ರಣಬೀರ್‌ ಕಪೂರ್‌ಗೆ ಸನಾತನ ಧರ್ಮದ ಕುರಿತು ನಂಬಿಕೆ ಇರುವುದೇ? ಧರ್ಮ ಸೂಕ್ಷ್ಮ ಪ್ರಶ್ನೆಗೆ ರಾಮಾಯಣ ನಟನ ಅಚ್ಚರಿಯ ಉತ್ತರ
Jul 29, 2024 01:23 PM IST
Share
ರಣಬೀರ್‌ ಕಪೂರ್‌ಗೆ ಸನಾತನ ಧರ್ಮದ ಕುರಿತು ನಂಬಿಕೆ ಇರುವುದೇ?
- Ranbir Kapoor About Sanatana Dharam: ರಾಮಾಯಣ ಸಿನಿಮಾದಲ್ಲಿ ರಾಮನ ಪಾತ್ರಕ್ಕೆ ರಣಬೀರ್‌ ಕಪೂರ್ ಬಣ್ಣಹಚ್ಚಲಿದ್ದಾರೆ. ಸೀತೆಯಾಗಿ ಸಾಯಿ ಪಲ್ಲವಿ ನಟಿಸಲಿದ್ದಾರೆ. ಅಂದಹಾಗೆ, ರಣಬೀರ್‌ ಕಪೂರ್ ಅವರ ಧಾರ್ಮಿಕ ನಂಬಿಕೆಗಳೇನು? ಸನಾತನ ಧರ್ಮದ ಕುರಿತು ನಂಬಿಕೆ ಇರುವುದೇ? ಈ ಪ್ರಶ್ನೆಗೆ ನಟ ಉತ್ತರ ನೀಡಿದ್ದಾರೆ.
ಬೆಂಗಳೂರು: ನಿತೀಶ್‌ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ ರಾಮಾಯಣ ಸಿನಿಮಾದಲ್ಲಿ ಬಾಲಿವುಡ್ ನಟ ರಣಬೀರ್‌ ಕಪೂರ್ ನಟಿಸುತ್ತಿದ್ದಾರೆ. ಈ ಸಿನಿಮಾದಲ್ಲಿ ರಾಮನ ಪಾತ್ರಕ್ಕೆ ರಣಬೀರ್‌ ಕಪೂರ್ ಮತ್ತು ಸೀತಾ ಮಾತೆಯ ಪಾತ್ರಕ್ಕೆ ಸಾಯಿ ಪಲ್ಲವಿ ಬಣ್ಣ ಹಚ್ಚಲಿದ್ದಾರೆ. ಇದೇ ಸಂದರ್ಭದಲ್ಲಿ ಇದೀಗ ರಣಬೀರ್‌ ಕಪೂರ್ ಅವರು ಧರ್ಮ ಮತ್ತು ದೇವರ ಜತೆ ಸಂಬಂಧದ ಕುರಿತು ಮನಸ್ಸು ಬಿಚ್ಚಿ ಮಾತನಾಡಿದ್ದಾರೆ. ಸನಾತನ ಧರ್ಮದ ಕುರಿತು ರಣಬೀರ್‌ ಕಪೂರ್‌ಗೆ ಇರುವ ನಂಬಿಕೆಗಳ ಕುರಿತು ಮಾಧ್ಯಮಗಳು ಕೇಳಿದ ಧರ್ಮ ಸೂಕ್ಷ್ಮ ಪ್ರಶ್ನೆಗಳಿಗೆ ಉತ್ತರ ನೀಡಿದ್ದಾರೆ. ನಿಖಿಲ್‌ ಕಾಮತ್‌ ಅವರು ನಡೆಸಿಕೊಡುವ ಡಬ್ಲ್ಯುಟಿಎಫ್‌ ಪಾಡ್‌ಕಾಸ್ಟ್‌ನಲ್ಲಿ "ಸನಾತನ ಧರ್ಮದ ಮೇಲೆ ಅಗಾಧ ನಂಬಿಕೆ" ಇರುವುದಾಗಿ ರಣಬೀರ್‌ ಕಪೂರ್ ಹೇಳಿದ್ದಾರೆ.
ದೇವರ ಜತೆ ಸಂಬಂಧ
"ನಾನು ಬಾಲ್ಯದಿಂದಲೇ ಧಾರ್ಮಿಕ ನಂಬಿಕೆಗಳ ನಡುವೆ ಬೆಳೆದವನು. ನನ್ನ ತಂದೆ (ರಿಷಿ ಕಪೂರ್) ತುಂಬಾ ಧರ್ಮ ನಿಷ್ಠರಾಗಿದ್ದರು. ಅವರು ದಿನಕ್ಕೆ ಎರಡು ಬಾರಿ ಪೂಜೆ ಪುನಸ್ಕಾರಗಳನ್ನು ಮಾಡುತ್ತಿದ್ದರು. ನಾವು ಪ್ರತಿ ಹಬ್ಬವನ್ನೂ ಆಚರಿಸುತ್ತೇನೆವೆ. ನಮ್ಮ ಮನೆಯಲ್ಲಿ ನವರಾತ್ರಿ ಹಬ್ಬ ನಡೆಯುತ್ತದೆ. ನನ್ನ ತಂದೆಗೆ ಧಾರ್ಮಿಕ ಭಕ್ತಿಯು ತುಂಬಾ ಶಾಂತಿ ನೀಡಿದೆ ಎನ್ನುವುದು ನನ್ನ ನಂಬಿಕೆ" ಎಂದು ರಣಬೀರ್‌ ಕಪೂರ್ ಹೇಳಿದ್ದಾರೆ.
"ಆದರೆ, ಧಾರ್ಮಿಕ ವಿಷಯಗಳಲ್ಲಿ ನನ್ನ ತಾಯಿ (ನೀತು ಕಪೂರ್) ತುಸು ಕಡಿಮೆ ಎನ್ನಬಹುದು. ಮನೆಯಲ್ಲಿ ಹಬ್ಬಗಳು ನಡೆಯುತ್ತವೆ. ಅಪ್ಪನ ಧಾರ್ಮಿಕ ನಿಷ್ಠೆ, ಶ್ರದ್ಧೆ ನನ್ನ ಮೇಲೂ ಪರಿಣಾಮ ಬೀರಿದೆ. ದೇವರು ತುಂಬಾ ದೊಡ್ಡವನು. ನನಗೆ ದೇವರ ಬಗ್ಗೆ ಒಳ್ಳೆಯ ಭಾವನೆ ಇದೆ. ಸಿನಿಮಾ ಯಶಸ್ವಿಯಾಗಲೆಂದೋ ಅಥವಾ ಇನ್ನೆನ್ನೋ ಬೇಕು ಎಂದು ನಾನು ದೇವರಲ್ಲಿ ಎಂದಿಗೂ ಕೇಳಿಲ್ಲ. ದೇವರೊಂದಿಗಿನ ನನ್ನ ಸಂಬಂಧವು ಕೃತಜ್ಞತೆಯನ್ನು ಹೊಂದಿದೆ. ನನಗೆ ದೊರಕಿರುವ ಎಲ್ಲದಕ್ಕೂ ನಾನು ದೇವರಿಗೆ ಕೃತಜ್ಞತೆ ಸಲ್ಲಿಸುವೆ. ಇದೇ ದೇವರೊಂದಿಗೆ ನನ್ನ ಸಂಬಂಧ" ಎಂದು ರಣಬೀರ್‌ ಕಪೂರ್ ಹೇಳಿದ್ದಾರೆ.
ಸನಾತನ ಧರ್ಮದ ಕುರಿತು ನಂಬಿಕೆ ಇದೆಯೇ? ಇಲ್ಲವೇ?
ಪಾಡ್‌ಕಾಸ್ಟ್‌ನಲ್ಲಿ ಕೇಳಿದ ಈ ಪ್ರಶ್ನೆಗೂ ರಣಬೀರ್‌ ಕಪೂರ್ ಉತ್ತರಿಸಿದ್ದಾರೆ. "ನನಗೆ ಸನಾತನ ಧರ್ಮದ ಕುರಿತು ಅಗಾಧವಾದ ನಂಬಿಕೆಯಿದೆ. ಕಳೆದ ಹಲವು ವರ್ಷಗಳಿಂದ ಸನಾತನ ಧರ್ಮಕ್ಕೆ ಸಂಬಂಧಪಟ್ಟ ಸಾಕಷ್ಟು ಕೃತಿಗಳನ್ನು ಓದಿದ್ದೇನೆ. ಸನಾತನ ಧರ್ಮ ಎಂದರೆ ಏನೆಂದು ಮತ್ತು ಅದರ ಪರಿಣಾಮಗಳು ಏನೆಂದು ಆಳವಾದ ಯೋಚನೆಗೆ ನಾನು ಹೋಗುವೆ. ನಿಮಗೆ ಸನಾತನ ಧರ್ಮದ ಮೇಲೆ ನಂಬಿಕೆ ಇರಬಹುದು. ಇರದೆ ಇರಬಹುದು. ಆದರೆ, ಅದರಲ್ಲಿ ಸಾಕಷ್ಟು ಒಳ್ಳೆಯ ವಿಚಾರಗಳು ಇವೆ. ಅದು ಉತ್ತಮ ಮೌಲ್ಯಗಳನ್ನು ಹೊಂದಿದೆ. ನನಗೆ ಅದರೊಂದಿಗೆ ಕನೆಕ್ಟ್‌ ಆಗಿರುವಂತಹ ಭಾವನೆ ಇದೆ" ಎಂದು ರಣಬೀರ್‌ ಕಪೂರ್ ಹೇಳಿದ್ದಾರೆ.
ರಣಬೀರ್‌ ಕಪೂರ್ ಮುಂಬರುವ ಸಿನಿಮಾಗಳು
ರಣಬೀರ್‌ ಕಪೂರ್ ಅವರು ಕೊನೆಯದಾಗಿ ಅನಿಮಲ್‌ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದರು. ಈ ಸಿನಿಮಾದ ಸೀಕ್ವೆಲ್‌ "ಅನಿಮಲ್‌ ಪಾರ್ಕ್‌"ನಲ್ಲಿ ಇವರು ಕಾಣಿಸಿಕೊಳ್ಳುವ ನಿರೀಕ್ಷೆಯಿದೆ. ಸದ್ಯ ಇವರು ರಾಮಾಯಣ ಸಿನಿಮಾದಲ್ಲಿ ಬಿಝಿ ಇದ್ದಾರೆ. ಇನ್ನೊಂದು ಟ್ರಯಾಲಜಿ ಸಿನಿಮಾದಲ್ಲೂ ನಟಿಸಲಿದ್ದಾರೆ. ಇಷ್ಟು ಮಾತ್ರವಲ್ಲದೆ ಲವ್‌ ಆಂಡ್‌ ವಾರ್‌ನಲ್ಲೂ ಕಾಣಿಸಿಕೊಳ್ಳಲಿದ್ದಾರೆ. ಲವ್‌ ಆಂಡ್‌ ವಾರ್‌ನಲ್ಲಿ ರಣಬೀರ್‌ ಕಪೂರ್, ಆಲಿಯಾ ಭಟ್‌ ಮತ್ತು ವಿಕ್ಕಿ ಕೌಶಲ್‌ ನಟಿಸಲಿದ್ದಾರೆ. ಇದು ಸಂಜಯ್‌ ಲೀಲಾ ಬನ್ಸಾಲಿ ನಿರ್ದೇಶನದಲ್ಲಿ ಮೂಡಿ ಬರಲಿದೆ.