Dasara on Netflix: ನಾನಿಯ ದಸರಾ ಸಿನಿಮಾ ಒಟಿಟಿಗೆ ಎಂಟ್ರಿ; ನೆಟ್‌ಫ್ಲಿಕ್ಸ್‌ನಲ್ಲಿ ಈ ದಿನದಿಂದ ಸ್ಟ್ರೀಮಿಂಗ್‌ ಆರಂಭ

Dasara on Netflix: ನ್ಯಾಚುರಲ್ ಸ್ಟಾರ್ ನಾನಿ ನಟನೆಯ ಪ್ಯಾನ್ ಇಂಡಿಯಾ ಸಿನಿಮಾ 'ದಸರಾ' ಬಾಕ್ಸ್‌ ಆಫೀಸ್ ಲೂಟಿ ಮಾಡಿದೆ. ಶ್ರೀರಾಮ ನವಮಿ (ಮಾ. 30) ಪ್ರಯುಕ್ತ ತೆರೆಗೆ ಬಂದ 'ದಸರಾ' ವಿಶ್ವಾದ್ಯಂತ ಬರೋಬ್ಬರಿ 38 ಕೋಟಿಗೂ ಅಧಿಕ ಹಣ ದೋಚಿತ್ತು. ಲವರ್ ಬಾಯ್ ಆಗಿ ಪ್ರೇಕ್ಷಕರನ್ನು ರಂಜಿಸುತ್ತಿದ್ದ ನಾನಿ ಮೊದಲ ಬಾರಿ ಔಟ್ ಅಂಡ್ ಔಟ್ ಮಾಸ್ ಲುಕ್‌ನಲ್ಲಿ, ರಗಡ್ ಆಗಿ ಕಾಣಿಸಿಕೊಂಡಿದ್ದರು. ನಾನಿ ಹೊಸ ಅವತಾರಕ್ಕೆ ಫ್ಯಾನ್ಸ್ ಫಿದಾ ಆಗಿದ್ದರು. ಅದರ ಪರಿಣಾಮ ಈ ಸಿನಿಮಾ ಬಾಕ್ಸ್‌ ಆಫೀಸ್‌ನಲ್ಲಿ 100 ಕೋಟಿಯ ಗಡಿಯನ್ನೂ ದಾಟಿತ್ತು.

ಬಾಕ್ಸ್‌ ಆಫೀಸ್‌ನಲ್ಲಿ ಗೆದ್ದು ಬೀಗಿದ ಈ ಸಿನಿಮಾ ಶತಕೋಟಿ ಕ್ಲಬ್‌ ಸೇರುವುದರ ಜತೆಗೆ ನಾನಿಯ ನಟನೆಯೂ ಮೆಚ್ಚುಗೆ ಪಡೆದುಕೊಂಡಿತ್ತು. ಇದೀಗ ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ತೆಲುಗು, ತಮಿಳು, ಕನ್ನಡ, ಮಲಯಾಳಂ ಮತ್ತು ಹಿಂದಿ ಭಾಷೆಯಲ್ಲಿ ಬಿಡುಗಡೆ ಆಗಿದ್ದ ಈ ಸಿನಿಮಾ, ಬಿಡುಗಡೆ ಆಗಿ ತಿಂಗಳಾಗುತ್ತಿದ್ದಂತೆ, ಒಟಿಟಿಯಲ್ಲಿ ಅಬ್ಬರಿಸಲು ಸಜ್ಜಾಗಿದೆ.

ಶ್ರೀಕಾಂತ್ ಒಡೆಲಾ ಆಕ್ಷನ್ ಕಟ್ ಹೇಳಿರುವ ದಸರಾ ಸಿನಿಮಾ, ನಾನಿಯ ಮೊದಲ ಪ್ಯಾನ್ ಇಂಡಿಯಾ ಚಿತ್ರ. ಇದೀಗ ಈ ಸಿನಿಮಾ ಒಟಿಟಿಗೆ ಎಂಟ್ರಿಕೊಟ್ಟಿದೆ. ನೆಟ್‌ಫ್ಲಿಕ್ಸ್‌ನಲ್ಲಿ ಇದೇ 27ರಂದು ಸ್ಟ್ರೀಮಿಂಗ್‌ ಆರಂಭಿಸಲಿದೆ. ಕಲ್ಲಿದ್ದಲು ಗಣಿಯ ಸುತ್ತ ನಡೆಯುವ ಗ್ರಾಮೀಣ ಸೊಗಡಿನ ಕಥೆಯಲ್ಲಿ ರಾಷ್ಟ್ರಪ್ರಶಸ್ತಿ ವಿಜೇತ ನಟಿ ಕೀರ್ತಿ ಸುರೇಶ್ ನಾಯಕಿಯಾಗಿ ನಟಿಸಿದ್ದಾರೆ. ಕನ್ನಡಿಗ ದೀಕ್ಷಿತ್‌ ಶೆಟ್ಟಿ ಕೂಡಾ ಈ ಚಿತ್ರದಲ್ಲಿ ನಟಿಸಿದ್ದಾರೆ.

ಸುಧಾಕರ್ ಚೆರಕೂರಿ ನಿರ್ಮಿಸಿರುವ ದಸರಾಗೆ ಸಂತೋಷ್ ನಾರಾಯಣನ್ ಸಂಗೀತ ನೀಡಿದ್ದು, ಸತ್ಯನ್ ಸೂರ್ಯನ್ ಛಾಯಾಗ್ರಹಣವಿದೆ. ಶೈನ್ ಟಾಮ್ ಚಾಕೋ, ಸಮುದ್ರಖನಿ, ಸಾಯಿಕುಮಾರ್, ಜಾನ್ಸಿ, ಶಮಾ ಖಾಸೀಂ, ರಾಜಶೇಖರ್ ಅನಿಂಗಿ, ರವಿ ತೇಜ ನನ್ನಿಮಾಲಾ ಮುಂತಾದ ತಾರಾಬಳಗ ಚಿತ್ರದಲ್ಲಿದೆ.

ಚಿತ್ರಕ್ಕಾಗಿ ರಿಯಲ್‌ ಡ್ರಿಂಕ್ಸ್‌..

ದಸರಾ ಸಿನಿಮಾಕ್ಕಾಗಿ ನಟ ನಾನಿ ನಿಜವಾಗಿಯೂ ಮದ್ಯಪಾನ ಮಾಡಿ ಕೆಲ ದೃಶ್ಯಗಳಲ್ಲಿ ಕಾಣಿಸಿಕೊಂಡಿದ್ದರಂತೆ. ''ಚಿತ್ರದಲ್ಲಿ ನಾನು ಡ್ರಿಂಕ್ಸ್‌ ಮಾಡುವ ದೃಶ್ಯಗಳಿವೆ. ಡ್ರಿಂಕ್ಸ್‌ ಮಾಡಿದಾಗ ನನ್ನ ಕಣ್ಣು ಕೆಂಪಗಾಗಬೇಕಿತ್ತು. ಆದರೆ ಏನೇ ಮಾಡಿದರೂ ನ್ಯಾಚುರಲ್‌ ಎಫೆಕ್ಟ್‌ ಬಾರದ ಕಾರಣ ಮದ್ಯಪಾನ ಮಾಡುವ ದೃಶ್ಯಗಳಲ್ಲಿ ನಾನು ನಿಜವಾಗಿಯೂ ಡ್ರಿಂಕ್ಸ್‌ ಮಾಡಬೇಕಾಯ್ತು. ಚಿತ್ರದ ಕೆಲವೊಂದು ದೃಶ್ಯಗಳಲ್ಲಿ ನನ್ನ ಪಾತ್ರ ಬಹಳ ರಫ್‌ ಆಗಿದೆ. ಆದರೆ ಸಿನಿಮಾ ಔಟ್‌ಪುಟ್‌ ಮಾತ್ರ ಬಹಳ ಚೆನ್ನಾಗಿದೆ. ಸಿನಿಮಾ ನೋಡಿದ ನಂತರ ನೀವೇ ಹೇಳುತ್ತೀರಿ. ಖಂಡಿತ ಸಿನಿಮಾ ಎಲ್ಲರಿಗೂ ಮೆಚ್ಚುಗೆ ಆಗಲಿದೆ. ನೋಡುಗರಿಗೆ ನಿಜವಾಗಲೂ ಥ್ರಿಲ್‌ ಕೊಡುತ್ತದೆ'' ಎಂದು ನಾನಿ ತಮ್ಮ ಸಿನಿಮಾ ಹಾಗೂ ಶೂಟಿಂಗ್‌ ಅನುಭವವನ್ನು ಹೇಳಿಕೊಂಡಿದ್ದಾರೆ.