Nawazuddin Siddiqui on Kantara: ರಿಷಬ್‌ ಶೆಟ್ಟಿ ನಮ್ಮಂತೆ ಏನೂ ಮಾಡಲಿಲ್ಲ..ಬಾಲಿವುಡ್‌ ನಟ ನವಾಜುದ್ದೀನಿ ಸಿದ್ದಿಕಿ ಹೀಗೆ ಹೇಳಿದ್ದೇಕೆ..?

'ಕಾಂತಾರ' ಸಿನಿಮಾವನ್ನು ಎಷ್ಟು ಹೊಗಳಿದರೂ ಸಾಲದು. ಎಲ್ಲಿ ನೋಡಿದರೂ ಈ ಸಿನಿಮಾದ್ದೇ ಗುಣಗಾನ, ಎಲ್ಲಿ ಹೋದರೂ ರಿಷಬ್‌ ಶೆಟ್ಟಿ ಬಗ್ಗೆಯೇ ಮಾತು. ರಿಷಬ್‌ ಶೆಟ್ಟಿ ಎಂದರೆ ಯಾರು ಎಂದೇ ತಿಳಿಯದ ಬಾಲಿವುಡ್‌ ಮಂದಿ, ಈಗ ಅವರ ಪ್ರತಿಭೆಯನ್ನು ಹಾಡಿ ಹೊಗಳುತ್ತಿದ್ದಾರೆ. ಹಿಂದಿ, ತೆಲುಗು ಮಾಧ್ಯಮಗಳು ರಿಷಬ್‌ ಅವರನ್ನು ಮೇಲಿಂದ ಮೇಲೆ ಸಂದರ್ಶನ ಮಾಡುತ್ತಿವೆ.

ಇತ್ತೀಚೆಗೆ ರಿಷಬ್‌ ಶೆಟ್ಟಿ ಖ್ಯಾತ ಫ್ಯಾಷನ್‌ ಮ್ಯಾಗಜಿನ್‌ ಒಂದರ ಮುಖಪುಟದಲ್ಲಿ ಮಿಂಚಿದ್ದರು. ಬಾಲಿವುಡ್‌ನಲ್ಲಿ ನಡೆಯುವ ಅನೇಕ ಕಾರ್ಯಕ್ರಮಗಳಿಗೆ ರಿಷಬ್‌ ಅವರಿಗೆ ಆಹ್ವಾನ ದೊರೆಯುತ್ತಲೇ ಇದೆ. ಮತ್ತೊಂದೆಡೆ ರಿಷಬ್‌ ಕಾಂತಾರ ಭಾಗ 2ರ ಸಿದ್ಧತೆಯಲ್ಲಿದ್ದಾರೆ. ಇತ್ತೀಚೆಗೆ ಅವರು ಮತ್ತೊಮ್ಮೆ ಪಂಜುರ್ಲಿ ದೈವದ ಸನ್ನಿಧಿಗೆ ತೆರಳಿ, ಕಾಂತಾರ ಭಾಗ 2 ಮಾಡಲು ಅಪ್ಪಣೆ ಪಡೆದಿದ್ದಾರೆ ಎಂದು ತಿಳಿದುಬಂದಿದೆ. ಈ ನಡುವೆ ರಿಷಬ್‌ ಶೆಟ್ಟಿ, ಬಾಲಿವುಡ್‌ ಖ್ಯಾತ ನಟ ನವಾಜುದ್ದೀನ್‌ ಸಿದ್ದಿಕಿ ಅವರನ್ನು ಭೇಟಿ ಮಾಡಿದ್ದಾರೆ. ಬಾಲಿವುಡ್‌ ಕಾರ್ಯಕ್ರಮವೊಂದರಲ್ಲಿ ಇಬ್ಬರೂ ಮುಖಾಮುಖಿಯಾಗಿದ್ದಾರೆ. ಈ ವೇಳೆ ನಟ ನವಾಜುದ್ದೀನ್‌ ಸಿದ್ದಿಕಿ ನನಗೆ ರಿಷಬ್‌ ಶೆಟ್ಟಿ ನೋಡಿದರೆ ಹೊಟ್ಟೆಉರಿ ಎಂದಿದ್ದಾರೆ.

ರಿಷಬ್‌ ಶೆಟ್ಟಿ ಅವರ ಪ್ರತಿಭೆ ನೋಡಿ ಜನರೆಲ್ಲಾ ಶಾಕ್‌ ಆಗಿದ್ದಾರೆ. ಅವರು ನಮ್ಮಂತೆ ಹೆಚ್ಚಿಗೆ ಪ್ರಮೋಷನ್‌ ಮಾಡಲಿಲ್ಲ, ಪ್ರೀ ರಿಲೀಸ್‌ ಇವೆಂಟ್‌ ಮಾಡಲಿಲ್ಲ, ಸೈಲೆಂಟ್‌ ಆಗಿ ಬಂದು ಹವಾ ಎಬ್ಬಿಸಿ ಹೊರಟುಹೋದರು. ರಿಷಬ್‌ ಶೆಟ್ಟಿ ನಮ್ಮೆಲ್ಲರಿಗೂ ಸ್ಫೂರ್ತಿ. ಸಿನಿಮಾ ನೋಡಿ ಇಡೀ ಭಾರತೀಯರೇ ಮೆಚ್ಚಿಕೊಂಡಿದ್ದಾರೆ. ಅವರನ್ನು ನೋಡಿದರೆ ನನಗೆ ಹೊಟ್ಟೆಕಿಚ್ಚಾಗುತ್ತಿದೆ. ನಾನೂ ಕೂಡಾ ಅವರಂತೆ ಪ್ರಯತ್ನ ಮಾಡಬೇಕಿದೆ ಎಂದಿದ್ದಾರೆ. ಇದಕ್ಕೆ ಉತ್ತರಿಸಿದ ರಿಷಬ್‌ ಶೆಟ್ಟಿ, ನಾನು ನವಾಜುದ್ದೀನ್‌ ಭಾಯ್‌ ಅವರ ದೊಡ್ಡ ಫ್ಯಾನ್‌, ಅವರ ಸಿನಿಮಾಗಳನ್ನು ನಾನು ನೋಡಿದ್ದೇನೆ. ಇವರಂತ ಖ್ಯಾತ ನಟರಿಂದ ಇಷ್ಟು ದೊಡ್ಡ ಮಾತುಗಳನ್ನು ನಾನು ಊಹಿಸಿರಲಿಲ್ಲ. ನಮ್ಮಂತವರಿಗೆ ಇವರೇ ಸ್ಫೂರ್ತಿ ಎಂದರು.

ಮತ್ತೊಮ್ಮೆ ರಿಷಬ್‌ ಶೆಟ್ಟಿಗೆ ನಿರೂಪಕಿಯಿಂದ ನೀವು ಬಾಲಿವುಡ್‌ನಲ್ಲಿ ಸಿನಿಮಾ ಮಾಡ್ತೀರ..? ಎಂಬ ಪ್ರಶ್ನೆ ಎದುರಾಯ್ತು. ಇದಕ್ಕೆ ಉತ್ತರಿಸಿದ ರಿಷಬ್‌ ಶೆಟ್ಟಿ, ಇಲ್ಲ, ನಾನು ಕನ್ನಡದಲ್ಲೇ ಸಿನಿಮಾ ಮಾಡುತ್ತೇನೆ ಎಂದರು. ಹಾಗೇ ನಿರೂಪಕಿ ನವಾಜುದ್ದೀನ್‌ ಸಿದ್ದಿಕಿ ಅವರನ್ನು ಕುರಿತು, ನೀವು ಕನ್ನಡದಲ್ಲಿ ಸಿನಿಮಾ ಮಾಡ್ತೀರ ಎಂದರು. ರಿಷಬ್‌ ಶೆಟ್ಟಿ ಕರೆದರೆ ಖಂಡಿತ ನಾನು ಸ್ಯಾಂಡಲ್‌ವುಡ್‌ಗೆ ಬರುತ್ತೇನೆ, ಕನ್ನಡ ಸಿನಿಮಾಗಳನ್ನು ಮಾಡುತ್ತೇನೆ ಎಂದರು.

ಕಾಂತಾರ ಕ್ಲೈಮಾಕ್ಸ್‌ ಮೆಚ್ಚಿದ ಹೃತಿಕ್‌ ರೋಷನ್‌

ಉತ್ತರ ಭಾರತ ಹಾಗೂ ಬಾಲಿವುಡ್‌ ಮಂದಿಯಿಂದ ‘ಕಾಂತಾರ’ ಚಿತ್ರಕ್ಕೆ ದೊಡ್ಡ ಮಟ್ಟದ ಮೆಚ್ಚುಗೆ ಸಿಕ್ಕಿದೆ. ಬಹುತೇಕ ಸ್ಟಾರ್‌ ನಟರು ಈ ಸಿನಿಮಾ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಅಷ್ಟೇ ಅಲ್ಲ ಸೋಷಿಯಲ್‌ ಮೀಡಿಯಾದಲ್ಲಿಯೂ ಚಿತ್ರದ ಬಗ್ಗೆ ಕೆಲವು ವಿಚಾರಗಳನ್ನು ಷೇರ ಮಾಡಿಕೊಂಡು ಚಿತ್ರತಂಡದ ಪ್ರಯತ್ನವನ್ನು ಹೊಗಳಿಸಿದ್ದಾರೆ. ಬಾಲಿವುಡ್‌ನ ಕಂಗನಾ ರಣಾವತ್‌, ಸುನೀಲ್‌ ಶೆಟ್ಟಿ, ಶಿಲ್ಪಾ ಶೆಟ್ಟಿ, ಊರ್ಮಿಳಾ ಮತೋಂಡ್ಕರ್‌, ವಿವೇಕ್‌ ರಂಜನ್‌ ಅಗ್ನಿಹೋತ್ರಿ ಸೇರಿದಂತೆ ಅನೇಕ ಸೆಲೆಬ್ರಿಟಿಗಳು ಕಾಂತಾರ ಸಿನಿಮಾ ನೋಡಿ ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಇದೀಗ ಬಾಲಿವುಡ್‌ ಸ್ಟಾರ್‌ ನಟ ಹೃತಿಕ್‌ ರೋಷನ್‌ ಕೂಡಾ ಸಿನಿಮಾ ನೋಡಿ ಪ್ರತಿಕ್ರಿಯೆ ನೀಡಿದ್ದಾರೆ.

'ಕಾಂತಾರ ' ಸಿನಿಮಾ ನೋಡಿ ಬಹಳ ಕಲಿಯುವುದಿದೆ. ರಿಷಬ್‌ ಶೆಟ್ಟಿ, ಕಥೆಯನ್ನು ಹೇಳುವ ಶೈಲಿ ಬಹಳ ಅದ್ಭುತವಾಗಿದೆ. ನಿರ್ದೇಶನ, ನಟನೆ, ಮೇಕಿಂಗ್‌ ಎಲ್ಲವೂ ಅತ್ಯದ್ಭುತವಾಗಿದೆ. ಅವರ ಕ್ಲೈಮ್ಯಾಕ್ಸ್‌ ಅವತಾರವಂತೂ ನನಗೆ ಮೈ ರೋಮಾಂಚನ ಎನಿಸುವಂತೆ ಮಾಡಿದ್ದು ನಿಜ. ಇಡೀ ತಂಡಕ್ಕೆ ನನ್ನ ಕಡೆಯಿಂದ ಅಭಿನಂದನೆಗಳು" ಎಂದು ಹೃತಿಕ್‌ ರೋಷನ್‌ ಟ್ವೀಟ್‌ ಮಾಡಿದ್ದಾರೆ.