Virender Sehwag: ವಿಶ್ವಕಪ್ ಸೆಮೀಸ್ ತಲುಪುವ ಬಲಿಷ್ಠ 4 ತಂಡಗಳನ್ನು ಆರಿಸಿದ ಸೆಹ್ವಾಗ್; ಪಾಕ್ ಫೈನಲ್​ ತಲುಪಿದರೂ ಅಚ್ಚರಿ ಇಲ್ಲ ಎಂದ ವೀರು

ಅಕ್ಟೋಬರ್​ 5ರಿಂದ ಕ್ರಿಕೆಟ್​ ಹಬ್ಬ ಏಕದಿನ ವಿಶ್ವಕಪ್ (ODI World Cup 2023) ಶುರುವಾಗಲಿದೆ. ಬರೋಬ್ಬರಿ 48 ದಿನಗಳ ಈ ಪಂದ್ಯ ನಡೆಯಲಿದೆ. 2011ರ ನಂತರ ಅಂದರೆ 12 ವರ್ಷಗಳ ಬಳಿಕ ಮೆಗಾ ಟೂರ್ನಿಗೆ ಭಾರತವೇ ಆತಿಥ್ಯ ವಹಿಸಲಿದೆ. ಇನ್ನೇನು ಒಂದೂವರೆ ತಿಂಗಳಲ್ಲಿ ಶುರುವಾಗುವ ಈ ಕ್ರಿಕೆಟ್​ ಮಹಾ ಸಂಗ್ರಾಮಕ್ಕೆ ಬಿಸಿಸಿಐ ಅಂತಿಮ ಸಿದ್ಧತೆಯಲ್ಲಿ ತೊಡಗಿದೆ. ಮತ್ತೊಂದೆಡೆ ಟೂರ್ನಿಯ ಸೆಮಿಫೈನಲ್​, ಫೈನಲ್​​ಗೇರುವ ನೆಚ್ಚಿನ ತಂಡಗಳನ್ನು ಮಾಜಿ-ಹಾಲಿ ಕ್ರಿಕೆಟರ್​​ಗಳು ಆರಿಸುತ್ತಿದ್ದಾರೆ.

ಅದರಂತೆ, ವೀರೇಂದ್ರ ಸೆಹ್ವಾಗ್ (Virender Sehwag) ಕೂಡ ಈ ಬಾರಿ ಸೆಮಿಫೈನಲ್​ ಪ್ರವೇಶಿಸಲಿರುವ 4 ಬಲಿಷ್ಠ ತಂಡಗಳ ಹೆಸರನ್ನು ಬಹಿರಂಗಪಡಿಸಿದ್ದಾರೆ. ಅಲ್ಲದೆ, ತಂಡಗಳನ್ನು ಆಯ್ಕೆ ಮಾಡಿರುವುದಕ್ಕೆ ನಿಖರ ಕಾರಣವನ್ನೂ ವಿವರಿಸಿದ್ದಾರೆ. ಸಂದರ್ಶನವೊಂದರಲ್ಲಿ ಮಾತನಾಡಿದ ಸೆಹ್ವಾಗ್, ನನ್ನ ಪ್ರಕಾರ ಈ ಸಲ ವಿಶ್ವಕಪ್​​ನಲ್ಲಿ ಸೆಮಿಫೈನಲ್​ ಸೇರುವ ತಂಡಗಳು ಅಂದರೆ, ಅವು ಭಾರತ (India), ಆಸ್ಟ್ರೇಲಿಯಾ (Australia), ಇಂಗ್ಲೆಂಡ್ (England) ಮತ್ತು ಪಾಕಿಸ್ತಾನ (Pakistan) ಎಂದು ತಿಳಿಸಿದ್ದಾರೆ.

ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ತಂಡಗಳು, ತುಂಬಾ ಆಕ್ರಮಣಕಾರಿ ಆಟವಾಡುತ್ತಿವೆ. ಉಭಯ ತಂಡಗಳು, ಏಷ್ಯನ್ ಪಿಚ್​​ಗಳಲ್ಲಿ ಅದ್ಭುತ ಪ್ರದರ್ಶನ ನೀಡಿವೆ. ಆಟಗಾರರೂ ಅಷ್ಟೇ ಬಲಿಷ್ಠರಾಗಿದ್ದಾರೆ. ಭಾರತದ ಪಿಚ್​​ಗಳಲ್ಲಿ ಈ ತಂಡಗಳಿಗೆ ಹೊರತುಪಡಿಸಿದರೆ, ಉಳಿದ ತಂಡಗಳು ನೀಡುವ ಸಾಮರ್ಥ್ಯ ಅಷ್ಟಕಷ್ಟೆ. ಹಾಗಾಗಿ, ಸೆಮಿಫೈನಲ್​ ಪ್ರವೇಶಿಸುವ ಪ್ರಮುಖ ತಂಡಗಳಾಗಿ ಗುರುತಿಸಿಕೊಂಡಿವೆ ಎಂದು ಮಾಜಿ ಆಟಗಾರ ತಿಳಿಸಿದ್ದಾರೆ.

ಭಾರತಕ್ಕೆ ತವರಿನ ಲಾಭ

ಟೀಮ್​ ಇಂಡಿಯಾ ಬಗ್ಗೆ ವಿಶೇಷವಾಗಿ ಹೇಳುವುದೇನಿಲ್ಲ. ತವರಿನ ಅಂಗಳದಲ್ಲಿ ಭಾರತ ತಂಡವು ಅತ್ಯಂತ ಬಲಿಷ್ಠವಾಗಿದೆ. ಸೆಮಿಫೈನಲ್ ಮಾತ್ರವಲ್ಲ, ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡವೂ ಆಗಿದೆ. ಇದಕ್ಕೆ ಕಾರಣ, ಇತ್ತೀಚಿಗೆ ತಂಡದಲ್ಲಿ ಆಗುತ್ತಿರುವ ಬದಲಾವಣೆಗಳು. ಸ್ಪೋಟಕ ಬ್ಯಾಟಿಂಗ್​ ನಡೆಸುವ ಮೂಲಕ ಎದುರಾಳಿಗಳ ಮೇಲೆ ಹೆಚ್ಚು ಒತ್ತಡ ಹೇರುವ ಪ್ರಯತ್ನ ನಡೆಸುತ್ತಿದೆ. ಅದ್ಭುತ ಸಮತೋಲನದೊಂದಿಗೆ ಜವಾಬ್ದಾರಿಯುತ ಪ್ರದರ್ಶನ ನೀಡಲಿದೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಈಗಾಗಲೇ ತವರಿನ ನೆಲದಲ್ಲಿ ಭಾರತ ತಂಡವು ಅದ್ಭುತ ಪ್ರದರ್ಶನ ನೀಡಿದೆ. ಕಳೆದ 4 ವರ್ಷಗಳಿಂದಲೂ ಏಕದಿನ ಸರಣಿಗಳಲ್ಲಿ ಮೆನ್ ಇನ್ ಬ್ಲೂ ಸಂಪೂರ್ಣ ಪ್ರಾಬಲ್ಯ ಮೆರೆದಿದೆ. ಹಾಗಾಗಿ, ಈ ಬಾರಿ ಸೆಮಿಫೈನಲ್ ಪ್ರವೇಶಿಸುವ ಮತ್ತು ಪ್ರಶಸ್ತಿ ಗೆಲ್ಲುವ ನೆಚ್ಚಿನ ಭಾರತವೇ ಆಗಿದೆ. ಬ್ಯಾಟಿಂಗ್​​ ವಿಭಾಗದಲ್ಲಿ ಟೀಮ್​ ಇಂಡಿಯಾ ತುಂಬಾ ಬಲಿಷ್ಠವಾಗಿದೆ. ಕೆಲವೊಂದಿಷ್ಟು ನ್ಯೂನತೆಗಳನ್ನು ಸರಿಪಡಿಸಿಕೊಂಡರೆ, ಭಾರತವನ್ನು ಸೋಲಿಸುವುದು ಅಷ್ಟು ಸುಲಭವಲ್ಲ ಎಂದು ಸೆಹ್ವಾಗ್ ವಿವರಿಸಿದ್ದಾರೆ.

ಐಪಿಎಲ್​ ಆಡಿದವರೇ ಹೆಚ್ಚು

ಹಾಲಿ ಚಾಂಪಿಯನ್​ ಇಂಗ್ಲೆಂಡ್ ಮೋಸ್ಟ್ ಡೇಂಜರಸ್ ತಂಡವಾಗಿದ್ದು, ಮತ್ತೊಂದು ಪ್ರಶಸ್ತಿ ಮೇಲೆ ಕಣ್ಣಿಟ್ಟಿದೆ. ಭಾರತದ ನೆಲದಲ್ಲಿ ಇಂಗ್ಲೆಂಡ್​​ನ ಏಕದಿನ ಸಾಧನೆಗಳನ್ನು ನೋಡಿದರೆ, ಅದ್ಭುತವಾಗಿದೆ. ಚಾಂಪಿಯನ್​ ಬ್ಯಾಟರ್​ಗಳನ್ನೇ ಹೊಂದಿರುವ ಆಂಗ್ಲರು, ಆಕ್ರಮಣಕಾರಿ ಆಟಕ್ಕೆ ಕೈಹಾಕಿದರೆ, ಅವರನ್ನು ಸೋಲಿಸುವುದು ಸುಲಭವಲ್ಲ. ಇದರೊಂದಿಗೆ ಐಪಿಎಲ್​ ಆಡಿರುವ ಬಹುತೇಕ ಇಂಗ್ಲೆಂಡ್​ ಆಟಗಾರರಿಗೆ ಭಾರತದ ಪಿಚ್​​ಗಳ ಬಗ್ಗೆ ಪರಿಚಯ ಇದೆ. ಇದು ಸೆಮಿಫೈನಲ್ ತಲುಪಲು ಬಹುದೊಡ್ಡ ಲಾಭವಾಗಲಿದೆ ಎಂದು ಸೆಹ್ವಾಗ್ ಹೇಳಿದ್ದಾರೆ.

ಆಲ್​ರೌಂಡ್​ ಆಟವಾಡಿದರೆ ಕಷ್ಟ

ಇನ್ನು ಆಸ್ಟ್ರೇಲಿಯಾದ ಬಹುತೇಕ ಆಟಗಾರರಿಗೆ ಪಿಚ್​ ಮರ್ಮ ಗೊತ್ತಿದೆ. ಯಾಕೆಂದರೆ ಐಪಿಎಲ್​ನಲ್ಲಿ ಮಿಂಚಿದ ಆಟಗಾರರಲ್ಲಿ ಆಸಿಸ್​ನವರೇ ಹೆಚ್ಚು. ಬ್ಯಾಟಿಂಗ್​​ನಲ್ಲೂ ಆಟಗಾರರ ದಂಡೇ ಇದೆ. ಆಸ್ಟ್ರೇಲಿಯಾ ತಂಡವನ್ನು ಪ್ಯಾಟ್ ಕಮಿನ್ಸ್‌ ಮುನ್ನಡೆಸಲಿದ್ದು, ಈಗಾಗಲೇ ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್‌ಷಿಪ್‌ ಗೆದ್ದುಕೊಟ್ಟಿದ್ದಾರೆ. ಬೌಲಿಂಗ್​ ವಿಭಾಗವೂ ಅಷ್ಟೇ ಬಲಿಷ್ಠವಾಗಿದೆ. ಆಲ್​ರೌಂಡ್​ ಪ್ರದರ್ಶನ ನೀಡಿದ್ದೇ ಆದರೆ, ಸುಲಭವಾಗಿ ಸೆಮಿಫೈನಲ್ ಪ್ರವೇಶಿಸಲಿದೆ ಎಂದು ವೀರೂ ಹೇಳಿದ್ದಾರೆ.

ಪಾಕ್​ ಬಗ್ಗೆ ವೀರೂ ಅಚ್ಚರಿ ಹೇಳಿಕೆ

ಪಾಕಿಸ್ತಾನ ತಂಡವನ್ನು ಯಾವುದೇ ಕಾರಣಕ್ಕೂ ಕಡೆಗಣಿಸಬಾರದು ಸೆಹ್ವಾಗ್ ಸೂಚಿಸಿದ್ದಾರೆ. ಏಷ್ಯಾದ ವಾತಾವರಣ, ಪಿಚ್​, ಕಂಡೀಷನ್ ಎಲ್ಲವೂ ಒಂದೇ ತರದ್ದು. ಹಾಗಾಗಿ ಪಿಚ್​​​ನಲ್ಲಿ ಪಾಕಿಸ್ತಾನಕ್ಕೆ ಯಾವುದೇ ವ್ತತ್ಯಯ ಉಂಟಾಗುವುದಿಲ್ಲ. ಬ್ಯಾಟಿಂಗ್​-ಬೌಲಿಂಗ್​​ ಎರಡರಲ್ಲೂ ಅದ್ಭುತ ಲೈನಪ್​ ಅನ್ನು ಹೊಂದಿದೆ. ಕ್ಯಾಪ್ಟನ್ ಬಾಬರ್ ಅಜಮ್ ಅದ್ಭುತ ಫಾರ್ಮ್​ನಲ್ಲಿದ್ದು, ಅವರನ್ನು ಕಟ್ಟಿಹಾಕುವುದೇ ಭಾರತದ ಮೂಲ ಮಂತ್ರವಾಗಬೇಕು. ಒಂದು ವೇಳೆ ಭಾರತ ವಿರುದ್ಧ ಜಯಿಸಿದ್ದೇ ಆದರೆ, ಪಾಕ್ ಫೈನಲ್​ ತಲುಪಿದರೂ ಅಚ್ಚರಿ ಇಲ್ಲ ಎನ್ನುತ್ತಾರೆ ಸೆಹ್ವಾಗ್.