Pan India Movie: ಸಾವಿರ ಕೋಟಿಯ ಸರದಾರನ್ಯಾರು? ಈ ಸಿನಿಮಾ ಮೇಲೆ ನೆಟ್ಟಿಗರ ಕಣ್ಣು
Sep 13, 2023 04:45 PM IST
Share
ಯಾವ ಸಿನಿಮಾ 1000 ಕೋಟಿ ಗಳಿಸಲಿದೆ
- ಇತ್ತೀಚೆಗೆ ಹಲವು ಪ್ಯಾನ್‌ ಇಂಡಿಯಾ ಸಿನಿಮಾಗಳು ಬಿಡುಗಡೆಯಾಗಿವೆ. ಇನ್ನೂ ಹಲವು ಸಿನಿಮಾಗಳು ಬಿಡುಗಡೆಗೆ ಸಿದ್ಧವಾಗಿವೆ. ಈ ನಡುವೆ ಯಾವ ಸಿನಿಮಾ ಹೆಚ್ಚು ಗಳಿಕೆ ಮಾಡಬಹುದು ಎಂಬ ಚರ್ಚೆಯೊಂದು ಸಾಮಾಜಿಕ ಜಾಲತಾಣದಲ್ಲಿ ನಡೆಯುತ್ತಿದೆ. ಮುಂದಿನ ಪ್ಯಾನ್‌ ಇಂಡಿಯಾ ಸಿನಿಮಾಗಳಲ್ಲಿ ಯಾವ ಸಿನಿಮಾ 1000 ಕೋಟಿ ಗಳಿಸಲಿದೆ ಎಂಬುದಕ್ಕೆ ಸಿನಿಪ್ರೇಮಿಗಳ ಕಾಮೆಂಟ್‌ ಹೀಗಿದೆ.
ಭಾರತೀಯ ಚಿತ್ರರಂಗದಲ್ಲಿ ಇತ್ತೀಚೆಗೆ ಪ್ಯಾನ್‌ ಇಂಡಿಯಾ ಸಿನಿಮಾಗಳು ಹೆಚ್ಚು ಬಿಡುಗಡೆಯಾಗುತ್ತಿವೆ. ಈಗಾಗಲೇ ಕೆಲವು ಪ್ಯಾನ್‌ ಇಂಡಿಯಾ ಸಿನಿಮಾಗಳು ಬಿಡುಗಡೆಯಾಗಿದ್ದು, ಇನ್ನೂ ಹಲವು ಸಿನಿಮಾಗಳು ಬಿಡುಗಡೆಯ ಹಾದಿಯಲ್ಲಿವೆ.
ಸ್ಟಾರ್‌ ನಟರ ಈ ಸಿನಿಮಾಗಳ ಬಿಡುಗಡೆಯಾಗಿ ಅಭಿಮಾನಿಗಳು ಎದುರು ನೋಡುತ್ತಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ಕೆಲವು ಪ್ಯಾನ್‌ ಇಂಡಿಯಾ ಸಿನಿಮಾಗಳು ದೊಡ್ಡ ಮಟ್ಟಿಗೆ ಯಶಸ್ಸು ಗಳಿಸಿದ್ದರೂ ಕೂಡ ಕೆಲವು ಸಿನಿಮಾಗಳು ಗಲ್ಲಾಪೆಟ್ಟಿಗೆಯಲ್ಲಿ ಸದ್ದು ಮಾಡಿರಲಿಲ್ಲ. ಇದೀಗ ಬಾಲಿವುಡ್, ಕಾಲಿವುಡ್, ಸ್ಯಾಂಡಲ್ವುಡ್, ಟಾಲಿವುಡ್‌ನಲ್ಲಿ ಹಲವು ಪ್ಯಾನ್‌ ಇಂಡಿಯಾ ಸಿನಿಮಾಗಳು ಬಿಡುಗಡೆಯ ಹಾದಿಯಲ್ಲಿದ್ದು, ಯಾವ ಸಿನಿಮಾ ಹೆಚ್ಚು ಕಲೆಕ್ಷನ್‌ ಮಾಡಬಹುದು ಎಂಬ ಚರ್ಚೆ ಆರಂಭವಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಮುಂದಿನ ಯಾವ ಸಿನಿಮಾ 1000 ಕೋಟಿ ಗಳಿಕೆ ಮಾಡಬಹುದು ಎಂಬ ಚರ್ಚೆಗೆ ಮೊದಲಿಟ್ಟಿದ್ದಾರೆ ಅಂಕಣಕಾರ, ಬರಹಗಾರ ಮನೋಬಲ ವಿಜಯಬಾಲನ್‌.
ಇವರ ಈ ಪೋಸ್ಟ್‌ಗೆ ಹಲವರು ಕಾಮೆಂಟ್‌ ಮಾಡುವ ಮೂಲಕ ತಮ್ಮ ಪ್ರತಿಕ್ರಿಯೆ ವ್ಯಕ್ತಪಡಿಸಿದ್ದಾರೆ. ಹಲವರು ಲಿಯೋ, ಸಲಾರ್‌, ಕಲ್ಕಿ2898AD, ಪುಷ್ಪಾ 2 ಹೀಗೆ ಹಲವು ಸಿನಿಮಾಗಳನ್ನು ಹೆಸರಿಸಿದ್ದಾರೆ.
ಮನೋಬಲ ಅವರ ಪೋಸ್ಟ್‌ಗೆ ಬಂದ ಕಾಮೆಂಟ್‌ಗಳು ಹೀಗಿವೆ
ತಮಿಳಿನ ಮೊದಲ 1000 ಕೋಟಿ ಸಿನಿಮಾ ಇನ್ನು ಲೋಡಿಂಗ್‌ ಆಗುತ್ತಿದೆ. ತಲೈವಾ171 ಎಂದು ಹ್ಯಾಷ್‌ಟ್ಯಾಗ್‌ ಹಾಕಿ ಸತೀಶ್‌ ಎನ್ನುವವರು ಕಾಮೆಂಟ್‌ ಮಾಡಿದ್ದಾರೆ. ರಜನಿಕಾಂತ್‌ ಅವರ 171 ಚಿತ್ರ ತಯಾರಾಗುತ್ತಿದ್ದು ಈ ಚಿತ್ರಕ್ಕೆ ಇನ್ನೂ ಹೆಸರಿಟ್ಟಿಲ್ಲ, ಸದ್ಯಕ್ಕೆ ಈ ಸಿನಿಮಾಕ್ಕೆ ತಲೈವಾ 171 ಎಂದು ಕರೆಯಲಾಗುತ್ತಿದೆ.
ʼತಮಿಳಿನಲ್ಲಿ ರಜನಿಕಾಂತ್‌ ಸಿನಿಮಾದಿಂದ ಮಾತ್ರ 1000 ಕೋಟಿ ಗಳಿಕೆ ಸಾಧ್ಯ. ಅವರ ಎರಡು ಸಿನಿಮಾಗಳು ಈಗಾಗಲೇ 600 ಕೋಟಿಗೂ ಹೆಚ್ಚು ಗಳಿಕೆ ಮಾಡಿದ್ದವುʼ ಎಂದು ಆನ್‌ಲೈನ್‌ ರಜನಿ ಫ್ಯಾನ್ಸ್‌ ಪುಟದವರು ಕಾಮೆಂಟ್‌ ಮಾಡಿದ್ದಾರೆ.
ಐವಿಡಿ ಸಲಾರ್‌ ಪುಟದವರು ʼಸಲಾರ್‌ʼ ಎಂದು ಉತ್ತರ ನೀಡಿದ್ದರೆ, ಅರವಿಂದ ಸಲಾರ್‌ ಎನ್ನುವವರು 1000 ಗಳಿಸಬಹುದಾದ ಚಿತ್ರಗಳ ಪಟ್ಟಿಯನ್ನು ಊಹಿಸಿದ್ದಾರೆ. ಜವಾನ್‌, ಸಲಾರ್‌, ಕಲ್ಕಿ2898AD, ಟೈಗರ್‌ 3, ವಾರ್‌ 3, ಅನಿಮಲ್‌, ಪುಷ್ಪಾ 2 ದಿ ರೂಲ್‌, ದೇವರ, ಗೇಮ್‌ ಚೆಂಜರ್‌, ದಿ ವ್ಯಾಕ್ಸಿನ್‌ ವಾರ್‌ ಸಿನಿಮಾಗಳು 1000 ಗಳಿಸಬಹುದು ಎಂದು ಅಂದಾಜಿಸಿದ್ದಾರೆ.
ʼಸಲಾರ್‌ʼ ಎಂದು ಶಿವ ಕಾನುಮುರಿ ಎನ್ನುವವರು ಕಾಮೆಂಟ್‌ ಮಾಡಿದ್ದರೆ, ʼಸದ್ಯ ಜವಾನ್‌ ಮುಂದೆ ಟೈಗರ್‌ 3ʼ ಎಂದು ಜಿಶಾನ್‌ ಅಲಂ ಕಾಮೆಂಟ್‌ ಮಾಡಿದ್ದಾರೆ. ʼಸರಿಯಾಗಿ ಬಿಡುಗಡೆ ಆದ್ರೆ ಸಲಾರ್‌ ಪಕ್ಕಾʼ ಎಂದು ವೇಣು ಚರಣ್‌ ಎನ್ನುವವರು ಕಾಮೆಂಟ್‌ ಮಾಡಿದ್ದಾರೆ. ʼಸಲಾರ್‌, ಅದರಲ್ಲಿ ಯಾವುದೇ ಅನುಮಾನವಿಲ್ಲʼ ಎಂದು ವಿನೀತ್‌ ಎನ್ನುವವರು ಕಾಮೆಂಟ್‌ ಮಾಡಿದ್ದಾರೆ. ಕೆಲವರು ʼಲಿಯೊ ಹಾಗೂ ಟೈಗರ್‌ 3ʼ ಎಂದು ಕಾಮೆಂಟ್‌ ಮಾಡುವ ಮೂಲಕ ತಮ್ಮ ಅಭಿಪ್ರಾಯ ಹಂಚಿಕೊಂಡಿದ್ದಾರೆ.
ಹಲವರು ಈ ಪೋಸ್ಟ್‌ಗೆ ಸಲಾರ್‌ ಎಂದು ಕಾಮೆಂಟ್‌ ಮಾಡಿದ್ದರೆ, ಇನ್ನೂ ಕೆಲವರು ಲಿಯೊ ಎಂದು ಕಾಮೆಂಟ್‌ ಮಾಡಿದ್ದಾರೆ. ಆದರೆ ಬಹುತೇಕರ ಆಯ್ಕೆ ಸಲಾರ್‌ ಹಾಗೂ ತಲೈವಾ171 ಆಗಿದೆ.
ಇಂದು ಮಧ್ಯಾಹ್ನ 1.11ಕ್ಕೆ ಈ ಪೋಸ್ಟ್‌ ಮಾಡಲಾಗಿದ್ದು, ಈಗಾಗಲೇ 92 ಸಾವಿರಕ್ಕೂ ಅಧಿಕ ಮಂದಿ ವೀಕ್ಷಿಸಿದ್ದಾರೆ. 377ಕ್ಕೂ ಹೆಚ್ಚು ಮಂದಿ ಕಾಮೆಂಟ್‌ ಮಾಡುವ ಮೂಲಕ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.