ಬಾಬರ್​ಗೆ ಸಹಿ ಮಾಡಿದ ಜೆರ್ಸಿ ಉಡುಗೊರೆ ನೀಡಿದ ಕೊಹ್ಲಿ; ಫ್ಯಾನ್ ಬಾಯ್ ಮೂಮೆಂಟ್ ಅಂದ ಫ್ಯಾನ್ಸ್, ವಿಡಿಯೋ ವೈರಲ್

ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ (ICC ODI World Cup 2023) ಭಾರತದ ಗೆಲುವಿನ ಓಟ ಮುಂದುವರೆದಿದೆ. ಅಹ್ಮದಾಬಾದ್​ನ ನರೇಂದ್ರ ಮೋದಿ ಮೈದಾನದಲ್ಲಿ ಜರುಗಿದ ವಿಶ್ವಕಪ್​​ ಟೂರ್ನಿಯ 12ನೇ ಪಂದ್ಯದಲ್ಲಿ ಪಾಕಿಸ್ತಾನ ತಂಡವನ್ನು 7 ವಿಕೆಟ್​ಗಳಿಂದ ಭಾರತ (India vs Pakistan) ಮಣಿಸಿತು. ಅಲ್ಲದೆ, ಪಾಕ್ ಎದುರು ಕೂಡ ಗೆಲುವಿನ ನಾಗಾಲೋಟ ಮುಂದುವರೆಸಿತು. ವಿಶ್ವವೇ ಕಾಯುತ್ತಿದ್ದ ರಣರೋಚಕ ಪಂದ್ಯದಲ್ಲಿ ಭಾರತ ಗೆಲ್ಲುತ್ತಿದ್ದಂತೆ ಸಂಭ್ರಮಾಚರಣೆ ಮುಗಿಲು ಮುಟ್ಟಿತ್ತು.

ಮೊದಲು ಬ್ಯಾಟಿಂಗ್ ನಡೆಸಿದ ಪಾಕಿಸ್ತಾನ, ಭಾರತ ಬೌಲರ್​ಗಳ ಶಿಸ್ತುಬದ್ಧ ದಾಳಿಗೆ ತತ್ತರಿಸಿತು. 42.3 ಓವರ್​​​ಗಳಲ್ಲಿ 191 ರನ್​ಗಳಿಗೆ ಸರ್ವಪತನ ಕಂಡಿತು. ಬಾಬರ್ ಅಜಮ್ (50), ಮೊಹಮ್ಮದ್ ರಿಜ್ವಾನ್ (49) ಉತ್ತಮ ಪ್ರದರ್ಶನ ನೀಡಿದರು. ಈ ಗುರಿ ಬೆನ್ನಟ್ಟಿದ ಭಾರತ 30.3 ಓವರ್​​ಗಳಲ್ಲೇ ಗೆದ್ದು ಬೀಗಿತು. ರೋಹಿತ್ ಶರ್ಮಾ 86, ಶ್ರೇಯಸ್ ಅಯ್ಯರ್​ ಅಜೇಯ 53 ರನ್ ಸಿಡಿಸಿ ಮಿಂಚಿದರು. ಆದರೆ ಈ ಪಂದ್ಯ ಮುಗಿದ ವಿಶೇಷ ಘಟನೆಯೊಂದು ನಡೆಯಿತು.

ಬಾಬರ್​ಗೆ ಜೆರ್ಸಿ ಉಡುಗೊರೆ ನೀಡಿದ ಕೊಹ್ಲಿ

ಪಂದ್ಯದ ಬಳಿಕ ಪಾಕಿಸ್ತಾನದ ನಾಯಕ ಬಾಬರ್ ಅಜಮ್ (Babar Azam)​, ಟೀಮ್ ಇಂಡಿಯಾ ಸೂಪರ್ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ (Virat Kohli) ಅವರಿಂದ ಜೆರ್ಸಿಯನ್ನು ಉಡುಗೊರೆಯಾಗಿ ಪಡೆದರು. ಕೊಹ್ಲಿಯಿಂದ ಸಹಿ ಮಾಡಿದ ಜೆರ್ಸಿಯನ್ನು ಕೇಳಿ ಪಡೆದರು. ಏಕದಿನ ಕ್ರಿಕೆಟ್​ನಲ್ಲಿ ನಂಬರ್ 1 ಬ್ಯಾಟರ್​ ಆಗಿರುವ ಬಾಬರ್ ಅಜಮ್​ ಜೆರ್ಸಿ ಪಡೆದ ಕ್ಷಣವನ್ನು ಫ್ಯಾನ್ ಬಾಯ್​ ಮೂಮೆಂಟ್ ಎಂದು ಅಭಿಮಾನಿಗಳು ಬಣ್ಣಿಸಿದ್ದಾರೆ. ಉಭಯ ಆಟಗಾರರ ಅಭಿಮಾನಿಗಳು ಸಹ ಖುಷಿಪಟ್ಟಿದ್ದಾರೆ.

ಬಾಬರ್​ಗೆ ಕೊಹ್ಲಿ ಜೆರ್ಸಿ ಉಡುಗೊರೆಯಾಗಿರುವ ನೀಡುತ್ತಿರುವ ವಿಡಿಯೋ ಸಖತ್ ವೈರಲ್ ಆಗುತ್ತಿದೆ. ಈ ವಿಡಿಯೋದಲ್ಲಿ ಕೊಹ್ಲಿ ಸಹಿ ಮಾಡುತ್ತಿರುವುದನ್ನು ನೋಡಬಹುದು. ಆಟಗಾರರಿಗೆ ಕೊಹ್ಲಿ ತನ್ನ ಸಹಿ ಮಾಡಿದ ಜೆರ್ಸಿಯನ್ನು ಪಡೆದಿರುವುದು ಇದೇ ಮೊದಲಲ್ಲ. ಪಾಕಿಸ್ತಾನದ ಮತ್ತೊಬ್ಬ ಆಟಗಾರ ಹ್ಯಾರಿಸ್ ರೌಫ್​​ಗೆ 2022ರ ಏಷ್ಯಾಕಪ್​ನಲ್ಲಿ ಕೊಹ್ಲಿ ಜೆರ್ಸಿ ಉಡುಗೊರೆ ನೀಡಿದ್ದರು.

ಅನುಷ್ಕಾ ಶರ್ಮಾ ಹಾಜರಿ

ವಿರಾಟ್ ಕೊಹ್ಲಿ ಮತ್ತು ಅನುಷ್ಕಾ ಶರ್ಮಾ (Anushka Sharma) ಎರಡನೇ ಮಗುವಿನ ನಿರೀಕ್ಷೆಯಲ್ಲಿರುವ ಸುದ್ದಿಯ ನಡುವೆ, ಐಪಿಎಲ್ ಬಳಿಕ ಅನುಷ್ಕಾ ಇದೇ ಮೊದಲ ಬಾರಿಗೆ ಕಾಣಿಸಿಕೊಂಡರು. ಇಂಡೋ-ಪಾಕ್ ಪಂದ್ಯವನ್ನು ಕಣ್ತುಂಬಿಕೊಂಡರು. ವಿಶೇಷ ಅಂದರೆ ರೋಹಿತ್​ ಶರ್ಮಾ ಪತ್ನಿ ರಿತಿಕಾ ಸಜ್ದೇಹ್ (Ritika Sajdeh) ಅವರೊಂದಿಗೆ ಒಟ್ಟಿಗೆ ಕೂತು ಪಂದ್ಯ ವೀಕ್ಷಿಸಿದರು. ಆದರೆ ಈ ಮೊದಲು ಅನುಷ್ಕಾ ಶರ್ಮಾ ಮತ್ತು ರಿತಿಕಾ ನಡುವೆ ಭಿನ್ನಾಭಿಪ್ರಾಯ ಇದೆ ಎಂಬ ಹಲವು ಅನುಮಾನಗಳಿಗೆ ತೆರೆ ಎಳೆದರು.

ಒಟ್ಟಿಗೆ ಹೋಗೊಣ ಎಂದ ಕೊಹ್ಲಿ

ಪಂದ್ಯದ ಮುಗಿದ ನಂತರ ಸ್ಟ್ಯಾಂಡ್​​ನಲ್ಲಿದ್ದ ಅನುಷ್ಕಾ ಶರ್ಮಾ, ಕೈ ಸನ್ನೆಯ ಮೂಲಕ ಕೊಹ್ಲಿ ಕರೆದರು. ಅಲ್ಲೇ ಇರು, ಎಲ್ಲೂ ಹೋಗಬೇಡ. ಇಬ್ಬರು ಒಟ್ಟಿಗೆ ಕಾರಿನಲ್ಲಿ ಹೋಗೋಣ ಎಂದು ಕೈ ಸನ್ನೆಯ ಮೂಲಕವೇ ತಿಳಿಸಿದರು. ಅಲ್ಲದೆ, ಹೋಟೆಲ್​​ನಲ್ಲಿ ರೋಹಿತ್ ಶರ್ಮಾ ಪತ್ನಿಯನ್ನು ರಿತಿಕಾಗೆ ಹಗ್ ನೀಡಿದರು. ವಿಶೇಷ ಅಂದರೆ ರೋಹಿತ್​ ಪತ್ನಿಯೇ ಈ ಮೊದಲು ಕೊಹ್ಲಿ ಮ್ಯಾನೇಜರ್ ಆಗಿದ್ದರು. ಆಗ ಇಬ್ಬರು ಡೇಟಿಂಗ್ ನಡೆಸುತ್ತಿದ್ದಾರೆ ಎಂಬ ಸುದ್ದಿ ಹರಡಿತ್ತು.