ಡಂಕಿ ಸಿನಿಮಾ ಬಿಡುಗಡೆಗೆ ದಿನಗಣನೆ; ವೈಷ್ಣೋ ದೇವಿ ಮಂದಿರದಲ್ಲಿ ಶಾರೂಖ್‌ ಖಾನ್ ಪ್ರಾರ್ಥನೆ
Dec 12, 2023 02:45 PM IST
Share
ವೈಷ್ಣೋ ದೇವಿ ಮಂದಿರದಲ್ಲಿ ಶಾರೂಖ್‌ ಖಾನ್ ಪ್ರಾರ್ಥನೆ
- Shah Rukh Khan visits Vaishno Devi Temple: ಶಾರೂಖ್‌ ಖಾನ್ ಅವರು ವೈಷ್ಣೋದೇವಿ ದರ್ಶನಕ್ಕೆ ಮತ್ತೆ ಆಗಮಿಸಿದ್ದಾರೆ. ಇದು ಇವರು ಒಂದು ವರ್ಷದಲ್ಲಿ ಈ ದೇವಿ ದೇಗುಲಕ್ಕೆ ನೀಡುವ ಮೂರನೇ ಭೇಟಿಯಾಗಿದೆ. ಡಂಕಿ ಸಿನಿಮಾ ಬಿಡುಗಡೆಗೆ ಮುನ್ನ ದೇವಿ ಮಂದಿರಕ್ಕೆ ಆಗಮಿಸಿ ಪ್ರಾರ್ಥನೆ ಸಲ್ಲಿಸಿದ್ದಾರೆ.
ಡಂಕಿ ಸಿನಿಮಾ ಡಿಸೆಂಬರ್‌ 21ರಂದು ಬಿಡುಗಡೆಯಾಗಲಿದೆ. ಇದಕ್ಕೂ ಮುನ್ನ ಶಾರೂಖ್‌ ಖಾನ್ ಅವರು ವೈಷ್ಣೋದೇವಿ ದರ್ಶನಕ್ಕೆ ಮತ್ತೆ ಆಗಮಿಸಿದ್ದಾರೆ. ಇದು ಇವರು ಒಂದು ವರ್ಷದಲ್ಲಿ ಈ ದೇವಿ ದೇಗುಲಕ್ಕೆ ನೀಡುವ ಮೂರನೇ ಭೇಟಿಯಾಗಿದೆ. ಡಂಕಿ ಸಿನಿಮಾ ಬಿಡುಗಡೆಗೆ ಮುನ್ನ ದೇವಿ ಮಂದಿರಕ್ಕೆ ಆಗಮಿಸಿ ಪ್ರಾರ್ಥನೆ ಸಲ್ಲಿಸಿದ್ದಾರೆ. ಡಂಕಿ ಸಿನಿಮಾವು ಕಳ್ಳಮಾರ್ಗದ ಮೂಲಕ ವಿದೇಶಕ್ಕೆ ತೆರಳುವ ಕಥೆ ಹೊಂದಿರುವುದರಿಂದ ಸಾಕಷ್ಟು ನಿರೀಕ್ಷೆ ಹುಟ್ಟಿಸಿದೆ.
ಸುದ್ದಿ ಸಂಸ್ಥೆ ಪಿಟಿಐ ಬಿಡುಗಡೆ ಮಾಡಿರುವ ವಿಡಿಯೋದಲ್ಲಿ ಶಾರೂಖ್‌ ಖಾನ್ ಅವರು ತನ್ನ ಬಾಡಿಗಾರ್ಡ್‌ಗಳು ಮತ್ತು ಮ್ಯಾನೇಜರ್‌ಗಳ ಜತೆ ಜಮ್ಮುವಿನ ವೈಷ್ಣೋದೇವಿ ಮಂದಿರಕ್ಕೆ ಪ್ರವೇಶಿಸುವ ದೃಶ್ಯವಿದೆ. ಕಪ್ಪು ಪುಫರ್‌ ಜಾಕೆಟ್‌ ತೊಟ್ಟು ದೇವಿ ದೇಗುಲಕ್ಕೆ ಆಗಮಿಸಿದ್ದಾರೆ. ವಿಡಿಯೋದಲ್ಲಿ ಇವರ ಮ್ಯಾನೇಜರ್‌ ಪೂಜಾ ದಾಂಡ್ಲಾನಿ ಕೂಡ ಇದ್ದಾರೆ.
ಕಳೆದ ವರ್ಷ ಇದೇ ಸಮಯದಲ್ಲಿ ಶಾರೂಖ್‌ ಖಾನ್ ಅವರು ವೈಷ್ಣೋ ದೇವಿ ಮಂದಿರಕ್ಕೆ ಭೇಟಿ ನೀಡಿದ್ದರು. ಪಠಾಣ್‌ ಸಿನಿಮಾ ಬಿಡುಗಡೆಗೆ ಮುನ್ನ ಕಳೆದ ವರ್ಷ ಡಿಸೆಂಬರ್‌ 12ರಂದು ವೈಷ್ಣೋದೇವಿ ಮಂದಿರಕ್ಕೆ ಆಗಮಿಸಿದರು. ಪಠಾಣ್‌ ಸಿನಿಮಾವು ಜಾಗತಿಕವಾಗಿ 1000 ಕೋಟಿ ರೂಪಾಯಿಗೂ ಹೆಚ್ಚು ಗಳಿಕೆ ಮಾಡಿತ್ತು. ಇದಾದ ಬಳಿಕ ಆಗಸ್ಟ್‌ ತಿಂಗಳಲ್ಲಿ ಜವಾನ್‌ ಸಿನಿಮಾ ಬಿಡುಗಡೆಗೆ ಮುನ್ನ ಶಾರೂಖ್‌ ಖಾನ್ ಇದೇ ದೇಗುಲಕ್ಕೆ ಭೇಟಿ ನೀಡಿದ್ದರು. ಜವಾನ್‌ ಸಿನಿಮಾವು ಜಾಗತಿಕ ಬಾಕ್ಸ್‌ ಆಫೀಸ್‌ನಲ್ಲಿ 1100 ಕೋಟಿ ರೂಪಾಯಿ ಗಳಿಕೆ ಮಾಡಿತ್ತು. ಇದು ಈ ವರ್ಷದ ಪ್ರಮುಖ ಹಿಟ್‌ ಸಿನಿಮಾವಾಗಿದೆ. ಹಿಂದಿಯ ಯಶಸ್ವಿ ಸಿನಿಮಾಗಳಲ್ಲಿ ಒಂದಾಗಿದೆ.
ಶಾರೂಖ್‌ ಖಾನ್ ಅವರ ಮುಂಬರುವ ಡಂಕಿ ಸಿನಿಮಾವು ಡಿಸೆಂಬರ್‌ 21ರಂದು ಬಿಡುಗಡೆಯಾಗಲಿದೆ. ರಾಜ್‌ ಕುಮಾರ್‌ ಹಿರಾನಿ ನಿರ್ದೇಶನದ ಈ ಸಿನಿಮಾವು 1000 ಕೋಟಿ ರೂಪಾಯಿ ಸಂಗ್ರಹಿಸುವ ಸೂಚನೆಯಿದೆ. ಪ್ರಭಾಸ್‌ ಅವರ ಸಲಾರ್‌ ಚಿತ್ರದೊಂದಿಗೆ ಬಾಕ್ಸ್‌ ಆಫೀಸ್‌ನಲ್ಲಿ ಇದು ಪೈಪೋಟಿ ನಡೆಸಲಿದೆ. ಈ ವರ್ಷ ಸದ್ಯ ಶಾರೂಖ್‌ ಖಾನ್ ಡಂಕಿ ಸಿನಿಮಾದ ಯಾವುದೇ ಪ್ರಮೋಷನ್‌ ಮಾಡುವುದು ಕಾಣುತ್ತಿಲ್ಲ. ಸಿನಿಮಾ ಪ್ರಮೋಷನ್‌ ಸಂದರ್ಶನಗಳೂ ಕಾಣುತ್ತಿಲ್ಲ.
ಡಂಕಿ ಸಿನಿಮಾದಲ್ಲಿ ಬೊಮ್ಮಾನ್‌ ಇರಾನಿ, ತಾಪ್ಸೆ ಪನ್ನು, ವಿಕ್ಕಿ ಕೌಶಲ್‌, ವಿಕ್ರಮ್‌ ಕೊಚ್ಚಾರ್‌, ಅನಿಲ್‌ ಗ್ರೋವರ್‌ ಸೇರಿದಂತೆ ಪ್ರಮುಖ ತಾರಾಗಣವಿದೆ. ಜಿಯೋ ಸ್ಟುಡಿಯೋಸ್‌ನ ಈ ಸಿನಿಮಾದ ಕುರಿತು ನಿರೀಕ್ಷೆ ಸಾಕಷ್ಟಿದೆ.
ರಾಜಕುಮಾರ್ ಹಿರಾನಿ ಕಾನೂನು ಬಾಹಿರವಾಗಿ ಕೆನಡಾ ಮತ್ತು ಅಮೆರಿಕಕ್ಕೆ ಹೋಗುವ ಜನರ ಕಥೆಯನ್ನೆ ಡಂಕಿ ಸಿನಿಮಾದಲ್ಲಿ ಕಟ್ಟಿಕೊಟ್ಟಿದ್ದಾರೆ. ಡಂಕಿ ಚಿತ್ರವನ್ನು ಜಿಯೋ ಸ್ಟುಡಿಯೋಸ್, ರೆಡ್ ಚಿಲ್ಲೀಸ್ ಎಂಟರ್‌ಟೇನ್‌ಮೆಂಟ್ ಮತ್ತು ರಾಜ್‌ಕುಮಾರ್ ಹಿರಾನಿ ಫಿಲ್ಮ್ಸ್ ಬ್ಯಾನರ್ ಅಡಿಯಲ್ಲಿ ಗೌರಿ ಖಾನ್ ಹಾಗೂ ರಾಜ್‌ಕುಮಾರ್ ಹಿರಾನಿ ನಿರ್ಮಿಸಿದ್ದಾರೆ.
ಡಂಕಿ ಈ ವರ್ಷ ಬಿಡುಗಡೆಯಾಗುತ್ತಿರುವ ಶಾರೂಖ್‌ ಖಾನ್‌ರ ಮೂರನೇ ಸಿನಿಮಾ. ಈ ವರ್ಷದ ಆರಂಭದಲ್ಲಿ ಪಠಾಣ್‌ ಮತ್ತು ಇತ್ತೀಚೆಗೆ ಜವಾನ್‌ ಸಿನಿಮಾ ಬಿಡುಗಡೆಯಾಗಿತ್ತು.