Telugu Movie Fan war in Dallas: ಬಾಲಕೃಷ್ಣ-ಪವನ್‌ ಕಲ್ಯಾಣ್‌ಗಾಗಿ ಅಮೆರಿಕದ ಡಲ್ಲಾಸ್‌ನಲ್ಲಿ ಜಗಳ..ಬಾಲಯ್ಯ ಅಭಿಮಾನಿ ಅರೆಸ್ಟ್‌
Jan 03, 2023 11:56 AM IST
Share
ನಂದಮೂರಿ ಬಾಲಕೃಷ್ಣ, ಪವನ್‌ ಕಲ್ಯಾಣ್‌
- ಅಮೆರಿಕದ ಡಲ್ಲಾಸ್‌ನಲ್ಲಿ (Dallas) ಹೊಸ ವರ್ಷ ಆಚರಣೆಯಲ್ಲಿ ಭಾರತೀಯರು ಒಂದೆಡೆ ಸೇರಿದ್ದಾಗ ಅನ್‌ಸ್ಟಾಪಬಲ್‌ ವಿಚಾರ ಚರ್ಚೆಯಾಗಿದೆ. ಅನ್‌ಸ್ಟಾಪಬಲ್‌ (Unstoppable ) ಕಾರ್ಯಕ್ರಮದಲ್ಲಿ ಪವನ್‌ ಕಲ್ಯಾಣ್‌ (Pawan Kalyan), ಬಾಲಕೃಷ್ಣ (Nandamuri Balakrishna) ಕಾಲಿಗೆ ಬಿದ್ದಿದ್ದ ವಿಚಾರಕ್ಕೆ ಬಾಲಕೃಷ್ಣ ಅಭಿಮಾನಿಗಳು ಪವನ್‌ ಕಲ್ಯಾಣ್‌ ಬಗ್ಗೆ ವ್ಯಂಗ್ಯವಾಡಿದ್ದಾರೆ. ತಮ್ಮ ಮೆಚ್ಚಿನ ನಟನ ಬಗ್ಗೆ ಲಘುವಾಗಿ ಮಾತನಾಡಿದ್ದಕ್ಕೆ ಪವನ್‌ ಅಭಿಮಾನಿಗಳು ಕೂಡಾ ಗರಂ ಆಗಿದ್ದಾರೆ.
ಚಿತ್ರರಂಗದಲ್ಲಿ ಕೆಲವೊಮ್ಮೆ ಸ್ಟಾರ್‌ ವಾರ್‌ಗಳಿಗಿಂತ ಫ್ಯಾನ್‌ ವಾರ್‌ಗಳೇ ಹೆಚ್ಚು ಚರ್ಚೆಯಲ್ಲಿರುತ್ತದೆ. ಏಕೆಂದರೆ ಮನಸ್ತಾಪ ಇರುವ ಸ್ಟಾರ್‌ ನಟರು ಒಂದಾದರೂ, ಅವರ ಅಭಿಮಾನಿಗಳು ಮಾತ್ರ ಒಂದಲ್ಲಾ ಒಂದು ವಿಚಾರ ಕೆದಕುತ್ತಾ ವಾರ್‌ ಮಾಡುತ್ತಲೇ ಇರುತ್ತಾರೆ. ಇದೀಗ ತೆಲುಗು ಚಿತ್ರರಂಗದಲ್ಲಿ ಕೂಡಾ ಪವನ್‌ ಕಲ್ಯಾಣ್‌ (Pawan Kalyan) ಹಾಗೂ ಬಾಲಕೃಷ್ಣ (Nandamuri Balakrishna)ಅಭಿಮಾನಿಗಳಿಗೆ ಇದೇ ವಿಚಾರದಲ್ಲಿ ಜಗಳ ಶುರುವಾಗಿದೆ.
ಮೊನ್ನೆಯಷ್ಟೇ ಪವನ್‌ ಕಲ್ಯಾಣ್‌ ಹಾಗೂ ನಂದಮೂರಿ ಬಾಲಕೃಷ್ಣ ಒಟ್ಟಿಗೆ ಭೇಟಿಯಾಗಿದ್ದರು. ಜೊತೆಗೆ ಬಾಲಕೃಷ್ಣ ನಡೆಸಿಕೊಡುವ ಅನ್‌ಸ್ಟಾಪಬಲ್‌ ಕಾರ್ಯಕ್ರಮಕ್ಕೆ ಪವನ್‌ ಕಲ್ಯಾಣ್‌ ಗೆಸ್ಟ್‌ ಆಗಿ ಆಗಮಿಸಿದ್ದರು. ಈ ವಿಚಾರ ರಾಜಕೀಯ ವಲಯದಲ್ಲಿ ಕೂಡಾ ಚರ್ಚೆಯಾಗುತ್ತಿದೆ. ಪವನ್‌ ಕಲ್ಯಾಣ್‌ ಯಾವುದೇ ಶೋಗೆ ಹೋದವರಲ್ಲ ಅಂತದ್ದರಲ್ಲಿ ಅವರು ಬಾಲಕೃಷ್ಣ ಅವರ ಅನ್‌ಸ್ಟಾಪಬಲ್‌ ಕಾರ್ಯಕ್ರಮಕ್ಕೆ ಹೋಗಿದ್ದಾರೆ ಎಂದರೆ ಅವರಿಗೆ ಚಂದ್ರಬಾಬುನಾಯ್ಡು ಕಡೆಯಿಂದ ಒಳ್ಳೆ ಪ್ಯಾಕೇಜ್‌ ದೊರೆಯತ್ತದೆ ಎಂದೇ ಅರ್ಥ, ಎಂದು ಪ್ರವಾಸೋದ್ಯಮ, ಸಂಸ್ಕೃತಿ ಮತ್ತು ಯುವಜನ ಅಭಿವೃದ್ಧಿ ಸಚಿವೆ ರೋಜಾ, ಪವನ್‌ ಬಗ್ಗೆ ಕಮೆಂಟ್‌ ಮಾಡಿದ್ದರು.
ಎನ್‌ಟಿಆರ್‌ ಹಾಗೂ ಕೊನಿಡೇಲ ಕುಟುಂಬಕ್ಕೆ ಇತ್ತೀಚೆಗೆ ಸ್ನೇಹ ಬೆಳೆಯುತ್ತಿದೆ. ರಾಮ್‌ಚರಣ್‌ ಹಾಗೂ ಜ್ಯೂನಿಯರ್‌ ಎನ್‌ಟಿಆರ್‌ ಬಹಳ ಆತ್ಮೀಯರು, ಬಾಲಕೃಷ್ಣ ಹಾಗೂ ಚಿರಂಜೀವಿ ಒಂದೇ ವೇದಿಕೆಯಲ್ಲಿ ಕಾಣಿಸಿಕೊಂಡಾಗ ಕೆಲವರು ಖುಷಿಪಟ್ಟಿದ್ದರು. ಇತ್ತೀಚೆಗೆ ಪವನ್‌ ಕಲ್ಯಾಣ್‌ ಹಾಗೂ ಬಾಲಕೃಷ್ಣ ಭೇಟಿಯಾದಾಗ ಕೂಡಾ ಇಬ್ಬರ ಅಭಿಮಾನಿಗಳು ಸಂತೋಷ ವ್ಯಕ್ತಪಡಿಸಿದ್ದರು. ಆದರೆ ಕೆಲವರು ಮಾತ್ರ ಇದನ್ನೇ ಮುಂದಿಟ್ಟುಕೊಂಡು ಮತ್ತೆ ಜಗಳ ಶುರು ಮಾಡಿದ್ದಾರೆ. ಆದೂ ಕೂಡಾ ಆಂಧ್ರ, ತೆಲಂಗಾಣದಲ್ಲಿ ಅಲ್ಲ, ದೂರದ ಅಮೆರಿಕದ ಡಲ್ಲಾಸ್‌ನಲ್ಲಿ. ಪವನ್‌ ಕಲ್ಯಾಣ್‌ ಹಾಗೂ ಬಾಲಕೃಷ್ಣ ಅಭಿಮಾನಿಗಳ ನಡುವೆ ನಡೆದ ಗಲಾಟೆಯಲ್ಲಿ ಪೊಲೀಸರು ಬಾಲಕೃಷ್ಣ ಅಭಿಮಾನಿಯೊಬ್ಬರನ್ನು ಬಂಧಿಸಿದ್ದಾರೆ.
ಅಮೆರಿಕದ ಡಲ್ಲಾಸ್‌ನಲ್ಲಿ ಹೊಸ ವರ್ಷ ಆಚರಣೆಯಲ್ಲಿ ಭಾರತೀಯರು ಒಂದೆಡೆ ಸೇರಿದ್ದಾಗ ಅನ್‌ಸ್ಟಾಪಬಲ್‌ ವಿಚಾಋ ಚರ್ಚೆಯಾಗಿದೆ. ಅನ್‌ಸ್ಟಾಪಬಲ್‌ ಕಾರ್ಯಕ್ರಮದಲ್ಲಿ ಪವನ್‌ ಕಲ್ಯಾಣ್‌, ಬಾಲಕೃಷ್ಣ ಕಾಲಿಗೆ ಬಿದ್ದಿದ್ದ ವಿಚಾರಕ್ಕೆ ಬಾಲಕೃಷ್ಣ ಅಭಿಮಾನಿಗಳು ಪವನ್‌ ಕಲ್ಯಾಣ್‌ ಬಗ್ಗೆ ವ್ಯಂಗ್ಯವಾಡಿದ್ದಾರೆ. ತಮ್ಮ ಮೆಚ್ಚಿನ ನಟನ ಬಗ್ಗೆ ಲಘುವಾಗಿ ಮಾತನಾಡಿದ್ದಕ್ಕೆ ಪವನ್‌ ಅಭಿಮಾನಿಗಳು ಕೂಡಾ ಗರಂ ಆಗಿದ್ದಾರೆ. ಮಾತಿನ ಚಕಮಕಿ ನಂತರ ರಸ್ತೆಯಲ್ಲೇ ಜಗಳಕ್ಕೆ ತಿರುಗಿ ಹೊಡೆದಾಟದವರೆಗೂ ಬಂದಿದೆ. ಕೊನೆಗೆ ಪೊಲೀಸರು ಆಗಮಿಸಿ ಘಟನೆಗೆ ಕಾರಣವಾದ ಬಾಲಕೃಷ್ಣ ಅಭಿಮಾನಿಯೊಬ್ಬರನ್ನು ಬಂಧಿಸಿದ್ದಾರೆ.
ಬಾಲಕೃಷ್ಣ ಸಿನಿಮಾ ವಿಚಾರಕ್ಕೆ ಬರುವುದಾದರೆ, ಅವರು ಸದ್ಯಕ್ಕೆ 'ವೀರಸಿಂಹರೆಡ್ಡಿ' ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಈ ಚಿತ್ರವನ್ನು ಗೋಪಿಚಂದ್‌ ಮಲಿನೇನಿ ನಿರ್ದೇಶಿಸುತ್ತಿದ್ದಾರೆ. ಮೈತ್ರಿ ಮೂವಿ ಮೇಕರ್ಸ್‌ ಈ ಚಿತ್ರವನ್ನು ನಿರ್ಮಿಸುತ್ತಿದೆ. ಚಿತ್ರದಲ್ಲಿ ನಂದಮೂರಿ ಬಾಲಕೃಷ್ಣ, ದುನಿಯಾ ವಿಜಯ್‌, ಶ್ರತಿ ಹಾಸನ್‌, ವರಲಕ್ಷ್ಮಿ ಶರತ್‌ ಕುಮಾರ್‌ ರವಿಶಂಕರ್‌ ಹಾಗೂ ಇನ್ನಿತರರು ನಟಿಸಿದ್ದಾರೆ. ಇತ್ತ ಪವನ್‌ ಕಲ್ಯಾಣ್‌, 'ಹರಿಹರ ವೀರಮಲ್ಲು' ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ. ಈ ಸಿನಿಮಾವನ್ನು ಮೆಗಾ ಸೂರ್ಯ ಪ್ರೊಡಕ್ಷನ್ಸ್‌ ನಿರ್ಮಿಸುತ್ತಿದ್ದು ಕೃಷ್ಣ ಜಗರ್ಲಮುಡಿ ಆಕ್ಷನ್‌ ಕಟ್‌ ಹೇಳ್ತಿದ್ದಾರೆ. ಚಿತ್ರದಲ್ಲಿ ನಿಧಿ ಅಗರ್‌ವಾಲ್‌, ಬಾಬ್ಬಿ ಡಿಯೋಲ್‌, ನರ್ಗಿಸ್‌ ಫಕ್ರಿ ಹಾಗೂ ಇನ್ನಿತರರು ಇದ್ಧಾರೆ.