ಎ, ಮಾರಕ ಬೌಲಿಂಗ್ ಪಡೆಯನ್ನು ಹೊಂದಿದ್ದ ಪಾಕಿಸ್ತಾನವನ್ನು ದಿಟ್ಟವಾಗಿ ಎದುರಿಸಿತು. ಅಂತಿಮವಾಗಿ 20 ಓವರ್​​ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ ಅಷ್ಟೇ ರನ್ ಗಳಿಸಿತು. ಪಂದ್ಯ ಆದ ಕಾರಣ ಸೂಪರ್ ಓವರ್ ನಡೆಸಲಾಯಿತು. ಈ ವೇಳೆ ಮೊದಲು ಬ್ಯಾಟಿಂಗ್ ಮಾಡಿದ ಅಮೆರಿಕ 19 ರನ್​​ಗಳ ಗುರಿ ನೀಡಿತು. ಆದರೆ ಪಾಕಿಸ್ತಾನ 13 ರನ್ ಗಳಿಸಲಷ್ಟೇ ಶಕ್ತವಾಯಿತು.

ಅತ್ಯುತ್ತಮ ಪ್ರದರ್ಶನ ನೀಡಿದ ಅಮೆರಿಕ

ಈ ಗುರಿ ಬೆನ್ನಟ್ಟಿದ ಅಮೆರಿಕ ಉತ್ತಮ ಆರಂಭ ಪಡೆದುಕೊಂಡಿತು. ಪಾಕ್ ಬೌಲರ್​​ಗಳ ಎದುರು ದಿಟ್ಟ ಹೋರಾಟ ನಡೆಸಿತು. ತಂಡದ ಮೊತ್ತ 35 ರನ್ ಆಗಿದ್ದಾಗ 12 ರನ್ ಗಳಿಸಿದ್ದ ಸ್ಟೀವನ್ ಟೇಲರ್, ನಸೀಮ್ ಶಾ ಬೌಲಿಂಗ್​​ನಲ್ಲಿ ಹೊರಬಿದ್ದರು. ಆ ಬಳಿಕ ಜೊತೆಯಾದ ಮೋನಾಂಕ್ ಪಟೇಲ್-ಆಂಡ್ರೀಸ್ ಗೌಸ್, ಬೌಲರ್ಸ್​ಗೆ ಬೆಂಡೆತ್ತಿದರು. ನಿಧಾನಗತಿಯ ಪಿಚ್​​​ನಲ್ಲಿ ಚಾಣಾಕ್ಷತೆ ಮತ್ತು ನಿರ್ಭಿತವಾಗಿ ರನ್ ಗಳಿಸಿ ಗಮನ ಸೆಳೆದರು. 10 ಓವರ್​​ಗಳಲ್ಲಿ 76 ರನ್ ಕಲೆಹಾಕಿದರು.

ಉಳಿದ 10 ಓವರ್​​ಗಳಲ್ಲಿ ಅಮೆರಿಕ ಗೆಲುವಿಗೆ 84 ಬೇಕಿತ್ತು. ಅವರ ಕೈಯಲ್ಲಿ 9 ವಿಕೆಟ್​ಗಳಿದ್ದವು. ಯಾವುದೇ ಹಂತದಲ್ಲೂ ಆತಂಕಕ್ಕೆ ಒಳಗಾಗದೆ ಪಾಕಿಸ್ತಾನ ಬೌಲರ್​​ಗಳಿಗೆ ಪ್ರತಿರೋಧ ತೋರಿದರು. ಎಚ್ಚರಿಕೆಯ ಆಟವಾಡಿದ ಈ ಜೋಡಿ 2ನೇ ವಿಕೆಟ್​ಗೆ 68 ರನ್​ಗಳ ಪಾಲುದಾರಿಕೆ ಒದಗಿಸಿತು. ಮೋನಾಂಕ್ ಭರ್ಜರಿ ಅರ್ಧಶತಕ (50) ಸಿಡಿಸಿ ಪಾಕ್​ಗೆ ಸೋಲಿನ ಭೀತಿ ಹೆಚ್ಚಿಸಿದರು. ಇದರ ಬೆನ್ನಲ್ಲೇ ಗೌಸ್ (35), ಮೋನಾಂಕ್ ಔಟಾದರು. ಈ ವೇಳೆ ಯುಎಸ್​​ಗೆ 35 ಎಸೆತಗಳಲ್ಲಿ 48 ರನ್ ಬೇಕಿತ್ತು.

ಇದನ್ನೂ ಓದಿ: ಪಾಕಿಸ್ತಾನ​ ವಿರುದ್ಧದ ಪಂದ್ಯಕ್ಕೆ ಭಾರತ ಪ್ಲೇಯಿಂಗ್​-XI ರೆಡಿ; ಕ್ಯಾಪ್ಟನ್-ಕೋಚ್​ರಿಂದ ಬಲಿಷ್ಠ ತಂಡ ಆಯ್ಕೆ

ಸತತ ವಿಕೆಟ್ ಕಳೆದುಕೊಂಡ ನಂತರ ಕೊಂಚ ಎದೆಗುಂದಿದ ಅಮೆರಿಕ, ನಿಧಾನಗತಿಯ ಆಟಕ್ಕೆ ಒತ್ತು ಕೊಟ್ಟಿತು. ಅಂತಿಮ ಹಂತದಲ್ಲಿ ಸೂಪರ್ ಕಂಬ್ಯಾಕ್ ಮಾಡಿದ ಪಾಕ್​ ಬೌಲರ್​​ಗಳಿಗೆ ಎದುರು ಕಳೆದ ಪಂದ್ಯದಲ್ಲಿ 10 ಸಿಕ್ಸರ್ ಚಚ್ಚಿದ್ದ ಆರೋನ್ ಜೊನ್ಸ್ ಮತ್ತು ನಿತೀಶ್ ಕುಮಾರ್ ಪ್ರತಿರೋಧ ತೋರಿದರು. ಕೊನೆಯ ಓವರ್​​ನಲ್ಲಿ 15 ರನ್ ಬೇಕಿತ್ತು. ಆದರೆ, ಈ ಓವರ್​ ಎಸೆದ ಹ್ಯಾರಿಸ್ ರೌಫ್ ಬೌಲಿಂಗ್​ ಅಮೆರಿಕ 14 ರನ್ ಗಳಿಸಿ ಸೂಪರ್​ ಓವರ್​​ಗೆ ತಂದು ನಿಲ್ಲಿಸಿತು. ಕೊನೆಯ ಬಾಲ್​ಗೆ 5 ರನ್ ಬೇಕಿದ್ದಾಗ ನಿತೀಶ್ ಕುಮಾರ್​ ಬೌಂಡರಿ ಸಿಡಿಸಿದರು.

ಅಮೆರಿಕ ಬೌಲಿಂಗ್​ಗೆ ತತ್ತರಿಸಿದ ಪಾಕಿಸ್ತಾನ

ಮೊದಲು ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನ ತಂಡವು ಪವರ್​ಪ್ಲೇ ಮುಗಿಯುವುದರೊಳಗೆ ಮೂರು ವಿಕೆಟ್ ಕಳೆದುಕೊಂಡಿತು. ಯುಎಸ್​ಎ ಬೌಲರ್​​ಗಳ ದಾಳಿಗೆ ಆಘಾತಕಾರಿ ಕುಸಿತ ಕಂಡಿತು. ಮೊಹಮ್ಮದ್ ರಿಜ್ವಾನ್ (9), ಉಸ್ಮಾನ್ ಖಾನ್ (3), ಫಕಾರ್ ಜಮಾನ್ (11) ಬೇಗನೇ ಔಟಾದರು. ಆಗ ತಂಡದ ಮೊತ್ತ 26/3. ತದನಂತರ ಒಂದಾದ ನಾಯಕ ಬಾಬರ್ ಅಜಮ್ ಮತ್ತು ಶಾದಾಬ್ ಖಾನ್ ತಂಡಕ್ಕೆ ಆಸರೆಯಾದರು. 4ನೇ ವಿಕೆಟ್​ಗೆ 48 ಎಸೆತಗಳಲ್ಲಿ 72 ರನ್​ಗಳ ಜೊತೆವಾಟವಾಡಿದರು.

ಇಬ್ಬರ ಸೊಗಸಾಟದ ನೆರವಿನಿಂದ ಪಾಕ್, ಅಲ್ಪಮೊತ್ತಕ್ಕೆ ಕುಸಿಯುವ ಭೀತಿಯಿಂದ ಹೊರಬಂತು. ಅದರಲ್ಲೂ ಶಾದಾಬ್ ಖಾನ್ ಬಿರುಸಿನ ಬ್ಯಾಟಿಂಗ್ ನಡೆಸಿ ಗಮನ ಸೆಳೆದರು. ಉತ್ತಮವಾಗಿ ಸಾಗುತ್ತಿದ್ದ ವೇಳೆ ಮತ್ತೊಮ್ಮೆ ದಾಳಿಗಿಳಿದ ನೋಸ್ತುಶ್ ಕೆಂಜಿಗೆ, 25 ಎಸೆತಗಳಲ್ಲಿ 40 ರನ್ ಸಿಡಿಸಿದ್ದ ಶಾದಾಬ್​ಗೆ ಡಗೌಟ್ ದಾರಿ ತೋರಿಸಿದರು. ಇವರ ಬೆನ್ನಲ್ಲೇ ಅಜಮ್ ಖಾನ್ ಡಕೌಟ್​ಗೆ ಬಲಿಯಾದರೆ, ಜವಾಬ್ದಾರಿಯುತವಾಗಿ ಬ್ಯಾಟ್ ಬೀಸುತ್ತಿದ್ದ ಬಾಬರ್ ಅರ್ಧಶತಕದಂಚಿನಲ್ಲಿ ಔಟಾದರು.

ಬಾಬರ್ 43 ಎಸೆತಗಳಲ್ಲಿ 44 ರನ್ ಗಳಿಸಿದರೆ, ಕೊನೆಯಲ್ಲಿ ಇಫ್ತಿಕಾರ್ ಅಹ್ಮದ್ 18, ಶಾಹೀನ್ ಶಾ ಅಫ್ರಿದಿ 23 ರನ್​ಗಳ ಕಾಣಿಕೆ ನೀಡಿದರು. ಹ್ಯಾರಿಸ್ ರೌಫ್ 3 ರನ್ ಸಿಡಿಸಿದರು. ಅಮೆರಿಕ ಪರ ನೋಸ್ತುಶ್ ಕೆಂಜಿಗೆ 3 ವಿಕೆಟ್ ಕಿತ್ತು ಮಿಂಚಿದರೆ, ನೇತ್ರಾವಲ್ಕರ್ 2 ವಿಕೆಟ್ ಉರುಳಿಸಿದರು. ಅಲಿ ಖಾನ್ ಮತ್ತು ಜಸ್ದೀಪ್ ಸಿಂಗ್ ತಲಾ ಒಬ್ಬರನ್ನು ಔಟ್ ಮಾಡಿದರು. ಅಂತಿಮವಾಗಿ ಪಾಕಿಸ್ತಾನ 20 ಓವರ್​​ಗಳಲ್ಲಿ 7 ವಿಕೆಟ್ ನಷ್ಟಕ್ಕೆ 159 ರನ್ ಕಲೆ ಹಾಕಿತು.

ಇದನ್ನೂ ಓದಿ: ವಾಟರ್​ಬಾಯ್ ಆದ ಎರಡು ಐಸಿಸಿ ಟ್ರೋಫಿ ಗೆದ್ದ ಪ್ಯಾಟ್ ಕಮಿನ್ಸ್; ಕೊಹ್ಲಿ, ಸಚಿನ್ ಸೇರಿ ದಿಗ್ಗಜರೇ ಮಾಡಿದ್ರು ಈ ಸೇವೆ!

ಇನ್ನಷ್ಟು ಟಿ20 ವಿಶ್ವಕಪ್​ 2024 ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ