Puneeth Rajkumar: ಅಪ್ಪು ನಟಿಸಬೇಕಿದ್ದ "ದ್ವಿತ್ವ" ಸಿನಿಮಾ ನಿಂತಿಲ್ಲ, ನಿಲ್ಲಲ್ಲ!; ಅಚ್ಚರಿಯ ಹೇಳಿಕೆ ನೀಡಿದ ಪವನ್‌ ಕುಮಾರ್..‌

ಬೆಂಗಳೂರು: ಸ್ಯಾಂಡಲ್‌ವುಡ್‌ನಲ್ಲಿ ತಮ್ಮ ವಿಶಿಷ್ಟ ಸಿನಿಮಾಗಳ ಮೂಲಕವೇ ಎಲ್ಲರ ಗಮನ ಸೆಳೆದಿರುವ ನಿರ್ದೇಶಕ ಎಂದರೆ ಅದು ಪವನ್‌ ಕುಮಾರ್.‌ ಮಾಡಿದ್ದು ಬೆರಳೆಣಿಕೆ ಸಿನಿಮಾಗಳಾದರೂ, ಎಲ್ಲವೂ ಒಂದಕ್ಕೊಂದು ಭಿನ್ನ. ಈ ನಿರ್ದೇಶಕನ ಜತೆಗೆ ಪುನೀತ್‌ ರಾಜ್‌ಕುಮಾರ್‌ ಸಹ ಸಿನಿಮಾ ಮಾಡುವುದು ಅಧಿಕೃತವಾಗಿತ್ತು. ಚಿತ್ರಕ್ಕೆ "ದ್ವಿತ್ವ" ಎಂಬ ಶೀರ್ಷಿಕೆಯೂ ಅಂತಿಮವಾಗಿತ್ತು. ಹೊಸ ಅವತಾರದಲ್ಲಿ ಕಾಣಿಸಿಕೊಳ್ಳಲಿರುವ ಬಗ್ಗೆಯೂ ಸ್ವತಃ ಪುನೀತ್‌ ಹೇಳಿಕೊಂಡಿದ್ದರು. ಆದರೆ ವಿಧಿ ಮಾತ್ರ ಅದಕ್ಕೆ ಅನುವು ಮಾಡಿಕೊಡಲಿಲ್ಲ.

ಎಲ್ಲ ಅಂದುಕೊಂಡಂತೆ ಆಗಿದ್ದರೆ, ಪುನೀತ್‌ ನಮ್ಮ ನಡುವೆ ಇದ್ದಿದ್ದೇ ಆಗಿದ್ದರೆ, ಇಷ್ಟೊತ್ತಿಗಾಗಲೇ ಈ ಸಿನಿಮಾ ಮುಗಿದಿರುತ್ತಿತ್ತು. ಆದರೆ, ಅದು ಈಡೇರಲಿಲ್ಲ. ಇದೀಗ ಈ ಚಿತ್ರಕ್ಕೆ ಸಂಬಂಧಿಸಿದಂತೆ, ಇತ್ತೀಚೆಗಷ್ಟೇ "ಗಾಳಿಪಟ 2" ಚಿತ್ರದ ಪತ್ರಿಕಾಗೋಷ್ಠಿ ಸಮಯದಲ್ಲಿ ಪವನ್‌, ದ್ವಿತ್ವ ಚಿತ್ರದ ಬಗ್ಗೆ ಮಾತನಾಡಿದ್ದಾರೆ. "ದ್ವಿತ್ವ" ಸಿನಿಮಾ ನಿಂತಿಲ್ಲ. ಅದು ಯಾವಾಗ ಆಗಬೇಕೋ ಆವಾಗ ಆಗಲಿದೆ. ಆ ಪಾತ್ರಕ್ಕೆ ಹೋಲುವ ವ್ಯಕ್ತಿ ಸಿಗುತ್ತಿದ್ದಂತೆ, ಸಿನಿಮಾ ಕೆಲಸ ಮತ್ತೆ ಶುರುವಾಗಲಿದೆ" ಎಂದಷ್ಟೇ ಹೇಳಿಕೊಂಡಿದ್ದಾರೆ. ಸದ್ಯ ಪವನ್‌ ಅವರ ಈ ಮಾತು ಅಭಿಮಾನಿಗಳ ಕುತೂಹಲಕ್ಕೆ ಕಾರಣವಾಗಿದೆ.

ಫಹಾದ್‌ ಹೆಸರು ಮುನ್ನೆಲೆಗೆ..

ಇದೆಲ್ಲದರ ನಡುವೆಯೇ ಇತ್ತೀಚೆಗಷ್ಟೇ ಪುನೀತ್‌ ಮಾಡಬೇಕಿದ್ದ "ದ್ವಿತ್ವ" ಚಿತ್ರವನ್ನು ಮಲಯಾಳಂ ಸ್ಟಾರ್‌ ನಟ ಫಹಾದ್‌ ಫಾಸಿಲ್‌ ಮಾಡಲಿದ್ದಾರಂತೆ ಎಂಬ ಸುದ್ದಿಯೂ ಹರಿದಾಡಿತ್ತು. ಈಗಾಗಲೇ ಅವರಿಗೆ ಕಥೆ ಹೇಳಿ ಅವರಿಂದಲೂ ಗ್ರೀನ್‌ ಸಿಗ್ನಲ್‌ ಸಹ ಸಿಕ್ಕಿದೆ ಎಂಬಂಥ ಗಾಸಿಪ್‌ಗಳು ಚಾಲ್ತಿಯಲ್ಲಿದ್ದವು. ಆದರೆ, ಅದ್ಯಾವುದರ ಬಗ್ಗೆಯೂ ನಿರ್ದೇಶಕ ಪವನ್‌ ತುಟಿಬಿಚ್ಚಿರಲಿಲ್ಲ.

ಫಹಾದ್‌ ಮತ್ತು ಪವನ್‌ ಮಾಡುವ ಸಿನಿಮಾಗಳೇ ಒಂದು ರೀತಿ ವಿಭಿನ್ನ. ಫಹಾದ್‌ ಫಾಸಿಲ್‌ ಅವರ ಈ ವರೆಗಿನ ಸಿನಿಮಾಗಳನ್ನು ನೋಡಿದರೆ, ಅಲ್ಲಿ ಒಂದಕ್ಕಿಂತ ಒಂದು ಡಿಫರೆಂಟ್.‌ ಕಂಟೆಂಟ್‌ ಆಧರಿತ ಕಥೆಗಳಿಗೇ ಹೆಚ್ಚು ಪ್ರಾಶಸ್ತ್ಯ ನೀಡುತ್ತಾರೆ. ಇದೀಗ ದ್ವಿತ್ವ ಸಹ ಅದೇ ಶೈಲಿಯ ಸಿನಿಮಾ ಆಗಿರುವುದರಿಂದ ಫಹಾದ್‌ ಸೂಕ್ತ ಆಯ್ಕೆ ಎಂದೆನಿಸಿ ಅವರಿಗೆ ಕಥೆ ಹೇಳಿಬಂದಿದ್ದಾರಂತೆ ಪವನ್.‌ ಎಲ್ಲವೂ ಓಕೆ ಸಹ ಆಗಿದೆ. ಮೂಲ ಮಲಯಾಳಂನಲ್ಲಿ ಸಿನಿಮಾ ಮಾಡಿ ಅದನ್ನು ಬೇರೆ ಭಾಷೆಗೆ ಡಬ್‌ ಮಾಡಲಿದ್ದಾರೆ ಎಂಬ ವಿಚಾರವೂ ಸುದ್ದಿಯಲ್ಲಿದೆ. ಕನ್ನಡದ ಕಲಾವಿದರಿಗೆ ಹೆಚ್ಚಿನ ಪ್ರಾಶಸ್ತ್ಯವೂ ಇಲ್ಲಿರಲಿದೆಯಂತೆ ಎಂದೇ ಹೇಳಲಾಗುತ್ತಿದೆಯಾದರೂ, ಇನ್ನಷ್ಟೇ ಅಧಿಕೃತವಾಗಬೇಕಿದೆ.

ಸದ್ಯ ಗಾಳಿಪಟ ಹಾರಿಸೋದ್ರಲ್ಲೆ ಪವನ್‌ ಬಿಜಿ..

ಯೋಗರಾಜ್‌ ಭಟ್‌ ನಿರ್ದೇಶನದ "ಗಾಳಿಪಟ 2ʼ ಸಿನಿಮಾದಲ್ಲಿ ಗಣೇಶ್‌, ದಿಗಂತ್‌ ಜತೆಗೆ ಪವನ್‌ ಸಹ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ಈ ಸಿನಿಮಾ ಬಿಡುಗಡೆಗೆ ಸಿದ್ಧವಾಗಿದೆ. ಹಾಡುಗಳು ಮತ್ತು ಟ್ರೇಲರ್ ಮೂಲಕ ಸದ್ದು ಮಾಡುತ್ತಿರುವ ಈ ಚಿತ್ರ ಆಗಸ್ಟ್‌ 12ಕ್ಕೆ ತೆರೆಕಾಣಲಿದೆ. ಈ ಸಿನಿಮಾ ಕೆಲಸಗಳ ಜತೆಯಲ್ಲಿಯೇ ಮುಂದಿನ ಸಿನಿಮಾಗಳ ಪ್ರೀ ಪ್ರೊಡಕ್ಷನ್‌ ಕೆಲಸವನ್ನೂ ಪವನ್‌ ಆರಂಭಿಸಿದ್ದಾರಂತೆ. ಆ ಚಿತ್ರ ಯಾವುದು? ಪುನೀತ್‌ಗೆ ಮಾಡಬೇಕಿದ್ದ ದ್ವಿತ್ವ ಆಗಿರಲಿದೆಯೇ? ಅಥವಾ ಹೊಸ ಪ್ರಾಜೆಕ್ಟ್‌ ಅನೌನ್ಸ್‌ ಮಾಡಲಿದ್ದಾರಾ ಎಂಬುದನ್ನು ಕಾದು ನೋಡಬೇಕಿದೆ.

ಗಾಳಿಪಟ 2 ಚಿತ್ರವನ್ನು ಸೂರಜ್ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿ ಯೋಗರಾಜ್ ಭಟ್ ಕಥೆ ಬರೆದು ನಿರ್ದೇಶಿಸುತ್ತಿದ್ದಾರೆ. ಚಿತ್ರದ ಹಾಡುಗಳಿಗೆ ಅರ್ಜುನ್ ಜನ್ಯ ಸಂಗೀತವಿದೆ. ಗಣೇಶ್, ದಿಗಂತ್, ಪವನ್ ಕುಮಾರ್, ಅನಂತ್ ನಾಗ್, ವೈಭವಿ ಶಾಂಡಿಲ್ಯ, ಸಂಯುಕ್ತ ಮೆನನ್, ಶರ್ಮಿಳಾ ಮಾಂಡ್ರೆ, ನಿಶ್ವಿಕಾ ನಾಯ್ಡು ಹಾಗೂ ಇನ್ನಿತರರು ಸಿನಿಮಾದಲ್ಲಿ ನಟಿಸಿದ್ದಾರೆ.