Puneeth Rajkumar: ಅಪ್ಪು ಕಥೆ ಫಹಾದ್‌ ಫಾಸಿಲ್‌ಗೆ ಹೋಯ್ತಾ?: ಪವನ್ ಕುಮಾರ್ ಬಗ್ಗೆ ಹೀಗೊಂದು ಗಾಸಿಪ್‌
Jul 09, 2022 08:29 AM IST
Share
ಅಪ್ಪು ಕಥೆ ಫಹಾದ್‌ ಫಾಸಿಲ್‌ಗೆ ಹೋಯ್ತಾ?: ಪವನ್ ಕುಮಾರ್ ಬಗ್ಗೆ ಹೀಗೊಂದು ಗಾಸಿಪ್‌
- ಗಾಂಧಿನಗರದ ಗಲ್ಲಿಗಳಲ್ಲಿ ಹೊಸದೊಂದು ಸುದ್ದಿ ಹರಿದಾಡ್ತಿದೆ. ಅದೇನೆಂದರೆ, ಪುನೀತ್‌ ಮಾಡಬೇಕಿದ್ದ ದ್ವಿತ್ವ ಚಿತ್ರವನ್ನು ಮಲಯಾಳಂ ಸ್ಟಾರ್‌ ನಟ ಮಾಡಲಿದ್ದಾರಂತೆ.
ಬೆಂಗಳೂರು: ಸ್ಯಾಂಡಲ್‌ವುಡ್‌ನಲ್ಲಿ ತಮ್ಮ ವಿಶಿಷ್ಟ ಸಿನಿಮಾಗಳ ಮೂಲಕವೇ ಎಲ್ಲರ ಗಮನ ಸೆಳೆದಿರುವ ನಿರ್ದೇಶಕ ಎಂದರೆ ಅದು ಪವನ್ ಕುಮಾರ್. ಮಾಡಿದ್ದು ಬೆರಳೆಣಿಕೆ ಸಿನಿಮಾಗಳಾದರೂ, ಎಲ್ಲವೂ ಒಂದಕ್ಕೊಂದು ಭಿನ್ನ. ಈ ನಿರ್ದೇಶಕನ ಜತೆಗೆ ಪುನೀತ್‌ ರಾಜ್‌ಕುಮಾರ್‌ ಸಹ ಸಿನಿಮಾ ಮಾಡುವುದು ಅಧಿಕೃತವಾಗಿತ್ತು. ಚಿತ್ರಕ್ಕೆ "ದ್ವಿತ್ವ" ಎಂಬ ಶೀರ್ಷಿಕೆಯೂ ಅಂತಿಮವಾಗಿತ್ತು. ಹೊಸ ಅವತಾರದಲ್ಲಿ ಕಾಣಿಸಿಕೊಳ್ಳಲಿರುವ ಬಗ್ಗೆಯೂ ಸ್ವತಃ ಪುನೀತ್‌ ಹೇಳಿಕೊಂಡಿದ್ದರು. ಆದರೆ ವಿಧಿ ಮಾತ್ರ ಅದಕ್ಕೆ ಅನುವು ಮಾಡಿಕೊಡಲಿಲ್ಲ.
ಈಗೇಕೆ ಈ ವಿಚಾರ?
ಹೌದು, ಸದ್ಯಕ್ಕೆ ಇದೇ ನಿರ್ದೇಶಕರ ಬಗ್ಗೆ ಗಾಂಧಿನಗರದ ಗಲ್ಲಿಗಳಲ್ಲಿ ಹೊಸದೊಂದು ಸುದ್ದಿ ಹರಿದಾಡ್ತಿದೆ. ಅದೇನೆಂದರೆ, ಪುನೀತ್‌ ಮಾಡಬೇಕಿದ್ದ ದ್ವಿತ್ವ ಚಿತ್ರವನ್ನು ಮಲಯಾಳಂ ಸ್ಟಾರ್‌ ನಟ ಮಾಡಲಿದ್ದಾರಂತೆ. ಈಗಾಗಲೇ ಅವರಿಗೆ ಕಥೆ ಹೇಳಿ ಅವರಿಂದಲೂ ಗ್ರೀನ್‌ ಸಿಗ್ನಲ್‌ ಸಹ ಸಿಕ್ಕಿದೆ ಎಂಬಂಥ ಗಾಸಿಪ್‌ಗಳು ಚಾಲ್ತಿಯಲ್ಲಿವೆ. ಅಂದಹಾಗೆ, ಆ ಮಲಯಾಳಂ ನಟ ಬೇರಾರು ಅಲ್ಲ, ಫಹಾದ್‌ ಫಾಸಿಲ್!
ಫಹಾದ್‌ಗೂ ಬೇಕಿರುವುದೂ ಇಂಥ ಕಥೆಗಳೇ..
ಈ ನಟ ನಿರ್ದೇಶಕರು ಮಾಡುವ ಸಿನಿಮಾಗಳೇ ಒಂದು ರೀತಿ ವಿಭಿನ್ನ. ಫಹಾದ್‌ ಫಾಸಿಲ್ ಅವರ ಈ ವರೆಗಿನ ಸಿನಿಮಾಗಳನ್ನು ನೋಡಿದರೆ, ಅಲ್ಲಿ ಒಂದಕ್ಕಿಂತ ಒಂದು ಡಿಫರೆಂಟ್. ಕಂಟೆಂಟ್‌ ಆಧರಿತ ಕಥೆಗಳಿಗೇ ಹೆಚ್ಚು ಪ್ರಾಶಸ್ತ್ಯ ನೀಡುತ್ತಾರೆ. ಇದೀಗ ದ್ವಿತ್ವ ಸಹ ಅದೇ ಶೈಲಿಯ ಸಿನಿಮಾ ಆಗಿರುವುದರಿಂದ ಫಹಾದ್‌ ಸೂಕ್ತ ಆಯ್ಕೆ ಎಂದೆನಿಸಿ ಅವರಿಗೆ ಕಥೆ ಹೇಳಿಬಂದಿದ್ದಾರಂತೆ ಪವನ್. ಎಲ್ಲವೂ ಓಕೆ ಸಹ ಆಗಿದೆ. ಮೂಲ ಮಲಯಾಳಂನಲ್ಲಿ ಸಿನಿಮಾ ಮಾಡಿ ಅದನ್ನು ಬೇರೆ ಭಾಷೆಗೆ ಡಬ್‌ ಮಾಡಲಿದ್ದಾರೆ ಎಂಬ ವಿಚಾರವೂ ಸುದ್ದಿಯಲ್ಲಿದೆ. ಕನ್ನಡದ ಕಲಾವಿದರಿಗೆ ಹೆಚ್ಚಿನ ಪ್ರಾಶಸ್ತ್ಯವೂ ಇಲ್ಲಿರಲಿದೆಯಂತೆ.
ಸದ್ಯ ಗಾಳಿಪಟ ಹಾರಿಸೋದ್ರಲ್ಲೆ ಪವನ್ ಬಿಜಿ..
ಯೋಗರಾಜ್ ಭಟ್ ನಿರ್ದೇಶನದ "ಗಾಳಿಪಟ 2ʼ ಸಿನಿಮಾದಲ್ಲಿ ಗಣೇಶ್, ದಿಗಂತ್ ಜತೆಗೆ ಪವನ್ ಸಹ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಈ ಸಿನಿಮಾ ಬಿಡುಗಡೆಗೆ ಸಿದ್ಧವಾಗಿದೆ. ಹಾಡುಗಳ ಮೂಲಕ ಸದ್ದು ಮಾಡುತ್ತಿರುವ ಈ ಚಿತ್ರ ಆಗಸ್ಟ್‌ 12ಕ್ಕೆ ತೆರೆಕಾಣಲಿದೆ. ಈ ಸಿನಿಮಾ ಕೆಲಸಗಳ ಜತೆಯಲ್ಲಿಯೇ ಮುಂದಿನ ಸಿನಿಮಾಗಳ ಪ್ರೀ ಪ್ರೊಡಕ್ಷನ್‌ ಕೆಲಸವನ್ನೂ ಪವನ್ ಆರಂಭಿಸಿದ್ದಾರಂತೆ. ಆ ಚಿತ್ರ ಯಾವುದು? ಪುನೀತ್‌ಗೆ ಮಾಡಬೇಕಿದ್ದ ದ್ವಿತ್ವ ಆಗಿರಲಿದೆಯೇ? ಅಥವಾ ಹೊಸ ಪ್ರಾಜೆಕ್ಟ್‌ ಅನೌನ್ಸ್‌ ಮಾಡಲಿದ್ದಾರಾ ಎಂಬುದನ್ನು ಕಾದು ನೋಡಬೇಕಿದೆ.
ಗಾಳಿಪಟ 2 ಚಿತ್ರವನ್ನು ಸೂರಜ್ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿ ಯೋಗರಾಜ್ ಭಟ್ ಕಥೆ ಬರೆದು ನಿರ್ದೇಶಿಸುತ್ತಿದ್ದಾರೆ. ಚಿತ್ರದ ಹಾಡುಗಳಿಗೆ ಅರ್ಜುನ್ ಜನ್ಯಾ ಸಂಗೀತವಿದೆ. ಗಣೇಶ್, ದಿಗಂತ್, ಪವನ್ ಕುಮಾರ್, ಅನಂತ್ ನಾಗ್, ವೈಭವಿ ಶಾಂಡಿಲ್ಯ, ಸಂಯುಕ್ತ ಮೆನನ್, ಶರ್ಮಿಳಾ ಮಾಂಡ್ರೆ, ನಿಶ್ವಿಕಾ ನಾಯ್ಡು ಹಾಗೂ ಇನ್ನಿತರರು ಸಿನಿಮಾದಲ್ಲಿ ನಟಿಸಿದ್ದಾರೆ.