ಬಿಗ್‌ಬಾಸ್‌ ಮನೆಗೆ ನಟಿ ಮಹಾಲಕ್ಷ್ಮೀ ಪತಿ, ಫ್ಯಾಟ್‌ ಮ್ಯಾನ್‌ ರವೀಂದರ್‌ ಚಂದ್ರಶೇಖರನ್‌ ಎಂಟ್ರಿ!

Ravinder Chandrasekharan: ಕಿರುತೆರೆಯಲ್ಲೀಗ ಬಿಗ್‌ ಬಾಸ್‌ ಸೀಸನ್‌ ಶುರುವಾಗಿದೆ. ಅಂದ್ರೆ, ಕನ್ನಡ ಮಾತ್ರವಲ್ಲದೆ, ತೆಲುಗು, ತಮಿಳು, ಹಿಂದಿಯಲ್ಲಿಯೂ ಬಿಗ್‌ಬಾಸ್‌ ರಿಯಾಲಿಟಿ ಶೋ ಆರಂಭವಾಗಿದೆ. ಹಿಂದಿ ಬಿಗ್‌ಬಾಸ್‌ನ ಪ್ರೋಮೋಗಳು ನೋಡುಗರ ಗಮನ ಸೆಳೆದಿವೆ. ಕನ್ನಡದಲ್ಲಿ ಈಗಾಗಲೇ ಬಿಗ್‌ ಬಾಸ್‌ ಆರಂಭವಾಗಿ ಒಂದು ವಾರ ಕಳೆದಿದೆ. ಮೊದಲ ಎಲಿಮಿನೇಷನ್‌ ಪ್ರಕ್ರಿಯೆ ಮುಗಿದಿದ್ದು, ಯಮುನಾ ಶ್ರೀನಿಧಿ ಹೊರನಡೆದಿದ್ದಾರೆ. ಇತ್ತ ತೆಲುಗಿನಲ್ಲಿಯೂ ಬಿಗ್‌ ಬಾಸ್‌ ಸೀಸನ್‌ 8 ಶುರುವಾಗಿದೆ. ಇತ್ತ ಪಕ್ಕದ ತಮಿಳಿನಲ್ಲಿಯೂ ಸೀಸನ್‌ 8 ನಿನ್ನೆಯಿಂದ (ಅ. 6) ಶುರುವಾಗಿದೆ. ಹೀಗೆ ಶುರುವಾದ ಶೋಗೆ ಅಚ್ಚರಿಯ ಸ್ಪರ್ಧಿಯೊಬ್ಬರು ಎಂಟ್ರಿಕೊಟ್ಟಿದ್ದಾರೆ.

ತಮಿಳಿನಲ್ಲಿ 18 ಮಂದಿ ಸ್ಪರ್ಧಿಗಳು

ತಮಿಳಿನ ಬಿಗ್‌ಬಾಸ್‌ಗೆ ಹಿರಿಯ ನಟ ಕಮಲ್ ಹಾಸನ್ ಕಳೆದ ಏಳು ಸೀಸನ್‌ಗಳಲ್ಲಿ ನಿರೂಪಕರಾಗಿದ್ದರು. ಆದರೆ ಈಗ ಅವರ ಸ್ಥಾನಕ್ಕೆ ಮಕ್ಕಳ್ ಸೆಲ್ವನ್ ವಿಜಯ್ ಸೇತುಪತಿ ಆಗಮಿಸಿದ್ದಾರೆ. ತಮ್ಮದೇ ಶೈಲಿಯಲ್ಲಿ ಜೋಕುಗಳನ್ನು ಹೇಳುತ್ತಾ ಮನೆಯನ್ನು ಖುಷಿಯಲ್ಲಿರಿಸಿದ್ದಾರೆ. ಎಲ್ಲಾ ಸ್ಪರ್ಧಿಗಳನ್ನು ಪ್ರೇಕ್ಷಕರಿಗೆ ಪರಿಚಯಿಸಿದ್ದಾರೆ. ಈ ಸಲದ ತಮಿಳಿನ ಸೀಸನ್‌ 8ರಲ್ಲಿ ಒಟ್ಟು 18 ಮಂದಿ ಸ್ಪರ್ಧಿಗಳು ಬಿಗ್ ಬಾಸ್ ಮನೆಗೆ ಪ್ರವೇಶಿಸಿದ್ದಾರೆ. ವಿವಿಧ ಕ್ಷೇತ್ರಗಳ ಅನೇಕ ಗಣ್ಯರು ಈ ಸಲದ ಶೋನ ಹೈಲೈಟ್.‌

ಇದನ್ನೂ ಓದಿ: ಅತಿಯಾದ ಮಾತೇ ಮುಳುವಾಯ್ತೇ? ಮೊದಲ ವಾರವೇ ಬಿಗ್‌ ಬಾಸ್‌ ಮನೆಯಿಂದ ಹೊರನಡೆದ ಯಮುನಾ ಶ್ರೀನಿಧಿ

ರವೀಂದರ್‌ ಚಂದ್ರಶೇಖರನ್‌ ಎಂಟ್ರಿ

ಆ ಪೈಕಿ ಎಲ್ಲರ ಗಮನ ಸೆಳೆದವರು, ತಮಿಳಿನ ಖ್ಯಾತ ನಿರ್ಮಾಪಕ ಹಾಗೂ ಲಿಬ್ರಾ ಪ್ರೊಡಕ್ಷನ್ಸ್ ಮುಖ್ಯಸ್ಥ ರವೀಂದರ್ ಚಂದ್ರಶೇಖರನ್. ಈ ಹಿಂದೆ ಜನಪ್ರಿಯ ಕಿರುತೆರೆ ನಟಿ ಮಹಾಲಕ್ಷ್ಮಿಯನ್ನು ಮದುವೆಯಾಗಿ ಸುದ್ದಿಯಾಗಿದ್ದರು. ಆಗ ಇವರಿಬ್ಬರ ಮದುವೆ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಟ್ರೋಲ್‌ಗಳು ಹರಿದಾಡಿದ್ದವು. ಹಣಕ್ಕಾಗಿ ಮಹಾಲಕ್ಷ್ಮಿ, ರವೀಂದರ್ ಅವರನ್ನು ಮದುವೆಯಾಗಿದ್ದಾರೆ ಎಂದು ನೆಟಿಜನ್‌ಗಳು ನಟಿಯನ್ನು ಟ್ರೋಲ್ ಮಾಡಿದ್ದರು. ರವೀಂದರ್ ಕೂಡ ತಮ್ಮ ಅತಿಯಾದ ತೂಕದ ಬಗ್ಗೆಯೂ ಟ್ರೋಲ್‌ ಆಗಿದ್ದರು. ಅದೆಲ್ಲವನ್ನು ದಾಟಿ ಖುಷಿಯ ಸಂಸಾರ ನಡೆಸುತ್ತಿದೆ ಈ ಜೋಡಿ.

ವಂಚನೆ ಪ್ರಕರಣದಲ್ಲಿ ಜೈಲುವಾಸ

ಕಳೆದ ವರ್ಷ ವಂಚನೆ ಪ್ರಕರಣದಲ್ಲಿ ರವೀಂದರ್‌ ಚಂದ್ರಶೇಖರ್‌ ಅವರನ್ನು ಬಂಧಿಸಲಾಗಿತ್ತು. ಅದಾದ ಬಳಿಕ ಮಹಾಲಕ್ಷ್ಮಿ ಅವರಿಗೆ ವಿಚ್ಛೇದನ ನೀಡುತ್ತಿದ್ದಾರೆ ಎಂಬ ಸುದ್ದಿಯೂ ಮುನ್ನೆಲೆಗೆ ಬಂದಿತ್ತು. ಆದರೆ, ಅವೆಲ್ಲವೂ ಸುಳ್ಳಾಗಿದ್ದವು. ಇದಾದ ಮೇಲೂ ಈ ಜೋಡಿ ಸೋಷಿಯಲ್ ಮೀಡಿಯಾದಲ್ಲಿ ಸಕ್ರಿಯವಾಗಿದೆ. ಈ ನಡುವೆಯೇ ಬಿಗ್ ಬಾಸ್ ಮನೆಗೆ ಎಂಟ್ರಿ ಕೊಟ್ಟಿದ್ದಾರೆ ರವೀಂದರ್‌. ಕಾಂಟ್ರವರ್ಸಿಗಳಿಂದಲೇ ವಿವಾದಗಳಿಂದಲೇ ಹೆಚ್ಚಾಗಿ ಸುದ್ದಿಯಲ್ಲಿರುವ ರವೀಂದರ್‌, ಬಿಗ್ ಬಾಸ್ ಪ್ರೇಕ್ಷಕರನ್ನು ಹೇಗೆ ಸೆಳೆಯಲಿದ್ದಾರೆ ಎಂಬುದನ್ನು ಕಾದು ನೋಡಬೇಕು.

ಇದನ್ನೂ ಓದಿ: ‘ನಾನೆಲ್ಲೂ ಹೋಗಿಲ್ಲ, ನಮ್ಮ ಕುಟುಂಬದ ಸದ್ಯದ ಪರಿಸ್ಥಿತಿ ನಿಮಗೂ ಗೊತ್ತು’; ರಾಯಲ್‌ ಚಿತ್ರದ ಹಾಡಿನ ನೆಪದಲ್ಲಿ ಬಂದ ದಿನಕರ್‌ ತೂಗುದೀಪ