ಟೈಗರ್‌ 3 ಚಿತ್ರ ಪ್ರದರ್ಶನ ಕಾಣ್ತಿದ್ದ ಥಿಯೇಟರ್‌ನಲ್ಲಿ ಪಟಾಕಿ ಸಿಡಿಸಿ ಹುಚ್ಚಾಟ ಮೆರೆದ ಫ್ಯಾನ್ಸ್‌! ಎದ್ನೋ ಬಿದ್ನೋ ಎಂದು ಓಡಿದ ಪ್ರೇಕ್ಷಕರು

Tiger 3: ಸಲ್ಮಾನ್‌ ಖಾನ್‌ ಸಿನಿಮಾ ರಿಲೀಸ್‌ ಆಗ್ತಿದೆ ಎಂದರೆ, ಅಲ್ಲಿ ಅಭಿಮಾನಿಗಳ ಕ್ರೇಜ್‌ ಹೇಳತೀರದು. ತಮ್ಮದೇ ಸ್ಟೈಲ್‌ನಲ್ಲಿ ಸಲ್ಲುಮಿಯಾನ ಸಿನಿಮಾವನ್ನು ಫ್ಯಾನ್ಸ್‌ ಬರಮಾಡಿಕೊಳ್ಳುತ್ತಾರೆ. ಅದರಂತೆ ನ. 12ರ ಭಾನುವಾರ, ದೀಪಾವಳಿ ಹಬ್ಬದ ನಿಮಿತ್ತ ಟೈಗರ್‌ 3 ಸಿನಿಮಾ ರಿಲೀಸ್‌ ಆಗಿದೆ. ದೊಡ್ಡ ಮಟ್ಟದ ಹೈಪ್‌ ಗಿಟ್ಟಿಸಿಕೊಂಡ ಈ ಚಿತ್ರವನ್ನು ಅಷ್ಟೇ ಅದ್ದೂರಿಯಾಗಿಯೇ ವೆಲ್‌ಕಮ್‌ ಮಾಡಿದ್ದಾರೆ ಫ್ಯಾನ್ಸ್‌.

ಮೊದಲ ದಿನವಾದ ಭಾನುವಾರ, ಸಲ್ಮಾನ್‌ ಭಾವಚಿತ್ರಕ್ಕೆ ಕ್ಷೀರಾಭಿಷೇಕ ಮಾಡುವ ಮೂಲಕ, ಜೈಕಾರ ಕೂಗುವ ಮೂಲಕ ಸಂಭ್ರಮಿಸಿದ್ದರು. ಇದೀಗ ಒಂದು ಹೆಜ್ಜೆ ಮುಂದೆ ಹೋಗಿ ಸಿನಿಮಾ ಪ್ರದರ್ಶನ ಕಾಣುತ್ತಿದ್ದ ಚಿತ್ರಮಂದಿರದಲ್ಲಿಯೇ ಪಟಾಕಿ ಸಿಡಿಸಿ ಕೆಲ ಕಾಲ ಆತಂಕ ಸೃಷ್ಟಿಸಿದ್ದಾರೆ ಫ್ಯಾನ್ಸ್‌. ಈ ಘಟನೆಯಿಂದ ಚಿತ್ರಮಂದಿರದಲ್ಲಿಯೇ ಕಾಲ್ತುಳಿತವಾಗಿ, ಸಿನಿಮಾ ನೋಡಲು ಬಂದವರು ಎದ್ನೋ ಬಿದ್ನೋ ಎಂದು ಓಡಿ ಹೋಗಿದ್ದಾರೆ!

ಇದನ್ನೂ ಓದಿ: Tiger 3 Review: ಜಾಳು ಜಾಳು ಕಥೆಯಲ್ಲಿ ಮೇಳೈಸಿದ ಸಾಹಸ; ಮಂಕಾದ ಟೈಗರ್‌ ಘರ್ಜನೆ!

ನಾಸಿಕ್‌ ಚಿತ್ರಮಂದಿರದಲ್ಲಿ ಘಟನೆ

ಟೈಗರ್‌ 3 ಚಿತ್ರ ಪ್ರದರ್ಶನದ ವೇಳೆ ಸಲ್ಮಾನ್‌ ಖಾನ್‌ ಎಂಟ್ರಿಯಾಗುತ್ತಿದ್ದಂತೆ, ಸ್ಕ್ರೀನ್‌ನ ಒಂದು ಬದಿಯಲ್ಲಿಯೇ ಪಟಾಕಿಯ ರಾಶಿಯನ್ನೇ ಸುಟ್ಟಿದ್ದಾರೆ. ಇಡೀ ಚಿತ್ರಮಂದಿರದಲ್ಲಿ ಪಟಾಕಿಗಳು ಸಿಡಿದು, ದಟ್ಟ ಹೊಗೆಯೂ ಆವರಿಸಿದೆ. ಅಂದಹಾಗೆ ಈ ಘಟನೆ ನಡೆದಿದ್ದು, ಮಹಾರಾಷ್ಟ್ರದ ನಾಸಿಕ್‌ನ ಮಾಲೇಗಾಂವ್‌ ಮೋಹನ್‌ ಚಿತ್ರಮಂದಿರದಲ್ಲಿ. ಹೀಗೆ ಪಟಾಕಿ ಸಿಡಿಯುತ್ತಿದ್ದಂತೆ, ಸಿನಿಮಾ ನೋಡಲು ಬಂದ ಪ್ರೇಕ್ಷಕ ದಿಕ್ಕಾಪಾಲಾಗಿ ಓಡಿದ್ದಾನೆ. ಇದೇ ವೇಳೆ ಕಾಲ್ತುಳಿತವೂ ಸಂಭವಿಸಿದೆ. ಸಾಕಷ್ಟು ಮಂದಿಗೆ ಗಾಯಗಳಾಗಿವೆ ಎಂದೂ ಹೇಳಲಾಗುತ್ತಿದೆ.

ಸೋಷಿಯಲ್‌ ಮೀಡಿಯಾದಲ್ಲಿ ಖಂಡನೆ

ಸಾಮಾಜಿಕ ಜಾಲತಾಣಗಳಲ್ಲಿ ಈ ವಿಡಿಯೋ ವೈರಲ್ ಆಗುತ್ತಿದ್ದಂತೆ, ನೆಟ್ಟಿಗರು ಪಟಾಕಿ ಸಿಡಿಸಿದವರಿಗೆ ತರಾಟೆ ತೆಗೆದುಕೊಂಡಿದ್ದಾರೆ. ಇದು ಮಿತಿ ಮೀರಿದ ಹುಚ್ಚುತನ ಎಂದು ಕಾಮೆಂಟ್‌ ಹಾಕುತ್ತಿದ್ದಾರೆ. ಇನ್ನು ಕೆಲವರು ಚಿತ್ರಮಂದಿರಗಳಲ್ಲಿ ಪಟಾಕಿ ಹಚ್ಚಲು ಅನುಮತಿ ನೀಡಿದವರು ಯಾರು ಎಂದೂ ಪ್ರಶ್ನೆ ಮಾಡಿದ್ದಾರೆ.

ಇನ್ನು ಮನೀಷ್‌ ಶರ್ಮಾ ನಿರ್ದೇಶನದಲ್ಲಿ ಮೂಡಿಬಂದಿರುವ ಟೈಗರ್‌ 3 ಚಿತ್ರವನ್ನು ಯಶ್‌ ರಾಜ್‌ ಫಿಲಂಸ್‌ ನಿರ್ಮಾಣ ಮಾಡಿದೆ. ಸಲ್ಮಾನ್ ಖಾನ್, ಕತ್ರಿನಾ ಕೈಫ್, ಇಮ್ರಾನ್ ಹಶ್ಮಿ, ರಿದ್ಧಿ ಡೋಗ್ರಾ, ಅಶುತೋಷ್ ರಾಣಾ, ರೇವತಿ, ಶಾರುಖ್ ಖಾನ್, ಹೃತಿಕ್ ರೋಷನ್ ಸೇರಿದಂತೆ ಅನೇಕ ತಾರೆಯರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.