ತಾನು ಪೈಲಟ್‌ ಆಗಲು ಸಹಾಯ ಮಾಡಿದ ನಟ ಸೋನು ಸೂದ್ ಜೊತೆ ಹಾರಾಡಲು ಕಾದು ನಿಂತ ಯುವಕ
Aug 28, 2023 03:14 PM IST
Share
ಪೈಲಟ್‌ ಆಗಬೇಕೆಂದು ಕನಸು ಕಂಡ ಯುವಕ ವಂಶಿಗೆ ಹಣದ ಸಹಾಯ ಮಾಡಿದ ಸೋನು ಸೂದ್
ಸೋನು ಸೂದ್ ಅವರನ್ನು ವಿಶೇಷ ವಿಮಾನದಲ್ಲಿ ಹೊತ್ತೊಯ್ಯಲು ನಾನು ಕಾಯುತ್ತಿದ್ದೇನೆ. ನಾನು ಕೊನೆಯವರೆಗೂ ಸೋನು ಸೂದ್ ಅವರಿಗೆ ಕೃತಜ್ಞನಾಗಿರುತ್ತೇನೆ ಎಂದು ವಂಶಿ ಹೇಳಿದ್ದಾರೆ.
ರಿಯಲ್‌ ಹೀರೋ ಸೋನು ಸೂದ್ ಅವರಿಂದ ಸಹಾಯ ಪಡೆದವರು ಒಬ್ಬರಲ್ಲಾ ಇಬ್ಬರಲ್ಲ. ತೆರೆ ಮರೆಯಲ್ಲಿ ಕಷ್ಟದಲ್ಲಿದ್ದವರಿಗೆ ಸಹಾಯ ಮಾಡುತ್ತಿದ್ದ ಸೋನು ಸೂದ್ ಅವರ ಆ ಗುಣ ಎಲ್ಲರಿಗೂ ತಿಳಿದಿದ್ದು ಕೊರೊನಾ ಲಾಕ್‌ಡೌನ್‌ ಸಮಯದಲ್ಲಿ. ಆರ್ಥಿಕವಾಗಿ ಹಿಂದುಳಿದಿದ್ದ ವಂಶಿ ಎಂಬ ಯುವಕನಿಗೂ ಸೋನು ಸೂದ್ ಸಹಾಯ ಮಾಡಿದ್ದು, ಆ ಯುವಕ ಈಗ ರಿಯಲ್‌ ಲೈಫ್‌ ಹೀರೋ ಸಹಾಯವನ್ನು ನೆನೆದಿದ್ದಾರೆ.
ಬಡ ಹುಡುಗನ ಕನಸಿಗೆ ನೀರೆರೆದಿದ್ದ ಸೋನು ಸೂದ್
ಪೈಲಟ್‌ ಆಗುವ ತನ್ನ ಕನಸಿಗೆ ಸಹಾಯ ಮಾಡಿದ ಸೋನು ಸೂದ್ ಜೊತೆ ಹಾರಾಡಲು ವಂಶಿ ಎಂಬ ಯುವಕ ಕಾಯುತ್ತಿದ್ದಾರೆ. ವಂಶಿಗೆ ಚಿಕ್ಕಂದಿನಿಂದ ಪೈಲಟ್‌ ಆಗುವ ಕನಸು. ಆದರೆ ಆತನ ಕನಸಿಗೆ ಅಡ್ಡ ಬಂದಿದ್ದು ಕುಟುಂಬದ ಆರ್ಥಿಕ ಸಮಸ್ಯೆ. ಅದೇ ವೇಳೆ ಸೋನು ಸೂದ್ ವಂಶಿ ಕನಸಿಗೆ ನೀರೆರೆದಿದ್ದಾರೆ. ಆತನ ವಿದ್ಯಾಭ್ಯಾಸಕ್ಕೆ, ತರಬೇತಿಗೆ ಹಣದ ಸಹಾಯ ಮಾಡಿದ್ದಾರೆ. ಆರ್ಥಿಕ ಸಹಾಯ ದೊರೆತ ವಂಶಿ, ಛಲದಿಂದ ಓದಿ ತಮ್ಮ ಕನಸನ್ನು ಸಾಕಾರ ಮಾಡಿಕೊಂಡಿದ್ದಾರೆ. ಈಗ ಆತ ಏವಿಯೇಶನ್‌ ಅಕಾಡೆಮಿಯಲ್ಲಿ ಗ್ರೌಂಡ್‌ ಇನ್‌ಸ್ಟ್ರಕ್ಟರ್‌ ಆಗಿ ಕೆಲಸ ಮಾಡುತ್ತಿದ್ದಾರೆ.
ತಾವು ಪೈಲಟ್‌ ಆಗುವ ಕನಸಿಗೆ ಸಹಾಯ ಮಾಡಿದ ಸೋನು ಸೂದ್ ಜೊತೆ ಆಕಾಶದಲ್ಲಿ ಹಾರಾಡಲು ವಂಶಿ ಕಾಯುತ್ತಿದ್ದಾರೆ. ''ಸೋನು ಸೂದ್ ಅವರನ್ನು ವಿಶೇಷ ವಿಮಾನದಲ್ಲಿ ಹೊತ್ತೊಯ್ಯಲು ನಾನು ಕಾಯುತ್ತಿದ್ದೇನೆ. ನಾನು ಅನೇಕ ಯೂಟ್ಯೂಬ್‌ ಚಾನೆಲ್‌ಗಳಿಗೆ ಇಂಟರ್‌ವ್ಯೂ ನೀಡಿದ್ದೇನೆ, ಅದನ್ನು ನೋಡಿ ಸೋನು ಸೂದ್ ಹೆಮ್ಮೆ ವ್ಯಕ್ತಪಡಿಸಿದ್ದಾರೆ. ಇದು ನನಗೆ ಇನ್ನೂ ದೊಡ್ಡ ಸಾಧನೆ ಮಾಡಿದ ಖುಷಿ ನೀಡಿದೆ. ಸೋನು ಸೂದ್ ನನ್ನಂತೆ ಹಲವು ಜನರಿಗೆ ಸಹಾಯ ಮಾಡಿದ್ದಾರೆ. ನನ್ನ ಸಂದರ್ಶನ ನೋಡಿದ ಅನೇಕರು ನನ್ನಂತೆ ಪೈಲಟ್‌ ಆಗುವ ಆಕಾಂಕ್ಷೆ ವ್ಯಕ್ತಪಡಿಸಿದ್ದಾರೆ, ನಾನು ಕೊನೆಯವರೆಗೂ ಸೋನು ಸೂದ್ ಅವರಿಗೆ ಕೃತಜ್ಞನಾಗಿರುತ್ತೇನೆ'' ಎಂದು ವಂಶಿ ಹೇಳಿದ್ದಾರೆ.
ಕಷ್ಟದಲ್ಲಿರುವ ಅನೇಕರಿಗೆ ಸಹಾಯ ಮಾಡಿರುವ ರಿಯಲ್‌ ಹೀರೋ
ಕೊರೊನಾ ಲಾಕ್‌ ಡೌನ್‌ ಸಮಯದಲ್ಲಿ ಸೋನು ಸೂದ್ ಮುಂಬೈನಲ್ಲಿ ಸಿಲುಕಿದ್ದ ಕರ್ನಾಟಕ ಹಾಗೂ ಇತರ ರಾಜ್ಯಗಳಿಗೆ ಸೇರಿದ ವಲಸೆ ಕಾರ್ಮಿಕರಿಗಾಗಿ ವಿಶೇಷ ಬಸ್‌ ವ್ಯವಸ್ಥೆ ಮಾಡಿಸಿದ್ದರು. ನಂತರ ಅನೇಕರಿಗೆ ಹಣದ ಸಹಾಯ ಮಾಡಿದ್ದರು. ಹೊಲ ಉಳಲು ಎತ್ತುಗಳು ಇಲ್ಲದೆ ಕಷ್ಟ ಪಡುತ್ತಿದ್ದ ರೈತರಿಗೆ ಟ್ರಾಕ್ಟರ್‌ ಕೊಡಿಸಿದ್ದರು. ಅನೇಕ ಮಕ್ಕಳಿಗೆ ವೈದ್ಯಕೀಯ ಚಿಕಿತ್ಸೆಗೆ ಹಣ ನೀಡಿದ್ದರು. ಅಂದಿನಿಂದ ಇದುವರೆಗೂ ಸೋನು ಸೂದ್ ಕಷ್ಟದಲ್ಲಿರುವವರಿಗೆ ಸಹಾಯ ಮಾಡುತ್ತಲೇ ಬಂದಿದ್ದಾರೆ.
ಸಿನಿಮಾಗಳ ವಿಚಾರಕ್ಕೆ ಬರುವುದಾದರೆ ಇದೇ ವರ್ಷ ಏಪ್ರಿಲ್‌ನಲ್ಲಿ ತೆರೆ ಕಂಡ 'ತಮಿಳರಸನ್‌' ಸಿನಿಮಾದಲ್ಲಿ ಸೋನು ಸೂದ್ ನಟಿಸಿದ್ದಾರೆ. ಸದ್ಯಕ್ಕೆ ಹಿಂದಿ ಸಿನಿಮಾವೊಂದರಲ್ಲಿ ಅವರು ಬ್ಯುಸಿ ಇದ್ದಾರೆ. 2019ರಲ್ಲಿ ತೆರೆ ಕಂಡ ಕುರುಕ್ಷೇತ್ರ ಸಿನಿಮಾ ನಂತರ ಸೋನು ಸೂದ್ ಮತ್ತೆ ಕನ್ನಡ ಸಿನಿಮಾದಲ್ಲಿ ನಟಿಸಿಲ್ಲ.