Animal Movie: ವಿಜಯ್‌ ದೇವರಕೊಂಡ ನಂತರ ರಣಬೀರ್‌ ಕಪೂರ್‌ ತುಟಿಗೆ ತುಟಿ ಒತ್ತಿದ ರಶ್ಮಿಕಾ ಮಂದಣ್ಣ
Oct 10, 2023 01:59 PM IST
Share
ರಶ್ಮಿಕಾ ಮಂದಣ್ಣ ರಣಬೀರ್‌ ಕಪೂರ್‌ ನಟನೆಯ ಅನಿಮಲ್‌ ಚಿತ್ರದ ಸಾಂಗ್‌ ಪೋಸ್ಟರ್‌ ರಿಲೀಸ್
Animal Hindi Movie: ರಶ್ಮಿಕಾ ಮಂದಣ್ಣ ಹಾಗೂ ರಣಬೀರ್‌ ಕಪೂರ್‌ ನಟನೆಯ ಅನಿಮಲ್‌ ಸಿನಿಮಾ ಡಿಸೆಂಬರ್‌ 1ಕ್ಕೆ ತೆರೆ ಕಾಣುತ್ತಿದೆ. ಅಕ್ಟೋಬರ್‌ 11ಕ್ಕೆ ಸಿನಿಮಾ ಹಾಡು ರಿಲೀಸ್ ಆಗುತ್ತಿದ್ದು ಚಿತ್ರತಂಡ ಸಾಂಗ್‌ ಪೋಸ್ಟರ್‌ ರಿಲೀಸ್ ಮಾಡಿದೆ.
Animal Hindi Movie: ಕನ್ನಡದ ನಂತರ ತೆಲುಗು, ತಮಿಳು, ಮಲಯಾಳಂ ಸಿನಿಮಾಗಳಲ್ಲಿ ನಟಿಸಿದ ರಶ್ಮಿಕಾ ಮಂದಣ್ಣ ಈಗ ಬಾಲಿವುಡ್‌ನಲ್ಲಿ ನೆಲೆಯೂರಿದ್ದಾರೆ. ಬಾಲಿವುಡ್‌ನಲ್ಲಿ ಕೂಡಾ ಬೇಡಿಕೆ ನಟಿಯಾಗಿ ಹೆಸರು ಮಾಡಿದ್ದಾರೆ. ಲಕ್ಷಾಂತರ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಸದ್ಯಕ್ಕೆ ರಶ್ಮಿಕಾ ರಣಬೀರ್‌ ಕಪೂರ್‌ ಜೊತೆ 'ಅನಿಮಲ್‌' ಚಿತ್ರದಲ್ಲಿ ನಟಿಸುತ್ತಿದ್ದಾರೆ.
ಬುಧವಾರ ಅನಿಮಲ್‌ ಚಿತ್ರದ ಹಾಡು ಬಿಡುಗಡೆ
'ಅನಿಮಲ್‌' ಚಿತ್ರತಂಡ ಇತ್ತೀಚೆಗೆ ರಶ್ಮಿಕಾ ಫಸ್ಟ್‌ಲುಕ್‌ ಬಿಡುಗಡೆ ಮಾಡಿತ್ತು. ಸೀರೆ, ಮಾಂಗಲ್ಯ, ಕುಂಕುಮ ಹಾಕಿ ಗೃಹಿಣಿ ಲುಕ್‌ನಲ್ಲಿ ರಶ್ಮಿಕಾ ಆಕರ್ಷಕವಾಗಿ ಕಾಣುತ್ತಿದ್ದರು. ಇದೀಗ ಚಿತ್ರತಂಡ ಹಾಡಿನ ಪೋಸ್ಟರ್‌ ಒಂದನ್ನು ರಿಲೀಸ್ ಮಾಡಿದೆ. ಅಕ್ಟೋಬರ್‌ 11 ರಂದು ಅನಿಮಲ್‌ ಚಿತ್ರದ ಹುವಾ ಮೈನ... ಹಾಡನ್ನು ರಿಲೀಸ್ ಮಾಡುವುದಾಗಿ ಚಿತ್ರತಂಡ ಹೇಳಿದೆ. ಅದಕ್ಕೂ ಮುನ್ನ ಚಿತ್ರತಂಡ ಆ ಹಾಡಿನ ಪೋಸ್ಟರನ್ನು ಅಧಿಕೃತ ಪೋಸ್ಟರ್‌ನಲ್ಲಿ ಹಂಚಿಕೊಂಡಿದೆ. ಈ ಪೋಸ್ಟರ್‌ನಲ್ಲಿ ರಶ್ಮಿಕಾ ಹಾಗೂ ರಣಬೀರ್‌ ಕಪೂರ್‌ ಲಿಪ್‌ ಲಾಕ್ ಮಾಡಿದ್ದಾರೆ.
ರಣಬೀರ್‌ ರಶ್ಮಿಕಾ ಲಿಪ್‌ ಲಾಕ್
ಬಾಲಿವುಡ್‌ನಲ್ಲಿ ಈಗ ಲಿಪ್‌ ಲಾಕ್ ಸಾಮಾನ್ಯ ಎನಿಸಿದೆ. ತೆಲುಗಿನ 'ಗೀತ ಗೋವಿಂದಂ' ಹಾಗೂ 'ಡಿಯರ್‌ ಕಾಮ್ರೇಡ್‌' ಚಿತ್ರದಲ್ಲಿ ವಿಜಯ್‌ ದೇವರಕೊಂಡ ಜೊತೆ ಲಿಪ್‌ ಲಾಲ್‌ ಮಾಡಿದ್ದ ರಶ್ಮಿಕಾ ಮಂದಣ್ಣ ಈಗ ಅನಿಮಲ್‌ ಚಿತ್ರಕ್ಕಾಗಿ ರಣಬೀರ್‌ ಕಪೂರ್‌ ತುಟಿಗೆ ತುಟಿ ಒತ್ತಿದ್ದಾರೆ. ಈ ಪೋಸ್ಟರ್‌ ಈಗ ವೈರಲ್‌ ಆಗುತ್ತಿದ್ದು ಗಮನ ಸೆಳೆದಿದೆ. ಈ ಕಿಸ್ಸಿಂಗ್‌ ದೃಶ್ಯಕ್ಕೆ ಕೆಲವರು ಲೈಕ್‌ ಒತ್ತಿದರೆ ಇನ್ನೂ ಕೆಲವರು ನಮಗೆ ಇಷ್ಟವಾಗಲಿಲ್ಲ ಎಂದಿದ್ದಾರೆ.
ಸಂದೀಪ್‌ ರೆಡ್ಡಿ ವಂಗಾ ನಿರ್ದೇಶನದ ಸಿನಿಮಾ
'ಅನಿಮಲ್‌' ಚಿತ್ರವನ್ನು ಟಿ ಸೀರೀಸ್ ಫಿಲ್ಮ್ಸ್‌, ಭದ್ರಕಾಳಿ ಪಿಕ್ಚರ್ಸ್‌, ಸಿನಿ ಸ್ಟುಡಿಯೋಸ್‌ ಬ್ಯಾನರ್‌ ಅಡಿ ಭೂಷಣ್‌ ಕುಮಾರ್‌, ಕೃಷ್ಣ ಕುಮಾರ್‌, ಮುರ್ದ್‌ ಖೇತಾನಿ, ಪ್ರಣಯ್‌ ರೆಡ್ಡಿ ವಂಗಾ ಜೊತೆ ಸೇರಿ ನಿರ್ಮಿಸಿದ್ದಾರೆ. ಚಿತ್ರಕ್ಕೆ ಸಂದೀಪ್‌ ರೆಡ್ಡಿ ವಂಗಾ ಆಕ್ಷನ್‌ ಕಟ್‌ ಹೇಳಿದ್ದಾರೆ. ಚಿತ್ರದ ಹಾಡುಗಳಿಗೆ ಪ್ರೀತಮ್‌, ವಿಶಾಲ್‌ ಮಿಶ್ರಾ, ಜಾನಿ ಹಾಗೂ ಇನ್ನಿತರರು ಸಂಗೀತ ನೀಡಿದ್ದಾರೆ. ಡಿಸೆಂಬರ್‌ 1 ರಂದು 'ಅನಿಮಲ್‌' ಸಿನಿಮಾ ತೆರೆ ಕಾಣುತ್ತಿದೆ. ಚಿತ್ರದಲ್ಲಿ ರಣಬೀರ್‌ ಕಪೂರ್‌, ಅನಿಲ್‌ ಕಪೂರ್‌, ರಶ್ಮಿಕಾ ಮಂದಣ್ಣ, ಶಕ್ತಿ ಕಪೂರ್‌, ಸುರೇಶ್‌ ಒಬೆರಾಯ್‌ ಹಾಗೂ ಇನ್ನಿತರರು ನಟಿಸಿದ್ದಾರೆ.
ಮನರಂಜನೆ ಸುದ್ದಿಗೆ ಈ ಲಿಂಕ್‌ ಕ್ಲಿಕ್‌ ಮಾಡಿ