Prem Meets Sanjay Dutt: ಬಾಲಿವುಡ್ ನಟ ಸಂಜಯ್‌ ದತ್- ಪ್ರೇಮ್ ಭೇಟಿ; ಇದರ ಅಸಲಿಯತ್ತು ಏನಿರಬಹುದು?
Oct 11, 2022 07:21 AM IST
Share
ಬಾಲಿವುಡ್ ನಟ ಸಂಜಯ್‌ ದತ್- ಪ್ರೇಮ್ ಭೇಟಿ; ಇದರ ಅಸಲಿಯತ್ತು ಏನಿರಬಹುದು?
- ಇತ್ತೀಚೆಗಷ್ಟೇ ಮಾಲಿವುಡ್‌ ನಟ ಮೋಹನ್‌ಲಾಲ್‌ ಅವರನ್ನು ಭೇಟಿ ಮಾಡಿ ಬಂದಿದ್ದ ಪ್ರೇಮ್, ಇದೀಗ ಬಾಲಿವುಡ್ ಕಡೆ ಮುಖ ಮಾಡಿದ್ದಾರೆ. ಸಂಜಯ್‌ ದತ್ ಅವರನ್ನೂ ಭೇಟಿ ಮಾಡಿ, ಈ ಹಿಂದೆ ಹರಿದಾಡಿದ ಸುದ್ದಿಗೆ ಜೀವ ತುಂಬಿದ್ದಾರೆ.
ಧ್ರುವ ಸರ್ಜಾ ಮತ್ತು ನಿರ್ದೇಶಕ ಪ್ರೇಮ್ ಕಾಂಬಿನೇಷನ್‌ ಸಿನಿಮಾ ಬರ್ತಿದೆ ಎಂದಾಗಲೇ ಒಂದಷ್ಟು ಕುತೂಹಲಗಳು ಗರಿಗೆದರಿದ್ದವು. ನಿರೀಕ್ಷೆಯೂ ಅಷ್ಟೇ ಜೋರಾಗಿತ್ತು. ಇದೀಗ ಸದ್ದಿಲ್ಲದೆ ಸಿನಿಮಾ ಕೆಲಸಗಳಲ್ಲಿ ತೊಡಗಿಸಿಕೊಂಡಿರುವ ಪ್ರೇಮ್, ಇತ್ತೀಚೆಗಷ್ಟೇ ಹೊಸ ವಿಚಾರವೊಂದನ್ನು ಹಂಚಿಕೊಂಡಿದ್ದರು. ಈ ಕಾಂಬಿನೇಷನ್‌ನ ಸಿನಿಮಾ ಹೇಗಿರಲಿದೆ? ಶೀರ್ಷಿಕೆ ಏನು ಎಂಬಿತ್ಯಾದಿ ಯಾವುದೇ ಮಾಹಿತಿ ಇಲ್ಲಿಯವರೆಗೂ ಹೊರಬಿದ್ದಿರಲಿಲ್ಲ. ಇದೀಗ ಸದ್ದಿಲ್ಲದೆ ಅಕಾಡಕ್ಕಿಳಿದಿರುವ ನಿರ್ದೇಶಕ ಪ್ರೇಮ್ ಕೆಲ ಸಾಹಸಗಳಿಗೆ ಇಳಿದಿದ್ದಾರೆ.
ಇತ್ತೀಚೆಗಷ್ಟೇ ಮಾಲಿವುಡ್‌ ನಟ ಮೋಹನ್‌ಲಾಲ್‌ ಅವರನ್ನು ಭೇಟಿ ಮಾಡಿ ಬಂದಿದ್ದ ಪ್ರೇಮ್, ಇದೀಗ ಬಾಲಿವುಡ್ ಕಡೆ ಮುಖ ಮಾಡಿದ್ದಾರೆ. ಧ್ರುವ ಸರ್ಜಾ ಜತೆಗಿನ ಪ್ಯಾನ್‌ ಇಂಡಿಯಾ ಸಿನಿಮಾದ ಶೀರ್ಷಿಕೆ ಲಾಂಚ್‌ ಸಿದ್ಧತೆಯಲ್ಲಿದ್ದಾರೆ. ಇದೀಗ ಸಂಜಯ್‌ ದತ್ ಅವರನ್ನೂ ಭೇಟಿ ಮಾಡಿ, ಈ ಹಿಂದೆ ಹರಿದಾಡಿದ ಸುದ್ದಿಗೆ ಜೀವ ತುಂಬಿದ್ದಾರೆ.
ಧ್ರುವ ಸಿನಿಮಾದಲ್ಲಿ ನಟಿಸ್ತಾರಾ ಸಂಜಯ್‌ ದತ್?
ಧ್ರುವ ಸರ್ಜಾ- ಪ್ರೇಮ್ ಕಾಂಬಿನೇಷನ್‌ ಸಿನಿಮಾ ಸುದ್ದಿ ಹೊರಬಿದ್ದಾಗಲೇ, ಈ ಸಿನಿಮಾದಲ್ಲಿ ಬಾಲಿವುಡ್‌ನ ಖ್ಯಾತ ನಟರೊಬ್ಬರು ವಿಲನ್‌ ಆಗಿ ನಟಿಸಲಿದ್ದಾರೆ ಎನ್ನಲಾಗಿತ್ತು. ಸಂಜಯ್‌ ದತ್ ಅವರನ್ನು ಪ್ರೇಮ್ ಅಪ್ರೋಚ್‌ ಮಾಡಿದ್ದಾರೆ ಎಂದೂ ಹೇಳಲಾಗಿತ್ತು. ಇದೀಗ ಆ ಸುದ್ದಿಗೆ ಇತ್ತೀಚಿನ ಭೇಟಿ ಉತ್ತರವಾಗಿ ಸಿಕ್ಕಂತಾಗಿದೆ. ಇಬ್ಬರೂ ಜತೆಜತೆಗೆ ನಿಂತ ಫೋಟೋಗಳನ್ನು ಶೇರ್‌ ಮಾಡಿಕೊಂಡಿರುವ ಪ್ರೇಮ್, ಅತ್ಯಂತ ಸಂತಸದ ಕ್ಷಣವಿದು ಎಂದು ಬರೆದುಕೊಂಡಿದ್ದಾರೆ. ಆದರೆ, ಸಂಜಯ್‌ ದತ್ ಈ ಸಿನಿಮಾ ಮೂಲಕ ನಟನಾಗಿ ಮತ್ತೆ ಸ್ಯಾಂಡಲ್‌ವುಡ್‌ಗೆ ಬರ್ತಾರಾ ಅಥವಾ ಶೀರ್ಷಿಕೆ ಲಾಂಚ್‌ ಮಾಡುತ್ತಾರಾ? ಎಂಬುದು ಸದ್ಯದ ಕುತೂಹಲ. ಅದೆಲ್ಲದಕ್ಕೂ ಇದೇ 20ರ ವರೆಗೆ ಕಾಯಬೇಕು.
ಮೋಹನ್‌ ಲಾಲ್‌ ಭೇಟಿಯ ಹಿನ್ನೆಲೆ ಏನು?
ಇದಕ್ಕೂ ಮೊದಲು ಮಾಲಿವುಡ್‌ ನಟ ಮೋಹನ್‌ಲಾಲ್‌ ಅವರನ್ನು ಪ್ರೇಮ್ ಭೇಟಿ ಮಾಡಿ ಬಂದಿದ್ದರು. ಈ ಭೇಟಿಯ ಹಿನ್ನೆಲೆಯನ್ನು ನೋಡಿದರೆ, ಇದೇ ತಿಂಗಳ 20ರಂದು ಪ್ರೇಮ್ ಮತ್ತು ಧ್ರುವ ಸರ್ಜಾ ಕಾಂಬಿನೇಷನ್‌ ಸಿನಿಮಾದ ಶೀರ್ಷಿಕೆ ಲಾಂಚ್‌ ಆಗಲಿದೆ. ಆ ಕಾರ್ಯಕ್ರಮಕ್ಕೆ ಮುಖ್ಯ ಅತಿಥಿಯಾಗಿ ಮೋಹನ್‌ಲಾಲ್‌ ಅವರನ್ನು ಆಹ್ವಾನಿಸಿದ್ದಾರಂತೆ ಪ್ರೇಮ್. "ಭಾರತೀಯ ಸಿನಿಮಾ ಕಂಡ ಸೂಪರ್‌ ಸ್ಟಾರ್‌, ಅಷ್ಟೇ ಡೌನ್‌ ಟು ಅರ್ಥ್‌. ಈ ಭೇಟಿಯ ಖುಷಿಯನ್ನು ಹೇಗೆ ವರ್ಣಿಸಲಿ ಎಂಬುದು ನನ್ನಿಂದ ಸಾಧ್ಯವಾಗುತ್ತಿಲ್ಲ. ವಿವರಿಸಲು ನನ್ನ ಬಳಿ ಪದಗಳಿಲ್ಲ. ನಿಮ್ಮ ಈ ಬೆಂಬಲ್ಲ ನಮ್ಮನ್ನು ಮತ್ತಷ್ಟು ಎತ್ತರಕ್ಕೆ ಕರೆದೊಯ್ಯಲಿದೆ" ಎಂದು ಪ್ರೇಮ್ ಟ್ವಿಟ್‌ ಮಾಡಿದ್ದರು.
ಪ್ಯಾನ್‌ ಇಂಡಿಯಾ ಸಿನಿಮಾ..
ಈಗಾಗಲೇ ಗೊತ್ತಿರುವಂತೆ ಕನ್ನಡದ ಜತೆಗೆ ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ತೆಲುಗು, ತಮಿಳು, ಮಲಯಾಳಂ, ಹಿಂದಿಯಲ್ಲಿಯೂ ಈ ಸಿನಿಮಾ ಸಿದ್ಧವಾಗಲಿದೆ. ಹಾಗಾಗಿಯೇ ಶೀರ್ಷಿಕೆ ಟೀಸರ್‌ನಲ್ಲಿ ಧ್ರುವ ಅವರ ಧ್ವನಿಯೂ ಇರಲಿದೆ ಎಂದು ಪ್ರೇಮ್ ಹೇಳಿದ್ದರು.
ಶೀರ್ಷಿಕೆ ಟೀಸರ್‌ಗೆ ಧ್ರುವ ಡಬ್..
KVN ಬ್ಯಾನರ್‌ನಲ್ಲಿ ನಿರ್ಮಾಣವಾಗಲಿರುವ ಈ ಸಿನಿಮಾದ ಶೀರ್ಷಿಕೆ ಪೋಸ್ಟರ್‌ ಬಿಡುಗಡೆ ಸಲುವಾಗಿ ಧ್ರುವ ಎಲ್ಲ ಭಾಷೆಗಳಿಗೆ ಸ್ವತಃ ಅವರೇ ಡಬ್ ಮಾಡಿದ್ದಾರೆ. ಇಲ್ಲಿಯವರೆಗೂ ಕನ್ನಡ ಹೊರತುಪಡಿಸಿ ಬೇರಾವ ಭಾಷೆಗೆ ಧ್ರುವ ಡಬ್ ಮಾಡಿದ ಉದಾಹರಣೆ ಇರಲಿಲ್ಲ. ಇದೀಗ ಪ್ರೇಮ್ ಸಿನಿಮಾದಲ್ಲಿ ಮೊದಲ ಬಾರಿ ಅಂಥದ್ದೊಂದು ಸಾಹಸಕ್ಕೆ ಧ್ರುವ ಕೈಹಾಕಿದ್ದಾರೆ. "ಚಿತ್ರದ ಶೀರ್ಷಿಕೆ ಟೀಸರ್‌ಗೆ ಧ್ರುವ ಸರ್ಜಾ ಮೊಟ್ಟ ಮೊದಲ ಬಾರಿಗೆ ಎಲ್ಲ ಭಾಷೆಗಳಿಗೆ ಅವರ ಡಬ್ ಮಾಡಿದ್ದಾರೆ. ಶೀಘ್ರದಲ್ಲಿ ಯುದ್ಧ ಶುರುವಾಗಲಿದೆ. ಶೀರ್ಷಿಕೆ ಟೀಸರ್‌ ಅತಿ ಬೇಗ ನಿಮ್ಮ ಬಳಿ ಬರಲಿದೆ" ಎಂದು ಪ್ರೇಮ್ ಟ್ವಿಟ್‌ ಮಾಡಿದ್ದರು.
ಧ್ರುವ ಸರ್ಜಾ ಸದ್ಯಕ್ಕೆ "ಮಾರ್ಟಿನ್‌" ಚಿತ್ರದಲ್ಲಿ ಬಿಜಿಯಾಗಿದ್ದಾರೆ. ಈ ವೇಳೆಗಾಗಲೇ ಈ ಸಿನಿಮಾ ಬಿಡುಗಡೆಯಾಗಬೇಕಿತ್ತು. ಆದರೆ ಕಾರಣಾಂತರಗಳಿಂದ ಸಿನಿಮಾ ತೆರೆ ಕಾಣುವುದು ತಡವಾಗುತ್ತಿದೆ. ಮಾರ್ಟಿನ್‌ ಚಿತ್ರವನ್ನು ಉದಯ್ ಕೆ ಮೆಹ್ತಾ ನಿರ್ಮಿಸುತ್ತಿದ್ದು ಎ.ಪಿ. ಅರ್ಜುನ್‌ ನಿರ್ದೇಶಿಸುತ್ತಿದ್ದಾರೆ. ಚಿತ್ರದಲ್ಲಿ ವೈಭವಿ ಶಾಂಡಿಲ್ಯ ಧ್ರುವಗೆ ಜೋಡಿಯಾಗಿದ್ದಾರೆ. ಚಿತ್ರಕ್ಕೆ ಮಣಿ ಶರ್ಮಾ ಸಂಗೀತವಿದ್ದು, ಸತ್ಯ ಹೆಗಡೆ ಛಾಯಾಗ್ರಹಣವಿದೆ.
ಇನ್ನು ಪ್ರೇಮ್ "ಏಕ್‌ ಲವ್‌ ಯಾ" ನಂತರ ಪ್ರೇಮ್, ತಮ್ಮ ಹೊಸ ಸಿನಿಮಾಗೆ ಮುಹೂರ್ತ ಕೂಡಾ ಮಾಡಿದ್ದರು. ಈ ಚಿತ್ರವನ್ನು ಕೆವಿಎನ್‌ ಸಂಸ್ಥೆ ನಿರ್ಮಿಸುತ್ತಿದೆ. ಇದು ಧ್ರುವ ಮತ್ತು ಪ್ರೇಮ್ ಕಾಂಬಿನೇಷನ್‌ನ ಮೊದಲ ಸಿನಿಮಾವಾಗಿದೆ. ನಾಯಕಿ, ಇತರ ಕಲಾವಿದರು ಹಾಗೂ ತಂತ್ರಜ್ಞರ ಬಗ್ಗೆ ಹೆಚ್ಚಿನ ಮಾಹಿತಿ ಲಭ್ಯವಾಗಿಲ್ಲ.