Shiva Rajkumar: ಇನ್ಮೇಲೆ ಶಿವಣ್ಣನ ಕನ್ನಡ ಸಿನಿಮಾ ಮಿಸ್‌ ಮಾಡಲ್ಲ ಗುರೂ; ಜೈಲರ್‌ ನೋಡಿ ತಮಿಳು ಮಂದಿಯಿಂದ ಹ್ಯಾಟ್ರಿಕ್‌ ಹೀರೋಗೆ ಬಹುಪರಾಕ್
Aug 11, 2023 09:45 AM IST
Share
Shiva Rajkumar: ಇನ್ಮೇಲೆ ಶಿವಣ್ಣನ ಕನ್ನಡ ಸಿನಿಮಾ ಮಿಸ್‌ ಮಾಡಲ್ಲ; ಜೈಲರ್‌ ನೋಡಿ ತಮಿಳು ಮಂದಿಯಿಂದ ಹ್ಯಾಟ್ರಿಕ್‌ ಹೀರೋಗೆ ಬಹುಪರಾಕ್
- ಜೈಲರ್‌ ಸಿನಿಮಾದಲ್ಲಿನ ಶಿವರಾಜ್‌ಕುಮಾರ್‌ ಅವರ ಸಣ್ಣ ಪಾತ್ರಕ್ಕೆ ದೊಡ್ಡ ಮಟ್ಟದ ಮೆಚ್ಚುಗೆ ಸಿಕ್ಕಿದೆ. ತಮಿಳುನಾಡಿನಲ್ಲಿ ಚಿತ್ರ ನೋಡಿದವರು ರಜನಿಕಾಂತ್‌ ಮಾತ್ರವಲ್ಲದೇ ಶಿವಣ್ಣನನ್ನೂ ಕೊಂಡಾಡುತ್ತಿದ್ದಾರೆ. ಅಷ್ಟೇ ಅಲ್ಲ ಇನ್ಮೇಲೆ ನಿಮ್ಮ ಸಿನಿಮಾ ಮಿಸ್‌ ಮಾಡದೇ ನೋಡುತ್ತೆವೆ ಎಂದೂ ಹೇಳುತ್ತಿದ್ದಾರೆ.
Shiva Rajkumar: ಸೂಪರ್‌ಸ್ಟಾರ್‌ ರಜಿನಿಕಾಂತ್‌ ಅವರ ಬಹುನಿರೀಕ್ಷಿತ ಜೈಲರ್‌ (Jailer) ಸಿನಿಮಾ ಆಗಸ್ಟ್‌ 10ರಂದು ವಿಶ್ವದಾದ್ಯಂತ ಬಿಡುಗಡೆಯಾಗಿದೆ. ಈ ಮೂಲಕ ದೊಡ್ಡ ಮಟ್ಟದ ಓಪನಿಂಗ್‌ ಸಹ ಪಡೆದುಕೊಂಡಿದೆ ಈ ಸಿನಿಮಾ. ರಜಿನಿಯ ಗತ್ತು, ಪಂಚಿಂಗ್‌ ಡೈಲಾಗ್‌ಗೆ ಫ್ಯಾನ್ಸ್ ಫಿದಾ ಆಗಿದ್ದಾರೆ. ಇದೆಲ್ಲದರ ಜತೆಗೆ ಶಿವರಾಜ್‌ಕುಮಾರ್‌ (Shiva Rajkumar) ಅವರ ನಟನೆಗೂ ಶಿಳ್ಳೆ ಚಪ್ಪಾಳೆ ಸಂದಾಯವಾಗಿವೆ. ತೆರೆಮೇಲೆ ಕ್ಷಣಹೊತ್ತು ಬಂದು ಹೋಗುವ ಶಿವಣ್ಣನ ಖದರ್‌ ಕಂಡು ತಮಿಳಿಗರು ನಿಬ್ಬೆರಗಾಗಿದ್ದಾರೆ!
ತಮಿಳುನಾಡಿನಲ್ಲೀಗ ಜೈಲರ್‌ ಹವಾ ಜೋರಾಗಿದೆ. ಚಿತ್ರಕ್ಕೆ ಪಾಸಿಟಿವ್‌ ಮಾತುಗಳೇ ಹೆಚ್ಚು ಕೇಳಿಬರುತ್ತಿವೆ. ರಜನಿ ಜತೆಗೆ ಶಿವರಾಜ್‌ಕುಮಾರ್‌, ಮೋಹನ್‌ಲಾಲ್‌ (Mohan Lal) ಪಾತ್ರಗಳು ಮೂಡಿಬಂದ ರೀತಿಗೂ ನಿರ್ದೇಶಕ ನೆಲ್ಸನ್‌ ಅವರನ್ನು ಕೊಂಡಾಡುತ್ತಿದ್ದಾರೆ ಚಿತ್ರಪ್ರೇಮಿಗಳು. ಇದೆಲ್ಲದರ ನಡುವೆ ಶಿವರಾಜ್‌ಕುಮಾರ್‌ ಅವರ ಎಂಟ್ರಿ ಕಂಡ ಅಲ್ಲಿನ ಸಿನಿಮಾ ಅಭಿಮಾನಿಗಳು ಇನ್ಮೇಲೆ ಶಿವಣ್ಣನ ಬೇರೆ ಸಿನಿಮಾಗಳನ್ನು ಮಿಸ್‌ ಮಾಡಲೇಬಾರದು ಎಂಬಂತೆ ಮಾತನಾಡಿಕೊಳ್ಳುತ್ತಿದ್ದಾರೆ.
ಟ್ರೆಂಡಿಂಗ್‌ನಲ್ಲಿ ಶಿವಣ್ಣ
ಜೈಲರ್‌ ಸಿನಿಮಾದ ಕ್ಲೈಮ್ಯಾಕ್ಸ್‌ ಸೀನ್‌ನಲ್ಲಿ ಬರುವ ಶಿವಣ್ಣನಿಗೆ ತಮಿಳು ಪ್ರೇಕ್ಷಕರು ಬಹುಪರಾಕ್ ಹೇಳಿದ್ದಾರೆ. ಪಂಚೆಯಲ್ಲಿ ನಡೆದುಕೊಂಡು ಬರುವ ಆ ಸ್ಟೈಲ್‌, ಸಿಗಾರ್‌ ಸೇದುವ ಭಂಗಿ, ಕಣ್ಣೀನಲ್ಲಿಯೇ ಎದುರಾಳಿಯನ್ನು ನಡುಗಿಸುವ ಆ ನೋಟ ಎಲ್ಲರಿಗೂ ಅಚ್ಚುಮೆಚ್ಚಾಗಿದೆ. ಸೋಷಿಯಲ್‌ ಮೀಡಿಯಾದಲ್ಲಿ #Shivarajkumar ಮತ್ತು #Shivanna ಸಖತ್‌ ಟ್ರೆಂಡ್‌ ಸೃಷ್ಟಿಸುತ್ತಿವೆ. ಚಿತ್ರದಲ್ಲಿನ ಆ ದೃಶ್ಯಗಳನ್ನು ಶೇರ್‌ ಮಾಡಿಕೊಂಡು, ಅಚ್ಚರಿ ವ್ಯಕ್ತಪಡಿಸುತ್ತಿದ್ದಾರೆ ತಮಿಳು ಫ್ಯಾನ್ಸ್.
ಶಿವಣ್ಣನ ನೋಡಿ ತಮಿಳು ಫ್ಯಾನ್ಸ್ ಏನಂದ್ರು?
- ಶಿವಣ್ಣನ ಆ ವಾಕ್‌, ಸ್ಕ್ರೀನ್‌ ಪ್ರಸೆನ್ಸ್‌ ಜಸ್ಟ್‌ ವಾವ್..
- ಶಿವಣ್ಣನ ಅಸಲಿ ರೂಪವಿದು, ನರ್ತನ್‌ ಮತ್ತು ಉಪೇಂದ್ರ ಅವರನ್ನು ಹೊರತುಪಡಿಸಿ ಕನ್ನಡದ ಇತರೆ ನಿರ್ದೇಶಕರಿಗೆ ಈ ನಟನನ್ನು ಹೇಗೆ ಬಳಸಿಕೊಳ್ಳಬೇಕೆಂದು ಗೊತ್ತಿಲ್ಲ
- ವಿಕ್ರಮ್‌ ಸಿನಿಮಾದಲ್ಲಿ ರೊಲೆಕ್ಸ್‌ ಹೇಗೋ, ಜೈಲರ್‌ ಚಿತ್ರದಲ್ಲಿ ಶಿವಣ್ಣ; ಅವರು ತೆರೆಮೇಲೆ ಕಾಣುವ ರೀತಿಯೇ ಅಚ್ಚರಿ
- ಅಬ್ಬಾ ಅದೆಂಥಾ ನಟ ಈತ, ಕನ್ನಡ ಸಿನಿಮಾ ಇಂಡಸ್ಟ್ರಿಯ ರಿಯಲ್‌ ಸೂಪರ್‌ಸ್ಟಾರ್‌
- ಇನ್ಮೇಲೆ ತಮಿಳುನಾಡಿನಲ್ಲೂ ನಿಮ್ಮ ಸಿನಿಮಾಗಳ ಅಬ್ಬರ ಶುರುವಾಗಲಿ
- ಅದ್ಭುತ ನಟರಾದ ಶಿವಣ್ಣ ಮತ್ತು ಫಹಾದ್‌ ಪಾಸಿಲ್‌ ಅವರಿಗೆ ತಮಿಳು ಚಿತ್ರರಂಗಕ್ಕೆ ಸ್ವಾಗತ
- ಇನ್ಮೇಲೆ ಕನ್ನಡದಲ್ಲಿ ರಿಲೀಸ್‌ ಆಗುವ ಶಿವಣ್ಣನ ಸಿನಿಮಾ ಮಿಸ್‌ ಮಾಡದೇ ನೋಡತ್ತೇವೆ. ಅವರ ನಟನೆಗೆ ಫಿದಾ ಆಗಿದ್ದೇವೆ
ಈ ರೀತಿಯಲ್ಲಿ ಅಭಿಮಾನಿಗಳು ಮೆಚ್ಚುಗೆಯ ಕಾಮೆಂಟ್‌ಗಳನ್ನು ಮಾಡುತ್ತಿದ್ದಾರೆ.
ಇನ್ಮೇಲೆ ಶಿವಣ್ಣನ ಕನ್ನಡ ಸಿನಿಮಾ ಮಿಸ್‌ ಮಾಡಲ್ಲ!
ಶಿವಣ್ಣ ಹುಟ್ಟಿದ್ದು ಚೆನ್ನೈನಲ್ಲಿಯೇ. ಕರ್ನಾಟಕದ ಜತೆಗೆ ತಮಿಳುನಾಡು, ಅಲ್ಲಿನ ಸಿನಿಮಾ ಮಂದಿಯೂ ಅವರಿಗೆ ಹತ್ತಿರ. ತಮಿಳು ಭಾಷೆಯನ್ನೂ ನೀರುಕುಡಿದಂತೆ ಮಾತನಾಡುತ್ತಾರೆ ಶಿವಣ್ಣ. ಶಿವಣ್ಣ ಕನ್ನಡದ ಓರ್ವ ಸ್ಟಾರ್‌ ನಟ ಎಂಬುದು ಅಲ್ಲಿನವರಿಗೂ ಗೊತ್ತಿತ್ತು. ಆದರೆ ನಟನೆಯನ್ನು ತಮಿಳಿಗರು ಅಷ್ಟಾಗಿ ಕಣ್ತುಂಬಿಕೊಂಡಿರಲಿಲ್ಲ. ಇದೀಗ ಜೈಲರ್‌ನಲ್ಲಿ ಶಿವಣ್ಣನ ಮಾಸ್‌ ಎಂಟ್ರಿ ಕಂಡು ಫಿದಾ ಆಗಿದ್ದಾರೆ. ಇನ್ಮುಂದೆ ಶಿವಣ್ಣನ ಕನ್ನಡ ಸಿನಿಮಾ ಮಿಸ್‌ ಮಾಡುವುದಿಲ್ಲ ಎಂಬಂತಹ ಸಾವಿರಾರು ಟ್ವಿಟ್‌ಗಳು ಹರಿದಾಡುತ್ತಿವೆ. ಇದಷ್ಟೇ ಅಲ್ಲ ಕರುನಾಡಿನ ಶಿವಣ್ಣನ ಫ್ಯಾನ್ಸ್ ಸಹ ಶಿವರಾಜ್‌ಕುಮಾರ್‌ ಅವರ ಎವರ್‌ಗ್ರೀನ್‌ ಸಿನಿಮಾಗಳಾದ, ಓಂ, ಜೋಗಿ, ಟಗರು ಸೇರಿ ಸಾಕಷ್ಟು ಸಿನಿಮಾಗಳನ್ನು ಕಾಮೆಂಟ್‌ ಬಾಕ್ಸ್‌ನಲ್ಲಿಯೇ ಅಲ್ಲಿನವರಿಗೆ ಸಜೆಸ್ಟ್‌ ಮಾಡುತ್ತಿದ್ದಾರೆ.