Thalapathy Vijay: ದರ್ಶನ್‌ರಂತೆ ದಳಪತಿ ವಿಜಯ್ ಮೇಲೂ ಚಪ್ಪಲಿ ಎಸೆತ! ವಿಜಯ್‌ಕಾಂತ್‌ ಅಂತಿಮ ದರ್ಶನದ ವೇಳೆ ಘಟನೆ VIDEO
Dec 29, 2023 04:51 PM IST
Share
Thalapathy Vijay: ದರ್ಶನ್‌ರಂತೆ ದಳಪತಿ ವಿಜಯ್ ಮೇಲೂ ಚಪ್ಪಲಿ ಎಸೆತ! ವಿಜಯ್‌ಕಾಂತ್‌ ಅಂತಿಮ ದರ್ಶನದ ವೇಳೆ ಘಟನೆ
- ಕಾಲಿವುಡ್‌ನ ಹಿರಿಯ ನಟ, ರಾಜಕಾರಣಿ ವಿಜಯ್ ಕಾಂತ್‌ ಅವರ ಅಂತಿಮ ದರ್ಶನಕ್ಕೆ ಬಂದ ನಟ ದಳಪತಿ ವಿಜಯ್ ಮೇಲೆ ಕಿಡಿಗೇಡಿಗಳು ಚಪ್ಪಲಿ ಎಸೆದಿದ್ದಾರೆ.
Thalapathy Vijay: ಕಾಲಿವುಡ್ ನಟ, ರಾಜಕಾರಣಿ ಕ್ಯಾಪ್ಟನ್‌ ವಿಜಯ್ ಕಾಂತ್‌ ನಿಧನದ ಬೆನ್ನಲ್ಲೇ ಇಡೀ ತಮಿಳು ಚಿತ್ರರಂಗ ಮೌನವಾಗಿದೆ. ಡಿಸೆಂನರ್‌ 28ರಂದು ನಿಧನರಾದ ವಿಜಯ್ ಕಾಂತ್‌ ಅವರ ಅಂತಿಮ ದರ್ಶನಕ್ಕೆ ಚೆನ್ನೈನ ಅವರ ಮನೆಯಲ್ಲಿ ವ್ಯವಸ್ಥೆ ಮಾಡಲಾಗಿತ್ತು. ಅದರಂತೆ, ತಮಿಳಿನ ಹಿರಿ ಕಿರಿ ಕಲಾವಿದರು ಆಗಮಿಸಿ ನೆಚ್ಚಿನ ನಟನ ಅಂತಿಮ ದರ್ಶನ ಪಡೆದಿದ್ದರು. ಖ್ಯಾತ ನಟ ದಳಪತಿ ವಿಜಯ್ ಸಹ ಆಗಮಿಸಿ ದರ್ಶನ ಪಡೆದು ಮರಳುತ್ತಿದ್ದಾಗ ಅವರ ಮೇಲೆ ಯಾರೋ ಕಿಡಿಗೇಡಿಗಳು ಚಪ್ಪಲಿ ಎಸೆದಿದ್ದಾರೆ!
ಚೆನ್ನೈನ ವಿಜಯ್‌ಕಾಂತ್‌ ಮನೆ ಮುಂಭಾಗದಲ್ಲಿ ಅವರ ಅಂತಿಮ ದರ್ಶನಕ್ಕೆ ವ್ಯವಸ್ಥೆ ಮಾಡಲಾಗಿತ್ತು. ಸಾವಿರಾರು ಅಭಿಮಾನಿಗಳು ನೆಚ್ಚಿನ ನಟನನ್ನು ಕೊನೆಯದಾಗಿ ಕಣ್ತುಂಬಿಕೊಳ್ಳಲು ಆಗಮಿಸಿದ್ದರು. ಕಿಕ್ಕಿರಿದ ಜನರ ಮಧ್ಯೆಯೇ ದಾರಿ ಮಾಡಿಕೊಂಡು, ನಟ ದಳಪತಿ ವಿಜಯ್ ಸಹ ಆಗಮಿಸಿದ್ದರು. ಪಾರ್ಥೀವ ಶರೀರದ ದರ್ಶನ ಪಡೆದ ಬಳಿಕ ತಮ್ಮ ಕಾರ್‌ ಬಳಿ ಮರಳುತ್ತಿದ್ದಂತೆ, ಯಾರೋ ಕಿಡಿಗೇಡಿಯೊಬ್ಬ ಅವರ ಮೇಲೆ ಚಪ್ಪಲಿ ಎಸೆದಿದ್ದಾನೆ. ಅದು ಅವರ ಬೆನ್ನಿಗೆ ತಾಗಿ ಹಾದು ಹೋಗಿದೆ.
ಹೀಗೆ ಸ್ಟಾರ್‌ ನಟನ ಮೇಲೆ ಚಪ್ಪಲಿ ಎಸೆದ ವಿಡಿಯೋ ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗುತ್ತಿದ್ದಂತೆ, ದಳಪತಿ ವಿಜಯ್ ಅಭಿಮಾನಿಗಳು ರೊಚ್ಚಿಗೆದ್ದಿದ್ದಾರೆ. ಟ್ವಿಟರ್‌ನಲ್ಲಿ ಈ ಬಗ್ಗೆ ತಮ್ಮ ಕೋಪತಾಪಗಳನ್ನು ಹೊರಗೆಡವುತ್ತಿದ್ದಾರೆ. ಇನ್ನು ಅಭಿಮಾನಿಗಳ ಸಂಖ್ಯೆ ಹೆಚ್ಚಾಗಿದ್ದ ಹಿನ್ನೆಲೆಯಲ್ಲಿ ಸರಿಯಾದ ಭದ್ರತೆಯ ಜತೆಗೆ ಅಂತಿಮ ದರ್ಶನಕ್ಕೆ ಸರಿಯಾದ ವ್ಯವಸ್ಥೆಯನ್ನೂ ಮಾಡಿರಲಿಲ್ಲ. ಹಾಗಾಗಿ ವಿಜಯ್ ಆಗಮಿಸುತ್ತಿದ್ದಂತೆ, ಅವರ ಮೇಲೆ ಸಾಕಷ್ಟು ಮಂದಿ ಮುಗಿಬಿದ್ದರು. ಆ ಗುಂಪಿನಿಂದ ಹೊರಬರುವಷ್ಟರಲ್ಲಿಯೇ ಅವರ ಮೇಲೆ ಚಪ್ಪಲಿ ಎಸೆಯಲಾಯ್ತು.
ತಮಿಳಿನಾಡಿನಲ್ಲಿ ಸಿನಿಮಾ ಸೆಲೆಬ್ರಿಟಿಗಳ ನಡುವೆ ಫ್ಯಾನ್ಸ್‌ ವಾರ್‌ ಈಗಿನಿಂದಲ್ಲ. ದಶಕಗಳಿಂದಲೂ ಅದು ಮುಂದುವರಿಯುತ್ತಲೇ ಬಂದಿದೆ. ಇದೀಗ ಅದೇ ಸ್ಟಾರ್‌ ವಾರ್‌ ಕಿಚ್ಚು ಸಾವಿನ ಮನೆಯಲ್ಲೂ ಮುಂದುವರಿದಿರುವುದು ವಿಪರ್ಯಾಸ. ವಿಜಯ್‌ಗೆ ಆಗದ ಬೇರೆ ನಟರ ಅಭಿಮಾನಿ ವಿಜಯ್ ಮೇಲೆ ಚಪ್ಪಲಿ ಎಸೆದು ವಿಕೃತಿ ಮೆರೆದಿದ್ದಾನೆ. ಸದ್ಯ ಈ ಬಗ್ಗೆ ವ್ಯಾಪಕ ಟೀಕೆ ವ್ಯಕ್ತವಾಗುತ್ತಿದ್ದು, ಅಭಿಮಾನಿಗಳ ಈ ವರ್ತನೆ ಸರಿಯಲ್ಲ ಎಂದು ಕೆಲವರು ತಮ್ಮ ಅಭಿಪ್ರಾಯವನ್ನು ಸೋಷಿಯಲ್‌ ಮೀಡಿಯಾ ಪುಟಕ್ಕಿಳಿಸುತ್ತಿದ್ದಾರೆ.
ದರ್ಶನ್‌ಗೂ ಆಗಿತ್ತು ಮುಖಭಂಗ
ಕಳೆದ ವರ್ಷದ ಡಿಸೆಂಬರ್‌ 18ರಂದು ಕ್ರಾಂತಿ ಸಿನಿಮಾದ ಬಿಡುಗಡೆ ಹಿನ್ನೆಲೆಯಲ್ಲಿ ಹೊಸಪೇಟೆಗೆ ಇಡೀ ತಂಡದ ಜತೆಗೆ ಪ್ರಚಾರದಲ್ಲಿ ತೊಡಗಿಸಿಕೊಂಡಿದ್ದ ದರ್ಶನ್‌ ಮೇಲೆ ಕಿಡಿಗೇಡಿಯೊಬ್ಬ ಚಪ್ಪಲಿ ಎಸೆದಿದ್ದ. ಈ ವಿಚಾರ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗಿದ್ದಷ್ಟೇ ಅಲ್ಲದೆ, ಪುನೀತ್‌ ರಾಜ್‌ಕುಮಾರ್‌ ಮತ್ತು ದರ್ಶನ್‌ ಅಭಿಮಾನಿಗಳ ನಡುವೆ ದೊಡ್ಡ ವಾರ್‌ ನಡೆದಿತ್ತು. ದರ್ಶನ್‌ ಅವರಿಗಾದ ಈ ಅವಮಾನಕ್ಕೆ ಇಡೀ ಚಿತ್ರರಂಗ ಅವರ ಬೆನ್ನಿಗೆ ನಿಂತು ಬೆಂಬಲ ಸೂಚಿಸಿತ್ತು. ಇದೀಗ ಅಂಥದ್ದೇ ಘಟನೆ ಚೆನ್ನೈನಲ್ಲಿ ದಳಪತಿ ವಿಜಯ್ ಮೇಲಾಗಿದೆ.