Rashmika Mandanna: ಕರಣ್ ಜೋಹರ್ ನಿರ್ಮಾಣದ ಹೊಸ ಚಿತ್ರದಲ್ಲಿ ರಶ್ಮಿಕಾ...ಹೀರೋ ಕೂಡಾ ಫಿಕ್ಸ್

ಟಾಲಿವುಡ್ ನಂತರ ಈಗ ಬಾಲಿವುಡ್ ರಶ್ಮಿಕಾ ಮಂದಣ್ಣ ಜಪ ಮಾಡುತ್ತಿದೆ. ಕಿರಿಕ್ ಪಾರ್ಟಿ ಚಿತ್ರದಲ್ಲಿ ಈ ಹುಡುಗಿ ನಟಿಸುವುದಾಗ, ಆಕೆ ಇಷ್ಟು ಎತ್ತರಕ್ಕೆ ಬೆಳೆಯುತ್ತಾರೆ ಎಂದು ಯಾರೂ ಊಹಿಸಿರಲಿಲ್ಲ. ಬಹುಶ: ಸ್ವತ: ರಶ್ಮಿಕಾಗೂ ತಾನೊಬ್ಬ ಸ್ಟಾರ್ ನಟಿಯಾಗುತ್ತೇನೆ ಎಂಬ ಕಲ್ಪನೆ ಕೂಡಾ ಇರಲಿಲ್ಲವೇನೋ. ಇದೀಗ ಆಕೆಗೆ ಅಂದುಕೊಳ್ಳದೆ ಎಲ್ಲಾ ಸಿಕ್ಕಿದೆ. ಈ ನಡುವೆ ರಶ್ಮಿಕಾ ಮತ್ತೊಂದು ಬಾಲಿವುಡ್​ ಚಿತ್ರದಲ್ಲಿ ನಟಿಸಲು ಆಯ್ಕೆಯಾಗಿದ್ದಾರೆ ಎನ್ನಲಾಗಿದೆ.

ರಶ್ಮಿಕಾ ಮಂದಣ್ಣ ತೆಲುಗು ಸಿನಿಮಾಗಳಲ್ಲಿ ನಟಿಸುತ್ತಿರುವಾಗಲೇ ಉತ್ತರ ಭಾರತದಲ್ಲೂ ಅವರಿಗೆ ಫ್ಯಾನ್ ಫಾಲೋಯಿಂಗ್ ಶುರುವಾಯ್ತು. ಇದರಿಂದಲೇ ಆಕೆ ಹಿಂದಿ ಆಲ್ಬಂವೊಂದರಲ್ಲಿ ನಟಿಸಲು ಅವಕಾಶ ಪಡೆದರು. ಟಾಪ್ ಟಕ್ಕರ್ ಹಾಡಿನಲ್ಲಿ ಕಾಣಿಸಿಕೊಂಡ ನಂತರ ಸಿದ್ದಾರ್ಥ್ ಮಲ್ಹೋತ್ರ ಜೊತೆ ಮಿಷನ್ ಮಜ್ನು ಚಿತ್ರದಲ್ಲಿ ರಶ್ಮಿಕಾ ನಟಿಸಲು ಆಯ್ಕೆಯಾದರು. ಇದು ಮುಗಿಯುತ್ತಿದ್ದಂತೆ ಗುಡ್ ಬೈ ಚಿತ್ರದಲ್ಲಿ ಬಾಲಿವುಡ್ ಬಿಗ್ ಬಿ ಅಮಿತಾಬ್ ಬಚ್ಚನ್ ಅವರ ಪುತ್ರಿಯಾಗಿ ನಟಿಸುವ ಅದೃಷ್ಟ ಒಲಿದು ಬಂತು. ಜೊತೆಗೆ ರಣಬೀರ್ ಕಪೂರ್ ಜೊತೆ ಅನಿಮಲ್ ಚಿತ್ರದಲ್ಲೂ ನಟಿಸುತ್ತಿದ್ದಾರೆ. ಮಿಷನ್ ಮಜ್ನು ಸಿನಿಮಾ ಜೂನ್ 10 ರಂದು ತೆರೆ ಕಾಣಬೇಕಿತ್ತು. ಆದರೆ ಬಿಡುಗಡೆ ದಿನಾಂಕವನ್ನು ಮುಂದೂಡಲಾಗಿದೆ. ಗುಡ್ ಬೈ ಸಿನಿಮಾ ಶೀಘ್ರದಲ್ಲೇ ತೆರೆ ಕಾಣಲಿದೆ. ಅನಿಮಲ್ ಸಿನಿಮಾ ಚಿತ್ರೀಕರಣದ ಹಂತದಲ್ಲಿದೆ. ಒಟ್ಟಿನಲ್ಲಿ ಈ ಮೂರೂ ಸಿನಿಮಾಗಳು ತೆರೆ ಕಾಣುವ ಮುನ್ನವೇ ರಶ್ಮಿಕಾ ಬಾಲಿವುಡ್​​​ನ ಮತ್ತೊಬ್ಬ ಖ್ಯಾತ ನಟನೊಂದಿಗೆ ನಟಿಸಲು ಒಪ್ಪಿದ್ದಾರಂತೆ.

ಬಾಲಿವುಡ್ ಸ್ಟಾರ್ ನಟ ಜಾಕಿ ಶ್ರಾಫ್ ಪುತ್ರ ಟೈಗರ್ ಶ್ರಾಫ್ ಜೊತೆ ರಶ್ಮಿಕಾ ನಟಿಸುತ್ತಿದ್ದಾರಂತೆ. ಧರ್ಮ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿ ಕರಣ್ ಜೋಹರ್, ಈ ಚಿತ್ರವನ್ನು ನಿರ್ಮಿಸುತ್ತಿದ್ದು ಶಶಾಂಕ್ ಖೈತಾನ್ ಈ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಹೇಳಲಿದ್ದಾರಂತೆ. ಇದೊಂದು ಆ್ಯಕ್ಷನ್ ಎಂಟರ್​​ಟೈನ್ಮೆಂಟ್ ಸಿನಿಮಾವಾಗಿದ್ದು ಚಿತ್ರಕ್ಕಾಗಿ ಟೈಗರ್ ಶ್ರಾಫ್ ಎಲ್ಲಾ ತಯಾರಿ ಮಾಡಿಕೊಂಡಿದ್ದಾರಂತೆ. ಈ ಸಿನಿಮಾ ಸೆಪ್ಟೆಂಬರ್​​​​​ನಲ್ಲಿ ಸೆಟ್ಟೇರಲಿದ್ದು ಶೀಘ್ರದಲ್ಲೇ ಚಿತ್ರತಂಡ ಅಧಿಕೃತವಾಗಿ ಘೋಷಣೆ ಮಾಡಲಿದೆ ಎನ್ನಲಾಗಿದೆ.

ರಶ್ಮಿಕಾ, ಸದ್ಯಕ್ಕೆ ತೆಲುಗು, ತಮಿಳು, ಮಲಯಾಳಂ ಹಾಗೂ ಹಿಂದಿ ಭಾಷೆಗಳ ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದು ಚೆನ್ನೈ, ಹೈದರಾಬಾದ್, ಮುಂಬೈ ಹಾಗೂ ತಿರುವನಂತಪುರಂಗೆ ಹಾರಾಡುತ್ತಿದ್ದಾರೆ. ತೆಲುಗಿನಲ್ಲಿ ಸೀತಾರಾಮಮ್ ಹಾಗೂ ಪುಷ್ಪ 2, ತಮಿಳಿನಲ್ಲಿ ವಿಜಯ್ ಜೊತೆ ವರಿಸು, ಹಿಂದಿಯಲ್ಲಿ ರಣಬೀರ್ ಕಪೂರ್ ಜೊತೆ ಅನಿಮಲ್, ಅಮಿತಾಬ್ ಬಚ್ಚನ್ ಪುತ್ರಿಯಾಗಿ ಗುಡ್ ಬೈ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. ಇದೀಗ ಮತ್ತೊಂದು ಹಿಂದಿ ಚಿತ್ರದಲ್ಲಿ ಅವರು ನಟಿಸುತ್ತಿದ್ದಾರೆ ಎಂದು ತಿಳಿದ ಅಭಿಮಾನಿಗಳು ಫುಲ್ ಖುಷಿಯಾಗಿದ್ದಾರೆ.

ಇನ್ನು ರಶ್ಮಿಕಾ ಖ್ಯಾತಿ ಗಳಿಸುತ್ತಿದ್ದಂತೆ ಸಿನಿಮಾ ನಿರ್ಮಾಪಕರಿಗೆ ಅವರು ನಾನಾ ಬೇಡಿಕೆ ಇಡುತ್ತಿದ್ದಾರಂತೆ. ರಶ್ಮಿಕಾ, ಸಾಕುನಾಯಿ ಔರಾಳನ್ನು ಬಹಳ ಇಷ್ಟಪಡುವ ವಿಚಾರ ತಿಳಿದೇ ಇದೆ. ಅದಕ್ಕಾಗಿ ಆಕೆ ಎಲ್ಲಿ ಶೂಟಿಂಗ್ ಹೋದರೂ ತನ್ನೊಂದಿಗೆ ತನ್ನ ಮುದ್ದಿನ ನಾಯಿಗೂ ಫ್ಲೈಟ್ ಟಿಕೆಟ್ ಬುಕ್ ಮಾಡಿ ಎಂದು ನಿರ್ಮಾಪಕರ ಬಳಿ ಡಿಮ್ಯಾಂಡ್ ಮಾಡಿದ್ದರು ಎಂಬ ಸುದ್ದಿ ಕೆಲವು ದಿನಗಳ ಹಿಂದೆ ವೈರಲ್ ಆಗಿತ್ತು. ಆದರೆ ರಶ್ಮಿಕಾ ಇದನ್ನು ನಿರಾಕರಿಸಿದ್ದರು.