ವಿಶ್ವಕಪ್ ಸೆಮಿಫೈನಲ್ ಪಂದ್ಯಗಳಿಗೆ ಮಳೆ ಅಡ್ಡಿಪಡಿಸಿದರೆ ಫಲಿತಾಂಶ ನಿರ್ಣಯ ಹೇಗೆ; ಐಸಿಸಿ ನಿಯಮ ಹೇಳುವುದೇನು?

ಐಸಿಸಿ ಏಕದಿನ ವಿಶ್ವಕಪ್ ಟೂರ್ನಿಯ (ICC ODI World Cup 2023) ಲೀಗ್ ಹಂತ ಅತ್ಯಂತ ಯಶಸ್ವಿಯಾಗಿ ಮುಕ್ತಾಯಗೊಂಡಿದೆ. ಇನ್ನೇನಿದ್ದರೂ ಸೆಮಿಫೈನಲ್ ಫೈಟ್. ಚಾಂಪಿಯನ್ ಪಟ್ಟಕ್ಕಾಗಿ 4 ತಂಡಗಳು ಹಸಿರು ಅಖಾಡದಲ್ಲಿ ಕಾದಾಡಲಿವೆ. ನವೆಂಬರ್ 15ರಂದು ಭಾರತ - ನ್ಯೂಜಿಲೆಂಡ್ ​(India vs New Zealand) ಮೊದಲ ಸೆಮಿಫೈನಲ್​ನಲ್ಲಿ ಸೆಣಸಾಟ ನಡೆಸಲಿವೆ.

ನವೆಂಬರ್ 16ರಂದು ಎರಡನೇ ಸೆಮೀಸ್​ನಲ್ಲಿ ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ(Australia vs South Africa) ಎದುರಾಗಲಿವೆ. ಕ್ರಮವಾಗಿ ಮುಂಬೈ ಮತ್ತು ಕೋಲ್ಕತ್ತಾದಲ್ಲಿ ಈ ಪಂದ್ಯಗಳು ನಡೆಯಲಿವೆ. ಒಂದು ವೇಳೆ ಈ ಮಹತ್ವದ ಪಂದ್ಯಗಳಿಗೆ ಮಳೆ ಅಡ್ಡಿಪಡಿಸಿದರೆ ಏನಾಗುತ್ತದೆ? ಫಲಿತಾಂಶ ಹೇಗೆ? ಐಸಿಸಿ ಮಳೆ ನಿಯಮ ಏನು? ಇಲ್ಲಿದೆ ವಿವರ.

ರಿಸರ್ವ್​ ಡೇ (ಮೀಸಲು ದಿನ)

ಐಸಿಸಿ ನಿಯಮದ ಪ್ರಕಾರ ವಿಶ್ವಕಪ್​​ನ ಲೀಗ್​ ಪಂದ್ಯಗಳಿಗೆ ಯಾವುದೇ ಮೀಸಲು ದಿನ ಇರುವುದಿಲ್ಲ. ಲೀಗ್​​ ಹಂತದಲ್ಲಿ ಮಳೆಯಿಂದ ಪಂದ್ಯ ರದ್ದಾದರೆ ಉಭಯ ತಂಡಗಳು ತಲಾ ಒಂದು ಅಂಕ ಪಡೆಯಲಿವೆ. ಆದರೆ, ಸೆಮಿಫೈನಲ್ ಪಂದ್ಯಕ್ಕೆ ಮಳೆ ಅಡ್ಡಿಪಡಿಸಿದರೆ, ಪ್ರೇಕ್ಷಕರು ಚಿಂತಿಸುವ ಅಗತ್ಯ ಇಲ್ಲ. ಎರಡೂ ಸೆಮಿಫೈನಲ್​ ಜೊತೆಗೆ ಫೈನಲ್ ಪಂದ್ಯಕ್ಕೂ ಮೀಸಲು ದಿನ (ರಿಸರ್ವ್​ ಡೇ) ಇರಲಿದೆ.

ಮೀಸಲು ದಿನವೂ ಮಳೆ ಅಡ್ಡಿಪಡಿಸಿದರೆ ಹೇಗೆ?

ಸೆಮಿಫೈನಲ್​ ಪಂದ್ಯಕ್ಕೆ ಮಳೆ ಅಡಚಣೆ ಉಂಟು ಮಾಡಿದರೆ, ಮೀಸಲು ದಿನದಂದು ಪಂದ್ಯ ನಡೆಯಲಿದೆ. ಒಂದು ವೇಳೆ ಮೀಸಲು ದಿನವೂ ಮಳೆ ಕಾಡಿದರೆ ಫಲಿತಾಂಶ ಘೋಷಣೆ ಹೇಗೆ ಎಂಬ ಪ್ರಶ್ನೆ ಕ್ರಿಕೆಟ್ ಪ್ರೇಮಿಗಳದ್ದು. ಅದಕ್ಕೆ ಉತ್ತರ ಇಲ್ಲಿದೆ. ರಿಸರ್ವ್​ ಡೇ ದಿನವೂ ಪಂದ್ಯ ಸಂಪೂರ್ಣ ರದ್ದಾಗ ಆಗ ಲೀಗ್​​ನಲ್ಲಿ ಹೆಚ್ಚು ಅಂಕ ಮತ್ತು ರನ್​ ರೇಟ್ ಹೊಂದಿರುವ ತಂಡ ಫೈನಲ್​ಗೆ ನೇರವಾಗಿ ಪ್ರವೇಶಿಸಲಿದೆ.

ಉದಾಹರಣೆ: ಮೊದಲ ಸೆಮಿಫೈನಲ್​ ಪಂದ್ಯದಲ್ಲಿ ಭಾರತ ಮತ್ತು ನ್ಯೂಜಿಲೆಂಡ್ ಮುಖಾಮುಖಿಯಾಗುತ್ತವೆ. ಈ ಪಂದ್ಯಕ್ಕೆ ಮಳೆ ತೊಂದರೆ ನೀಡಿದರೆ, ಇದರ ಲಾಭ ಭಾರತಕ್ಕೆ ಲಭಿಸಲಿದೆ. ಏಕೆಂದರೆ ವಿಶ್ವಕಪ್ ಲೀಗ್​ ಅಂಕಪಟ್ಟಿಯಲ್ಲಿ ಭಾರತ ಅಗ್ರಸ್ಥಾನ ಪಡೆದಿದೆ. ಹಾಗಾಗಿ ಮೀಸಲು ದಿನವೂ ಪಂದ್ಯ ಬಂದರೆ ಭಾರತ ಫೈನಲ್​ ಪ್ರವೇಶ ಪಡೆಯುತ್ತದೆ. ನ್ಯೂಜಿಲೆಂಡ್ ತಂಡಕ್ಕೆ ಹಿನ್ನಡೆಯಾಗಲಿದೆ.

ಒಂದೇ ಅಂಕ ಪಡೆದಿದ್ದರೆ, ಫಲಿತಾಂಶ ಹೇಗೆ?

ಒಂದು ವೇಳೆ ಸೆಮಿಫೈನಲ್​​ನಲ್ಲಿ ಮುಖಾಮುಖಿಯಾಗುವ ಉಭಯ ತಂಡಗಳು ಸಮಾನ ಅಂಕ ಹೊಂದಿದ್ದರೆ, ಫಲಿತಾಂಶ ಹೇಗೆ ಎಂಬ ಪ್ರಶ್ನೆ ನಿಮ್ಮದಾಗಿದ್ದರೆ ಅದಕ್ಕೂ ಉತ್ತರ ಇಲ್ಲಿದೆ. ಎರಡೂ ತಂಡಗಳು ಸಮಾನವಾದ ಅಂಕ ಹೊಂದಿದ್ದರೆ, ನೆಟ್​ ರನ್​ ರೇಟ್​ನಲ್ಲಿ ಮುಂದಿರುವ ತಂಡವು ಫೈನಲ್​ಗೆ ಪ್ರವೇಶಿಸಲಿದೆ.

ಆಸ್ಟ್ರೇಲಿಯಾ-ದಕ್ಷಿಣ ಆಫ್ರಿಕಾ ತಂಡಗಳು ತಲಾ 14 ಅಂಕ ಪಡೆದಿವೆ. ಈ ಉಭಯ ತಂಡಗಳ ಸೆಮಿಫೈನಲ್​ ಪಂದ್ಯವು ಮೀಸಲು ದಿನವೂ ರದ್ದುಗೊಂಡರೆ ನೆಟ್​ ರನ್​​ ರೇಟ್​ನಲ್ಲಿ ಮುಂದಿರುವ ದಕ್ಷಿಣ ಆಫ್ರಿಕಾ ನೇರವಾಗಿ ಫೈನಲ್​ ಪ್ರವೇಶಿಸಲಿದೆ.

ಬೌಂಡರಿ ಕೌಂಟ್ ಇಲ್ಲ

2019ರ ವಿಶ್ವಕಪ್​ ಟೂರ್ನಿಯ ಫೈನಲ್​ನಲ್ಲಿ ಸೂಪರ್​ ಓವರ್​​ನಲ್ಲಿ ಟೈಗೊಂಡಾಗ ಫಲಿತಾಂಶ ನಿರ್ಧರಿಸಲು ಬೌಂಡರಿ ಕೌಂಟ್ ಮಾಡಲಾಗಿತ್ತು. ಅದರ ಆಧಾರದಲ್ಲಿ ಫಲಿತಾಂಶ ನಿರ್ಧರಿಸಲಾಗಿತ್ತು. ಇದು ವಿವಾದ ಮತ್ತು ಆಕ್ರೋಶಕ್ಕೂ ಕಾರಣವಾಗಿತ್ತು. ಹಾಗಾಗಿ ಈ ಬಾರಿ ನಿಯಮವನ್ನು ಕಿತ್ತು ಹಾಕಲಾಗಿದೆ. ಈ ಬಾರಿ ಸೆಮಿಫೈನಲ್​, ಫೈನಲ್​ ಆಗಲಿ ಟೈ ಗೊಂಡರೆ ಫಲಿತಾಂಶ ಬರುವ ತನಕ ಸೂಪರ್​ ಓವರ್ ಹಾಕಿಸಲಾಗುತ್ತದೆ.

ಲೀಗ್​ ಹಂತದ ಅಂಕಪಟ್ಟಿ ಹೀಗಿದೆ.