Hoysala Title Song: ಧನಂಜಯ್‌ 25ನೇ ಚಿತ್ರದ ಟೈಟಲ್‌ ಹಾಡಿನಲ್ಲಿ ಪುನೀತ್‌... ಆ ಸೀನ್‌ ನೋಡಿ ಥ್ರಿಲ್‌ ಆದ ಅಪ್ಪು ಫ್ಯಾನ್ಸ್!
Feb 26, 2023 11:24 AM IST
Share
'ಹೊಯ್ಸಳ' ಟೈಟಲ್‌ ಹಾಡಿನಲ್ಲಿ ಅಪ್ಪು ಸಿನಿಮ್ ದೃಶ್ಯ ನೋಡಿ ಥ್ರಿಲ್‌ ಆದ ಫ್ಯಾನ್ಸ್
- ಹೊಯ್ಸಳ ಟೈಟಲ್‌ ಹಾಡು, ಪುನೀತ್‌ ರಾಜ್‌ಕುಮಾರ್‌ ಅಭಿಮಾನಿಗಳಿಗೆ ಕೂಡಾ ಬಹಳ ಇಷ್ಟವಾಗಿದೆ. ಈ ಹಾಡಿನಲ್ಲಿ ಪೊಲೀಸ್‌ ಅಧಿಕಾರಿ ಗುರುದೇವ ಹೊಯ್ಸಳ (ಧನಂಜಯ್‌) ಥಿಯೇಟರ್‌ನಲ್ಲಿ ಸಿನಿಮಾ ನೋಡುತ್ತಿದ್ದ ರೌಡಿಯೊಬ್ಬನನ್ನು ಹೊರಗೆ ಎಳೆದು ಹೋಗುವಾಗ ಹಿಂದಿನ ಪರದೆಯಲ್ಲಿ ಪುನೀತ್‌ ರಾಜ್‌ಕುಮಾರ್‌, ರಗಡ್‌ ಲುಕ್‌ನೊಂದಿಗೆ ನಡೆದು ಬರುವ ದೃಶ್ಯ ಇದೆ. ಈ ಸೀನ್‌ ನೋಡಿ ಅಪ್ಪು ಅಭಿಮಾನಿಗಳು ಥ್ರಿಲ್‌ ಆಗಿದ್ದಾರೆ.
ಡಾಲಿ ಧನಂಜಯ್‌ ಅಭಿನಯದ 25ನೇ ಸಿನಿಮಾ 'ಹೊಯ್ಸಳ' ಚಿತ್ರದ ಟೈಟಲ್‌ ಹಾಡು ಬಿಡುಗಡೆ ಆಗಿದೆ. ಆನಂದ್ ಯೂಟ್ಯೂಬ್‌ ಚಾನೆಲ್‌ನಲ್ಲಿ ಈ ಹಾಡು ಬಿಡುಗಡೆ ಆಗಿದ್ದು ಧನಂಜಯ್‌ ಅವರ ಖಡಕ್‌ ಪೊಲೀಸ್‌ ಅಧಿಕಾರಿ ಪಾತ್ರ ನೋಡಿ ಅಭಿಮಾನಿಗಳು ಥ್ರಿಲ್‌ ಆಗಿದ್ದಾರೆ.
'ಹೊಯ್ಸಳ' ಚಿತ್ರದಲ್ಲಿ ಧನಂಜಯ್‌ ಗುರುದೇವ ಹೊಯ್ಸಳ ಹೆಸರಿನ ಪೊಲೀಸ್‌ ಅಧಿಕಾರಿ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಚಿತ್ರತಂಡ ಇತ್ತೀಚೆಗೆ ಸಳ ಸಳ ನೀ ಹೊಯ್ಸಳ, ನೂರಾನೆಯ ಬಲ ಸಿಂಗಲ್‌ ಪಡೆ ಇದು... ಎಂಬ ಹಾಡನ್ನು ರಿಲೀಸ್‌ ಮಾಡಿದೆ. ಸಳ ಸಳ ಹೊಯ್ಸಳ ಹಾಡಿಗೆ ಸಂತೋಷ್‌ ಆನಂದ್ ರಾಮ್‌ ಸಾಹಿತ್ಯ ಬರೆದಿದ್ದಾರೆ. ನಕಾಶ್‌ ಅಜೀಜ್‌ ಈ ಹಾಡನ್ನು ಹಾಡಿದ್ದು ಚಿತ್ರದ ಹಾಡುಗಳಿಗೆ ಬಿ ಅಜನೀಶ್‌ ಲೋಕನಾಥ್‌ ಸಂಗೀತ ನೀಡಿದ್ದಾರೆ. ಯೋಗಿ ಬಿ ರಾಜ್‌, ರಾಪ್‌ ವರ್ಷನ್‌ ಹಾಡಿದ್ದಾರೆ. ಈ ಹಾಡು ಸಂಗೀತ ಪ್ರಿಯರಿಗೆ ಬಹಳ ಇಷ್ಟವಾಗಿದೆ. ಇದುವರೆಗೂ 2 ಲಕ್ಷಕ್ಕೂ ಹೆಚ್ಚು ಮಂದಿ ಈ ಹಾಡು ವೀಕ್ಷಣೆ ಮಾಡಿದ್ದಾರೆ.
ಹೊಯ್ಸಳ ಟೈಟಲ್‌ ಹಾಡು, ಪುನೀತ್‌ ರಾಜ್‌ಕುಮಾರ್‌ ಅಭಿಮಾನಿಗಳಿಗೆ ಕೂಡಾ ಬಹಳ ಇಷ್ಟವಾಗಿದೆ. ಈ ಹಾಡಿನಲ್ಲಿ ಪೊಲೀಸ್‌ ಅಧಿಕಾರಿ ಗುರುದೇವ ಹೊಯ್ಸಳ (ಧನಂಜಯ್‌) ಥಿಯೇಟರ್‌ನಲ್ಲಿ ಸಿನಿಮಾ ನೋಡುತ್ತಿದ್ದ ರೌಡಿಯೊಬ್ಬನನ್ನು ಹೊರಗೆ ಎಳೆದು ಹೋಗುವಾಗ ಹಿಂದಿನ ಪರದೆಯಲ್ಲಿ ಪುನೀತ್‌ ರಾಜ್‌ಕುಮಾರ್‌, ರಗಡ್‌ ಲುಕ್‌ನೊಂದಿಗೆ ನಡೆದು ಬರುವ ದೃಶ್ಯ ಇದೆ. ಈ ಸೀನ್‌ ನೋಡಿ ಅಪ್ಪು ಅಭಿಮಾನಿಗಳು ಥ್ರಿಲ್‌ ಆಗಿದ್ದಾರೆ, ಕೆಲವರ ಕಣ್ಣಂಚು ಒದ್ದೆಯಾಗಿದೆ. ಈ ದೃಶ್ಯವನ್ನು ನಾವು ಮತ್ತೆ ಮತ್ತೆ ನೋಡುತ್ತಿದ್ದೇವೆ ಎಂದು ಅಪ್ಪು ಫ್ಯಾನ್ಸ್ ಕಮೆಂಟ್‌ ಮಾಡುತ್ತಿದ್ದಾರೆ. ಚಿತ್ರದಲ್ಲಿ ಅಪ್ಪು ಅವರ ಸಿನಿಮಾ ದೃಶ್ಯ ಬಳಸಿಕೊಂಡಿರುವುದಕ್ಕೆ ಸಂತೋಷ ವ್ಯಕ್ತಪಡಿಸುತ್ತಿದ್ದಾರೆ. ಜೊತೆಗೆ 'ಹೊಯ್ಸಳ' ಚಿತ್ರಕ್ಕೆ ಶುಭ ಕೋರಿದ್ದಾರೆ. ದರ್ಶನ್‌ , ಸುದೀಪ್‌ ಅಭಿಮಾನಿಗಳು ಕೂಡಾ ಚಿತ್ರಕ್ಕೆ ಶುಭ ಹಾರೈಸಿದ್ದಾರೆ.
'ಹೊಯ್ಸಳ' ಮಾರ್ಚ್‌ 30 ರಂದು ತೆರೆ ಕಾಣುತ್ತಿದೆ. ಈ ಕ್ರೈಂ ಥ್ರಿಲ್ಲರ್ ಸಿನಿಮಾವನ್ನು ಕೆಆರ್‌ಜಿ ಸ್ಟುಡಿಯೋಸ್‌ ಬ್ಯಾನರ್‌ ಅಡಿಯಲ್ಲಿ ಕಾರ್ತಿಕ್‌ ಗೌಡ ಹಾಗೂ ಯೋಗಿ ಜಿ ರಾಜ್‌ ಜೊತೆ ಸೇರಿ ನಿರ್ಮಿಸುತ್ತಿದ್ದಾರೆ. ವಿಜಯ್‌. ಎನ್‌, 'ಹೊಯ್ಸಳ' ಚಿತ್ರಕ್ಕೆ ಆಕ್ಷನ್‌ ಕಟ್‌ ಹೇಳುತ್ತಿದ್ದಾರೆ. ಡಾಲಿ ಜೊತೆಗೆ ಅಮೃತಾ ಅಯ್ಯಂಗಾರ್‌, ನವೀನ್‌ ಶಂಕರ್‌, ಅಚ್ಯುತ್‌ ಕುಮಾರ್‌, ಅವಿನಾಶ್‌, ಅನಿರುದ್ಧ್‌ ಭಟ್‌, ಮಯೂರಿ ನಟರಾಜ್‌, ರಾಜೇಶ್‌ ಹಾಗೂ ಇನ್ನಿತರರು ನಟಿಸಿದ್ದಾರೆ.
ದೊಡ್ಡ ಮೊತ್ತಕ್ಕೆ ಸೇಲ್‌ ಆಗಿದೆ 'ಹೊಯ್ಸಳ' ಆಡಿಯೋ ಹಕ್ಕು
'ಹೊಯ್ಸಳ' ಆಡಿಯೋವನ್ನು ಆನಂದ್ ಆಡಿಯೋ ದಾಖಲೆಯ ಮೊತ್ತಕ್ಕೆ ಕೊಳ್ಳುವುದರ ಮೂಲಕ ಧನಂಜಯ ಟಾಪ್ ಸ್ಟಾರ್‌ಗಳಲ್ಲಿ ಒಬ್ಬರಾಗಿ ಹೊರ ಹೊಮ್ಮಿದ್ದಾರೆ. ಡಾಲಿ ಧನಂಜಯ ಅವರ 25ನೇ ಚಿತ್ರ ಅನ್ನುವುದು ಈ ಚಿತ್ರದ ಮತ್ತೊಂದು ವಿಶೇಷತೆಯಾಗಿದ್ದು ಅದಕ್ಕೆ ತಕ್ಕಂತೆ ನಿರೀಕ್ಷೆಯನ್ನು ಮೀರಿಸುವಂತೆ ಸಿನಿಮಾ ಮೂಡಿ ಬಂದಿದೆ. ಧನಂಜಯ ಅವರ ಕರಿಯರ್‌ನಲ್ಲೇ ಅತಿ ಹೆಚ್ಚಿನ ಮೊತ್ತು ಕೊಟ್ಟು ಆಡಿಯೋ ಹಕ್ಕುಗಳನ್ನು ಆನಂದ್ ಆಡಿಯೋ ಖರೀದಿಸಿದೆ. ಅಲ್ಲಿಗೆ ಧನಂಜಯ ಕನ್ನಡದ ಟಾಪ್ ಸ್ಟಾರ್‌ಗಳ ಪಟ್ಟಿಗೆ ಸೇರಿದ್ದಾರೆ.