BBK 10: ಕಿರುಚಾಡಿದ್ರಿ, ಕೆಟ್ಟವರಾದ್ರಿ.. ನೀವಿಬ್ಬರೂ ಇಲ್ಲದಿದ್ರೆ ಈ ಸೀಸನ್ನೇ ಅಪೂರ್ಣ; ಕಿಚ್ಚನ ಚಪ್ಪಾಳೆ ಪಡೆದ ಸಂಗೀತಾ, ವಿನಯ್

BBK 10: ಬಿಗ್‌ಬಾಸ್‌ ಕನ್ನಡ ಸೀಸನ್‌ 10 ಕೊನೇ ಹಂತಕ್ಕೆ ಬಂದಿದೆ. ಈ ಸೀಸನ್‌ನ ಕೊನೆಯ ಪಂಚಾಯ್ತಿ ನಡೆಸಿಕೊಟ್ಟಿದ್ದಾರೆ ಕಿಚ್ಚ ಸುದೀಪ್.‌ ಮತ್ತೊಂದು ಕಡೆಗೆ ಉಳಿದ ಬೆರಳೆಣಿಕೆ ಸದಸ್ಯರಲ್ಲಿ ಗೆಲುವಿನ ಮೆಟ್ಟಿಲೇರಲು ಕಾತರರಾಗಿದ್ದಾರೆ. ಇತ್ತ ತಮ್ಮ ಆಟದ ವೈಖರಿಯಿಂದಲೇ ಬಿಗ್‌ ಬಾಸ್‌ ಮನೆಯಲ್ಲಿ ಕಿಚ್ಚು ಹಚ್ಚಿದ್ದ ಸಂಗೀತಾ ಶೃಂಗೇರಿ ಮತ್ತು ವಿನಯ್‌ ಗೌಡ ಅವರಿಗೆ ಕಿಚ್ಚನಿಂದ ಕೊನೇ ಚಪ್ಪಾಳೆ ಸಿಕ್ಕಿದೆ.

ಈ ವಾರ ಯಾರಿಗೆ ಕಿಚ್ಚನ ಚಪ್ಪಾಳೆ ಸಿಗಲಿದೆ ಎಂಬ ಕೌತುಕ ಮನೆ ಮಂದಿಯವರ ತಲೆಯಲ್ಲಿ ಓಡುತ್ತಿದ್ದರೆ, ಇತ್ತ ವೀಕ್ಷಕರಿಗೂ ಆ ಕುತೂಹಲವಿತ್ತು. ಅದರಂತೆ ಇದೇ ಮೊದಲ ಬಾರಿ, ಬಿಗ್‌ ಬಾಸ್‌ ಇತಿಹಾಸದಲ್ಲಿಯೇ ಒಂದೇ ವಾರದಲ್ಲಿ ಇಬ್ಬರಿಗೆ ಕಿಚ್ಚನ ಚಪ್ಪಾಳೆ ನೀಡಿದ ಉದಾಹರಣೆ ಇರಲಿಲ್ಲ. ಇದೀಗ ಅದೂ 10ನೇ ಸೀಸನ್‌ನಲ್ಲಿ ಘಟಿಸಿದೆ. ವಿನಯ್‌ ಗೌಡ ಮತ್ತು ಸಂಗೀತಾಗೆ ಕೊನೇ ವಾರದ ಕಿಚ್ಚನ ಚಪ್ಪಾಳೆ ಲಭಿಸಿದೆ.

ಇದನ್ನೂ ಓದಿ: ‘ರಕ್ಷಕ್‌ ಅಂದ್ರೆ ಬುಲೆಟ್‌ ಪ್ರಕಾಶ್‌ ಮಗ ಅಲ್ವಾ, ವಯಸ್ಸು 11‌, 12 ಇರಬೇಕಲ್ವಾ? ಅಪ್ಪನ ಹೆಸರು ಉಳಿಸೋ ಮಗನಾಗಿ’; ಕಿಚ್ಚನ ಪಾಠ

ಸುದೀಪ್‌ ಹೇಳಿದ್ದೇನು?

ಕಿಚ್ಚನ ಚಪ್ಪಾಳೆ ಕೊಡುವುದಕ್ಕೂ ಮುನ್ನ ಸುದೀಪ್‌ ಹೇಳಿದ್ದು ಹೀಗೆ, "ಬಿಗ್‌ಬಾಸ್‌ ಸೀಸನ್‌ 10ರಲ್ಲಿ ಸಾಕಷ್ಟು ವಿಚಾರಗಳನ್ನು ಹೇಳಿದ್ದೇನೆ. ಕೆಲ ವಾರ ಕಿಚ್ಚನ ಚಪ್ಪಾಳೆ ಕೊಟ್ಟೆ, ಮತ್ತೆ ಇನ್ನು ಕೆಲ ವಾರ ಕೊಡಬೇಕು ಅನಿಸಲಿಲ್ಲ. ಈ ಪ್ರಯಾಣದಲ್ಲಿ ಬೈಸಿಕೊಂಡವರಿದ್ದಾರೆ. ತಪ್ಪು ಮಾಡಿದವರಿದ್ದಾರೆ, ಅತ್ತಿದ್ದಾರೆ, ನಕ್ಕಿದ್ದಾರೆ. ಆದರೆ, ಈ ಸೀಸನ್‌ನಲ್ಲಿ ವಿನಯ್, ಸಂಗೀತಾ ಇಲ್ಲ ಅಂದ್ರೆ ಅದು ಸಂಪೂರ್ಣ ಅಂತ ಅನಿಸೋದಿಲ್ಲ" ಎಂದಿದ್ದಾರೆ ಸುದೀಪ್.‌

ಈ ಜರ್ನಿಯಲ್ಲಿ ನಾನು ಇಬ್ಬರಿಗೆ ಚಪ್ಪಾಳೆ ಕೊಡಲು ಇಷ್ಟಪಡ್ತಿದೀನಿ. ಅಭಿಪ್ರಾಯಗಳನ್ನು ಹೇಳಿದ್ರಿ, ಜಗಳ ಆಡಿದ್ರಿ, ಕಿರುಚಾಡಿದ್ರಿ, ಕೆಟ್ಟವರಾಗಿದ್ರಿ ತಪ್ಪು ಮಾಡಿದ್ರಿ, ಸರಿಯೂ ಮಾಡಿದ್ರಿ, ಇಡೀ ಸೀಸನ್‌ಗೆ ಅದ್ಭುತ ಕೊಡುಗೆ ನೀಡಿದ್ದೀರಿ. ಈ ಸೀಸನ್‌ನ ಕೊನೆಯ ಚಪ್ಪಾಳೆ ಸಂಗೀತಾ ಹಾಗೂ ವಿನಯ್‌ಗೆ" ಎಂದಿದ್ದಾರೆ ಸುದೀಪ್‌.

ಇದನ್ನೂ ಓದಿ: ‘ಬರೀ ದರ್ಶನ್‌ಗಷ್ಟೇ ಅಲ್ಲ ಸುದೀಪಣ್ಣನಿಗೂ ಸಿನಿಮಾ ಮಾಡ್ತಿನಿ, ಆದ್ರೆ..’; ನಿರ್ದೇಶಕ ತರುಣ್‌ ಸುಧೀರ್‌ ಮಾತು

ಚಪ್ಪಾಳೆ ಪಡೆದ ಬಗ್ಗೆ ವಿನಯ್‌, ಸಂಗೀತಾ ಏನಂದ್ರು?

ಕಿಚ್ಚನಿಂದ ಚಪ್ಪಾಳೆ ಸಿಗುತ್ತಿದ್ದಂತೆ, ವಿನಯ್‌ ಗೌಡ ಕೊಂಚ ಭಾವುಕರಾದರು. ಈ ಸೀಸನ್‌ನಲ್ಲಿ ನಾನು ನಿಮ್ಮ ಚಪ್ಪಾಳೆ ಪಡೆಯುತ್ತೇನೋ ಇಲ್ಲವೋ ಎಂದೇ ನಾನು ಭಾವಿಸಿದ್ದೆ. ಇದೀಗ ಈ ಸೀಸನ್‌ ಗೆದ್ದಷ್ಟೇ ಖುಷಿಯಾಗ್ತಿದೆ. ತುಂಬ ತಪ್ಪು ಮಾಡಿದ್ದೇನೆ. ಮಾಡಿದ ತಪ್ಪನ್ನು ತಿದ್ದಿದ್ದೀರಿ. ಥ್ಯಾಂಕ್ಯು ಸರ್"‌ ಎಂದು ವಿನಯ್‌ ಹೇಳಿದರೆ, ಇದೇ ಖುಷಿಯನ್ನು ಸಂಗೀತಾ ಸಹ ಹಂಚಿಕೊಂಡರು. "ವಾರಾಂತ್ಯದಲ್ಲಿ ಕಿಚ್ಚನ ಚಪ್ಪಾಳೆ ವಿಚಾರದಲ್ಲಿ ನನಗೆ ಈ ಸಲ ಆ ಚಪ್ಪಾಳೆ ಸಿಗುತ್ತಾ? ಎಂದು ನಾನೇ ಪ್ರಶ್ನೆ ಮಾಡಿಕೊಳ್ಳುತ್ತಿದ್ದೆ. ಉತ್ತಮ ಪಟ್ಟವೇ ಸಿಗಲ್ಲ, ಇನ್ನೆಲ್ಲಿಂದ ಚಪ್ಪಾಳೆ ಎಂದು ಸುಮ್ಮನಾಗಿದ್ದೆ. ಈಗ ಖುಷಿಯಾಗಿದೆ. ಇದಕ್ಕಾಗಿ ನಾವು ಕೆಲಸ ಮಾಡುವ ಅವಶ್ಯಕತೆ ಇಲ್ಲ. ನಾವು ನಾವಾಗಿದ್ದರೆ ಎಲ್ಲವೂ ತಾನಾಗಿಯೇ ಬರುತ್ತೆ" ಎಂದಿದ್ದಾರೆ ಸಂಗೀತಾ.

ಫಿನಾಲೆಗೆ ಸಂಗೀತಾ ಜತೆ ಸಂತು- ಪಂತು

ಈಗಾಗಲೇ ಸಂಗೀತಾ ಶೃಂಗೇರಿ ಫಿನಾಲೆ ವೇದಿಕೆ ತಲುಪಿದ್ದಾರೆ. ಇದೀಗ ಶನಿವಾರ ಒಬ್ಬರನ್ನು ಸೇವ್‌ ಮಾಡುವ ಮೂಲಕ ಫಿನಾಲೆಗೆ ಕಳುಹಿಸಿದ್ದಾರೆ ಸುದೀಪ್. ಅದರಂತೆ ಶನಿವಾರ ವರ್ತೂರು ಸಂತೋಷ್‌ ಸೇವ್‌ ಆಗುವ ಮೂಲಕ ಫಿನಾಲೆಗೆ ತೆರಳಿದ್ದಾರೆ. ಇನ್ನು ಕಳೆದ ವಾರ ಕೇವಲ 1 ವೋಟ್‌ ಪಡೆದು ನಾಮಿನೇಟ್‌ ತೂಗುಗತ್ತಿಯಿಂದ ಪಾರಾಗಿದ್ದ ತುಕಾಲಿ ಸಂತೋಷ್‌ ಅವರೂ ಫಿನಾಲೆಗೆ ತಲುಪಿದ್ದಾರೆ ಎಂಬುದನ್ನೂ ಸುದೀಪ್‌ ಶನಿವಾರದ ಏಪಿಸೋಡ್‌ನಲ್ಲಿ ತಿಳಿಸಿದ್ದಾರೆ.