Seetha Rama: ಸಿಹಿಯ ಹೆಲಿಕಾಪ್ಟರ್‌ ಕನಸನ್ನು ರಾಮ ನನಸು ಮಾಡಿದ್ರೆ; ಇತ್ತ ಸೀತಾಳ ಅಡ್ವಾನ್ಸ್‌ ಸ್ಯಾಲರಿಗೆ ಕತ್ತರಿ ಹಾಕಿದ್ದಾಳೆ ಭಾರ್ಗವಿ

Seetha Rama: Serial 52th Episode: ಹೆಲಿಕಾಪ್ಟರ್‌ನಲ್ಲಿ ಹೋಗಬೇಕೆಂಬ ಮತ್ತು ಸೀತಮ್ಮನಿಗೆ ಹಣ ಸಿಗಲಿ ಎಂಬ ಕಾರಣಕ್ಕೆ ಸಿಹಿ ಉಪವಾಸ ಮಾಡಿದ್ದಾಳೆ. ಮೊದಲೇ ಸಕ್ಕರೆ ಕಾಯಿಲೆಯಿಂದ ಬಳಲುತ್ತಿದ್ದ ಸಿಹಿಗೆ ಉಪವಾಸ ಮಾಡಿದ್ದಕ್ಕೆ ಆರೋಗ್ಯದಲ್ಲಿ ಏರುಪೇರಾಗಿ ಪ್ರಜ್ಞಾಹೀನ ಸ್ಥಿತಿ ತಲುಪಿದ್ದಳು. ಗಾಬರಿಯಾದ ಸೀತಾ ಮತ್ತು ರಾಮ ಇಬ್ಬರೂ ಸಿಹಿಗೆ ಚಿಕಿತ್ಸೆ ಕೊಡಿಸಿದ್ದಾರೆ. ಉಪವಾಸ ಮಾಡಿದ್ದಕ್ಕೆ ಕಾರಣವನ್ನೂ ಹೇಳಿದ್ದಾಳೆ. ಸಿಹಿಯ ಕನಸನ್ನು ನನಸಾಗಿಸಲು ರಾಮ ಮುಂದಾಗಿದ್ದಾನೆ.

ಸಿಹಿ ಮತ್ತು ಸೀತಾಳನ್ನು ಕರೆದು ನೇರವಾಗಿ ಹೆಲಿಕಾಪ್ಟರ್‌ ಬಳಿ ಹೋಗಿದ್ದಾನೆ. ಸಿಹಿಗೆ ಸರ್ಪ್ರೈಸ್‌ ನೀಡಿದ್ದಾನೆ ರಾಮ್.‌ ಅಷ್ಟೇ ಅಲ್ಲ ಸಿಹಿ ಸೀತಾಳನ್ನು ಹೆಲಿಕಾಪ್ಟರ್‌ ಮೇಲೆ ಕೂರಿಸಿ, ಒಂದು ಸುತ್ತು ರೌಂಡ್‌ ಹೊಡೆಸಿದ್ದಾನೆ. ಪುಟಾಣಿ ಸಿಹಿ ಬೆರಗುಗಣ್ಣಿನಿಂದಲೇ ಹೆಲಿಕಾಪ್ಟರ್‌ನ ಪ್ರಯಾಣವನ್ನು ಅನುಭವಿಸಿದ್ದಾಳೆ. ಆಕಾಶದಲ್ಲಿ ಹಾರಾಡಿ ಖುಷಿ ಪಟ್ಟಿದ್ದಾಳೆ. ಫ್ರೆಂಡ್‌ ರಾಮ್‌ಗೂ ಸಿಹಿ ಮುತ್ತನಿಟ್ಟು, ಥ್ಯಾಂಕ್ಸ್‌ ಎಂದಿದ್ದಾಳೆ. ಇಷ್ಟೆಲ್ಲ ಖರ್ಚು ಮಾಡುವ ಅಗತ್ಯ ಏನಿತ್ತು ಎಂಬ ಮಾತು ಸೀತಾಳಿಂದ ಬಂದಿದೆ. ನನ್ನ ಫ್ರೆಂಡ್‌ ಸಲುವಾಗಿ ನಾನು ಏನು ಬೇಕಾದರೂ ಮಾಡಲು ಸಿದ್ಧ ಎಂದಿದ್ದಾನೆ ರಾಮ.

ಇದನ್ನೂ ಓದಿ: ಶಾರುಖ್‌ ಖಾನ್‌ಗೆ ಮತ್ತೆ ಮಗ್ಗಲು ಮುಳ್ಳಾಗಲು ಹೊರಟ ಹೊಂಬಾಳೆ ಫಿಲಂಸ್! ಹೀಗಿದೆ ಅಸಲಿ ಕಾರಣ

ಸಿಹಿಯ ಆಸೆ ಈಡೇರಿಸಿದ ಖುಷಿ ರಾಮನಲ್ಲಿ ಮೂಡಿದರೆ, ಇತ್ತ ಸಿಹಿಯ ಖುಷಿಗೆ ಪಾರವೇ ಇಲ್ಲ. ಸಿಹಿ ಮತ್ತು ರಾಮನ ಈ ಆತ್ಮೀಯತೆ ನೋಡಿದ ಸೀತಾ, ನಿಮ್ಮನ್ನು ನೋಡಿದ್ರೆ ನನಗೇ ಹೊಟ್ಟೆಕಿಚ್ಚಾಗುತ್ತದೆ ಎಂದಿದ್ದಾಳೆ. ಏನಕ್ಕೆ ಎಂದು ಕೇಳಿದ ರಾಮನಿಗೆ, ನನಗಿಂತ ನೀವೇ ಸಿಹಿಯನ್ನು ಹೆಚ್ಚು ಇಷ್ಟಪಡ್ತಿದ್ದೀರಾ ಎಂದಿದ್ದಾಳೆ. ಅಯ್ಯೋ ಹಾಗೇನಿಲ್ಲ, ನಿಮ್ಮನ್ನು ಮೀರಿಸಲು ಅದು ಅಸಾಧ್ಯ ಎಂದಿದ್ದಾನೆ ರಾಮ. ಹೀಗೆ ಇಬ್ಬರ ಮಾತುಕತೆ ಮುಂದುವರಿದಿದೆ.

ಮತ್ತೊಂದು ಕಡೆ ಸೀತಾಳನ್ನು ಭೇಟಿ ಮಾಡಿದ್ದಾಳೆ ಪ್ರಿಯಾ. ಇನ್ನೇನು ನಿನಗೆ ಹಣ ಸಿಗುತ್ತೆ. ನಿನ್ನ ಸಮಸ್ಯೆಗಳೆಲ್ಲ ಪರಿಹಾರ ಆಗುತ್ತವೆ ಎಂದು ಹೇಳುತ್ತಿದ್ದಾಳೆ. ಅಡ್ವಾನ್ಸ್‌ ಸ್ಯಾಲರಿ ಸಿಕ್ಕರೆ ಸಾಕಪ್ಪ ಎಂದು ಕಾದು ಕುಳಿತಿದ್ದ ಸೀತಾಗೆ, ಸಮಸ್ಯೆ ಸುಳಿಯಿಂದ ಹತ್ತಿರ ಬಂದೆ ಎಂಬ ಭಾವ ಆವರಿಸಿದೆ. ಆದರೆ, ಸೀತಾಗೆ ಅಡ್ವಾನ್ಸ್‌ ಸಂಬಳವನ್ನು ತಪ್ಪಿಸುವ ನಿಟ್ಟಿನಲ್ಲಿ ಅಡ್ಡಗಾಲಾಗಿದ್ದಾಳೆ ಭಾರ್ಗವಿ.

ಮನೆಯಲ್ಲಿ ರಾಮನ ಫೋನ್‌ ಸ್ವಿಚ್‌ ಆಫ್‌ ಮಾಡಿ, ನೇರವಾಗಿ ಆಫೀಸ್‌ಗೆ ಬಂದಿದ್ದಾಳೆ ಭಾರ್ಗವಿ. ಅಷ್ಟೇ ಅಲ್ಲ, ಮ್ಯಾನೇಜರ್‌ ಚರಣ್‌ ಜತೆಗೆ ಸೀತಾಳನ್ನು ಭೇಟಿ ಮಾಡಿ, ಅಡ್ವಾನ್ಸ್‌ ಸ್ಯಾಲರಿ ಕೊಡಲು ಸಾಧ್ಯವಿಲ್ಲ ಎಂದಿದ್ದಾಳೆ. ಔಟ್‌ ಎಂದು ಸೀತಾಳನ್ನು ಕ್ಯಾಬಿನ್‌ನಿಂದ ಹೊರ ಕಳಿಸಿದ್ದಾಳೆ. ತಪ್ಪಾಯ್ತು ಎಂದು ಹೇಳಿ ಕಣ್ಣೀರಾಗಿಯೇ ಹೊರ ಬಂದಿದ್ದಾಳೆ ಸೀತಾ. ಹಾಗಾದ್ರೆ, ಸೀತಾಳ ಮನೆ ಉಳಿಸಿಕೊಳ್ಳಬೇಕು ಅನ್ನೋ ಆಸೆ ಈಡೇರುವುದಿಲ್ಲವೇ? ರಾಮನ ಮುಂದಿನ ನಡೆ ಏನು?

ಮನರಂಜನೆ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ