ಹೀಗೇನಾದ್ರೂ ಆದ್ರೆ, ಕನ್ನಡದ ಬಿಗ್‌ಬಾಸ್‌ ಇತಿಹಾಸದಲ್ಲಿಯೇ ಇದು ಮೊದಲು! ಕಿಚ್ಚನ ಪಂಚಾಯ್ತಿಯಲ್ಲಿ ಸಿಕ್ತು ದೊಡ್ಡ ಸುಳಿವು
Oct 20, 2024 07:16 AM IST
Share
ಕಿಚ್ಚನ ಪಂಚಾಯ್ತಿಯಲ್ಲಿ ಸಿಕ್ತು ದೊಡ್ಡ ಸುಳಿವು, ಮತ್ತೆ ಬರ್ತಾರಾ ಜಗದೀಶ್
- Bigg Boss Kannada 11 October 19th Episode: ಶನಿವಾರದ ವಾರದ ಕಥೆ ಕಿಚ್ಚನ ಜೊತೆ ಸಂಚಿಕೆಯಲ್ಲಿ ಜಗದೀಶ್ ಅವರ ವಿಚಾರವನ್ನೇ ಕೆದಕಿ ಕೆದಕಿ ಮಾತನಾಡಿದರು ಸುದೀಪ್. ಯಾವುದು ಸರಿ, ಯಾವುದು ತಪ್ಪು ಎಂಬುದರ ಜತೆಗೆ ಪ್ರಾಮಾಣಿಕತೆಯ ಪಾಠ ಮಾಡಿದರು.
Bigg boss kannada 11: ಒಂದಿಡೀ ವಾರ ಬಿಗ್‌ ಬಾಸ್‌ ಮನೆಯಲ್ಲಿ ನಡೆದ ರಾದ್ಧಾಂತಗಳನ್ನು ನೋಡಿ ಕಿಚ್ಚ ಸುದೀಪ್ ತಾಳ್ಮೆ ಕಳೆದುಕೊಂಡಿದ್ದಾರೆ. ಪ್ರಶ್ನೆಗಳ ಸುರಿಮಳೆಯನ್ನೇ ಬಿಗ್‌ ಬಾಸ್‌ ಸ್ಪರ್ಧಿಗಳ ಮುಂದಿಟ್ಟಿದ್ದಾರೆ. ಪ್ರಾಮಾಣಿಕತೆ ಬಗ್ಗೆಯೂ ಪಾಠ ಮಾಡಿದ್ದಾರೆ. ನೀವೇಷ್ಟು ಸರಿ ಇದ್ದೀರಿ ಎಂದೂ ಪ್ರಶ್ನಿಸಿದ್ದಾರೆ. ಅಷ್ಟೇ ಅಲ್ಲ ಕೇಕ್‌ ತಿನಿಸಿ ಎಲ್ಲರ ಮುಖಕ್ಕೆ ಮಂಗಳಾರತಿಯನ್ನೂ ಮಾಡಿದ್ದಾರೆ. ಇದಕ್ಕೂ ಒಂದು ಹಂತ ಮೇಲೆ ಹೋಗಿ. ನನ್ನ ಇಲ್ಲಿಯವರೆಗಿನ ಬಿಗ್‌ ಬಾಸ್‌ ಪಯಣದಲ್ಲಿ ಈ ಸೀಸನ್‌ ಅತೀ ಕೆಟ್ಟದ್ದು ಎಂದೂ ಹೇಳಿದ್ದಾರೆ. ಹಾಗಾದರೆ, ಶನಿವಾರದ ಸಂಚಿಕೆಯಲ್ಲಿ ಇನ್ನೂ ಏನೆನೆಲ್ಲ ಆಯ್ತು? ಇಲ್ಲಿದೆ.
ಬಿಗ್‌ಬಾಸ್‌ ಮನೆಯ ಮಹಿಳಾ ಸದಸ್ಯರ ಮೇಲೆ ಕೆಟ್ಟ ಪದ ಬಳಕೆ ಮಾಡಿದ, ಇಡೀ ಮನೆಯ ಮಹಿಳೆಯರಿಂದ ಛೀ ಥೂ ಎನಿಸಿಕೊಂಡರು ಲಾಯರ್‌ ಜಗದೀಶ್. ಅದರ ಪರಿಣಾಮದಿಂದಲೇ ಬಿಗ್‌ ಬಾಸ್‌ ಆದೇಶದಂತೆ ನೇರವಾಗಿ ಮುಖ್ಯದ್ವಾರದಿಂದ ಹೊರ ನಡೆದರು. ದೈಹಿಕ ಹಲ್ಲೆ ಆರೋಪದ ಮೇಲೆ ರಂಜಿತ್‌ ಸಹ ಮನೆಯಿಂದ ಔಟ್‌ ಆದರು. ಇದೆಲ್ಲ ನಡೆದಿದ್ದರಿಂದ ವಾರದ ಕಥೆ ಕಿಚ್ಚನ ಜೊತೆ ಶೋ ಹೇಗಿರಬಹುದು? ಎಂಬ ಕುತೂಹಲ ಇತ್ತು. ಅದರಂತೆ, ಶನಿವಾರ ಇಡೀ ಒಂದು ಏಪಿಸೋಡ್‌ ಪೂರ್ತಿ ಮನೆ ಮಂದಿಗೆ ಹೆಚ್ಚು ಮಾತನಾಡಲು ಅವಕಾಶ ಕೊಡದೇ, ಚೆನ್ನಾಗಿಯೇ ಕ್ಲಾಸ್‌ ತೆಗೆದುಕೊಂಡಿದ್ದಾರೆ.
ಕೇಕ್‌ ತಿನಿಸಿ ಮಂಗಳಾರತಿ ಮಾಡಿದ ಕಿಚ್ಚ
ಶನಿವಾರದ ಸಂಚಿಕೆಯಲ್ಲಿ ಜಗದೀಶ್ ಅವರ ವಿಚಾರವನ್ನೇ ಕೆದಕಿ ಕೆದಕಿ ಮಾತನಾಡಿದರು ಸುದೀಪ್. ಅವರು ಮಾಡಿದ್ದು ತಪ್ಪು, ನೀವು ಮಾಡಿದ್ದು ಸರೀನಾ ಎಂದು ಪ್ರಶ್ನೆ ಮಾಡಿದರು. ಶೋ ಆರಂಭವಾದ ಬಳಿಕ ಒಂದು ದೊಡ್ಡ ಕೇಕ್‌ ಅನ್ನು ಬಿಗ್‌ ಬಾಸ್‌ ಮನೆ ಮಂದಿಗೆ ಕಳಿಸಿಕೊಡಲಾಗಿತ್ತು. ಅದರ ಮೇಲೆ ಧನ್ಯವಾದಗಳು ಎಂದೂ ಬರೆಯಲಾಗಿತ್ತು. ಸ್ಪರ್ಧಿಗಳು ಏನೋ ಮಹಾ ಸಾಧನೆ ಮಾಡಿದ್ದೇವೆ, ನಮ್ಮಿಂದ ಏನೋ ಹೊಸತು ಘಟಿಸಿದೆ ಅನ್ನೋ ಖುಷಿಯಲ್ಲಿ ಕೇಕ್‌ ಕತ್ತರಿಸಿ ಸವಿದಿದ್ದಾರೆ.
ಕೆರಿಯರ್‌ನ ಕೆಟ್ಟ ಸೀಸನ್‌ ಇದು
ಬಿಗ್‌ಬಾಸ್‌ ಪ್ರೆಸ್‌ಮೀಟ್‌ ಮಾಡುವಾಗ, ಮಾಧ್ಯಮ ಸ್ನೇಹಿತರು ಒಂದು ಪ್ರಶ್ನೆ ಕೇಳುತ್ತಲಿರುತ್ತಾರೆ. ನಿಮ್ಮ ಪಾಲಿನ ಅತಿ ಕೆಟ್ಟ ಸೀಸನ್‌ ಯಾವುದು ಎಂದು. ನಾನು ಸೀಸನ್‌ 6 ಎನ್ನುತ್ತಿದ್ದೆ. ಇದೀಗ ನೀವು ಅದನ್ನು ರೀಪ್ಲೇಸ್‌ ಮಾಡಿದ್ದೀರಿ. ಅತಿ ಕೆಟ್ಟ ಸೀಸನ್‌ ಯಾವುದು ಎಂದರೆ ಇನ್ಮೇಲೆ 6 ಎನ್ನುವ ಬದಲು 11 ಎನ್ನುತ್ತೇನೆ. ಈ ನನ್ನ ಅಭಿಪ್ರಾಯವನ್ನು ಬದಲಿದ್ದಕ್ಕೆ ನಿಮ್ಮೆಲ್ಲರಿಗೂ ಈ ಕೇಕ್‌ ಎನ್ನುತ್ತಾರೆ ಸುದೀಪ್. ಅಲ್ಲಿಗೆ ಖುಷಿಯಲ್ಲಿದ್ದ ಸ್ಪರ್ಧಿಗಳು, ಹ್ಯಾಪು ಮೋರೆ ಹಾಕಿ ತಲೆ ತಗ್ಗಿಸುತ್ತಾರೆ.
ಮತ್ತೆ ಎಂಟ್ರಿ ಕೊಡ್ತಾರಾ ಜಗದೀಶ್?
ಶನಿವಾರದ ಸಂಚಿಕೆಯಲ್ಲಿ ಬೇರೆ ಚಟುವಟಿಕೆಗಳು ನಡೆಯದೇ, ಜಗದೀಶ್ ಅವರ ವಿಚಾರವನ್ನೇ ಹೈಲೈಟ್‌ ಮಾಡಿ ಮಾತನಾಡಿದರು ಕಿಚ್ಚ. ಯಾವುದು ಸತ್ಯ, ಯಾವುದು ಸುಳ್ಳು, ಯಾವ ಅಭಿಪ್ರಾಯ ಸರಿ, ಯಾವುದು ತಪ್ಪು ಎಂದು ಸ್ಪರ್ಧಿಗಳ ಮುಖಕ್ಕೆ ಹೊಡೆದಂತೆ ಪರಾಮರ್ಶೆ ಮಾಡಿದರು. ಕೊನೆಗೆ ಇದೇ ಸಂಚಿಕೆಯ ಕೊನೆಯಲ್ಲಿ ಭಾನುವಾರ ಏನೆಲ್ಲ ಇರಲಿದೆ ಎಂಬ ಝಲಕ್‌ ತೋರಿಸಲಾಯ್ತು. ಅಚ್ಚರಿಯ ರೀತಿಯಲ್ಲಿ ಜಗದೀಶ್ ಅವರು ಕಾಣಿಸಿದ್ದಾರೆ.
"ಆ ಪ್ರೋಮೋದಲ್ಲಿ ಕೆಲವೊಂದು ಘಟನೆಗಳು ನಡೆಯಬಾರದಿತ್ತು. ನಡೆದಿದೆ. ನನ್ನ ಕಡೆಯಿಂದ ತಪ್ಪಾಗಿದೆ. ‘ಮೈ ಹಂಸ’. ನನ್ನದೊಂದು ರಿಕ್ವೆಸ್ಟ್ ಇದೆ. ಇಫ್ ಪಾಸಿಬಲ್ ಟೇಕ್ ಮಿ ಬ್ಯಾಕ್ ಎಂದಿದ್ದಾರೆ. ಇದಕ್ಕೂ ಮೊದಲು ಅವರು ನಿಯಮ ಮುರಿದು ಹೋಗಿಲ್ಲ. ಮಹಿಳೆಯರಿಗೆ ಅಗೌರವ ತೋರಿದ್ದಾರೆ. ಆ ಕಾರಣಕ್ಕೆ ಹೊರಕಳಿಸಿದ್ದಾರೆ ಎಂದೂ ಸುದೀಪ್ ಹೇಳಿದ್ದಾರೆ. ಹಾಗಾದರೆ, ಮತ್ತೆ ಬಿಗ್‌ ಮನೆಗೆ ಎಂಟ್ರಿಯಾಗ್ತಾರಾ ಜಗದೀಶ್? ಒಂದು ವೇಳೆ ಜಗದೀಶ್ ಆಗಮಿಸಿದರೆ, ಅದು ಕನ್ನಡದ ಬಿಗ್‌ಬಾಸ್‌ ಇತಿಹಾಸದಲ್ಲಿಯೇ ಮೊದಲು. ಇದಕ್ಕೆ ಇಂದಿನ ಸಂಚಿಕೆಯಲ್ಲಿ ಉತ್ತರ ಸಿಗಲಿದೆ.