Bigg Boss Kannada 11: ಹನುಮಂತನ ದೋಸ್ತನನ್ನು ಹುರಿದು ಮುಕ್ಕಿದ ಬಿಗ್‌ ಬಾಸ್ ಮನೆ ಮಂದಿ; ಬಾತ್‌ರೂಮ್‌ನಲ್ಲಿ ಕಣ್ಣೀರಿಟ್ಟ ಧನರಾಜ್
Nov 07, 2024 10:36 AM IST
Share
ಬಾತ್‌ರೂಮ್‌ನಲ್ಲಿ ಕಣ್ಣೀರಿಟ್ಟ ಧನರಾಜ್
- Bigg boss Kannada 11: ಬಿಗ್‌ ಬಾಸ್ ಮನೆಯಲ್ಲಿ ಕ್ಯಾಪ್ಟನ್ಸಿ ಟಾಸ್ಕ್‌ ವಿಚಾರದಲ್ಲಿ ಸ್ಪರ್ಧಿಗಳು ಕೊಂಚ ಗರಂ ಆಗಿದ್ದಾರೆ. ಅರ್ಹರಲ್ಲದ ಸ್ಪರ್ಧಿಗಳ ಹೆಸರು ಸೂಚಿಸುವಂತೆ ಬಿಗ್‌ ಬಾಸ್ ಕೋರಿದ್ದಾರೆ. ಆ ಪೈಕಿ ಎಲ್ಲರೂ ಧನರಾಜ್ ಆಚಾರ್ ಹೆಸರನ್ನೇ ಹೇಳಿದ್ದಾರೆ.
Bigg boss Kannada 11: ಬಿಗ್‌ ಬಾಸ್ ಮನೆಯಲ್ಲಿ ಈ ವಾರದ ಕ್ಯಾಪ್ಟನ್ಸಿ ಟಾಸ್ಕ್‌ ಕೊಂಚ ಜೋರಾಗಿಯೇ ನಡೆಯುತ್ತಿದೆ. ಮನೆಯ ಕ್ಯಾಪ್ಟನ್‌ ಪಟ್ಟ ಅಲಂಕರಿಸುವ ಸಲುವಾಗಿ ಜಿದ್ದಾಜಿದ್ದಿನ ಟಾಸ್ಕ್‌ಗಳಲ್ಲಿ ಎಲ್ಲರೂ ಭಾಗವಹಿಸಿದ್ದಾರೆ. ಅದರಂತೆ ನಾಲ್ಕು ತಂಡಗಳಾಗಿ ಮಾಡಿ, ಒಂದೊಂದು ತಂಡದಲ್ಲಿ ಮೂರು ಸ್ಪರ್ಧಿಗಳಿದ್ದಾರೆ. ಈಗಾಗಲೇ ಬುಧವಾರವೂ ನಿಲ್ಲೆ ನಿಲ್ಲೆ ಕಾವೇರಿ ಟಾಸ್ಕ್‌ ಸ್ಪರ್ಧಿಗಳ ನಡುವೆ ಕಿಚ್ಚು ಹಚ್ಚಿದೆ. ಮಾತಿನ ಚಕಮಕಿ ನಡೆದಿವೆ, ದೈಹಿಕವಾಗಿ ಉಗ್ರಂ ಮಂಜು ಮತ್ತು ತ್ರಿವಿಕ್ರಮ್‌ ನಡುವೆ ಕಾಳಗ ನಡೆಯಿತು. ತುಂಬಿದ ನೀರಿನ ಡ್ರಮ್‌ ಗೋಲ್ಡ್‌ ಸುರೇಶ್‌ ಕಾಲಿನ ಮೇಲೆಯೂ ಬಿದ್ದಿತು. ಈಗ ಇಂದಿನ (ನ. 7) ಏಪಿಸೋಡ್‌ನ ಝಲಕ್‌ ಹೇಗಿರಲಿದೆ ಎಂಬ ಪ್ರೋಮೋ ಹೊರಬಂದಿದೆ.
ಕ್ಯಾಪ್ಟನ್ಸಿ ಟಾಸ್ಕ್‌ನಲ್ಲಿ ಕೋಲಾಹಲ
ಅದರಂತೆ, ಈ ವಾರದ ಕ್ಯಾಪ್ಟನ್ಸಿ ಟಾಸ್ಕ್‌ನಿಂದ ಯಾವ ಇಬ್ಬರು ಸ್ಪರ್ಧಿ ಹೊರಗಿರಬೇಕು ಎಂಬುದನ್ನು ತಿಳಿಸುವ ಟಾಸ್ಕ್‌ ನೀಡಿದ್ದಾರೆ ಬಿಗ್‌ ಬಾಸ್. ಒಂದು ಬೋರ್ಡ್‌ನಲ್ಲಿ ಎರಡು ಫೋಟೋ ಹಾಕುವ ಮೂಲಕ ಅರ್ಹತೆ ಇಲ್ಲದ ಇಬ್ಬರನ್ನು ಸೂಚಿಸಬೇಕು. ಅದರಂತೆ, ತ್ರಿವಿಕ್ರಮ್‌, ಧರ್ಮ ಮತ್ತು ಧನರಾಜ್ ಅವರ ಹೆಸರನ್ನು ಸೂಚಿಸಿದರೆ, ಅದೇ ಧರ್ಮ ತ್ರಿವಿಕ್ರಮ್‌ ಮತ್ತು ಧನರಾಜ್ ಫೋಟೋ ಸಿಕ್ಕಿಸಿದ್ದಾರೆ. ಐಶ್ವರ್ಯಾ ಸಹ ತ್ರಿವಿಕ್ರಮ್‌ ಮತ್ತು ಧನರಾಜ್ ಅವರ ಹೆಸರನ್ನು ಸೂಚಿಸಿದ್ದಾರೆ. ಇತ್ತ ಧನರಾಜ್, ತ್ರಿವಿಕ್ರಮ್‌ ಮತ್ತು ಅನುಷಾ ಅವರ ಹೆಸರನ್ನು ಸೂಚಿಸಿ ಇವರು ಕ್ಯಾಪ್ಟನ್‌ ಆಗೋಕೆ ಅರ್ಹರಲ್ಲ ಎಂದಿದ್ದಾರೆ.
ಧನರಾಜ್ ವಿರುದ್ಧ ಮುಗಿಬಿದ್ದ ಮನೆ ಮಂದಿ
ಅನುಷಾ ಹೆಸರು ತೆಗೆದುಕೊಳ್ಳುತ್ತಿದ್ದಂತೆ, ಕೊಂಚ ಗರಂ ಆದ ಅನುಷಾ, ನಿಮಗಿಂತ ಜಾಸ್ತಿ ಅರ್ಹತೆ ನನಗಿದೆ ಎಂದಿದ್ದಾರೆ. ಇವರಷ್ಟೇ ಅಲ್ಲ, ಧನರಾಜ್‌ಗೆ ಮೆಚ್ಯುರಿಟಿ ಕಮ್ಮಿ. ತಪ್ಪನ್ನು ಒಪ್ಪಿಕೊಳ್ಳುವ ಮನಸ್ಥಿತಿ ನಿಮಗಿಲ್ಲ ಎಂದು ಗೌತಮಿ ಜಾದವ್‌ ಹೇಳಿದ್ದಾರೆ. ಬಳಿಕ ಅನುಷಾ ಜತೆಗೆ ಮೋಕ್ಷಿತಾ ಅವರ ಹೆಸರನ್ನೂ ಕ್ಯಾಪ್ಟನ್ಸಿಗೆ ಅರ್ಹರಲ್ಲ ಎಂದು ಸೂಚಿಸಿದ್ದರು ಧನರಾಜ್. ರೂಲ್ಸ್‌ ಅಂತ ಬಂದಾಗ ಅವರು ತುಂಬ ಎಡವುತ್ತಾರೆ ಎಂದು ಕಾರಣ ನೀಡಿದ್ದಾರೆ. ಧನರಾಜ್ ಅವರ ಈ ರೀಸನ್‌ಗೆ ಮೋಕ್ಷಿತಾ ಗರಂ ಆಗಿದ್ದಾರೆ. ನೆಟ್ಟಗೆ ಒಂದು ಡಿಸಿಷನ್‌ ತೆಗೆದುಕೊಳ್ಳಲು ಬರಲ್ಲ, ಸೆನ್ಸ್‌ ಇದೆಯಾ ತಲೆಯಲ್ಲಿ ಎಂದಿದ್ದಾರೆ. ಅಲ್ಲೇ ಪಕ್ಕದಲ್ಲಿದ್ದ ಅನುಷಾ ಸಹ ಸುಮ್ಮನಿದರೆ, ಮಾತನಾಡೋಕೆ ಧೈರ್ಯ ಇಲ್ಲ ಆ ವ್ಯಕ್ತಿಗೆ ಎಂದಿದ್ದಾರೆ.
ಬಾತ್‌ರೂಮ್‌ನಲ್ಲಿ ಧನರಾಜ್ ಕಣ್ಣೀರು
ಎಲ್ಲರ ಮಾತಿಗೆ ಕೊಂಚ ಗರಂ ಆದ ಧನರಾಜ್, ಈಗ ಧನರಾಜ್ ಮೊದಲಿನಂತಿಲ್ಲ. ಬೇರೆ ಆಗಿದ್ದಾನೆ. ಭಯಪಡುವ ಧನರಾಜ್ ಇಲ್ಲವೇ ಇಲ್ಲ ಈಗ ಎಂದಿದ್ದಾರೆ. ಬಳಿಕ ಬಾತ್‌ರೂಮ್‌ನಲ್ಲಿ ಬಿಕ್ಕಳಿಸಿ ಅತ್ತಿದ್ದಾರೆ. ದೋಸ್ತನ ಈ ಸ್ಥಿತಿ ಕಂಡು ಹನುಮಂತ ಬೇಸರದಲ್ಲಿದ್ದಾನೆ. ಈ ಪ್ರೋಮೋ ಬಿಡುಗಡೆ ಆಗುತ್ತಿದ್ದಂತೆ, ಸಾಕಷ್ಟು ಮಂದಿ ವೀಕ್ಷಕರು ಕಾಮೆಂಟ್‌ ಮಾಡಿದ್ದಾರೆ. ಕೆಲವರು ಧನರಾಜ್‌ಗೆ ಹೀಗಾಗಬಾರದಿತ್ತು ಎಂದರೆ, ಇನ್ನು ಕೆಲವರು ಈ ಅಳುಮುಂಜಿನ ಮೊದಲು ಮನೆಗೆ ಕಳಸ್ರೋ ಎಂದಿದ್ದಾರೆ. ಒಟ್ಟಿನಲ್ಲಿ ಈ ವಾರದ ಕ್ಯಾಪ್ಟನ್‌ ಯಾರಾಗುತ್ತಾರೆ ಎಂಬ ಕುತೂಹಲ ಇಂದು ಗೊತ್ತಾಗಲಿದೆ.