Rashmika New movie Shelved:ಸೆಟ್ಟೇರುವ ಮುನ್ನವೇ ನಿಂತ ರಶ್ಮಿಕಾ ಹೊಸ ಸಿನಿಮಾ....ನಾಯಕನೇ ಕಾರಣ ಅಂತೆ...!

ನಟಿ ರಶ್ಮಿಕಾ ಮಂದಣ್ಣ ಈಗ ಯಾರ ಕೈಗೂ ಸಿಗದಷ್ಟು ಬ್ಯುಸಿಯಾಗಿದ್ದಾರೆ. ಇಂದು ಹೈದರಾಬಾದ್‌ನಲ್ಲಿದ್ದರೆ ನಾಳೆ ಚೆನ್ನೈ, ಮರುದಿನ ಮುಂಬೈ, ಹೀಗೆ ಒಂದೊಂದು ರಾಜ್ಯಕ್ಕೂ ಹಾರಾಡುತ್ತಿದ್ದಾರೆ. ಬಾಲಿವುಡ್‌ನಲ್ಲೂ ರಶ್ಮಿಕಾ ಈಗ ಬೇಡಿಕೆಯ ನಟಿ. ಮಿಷನ್‌ ಮಜ್ನು ಹಾಗೂ ಗುಡ್‌ ಬೈ ಸಿನಿಮಾಗಳಲ್ಲಿ ರಶ್ಮಿಕಾ ನಟಿಸಿದ್ದಾರೆ. ಆದರೆ ಮೂರನೇ ಹಿಂದಿ ಸಿನಿಮಾ ಸೆಟ್ಟೇರುವ ಮುನ್ನವೇ ನಿಂತಿದೆ ಎಂಬ ಮಾತು ಬಿ ಟೌನ್‌ನಲ್ಲಿ ಕೇಳಿಬರುತ್ತಿದೆ.

ರಶ್ಮಿಕಾ, ಟೈಗರ್‌ ಶ್ರಾಫ್‌ ಜೊತೆ ಒಂದು ಸಿನಿಮಾ ಮಾಡಲಿದ್ದಾರೆ ಎಂಬ ಮಾತು ಕೇಳಿಬರುತ್ತಿದ್ದಂತೆ, ಇಲ್ಲ ನಾನು ಟೈಗರ್‌ ಶ್ರಾಫ್‌ ಜೊತೆ ಜಾಹೀರಾತಿನಲ್ಲಿ ಕಾಣಿಸಿಕೊಳ್ಳುತ್ತಿದ್ದೇನೆ ಎಂದು ರಶ್ಮಿಕಾ ಹೇಳಿದ್ದರು. ಆದರೆ ಮತ್ತೆ, ಧರ್ಮ ಪ್ರೊಡಕ್ಷನ್ಸ್‌ ಬ್ಯಾನರ್‌ ಅಡಿಯಲ್ಲಿ ಕರಣ್‌ ಜೋಹರ್‌ ನಿರ್ಮಿಸುತ್ತಿರುವ ಚಿತ್ರದಲ್ಲಿ ರಶ್ಮಿಕಾ ಮಂದಣ್ಣ ಹಾಗೂ ಟೈಗರ್‌ ಶ್ರಾಫ್‌ ಜೊತೆಯಾಗಿ ನಟಿಸುತ್ತಿದ್ದಾರೆ ಎಂದು ಘೋಷಿಸಲಾಯ್ತು. ಈ ಸಿನಿಮಾ ಸೆಪ್ಟೆಂಬರ್‌ನಲ್ಲಿ ಸೆಟ್ಟೇರಲಿದೆ ಎಂಬ ಮಾತು ಕೂಡಾ ಕೇಳಿಬಂದಿತ್ತು. ಆದರೆ ಇದೀಗ ಈ ಚಿತ್ರ ಸೆಟ್ಟೇರುವ ಮುನ್ನವೇ ನಿಂತುಹೋಗಿದೆ ಎನ್ನಲಾಗುತ್ತಿದೆ.

ಈ ಸಿನಿಮಾ ಹೀಗೆ ನಿಲ್ಲಲು ಕಾರಣ ಚಿತ್ರದ ಬಜೆಟ್‌ ಹಾಗೂ ಟೈಗರ್‌ ಶ್ರಾಫ್‌ ಸಂಭಾವನೆ ಅಂತೆ. ನಿರ್ಮಾಪಕ ಕರಣ್‌ ಜೋಹರ್‌, ಈ ಚಿತ್ರಕ್ಕೆ ಒಂದು ಬಜೆಟ್‌ ನಿಗದಿಪಡಿಸಿದ್ದರು. ಆದರೆ ಅಂದುಕೊಂಡಿದ್ದಕ್ಕಿಂತ ಬಜೆಟ್‌ ದುಪ್ಪಟ್ಟು ಹೆಚ್ಚಾಗಿದೆಯಂತೆ. ಜೊತೆಗೆ ಟೈಗರ್‌ ಶ್ರಾಫ್‌ ಕೂಡಾ ಹೆಚ್ಚು ಸಂಭಾವನೆಗೆ ಬೇಡಿಕೆ ಇಟ್ಟಿದ್ದಾರಂತೆ. ಇತ್ತೀಚೆಗೆ ಟೈಗರ್‌ ಶ್ರಾಫ್‌ ಅಭಿನಯದ ಸಿನಿಮಾಗಳೆಲ್ಲವೂ ಫ್ಲಾಪ್‌ ಆಗುತ್ತಿರುವುದರಿಂದ ಸಂಭಾವನೆ ಕಡಿತಗೊಳಿಸುವಂತೆ ಕರಣ್‌ ಜೋಹರ್‌ ಮನವಿ ಮಾಡಿದರೂ ಟೈಗರ್‌, ಇದಕ್ಕೆ ಒಪ್ಪುತ್ತಿಲ್ಲವಂತೆ. ಈ ಕಾರಣದಿಂದಲೇ ಚಿತ್ರ ನಿಂತುಹೋಗಿದೆ ಎನ್ನಲಾಗುತ್ತಿದೆ.

ಆದರೆ ಮತ್ತೊಂದು ಮೂಲಗಳ ಪ್ರಕಾರ ಸಿನಿಮಾ ನಿಂತಿಲ್ಲ. ಸ್ಕ್ರೀವ್‌ ಧೀಲಾ ಸಿನಿಮಾ ಮುಂದಿನ ವರ್ಷ ಸೆಟ್ಟೇರಲಿದೆ. ಕೆಲವೊಂದು ಕಾರಣಗಳಿಂದ ಈ ವರ್ಷ ಸಿನಿಮಾ ಆರಂಭವಾಗುತ್ತಿಲ್ಲ ಎಂಬ ಮಾಹಿತಿ ತಿಳಿದುಬಂದಿದೆ. ಒಟ್ಟಿನಲ್ಲಿ ಸಿನಿಮಾ ಆರಂಭವಾದಾಗಲೇ ಈ ಎಲ್ಲಾ ವಂದಂತಿಗಳಿಗೆ ಫುಲ್‌ ಸ್ಟಾಪ್‌ ಬೀಳಲಿದೆ.

ನಾಗಚೈತನ್ಯ ಜೋಡಿಯಾಗ್ ರಶ್ಮಿಕಾ

ಇತ್ತೀಚೆಗಷ್ಟೇ ಸರ್ಕಾರಿ ವಾರಿ ಪಾಟ ಅನ್ನೋ ಹಿಟ್‌ ಸಿನಿಮಾ ನೀಡಿದ್ದ ನಿರ್ದೇಶಕ ಪರಶುರಾಮ್‌, ಇದೀಗ ಹೊಸ ಸಿನಿಮಾ ಕೈಗೆತ್ತಿಕೊಂಡಿದ್ದಾರೆ. ಈ ಚಿತ್ರದಲ್ಲಿ ನಾಗಚೈತನ್ಯ ನಾಯಕನಾಗಿ ನಟಿಸಲಿದ್ದಾರೆ. ಅಚ್ಚರಿಯ ವಿಚಾರ ಎಂಬಂತೆ ಈ ಚಿತ್ರಕ್ಕೆ ನಾಯಕಿಯ ಆಯ್ಕೆಯೂ ಆಗಿದ್ದು, ರಶ್ಮಿಕಾ ಮಂದಣ್ಣ ನಾಗಚೈತನ್ಯಗೆ ಜೋಡಿಯಾಗಿದ್ದಾರೆ. ಇನ್ನಷ್ಟೇ ಈ ಸುದ್ದಿ ಅಧಿಕೃತ ಘೋಷಣೆ ಆಗಬೇಕಿದೆ. ಮೊದಲ ಬಾರಿಗೆ ನಾಗಚೈತನ್ಯ ಮತ್ತು ರಶ್ಮಿಕಾ ಮಂದಣ್ಣ ತೆರೆ ಮೇಲೆ ಜೊತೆಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ.

ಸಾಲು ಸಾಲು ಪ್ರಾಜೆಕ್ಟ್‌ಗಳಲ್ಲಿ ಬ್ಯುಸಿಯಾಗಿರುವ ರಶ್ಮಿಕಾ

ಬಾಲಿವುಡ್​​​ನಲ್ಲಿ ರಶ್ಮಿಕಾ ಮಂದಣ್ಣ ಮಿಷನ್ ಮಜ್ನು, ಅನಿಮಲ್ , ಗುಡ್ ಬೈ ಸಿನಿಮಾಗಳನ್ನು ಮುಗಿಸಿದ್ದಾರೆ. ತೆಲುಗಿನಲ್ಲಿ ಪುಷ್ಪ 2, ತಮಿಳಿನಲ್ಲಿ ವಿಜಯ್ ಜೊತೆ ವರಿಸು, ಹಿಂದಿಯಲ್ಲಿ ರಣಬೀರ್ ಕಪೂರ್ ಜೊತೆ ಅನಿಮಲ್ ಸಿನಿಮಾಗಳಲ್ಲಿ ರಶ್ಮಿಕಾ ನಟಿಸುತ್ತಿದ್ದಾರೆ.