Nani Dasara Movie: ನ್ಯಾಚುರಲ್‌ ಎಫೆಕ್ಟ್‌ಗಾಗಿ ನಿಜವಾಗಲೂ ಡ್ರಿಂಕ್ಸ್‌ ಮಾಡಿದ್ದೆ.. 'ದಸರಾ' ಶೂಟಿಂಗ್‌ ಅನುಭವ ಬಿಚ್ಚಿಟ್ಟ ನಾನಿ

ನ್ಯಾಚುರಲ್‌ ಸ್ಟಾರ್‌ ನಾನಿ ನಟನೆಯ 'ದಸರಾ' ಸಿನಿಮಾ ಮಾರ್ಚ್‌ 30 ರಂದು ತೆರೆಗೆ ಬರುತ್ತಿದೆ. ನಾನಿ ಹಾಗೂ ಸಿನಿಮಾ ತಂಡ ಪ್ರಮೋಷನ್‌ ಕೆಲಸಗಳಲ್ಲಿ ಬ್ಯುಸಿ ಇದ್ದಾರೆ. ಸಿನಿಮಾ ತೆಲುಗು ಜೊತೆ ಕನ್ನಡ, ತಮಿಳು, ಹಿಂದಿ ಹಾಗೂ ಮಲಯಾಳಂ ಭಾಷೆಗಳಲ್ಲಿ ತೆರೆ ಕಾಣುತ್ತಿದೆ. ಕೆಲವು ದಿನಗಳ ಹಿಂದೆ ನಾನಿ ಬೆಂಗಳೂರಿಗೆ ಬಂದು ಕ್ರೇಜಿಸ್ಟಾರ್‌ ರವಿಚಂದ್ರನ್‌ ಭೇಟಿ ಮಾಡಿದ್ದರು.

'ದಸರಾ' ಚಿತ್ರದ ಪ್ರಮೋಷನ್‌ ವೇಳೆ ನಾನಿ ಚಿತ್ರದ ತಯಾರಿ, ಒನ್‌ ಲೈನ್‌ ಸ್ಟೋರಿ, ತಮ್ಮ ಪಾತ್ರದ ಬಗ್ಗೆ ಮಾತನಾಡುತ್ತಲೇ ಬಂದಿದ್ದಾರೆ. ಇದೀಗ ಅವರು ಮತ್ತೊಂದು ಆಸಕ್ತಿಕರ ವಿಚಾರವನ್ನು ಹಂಚಿಕೊಂಡಿದ್ದಾರೆ. 'ದಸರಾ' ಚಿತ್ರದಲ್ಲಿ ನಾನಿ ಮಾಸ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಇಷ್ಟು ದಿನಗಳು ನಾನಿ ಚಾಕೊಲೇಟ್‌ ಬಾಯ್‌ ಪಾತ್ರಗಳಲ್ಲಿ ನಟಿಸುತ್ತಿದ್ದರು. ಆದರೆ ಇದೇ ಮೊದಲ ಬಾರಿಗೆ ಅವರು ರಗಡ್‌ ಲುಕ್‌ನಲ್ಲಿ ದರ್ಶನ ನೀಡುತ್ತಿದ್ದಾರೆ. ಅವರ ಪಾತ್ರ ಕೂಡಾ ಹಾಗೇ ಇರಲಿದೆಯಂತೆ. ಸಿನಿಮಾದ ಕೆಲವೊಂದು ಸನ್ನಿವೇಶಗಳಿಗೆ ನಾನಿ ನಿಜವಾಗಿಯೂ ಡ್ರಿಂಕ್ಸ್‌ ಮಾಡಿ ನಟಿಸಿದ್ದಾರಂತೆ.

''ಚಿತ್ರದಲ್ಲಿ ನಾನು ಡ್ರಿಂಕ್ಸ್‌ ಮಾಡುವ ದೃಶ್ಯಗಳಿವೆ. ಡ್ರಿಂಕ್ಸ್‌ ಮಾಡಿದಾಗ ನನ್ನ ಕಣ್ಣು ಕೆಂಪಗಾಗಬೇಕಿತ್ತು. ಆದರೆ ಏನೇ ಮಾಡಿದರೂ ನ್ಯಾಚುರಲ್‌ ಎಫೆಕ್ಟ್‌ ಬಾರದ ಕಾರಣ ಮದ್ಯಪಾನ ಮಾಡುವ ದೃಶ್ಯಗಳಲ್ಲಿ ನಾನು ನಿಜವಾಗಿಯೂ ಡ್ರಿಂಕ್ಸ್‌ ಮಾಡಬೇಕಾಯ್ತು. ಚಿತ್ರದ ಕೆಲವೊಂದು ದೃಶ್ಯಗಳಲ್ಲಿ ನನ್ನ ಪಾತ್ರ ಬಹಳ ರಫ್‌ ಆಗಿದೆ. ಆದರೆ ಸಿನಿಮಾ ಔಟ್‌ಪುಟ್‌ ಮಾತ್ರ ಬಹಳ ಚೆನ್ನಾಗಿದೆ. ಸಿನಿಮಾ ನೋಡಿದ ನಂತರ ನೀವೇ ಹೇಳುತ್ತೀರಿ. ಖಂಡಿತ ಸಿನಿಮಾ ಎಲ್ಲರಿಗೂ ಮೆಚ್ಚುಗೆ ಆಗಲಿದೆ. ನೋಡುಗರಿಗೆ ನಿಜವಾಗಲೂ ಥ್ರಿಲ್‌ ಕೊಡುತ್ತದೆ'' ಎಂದು ನಾನಿ ತಮ್ಮ ಸಿನಿಮಾ ಹಾಗೂ ಶೂಟಿಂಗ್‌ ಅನುಭವವನ್ನು ಹೇಳಿಕೊಂಡಿದ್ದಾರೆ.

ಶ್ರೀಕಾಂತ್ ಒಡೆಲಾ ನಿರ್ದೇಶನದ 'ದಸರಾ'

ನಾನಿ ಹಾಗೂ ಕೀರ್ತಿ ಸುರೇಶ್ ಜೋಡಿಯಾಗಿರುವ 'ದಸರಾ' ಚಿತ್ರವನ್ನು ಶ್ರೀಲಕ್ಷ್ಮೀ ವೆಂಕಟೇಶ್ವರ ಸಿನಿಮಾಸ್ ಬ್ಯಾನರ್ ಅಡಿ ಸುಧಾಕರ್ ಚೆರುಕುರಿ ಅದ್ದೂರಿಯಾಗಿ ನಿರ್ಮಾಣ ಮಾಡಿದ್ದಾರೆ. ಶ್ರೀಕಾಂತ್ ಒಡೆಲಾ, ಆಕ್ಷನ್ ಕಟ್ ಹೇಳಿದ್ದಾರೆ. ಈಗಾಗಲೇ ಸಿನಿಮಾ ಹಾಡುಗಳ ಮೂಲಕವೂ ಕ್ರೇಜ್ ಸೃಷ್ಟಿಸಿದೆ. 'ದಸರಾ' ಚಿತ್ರದಲ್ಲಿ ದೀಕ್ಷಿತ್ ಶೆಟ್ಟಿ, ಸಮುದ್ರಕನಿ, ಸಾಯಿಕುಮಾರ್, ಜರೀನಾ ವಹಾಬ್ ಸೇರಿದಂತೆ ಸ್ಟಾರ್ ಕಲಾವಿದರ ದಂಡೇ ಇದೆ. ಸತ್ಯನ್ ಸೂರ್ಯನ್ ಕ್ಯಾಮೆರಾ ವರ್ಕ್, ನವೀನ್ ನೂಲಿ ಸಂಕಲನ, ಅನ್ಬರಿವ್ ಸಾಹಸ ನಿರ್ದೇಶನ, ವಿಜಯ್ ಚಗಂಟಿ ಕಾರ್ಯಕಾರಿ ನಿರ್ಮಾಣ ಈ ಚಿತ್ರಕ್ಕಿದೆ. ಚಿತ್ರದ ಹಾಡುಗಳಿಗೆ ಸಂತೋಷ್‌ ನಾರಾಯಣ್‌ ಸಂಗೀತ ನೀಡಿದ್ದಾರೆ. ಗೀತಾ ಆರ್ಟ್ಸ್‌ ಹಾಗೂ ಸ್ಟಾರ್‌ ಸ್ಟುಡಿಯೋಸ್‌ ಈ ಚಿತ್ರವನ್ನು ಹಂಚಿಕೆ ಮಾಡುತ್ತಿದೆ.

ಅಪ್ಪ-ಮಗಳ ಬಾಂಧವ್ಯದ ಚಿತ್ರದಲ್ಲಿ ನಾನಿ

'ದಸರಾ' ಜೊತೆಗೆ ನಾನಿ ಮತೊಂದು ಹೊಸ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ. ವೈರ ಎಂಟರ್‌ಟೈನ್ಮೆಂಟ್ಸ್ ಬ್ಯಾನರ್, ನಾನಿಯೊಂದಿಗೆ ಮುಂದಿನ ಸಿನಿಮಾ ಮಾಡುವುದಾಗಿ ಕಳೆದ ವರ್ಷ ಮಾಹಿತಿ ಹಂಚಿಕೊಂಡಿತ್ತು. ಆದರೆ ಸಿನಿಮಾ ನಿರ್ದೇಶಕರು, ತಾರಾಬಳಗ, ತಂತ್ರಜ್ಞರ ಬಗ್ಗೆ ಮಾಹಿತಿ ಹಂಚಿಕೊಂಡಿರಲಿಲ್ಲ. ಹೊಸ ವರ್ಷದಂದು ಚಿತ್ರದ ಅಪ್‌ಡೇಟ್‌ ನೀಡಿತ್ತು. ನಾನಿ 30ನೇ ಸಿನಿಮಾಗೆ ಶೌರ್ಯುವ್ ಆಕ್ಷನ್ ಕಟ್ ಹೇಳುತ್ತಿದ್ದು, ನಿರ್ದೇಶಕನಾಗಿ ಇದು ಇವರ ಮೊದಲ ಸಿನಿಮಾವಾಗಿದೆ. ಎಮೋಶನಲ್ ಫ್ಯಾಮಿಲಿ ಎಂಟರ್‌ಟೈನ್ಮೆಂಟ್ ಸಬ್ಜೆಕ್ಟ್ ಒಳಗೊಂಡ ಈ ಚಿತ್ರ ಅಪ್ಪ- ಮಗಳ ಬಾಂಧವ್ಯದ ಸುತ್ತ ಹೆಣೆಯಲಾದ ವಿಭಿನ್ನ ಕಥಾಹಂದರ ಒಳಗೊಂಡಿದೆ. ನಾನಿ ಜೋಡಿಯಾಗಿ 'ಸೀತಾ ರಾಮಂ' ಖ್ಯಾತಿಯ ಮೃಣಾಲ್ ಠಾಕೂರ್ ತೆರೆ ಹಂಚಿಕೊಳ್ಳುತ್ತಿದ್ದಾರೆ.