Jawan OTT Release: ಶಾರೂಖ್‌ ಖಾನ್ ಹುಟ್ಟುಹಬ್ಬದ ಉಡುಗೊರೆ, ಬ್ಲಾಕ್‌ಬಸ್ಟರ್‌ ಜವಾನ್ ಚಿತ್ರ ಒಟಿಟಿ ಬಿಡುಗಡೆ ದಿನಾಂಕ ಪ್ರಕಟ
Oct 31, 2023 10:06 AM IST
Share
ಬ್ಲಾಕ್‌ಬಸ್ಟರ್‌ ಜವಾನ್ ಚಿತ್ರ ಒಟಿಟಿ ಬಿಡುಗಡೆ ದಿನಾಂಕ ಪ್ರಕಟ
- Jawan OTT Premiere Date: ಶಾರೂಖ್‌ ಖಾನ್ ನಟನೆಯ ಜವಾನ್ ಚಿತ್ರದ ಒಟಿಟಿ ಬಿಡುಗಡೆ ದಿನಾಂಕ ಬಹಿರಂಗವಾಗಿದೆ. ಇದೇ ನವೆಂಬರ್‌ 2ರಂದು ಒಟಿಟಿಯಲ್ಲಿ ಬಾಲಿವುಡ್ ಬ್ಲಾಕ್‌ಬಸ್ಟರ್‌ ಚಿತ್ರ ಜವಾನ್ ಬಿಡುಗಡೆಯಾಗಲಿದೆ.
Jawan ott release date: ಬಾಲಿವುಡ್‌ನ ಬ್ಲಾಕ್‌ಬಸ್ಟರ್‌ ಸಿನಿಮಾ "ಜವಾನ್" ಒಟಿಟಿ ವೇದಿಕೆಯಲ್ಲಿ ಪ್ರಸಾರಗೊಳ್ಳಲು ತಯಾರಾಗಿದೆ. ಜವಾನ್ ಚಿತ್ರ ಒಟಿಟಿ ಸ್ಟ್ರೀಮಿಂಗ್‌ ಆಗುವ ದಿನಾಂಕ ಬಹಿರಂಗಗೊಂಡಿದೆ. ಇದೇ ನವೆಂಬರ್‌ 2ರಂದು ಒಟಿಟಿಯಲ್ಲಿ ಜವಾನ್ ಸಿನಿಮಾ ಪ್ರಸಾರಗೊಳ್ಳಲಿದೆ. ಇನ್ನೂ ಚಿತ್ರಮಂದಿರಗಳಲ್ಲಿ ಜವಾನ್ ಚಿತ್ರ ನೋಡಿರದೆ ಇರುವವರು ಅಥವಾ ಚಿತ್ರಮಂದಿರಗಳಲ್ಲಿ ನೋಡಿದರೂ ಇನ್ನೊಮ್ಮೆ ನೋಡಬಯಸುವವರು ನೆಟ್‌ಫ್ಲಿಕ್ಸ್‌ನಲ್ಲಿ ನವೆಂಬರ್‌ 2ರಿಂದ ಜವಾನ್ ಚಿತ್ರವನ್ನು ನೋಡಬಹುದು.
2023ನೇ ವರ್ಷವು ಶಾರೂಖ್‌ ಖಾನ್‌ಗೆ ಪ್ರಮುಖ ವರ್ಷವಾಗಿದೆ. ಪಠಾನ್‌ ಮತ್ತು ಜವಾನ್ ಎಂಬ ಎರಡು ಚಿತ್ರಗಳು ಇವರಿಗೆ ಅಭೂತಪೂರ್ವ ಯಶಸ್ಸು ತಂದುಕೊಟ್ಟಿತ್ತು. ಇವೆರಡರಲ್ಲಿ ಜವಾನ್ ಚಿತ್ರವು ಸಾಕಷ್ಟು ಮೆಚ್ಚುಗೆಗೆ ಪಾತ್ರವಾಗಿತ್ತು. ಅಟ್ಲಿ ನಿರ್ದೇಶನದ ಈ ಚಿತ್ರದಲ್ಲಿ ಶಾರೂಖ್‌ ಖಾನ್‌ಗೆ ವಿಶೇಷ ಮಾಸ್‌ ಲುಕ್‌ ನೀಡಲಾಗಿತ್ತು. ಜವಾನ್ ಚಿತ್ರವು ಬಾಕ್ಸ್‌ ಆಫೀಸ್‌ನಲ್ಲಿ ಸಾಕಷ್ಟು ಸದ್ದು ಮಾಡಿತ್ತು. ಅಂದಾಜು 1150 ಕೋಟಿ ರೂಪಾಯಿ ಬಾಕ್ಸ್‌ ಆಫೀಸ್‌ ಗಳಿಕೆ ಮಾಡಿತ್ತು. ಕೇವಲ ಹಿಂದಿ ಅವತರಣಿಕೆಯಲ್ಲೇ 590 ಕೋಟಿ ರೂಪಾಯಿ ಗಳಿಸಿತ್ತು. ತಮಿಳು ಮತ್ತು ತೆಲುಗು ಸಿನಿ ಮಾರುಕಟ್ಟೆಯಲ್ಲೂ ಉತ್ತಮ ಗಳಿಕೆ ಮಾಡಿತ್ತು.
ಶಾರೂಖ್‌ ಖಾನ್ ಅಭಿಮಾನಿಗಳು ಜವಾನ್ ಚಿತ್ರವು ಡಿಜಿಟಲ್‌ ವೇದಿಕೆಯಲ್ಲಿ ಬಿಡುಗಡೆಯಾಗಲು ಕಾಯುತ್ತಿದ್ದರು. ಅವರ ಕಾಯುವಿಕೆ ಅಂತ್ಯವಾಗಿದೆ. ನಾಡಿದ್ದು ಅಂದರೆ, ನವೆಂಬರ್‌ 2ರಂದು ಈ ಚಿತ್ರವು ಒಟಿಟಿಯಲ್ಲಿ ಬಿಡುಗಡೆಯಾಗಲಿದೆ. ಶಾರೂಖ್‌ ಖಾನ್ ಹುಟ್ಟುಹಬ್ಬದ ಉಡುಗೊರೆಯಾಗಿ ಅದೇ ದಿನ ಒಟಿಟಿಯಲ್ಲಿ ಬಿಡುಗಡೆಯಾಗುತ್ತಿದೆ. ಅಂದಹಾಗೆ, ನೆಟ್‌ಫ್ಲಿಕ್ಸ್‌ ಈ ಸಿನಿಮಾದ ಪ್ರಸಾರ ಹಕ್ಕು ಪಡೆದಿದೆ. ನೆಟ್‌ಫ್ಲಿಕ್ಸ್‌ ಚಂದಾದಾರಿಕೆ ಪಡೆಯದವರಿಗೆ ಇದರಿಂದ ಬೇಸರವಾಗಬಹುದು.
ಶಾರುಖ್ ಖಾನ್ ಪತ್ನಿ ಗೌರಿ ಖಾನ್, ರೆಡ್ ಚಿಲ್ಲೀಸ್ ಎಂಟರ್‌ಟೈನ್‌ಮೆಂಟ್ ಬ್ಯಾನರ್ ಅಡಿಯಲ್ಲಿ ನಿರ್ಮಿಸಿರುವ ಜವಾನ್ ಸಿನಿಮಾ ಇವತ್ತಿಗೆ ಸರಿಯಾಗಿ ಒಂದು ತಿಂಗಳ ಹಿಂದೆ ಅಂದರೆ, ಸೆಪ್ಟೆಂಬರ್‌ 7ರಂದು ವಿಶ್ವದಾದ್ಯಂತ ಬಿಡುಗಡೆ ಆಗಿತ್ತು. ಈ ಸಿನಿಮಾ ಮೂಲಕ ನಿರ್ದೇಶಕ ಅಟ್ಲಿ ಮತ್ತು ನಟಿ ನಯನತಾರಾ ಬಾಲಿವುಡ್‌ಗೆ ಪದಾರ್ಪಣೆ ಮಾಡಿ ಗೆಲುವು ಕಂಡಿದ್ದರು.
ಜವಾನ್ ಚಿತ್ರವು ಹಿಂದಿ, ತೆಲುಗು, ತಮಿಳು, ಕನ್ನಡ ಮತ್ತು ಮಲಯಾಳಂ ಭಾಷೆಗಳಲ್ಲಿ ಸೆ. 7 ರಂದು ವಿಶ್ವದಾದ್ಯಂತ ಬಿಡುಗಡೆಯಾಗಿತ್ತು. ಜವಾನ್ ಚಿತ್ರದ ಡಿಜಿಟಲ್‌ ಹಕ್ಕನ್ನು ನೆಟ್‌ಫ್ಲಿಕ್ಸ್‌ ಸಂಸ್ಥೆ ದೊಡ್ಡ ಮೊತ್ತಕ್ಕೇ ಖರೀದಿಸಿದೆ ಎಂಬ ವಿಚಾರ ಈ ಹಿಂದೆಯೇ ಹೊರಬಿದ್ದಿತ್ತು. 250 ಕೋಟಿಗೆ ಪಡೆದಿದೆ ಎಂದು ಹಿಂದೂಸ್ತಾನ್ ಟೈಮ್ಸ್ ಈಗಾಗಲೇ ವರದಿ ಮಾಡಿದೆ. ಶಾರುಖ್ ಬರ್ತ್‌ಡೇ ಪ್ರಯುಕ್ತ ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಲಿದೆ. ಈ ಮೂಲಕ ಸಿನಿಮಾ ಬಿಡುಗಡೆಯಾದ ಎರಡು ತಿಂಗಳಿಗೆ ಜವಾನ್ ಆಗಮನವಾಗಲಿದೆ. ಅಷ್ಟೇ ಅಲ್ಲ ಹೆಚ್ಚುವರಿ ದೃಶ್ಯಗಳನ್ನೂ ಒಳಗೊಂಡು ಒಟಿಟಿಗೆ ಪ್ರವೇಶಿಸಲಿದೆ.