Ajith Kumar: ಶೂಟಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ ನಾಲ್ಕು ಚಿನ್ನ ಗೆದ್ದ ತಮಿಳು ನಟ ಅಜಿತ್‌ಕುಮಾರ್‌!
Jul 30, 2022 05:08 PM IST
Share
ಶೂಟಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ ನಾಲ್ಕು ಚಿನ್ನ ಗೆದ್ದ ತಮಿಳು ನಟ ಅಜಿತ್‌ಕುಮಾರ್‌!
- ಕಾಲಿವುಡ್ ಸ್ಟಾರ್‌ ನಟ ಅಜಿತ್ ಕುಮಾರ್ ಸಿನಿಮಾ ಅಷ್ಟೇ ಅಲ್ಲದೆ ಶೂಟಿಂಗ್‌ನಲ್ಲಿಯೂ ಎತ್ತಿದ ಕೈ ಎಂಬುದು ಗೊತ್ತಿರುವ ಸಂಗತಿ. ತಮ್ಮ ಆ ಪ್ರತಿಭೆಯನ್ನು ಆಗಾಗ ಅವರು ಪ್ರದರ್ಶಿಸಿದ್ದುಂಟು. ಇದೀಗ ಇದೇ ನಟ ಶೂಟಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ ಬರೋಬ್ಬರಿ 6 ಪದಕಗಳನ್ನು ಜಯಿಸಿದ್ದಾರೆ.
ತಿರುಚ್ಚಿ: ಕಾಲಿವುಡ್ ಸ್ಟಾರ್‌ ನಟ ಅಜಿತ್ ಕುಮಾರ್ ಸಿನಿಮಾ ಅಷ್ಟೇ ಅಲ್ಲದೆ ಶೂಟಿಂಗ್‌ನಲ್ಲಿಯೂ ಎತ್ತಿದ ಕೈ ಎಂಬುದು ಗೊತ್ತಿರುವ ಸಂಗತಿ. ತಮ್ಮ ಆ ಪ್ರತಿಭೆಯನ್ನು ಆಗಾಗ ಅವರು ಪ್ರದರ್ಶಿಸಿದ್ದುಂಟು. ಇದೀಗ ಇದೇ ನಟ ಶೂಟಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ ಬರೋಬ್ಬರಿ 6 ಪದಕಗಳನ್ನು ಜಯಿಸಿದ್ದಾರೆ.
ಇತ್ತೀಚೆಗೆ ತಮಿಳುನಾಡಿನ ತಿರುಚ್ಚಿಯಲ್ಲಿ ನಡೆದ 47ನೇ ತಮಿಳುನಾಡು ರಾಜ್ಯ ಶೂಟಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ ಅಜಿತ್ ಕುಮಾರ್ ಭಾಗವಹಿಸಿದ್ದರು. ಈ ಕೂಟದಲ್ಲಿ ಅವರು ನಾಲ್ಕು ಚಿನ್ನ ಮತ್ತು ಎರಡು ಕಂಚಿನ ಪದಕಗಳನ್ನು ಪಡೆದಿದ್ದಾರೆ. ಈ ವಿಚಾರ ಸೋಷಿಯಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿದ್ದಂತೆ, ನಟನ ಈ ಕಲೆಗೆ ಶಹಬ್ಬಾಸ್‌ ಎನ್ನುತ್ತಿದ್ದಾರೆ ಅಭಿಮಾನಿಗಳು.
ಕೇವಲ ಸಿನಿಮಾ ಮಾತ್ರವಲ್ಲದೆ, ಈ ರೀತಿ ಹೊಸ ಕಲೆಗಳಲ್ಲಿಯೂ ಅಜಿತ್ ಕುಮಾರ್ ಸಾಹಸ ಮೆರೆದಿದ್ದಕ್ಕೆ, ಅನೇಕರು ನಟನನ್ನು ಶ್ಲಾಘಿಸಿದ್ದಾರೆ. 51 ವರ್ಷದ ಅಜಿತ್. ಈ ಹಿಂದೆ ಫಾರ್ಮುಲಾ ಟು ರೇಸಿಂಗ್‌ನಲ್ಲಿಯೂ ಭಾಗವಹಿಸಿದ್ದಾರೆ. ಆ ಮೂಲಕವೂ ಸುದ್ದಿಯಾಗಿದ್ದರು. ಇದೀಗ ಶೂಟಿಂಗ್‌ನಲ್ಲಿ ಚಿನ್ನ ಗಳಿಸಿದ್ದಾರೆ.
47ನೇ ತಮಿಳುನಾಡು ರಾಜ್ಯ ಶೂಟಿಂಗ್ ಚಾಂಪಿಯನ್‌ಶಿಪ್ ಕಳೆದೊಂದು ವಾರದ ಹಿಂದೆ ತಿರುಚ್ಚಿಯ ರೈಫಲ್ ಕ್ಲಬ್‌ನಲ್ಲಿ ನಡೆದಿತ್ತು. ಈ ಕ್ಲಬ್‌ನಲ್ಲಿ ನಡೆದ ಹಲವು ವಿಭಾಗಗಳ ಸ್ಪರ್ಧೆಗಳಲ್ಲಿ ಅಜಿತ್ ಭಾಗವಹಿಸಿದ್ದರು. CFP ಮಾಸ್ಟರ್ ಪುರುಷರ ತಂಡ, ಸ್ಟ್ಯಾಂಡರ್ಡ್ ಪಿಸ್ತೂಲ್ ಮಾಸ್ಟರ್ ಪುರುಷರ ತಂಡ (NR), ಸ್ಟ್ಯಾಂಡರ್ಡ್ ಪಿಸ್ತೂಲ್ ಮಾಸ್ಟರ್ ಪುರುಷರ ತಂಡ (ISSF), ಮತ್ತು 50m FP ಮಾಸ್ಟರ್ ಪುರುಷರ ತಂಡಗಳ ವಿಭಾಗಗಳಲ್ಲಿ ನಾಲ್ಕು ಚಿನ್ನ ಗೆದ್ದರು. ಇತ್ತ 50m FP ಪುರುಷರ ತಂಡ ಮತ್ತು ಸ್ಟ್ಯಾಂಡರ್ಡ್ ಪಿಸ್ತೂಲ್ ಪುರುಷರ ತಂಡದ ಈವೆಂಟ್‌ಗಳಲ್ಲಿ ಎರಡು ಕಂಚು ಜಯಿಸಿದರು.
ಅಭಿಮಾನಿ ವಲಯದಲ್ಲಿ ಸಂಭ್ರಮ..
ಅಜಿತ್ ಅವರ ಈ ಕ್ರೀಡಾ ಸಾಧನೆಗೆ ಅವರ ಅಭಿಮಾನಿಗಳು ಪುಳಕಗೊಂಡಿದ್ದಾರೆ. ಬಗೆ ಬಗೆ ಕಮೆಂಟ್‌ ಮೂಲಕ ಶುಭ ಹಾರೈಸುತ್ತಿದ್ದಾರೆ. “ಕೆಲವರು ತೆರೆಯ ಮೇಲೆ ನಾಯಕರಾಗಿದ್ದಾರೆ. ಆದರೆ ಅಜಿತ್ ಆಫ್ ಸ್ಕ್ರೀನ್ ಕೂಡ ನಿಜವಾದ ಹೀರೋ" ಎಂದರೆ, "ರೇಸಿಂಗ್ ಅಥವಾ ಶೂಟಿಂಗ್ ಆಗಿರಲಿ, ಅವರು ಯಾವಾಗಲೂ ನಂಬರ್ ಒನ್" ಎಂದು ಮತ್ತೊಬ್ಬ ಅಭಿಮಾನಿ ಟ್ವೀಟ್ ಮಾಡಿದ್ದಾರೆ. 50 ರ ಹರೆಯದಲ್ಲಿ ಈ ಸಾಧನೆ ಮತ್ತು ಪದಕ ಜಯಿಸುವಿಕೆ ನಿಜವಾಗಿಯೂ ದೊಡ್ಡ ಯಶಸ್ಸು" ಎಂದೂ ಹಲವರು ಶ್ಲಾಘಿಸಿದ್ದಾರೆ.
ನಾನಾ ಪಾಟೇಕರ್ ಮೊದಲಿಗರು..
ಈ ರೀತಿಯ ಶೂಟಿಂಗ್ ಸ್ಪರ್ಧೆಯಲ್ಲಿ ಅತ್ಯುನ್ನತ ಮಟ್ಟದಲ್ಲಿ ಸ್ಪರ್ಧಿಸಿದ ಮೊದಲ ಭಾರತೀಯ ನಟ ಅಜಿತ್ ಅಲ್ಲ. 2011 ರಲ್ಲಿ ಬಾಲಿವುಡ್ ನಟ ನಾನಾ ಪಾಟೇಕರ್ ತಮ್ಮ 61 ನೇ ವಯಸ್ಸಿನಲ್ಲಿ ರಾಷ್ಟ್ರೀಯ ಶೂಟಿಂಗ್ ಚಾಂಪಿಯನ್‌ಶಿಪ್‌ನಲ್ಲಿ ಭಾಗವಹಿಸಿದ್ದರು. ಈ ಹಿಂದೆ ರಾಜ್ಯ ಮಟ್ಟದ ಸ್ಪರ್ಧೆಗಳಲ್ಲಿ ಅವರು ಸಾಕಷ್ಟು ಪದಕಗಳನ್ನು ಗೆದ್ದಿದ್ದರು. ಆದರೆ, ಅಜಿತ್ ನಾನಾ ಪಾಟೇಕಾರ್‌ಗಿಂತ ಬೇರೆ ರೀತಿಯಲ್ಲಿಯೇ ಗುರುತಿಸಿಕೊಂಡಿದ್ದಾರೆ. 2003 ರಲ್ಲಿ ಫಾರ್ಮುಲಾ BMW ಏಷ್ಯಾ ಚಾಂಪಿಯನ್‌ಶಿಪ್‌ನಲ್ಲಿ ಭಾಗವಹಿಸಿದ ಅಜಿತ್, ಆ ಸೀಸನ್‌ನಲ್ಲಿ 12 ನೇ ಸ್ಥಾನ ಪಡೆದರು. 2010 ರಲ್ಲಿ FIA ಫಾರ್ಮುಲಾ ಚಾಂಪಿಯನ್‌ಶಿಪ್, F1 ವಿಶ್ವ ಚಾಂಪಿಯನ್‌ಶಿಪ್‌ನಲ್ಲಿಯೂ ಭಾಗವಹಿಸಿದ್ದರು.