Ravi Basrur: ಎಲ್ಲೆಲ್ಲೂ ಇವರದ್ದೇ ಹವಾ..ಸ್ಟಾರ್ ಹೀರೋ ಚಿತ್ರಕ್ಕಾಗಿ ಮಾಲಿವುಡ್​​​​​​ಗೆ ಹೊರಟ ಕೆಜಿಎಫ್​​​​ ಸಂಗೀತ ನಿರ್ದೇಶಕ

'ಕೆಜಿಎಫ್' ಸಿನಿಮಾ, ಆ ಚಿತ್ರದಲ್ಲಿ ನಟಿಸಿದ ಕಲಾವಿದರು ಹಾಗೂ ತಂತ್ರಜ್ಞರಿಗೆ ಹಣ, ಹೆಸರು ಎರಡನ್ನೂ ತಂದುನೀಡಿದೆ. ಈ ಚಿತ್ರದ ನಂತರ ಯಶ್ ನ್ಯಾಷನಲ್ ಸ್ಟಾರ್ ಆದರೆ, ನಿರ್ದೇಶಕ ಪ್ರಶಾಂತ್ ನೀಲ್ ತೆಲುಗು ಸ್ಟಾರ್ ನಟರ ಸಿನಿಮಾಗಳನ್ನು ನಿರ್ದೇಶಿಸುವ ಹಂತಕ್ಕೆ ಬೆಳೆದಿದ್ದಾರೆ. ಹೊಂಬಾಳೆ ಫಿಲ್ಮ್ಸ್ ನಿರ್ಮಾಣ ಸಂಸ್ಥೆ ಕೂಡಾ ಪರಭಾಷೆ ಸಿನಿಮಾಗಳನ್ನೂ ನಿರ್ಮಾಣ ಮಾಡುತ್ತಿದ್ದಾರೆ.

ಕೆಜಿಎಫ್ ಸಿನಿಮಾ ಸಂಗೀತ ನಿರ್ದೇಶಕ ರವಿ ಬಸ್ರೂರು​​ ಅವರಿಗೂ ಕೂಡಾ ಈಗ ಬೇಡಿಕೆ ಹೆಚ್ಚಿದೆ. ಕೆಜಿಎಫ್ ಚಿತ್ರದ ಹಾಡುಗಳು, ಹಿನ್ನೆಲೆ ಸಂಗೀತ ಎಷ್ಟು ಫೇಮಸ್ ಆಗಿದೆ ಎಂದರೆ, ಬಹುತೇಕ ವಿಡಿಯೋಗಳಿಗೆ ಈ ಚಿತ್ರದ ಹಿನ್ನೆಲೆ ಸಂಗೀತವನ್ನು ಬಳಸಿಕೊಳ್ಳುತ್ತಿರುವುದನ್ನು ನೋಡಬಹುದು. ಈಗ ರವಿ ಬಸ್ರೂರ್​​​ಗೆ ಪರಭಾಷೆಗಳಲ್ಲಿ ಕೂಡಾ ಆಫರ್ ಬರುತ್ತಿದೆ. ಇದೀಗ ಅವರು ಮತ್ತೆ ಮಲಯಾಳಂ ಚಿತ್ರರಂಗಕ್ಕೆ ಹೊರಟಿದ್ದಾರೆ.

ರವಿ ಬಸ್ರೂರು ಮಲಯಾಳಂ ಸ್ಟಾರ್ ನಟ ಪೃಥ್ವಿರಾಜ್ ಸುಕುಮಾರನ್ ಅವರ ಸಿನಿಮಾಗೆ ಸಂಗೀತ ನೀಡುತ್ತಿದ್ದಾರೆ ಎಂಬ ಮಾಹಿತಿ ತಿಳಿದುಬಂದಿದೆ. 'ಕಾಳಿಯನ್' ಎಂಬ ಮಲಯಾಳಂ ಚಿತ್ರಕ್ಕೆ ರವಿ ಬಸ್ರೂರು ಸಂಗೀತ ನೀಡುತ್ತಿದ್ದಾರೆ. ಇದೊಂದು ಥ್ರಿಲ್ಲರ್ ಕಥೆಯಾಗಿದ್ದು ಚಿತ್ರವನ್ನು ಎಸ್. ಮಹೇಶ್ ನಿರ್ದೇಶಿಸುತ್ತಿದ್ದಾರೆ. ಇದಕ್ಕೂ ಮುನ್ನ ಮಡ್ಡಿ ಎಂಬ ಮಲಯಾಳಂ ಚಿತ್ರಕ್ಕೆ ಅವರು ಸಂಗೀತ ನೀಡಿದ್ದರು. ತಮ್ಮ ಚಿತ್ರಕ್ಕೆ ರವಿ ಬಸ್ರೂರು ಸಂಗೀತ ನೀಡುತ್ತಿರುವ ವಿಚಾರವನ್ನು ಸ್ವತ: ಪೃಥ್ವಿರಾಜ್ ಸುಕುಮಾರನ್ ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ಬರೆದುಕೊಂಡಿದ್ದಾರೆ. ಅವರೊಂದಿಗೆ ಇರುವ ಫೋಟೋದೊಂದಿಗೆ ಕಾಳಿಯನ್ ತಂಡಕ್ಕೆ ನಿಮಗೆ ಸ್ವಾಗತ ಎಂದು ರವಿ ಬಸ್ರೂರ್​​​ಗೆ ಸ್ವಾಗತ ಕೋರಿದ್ದಾರೆ.

ಇದರೊಂದಿಗೆ ಈಗಾಗಲೇ ರವಿ ಬಸ್ರೂರು ಬಾಲಿವುಡ್​ ಚಿತ್ರಗಳಿಗೂ ಸಂಗೀತ ನೀಡಿದ್ದಾರೆ. ಸಲ್ಮಾನ್ ಖಾನ್ ಸಹೋದರಿ ಅರ್ಪಿತಾ ಪತಿ ಆಯುಶ್ ಶರ್ಮಾ ಅಭಿನಯದ 'ಅಂತಿಮ್' ಚಿತ್ರಕ್ಕೆ ರವಿ ಬಸ್ರೂರು ಸಂಗೀತ ಸಂಯೋಜನೆ ಮಾಡಿದ್ದಾರೆ. ಇದಾದ ನಂತರ ಸಲ್ಮಾನ್ ಖಾನ್ ಮತ್ತೆ ತಮ್ಮ ಹೊಸ ಚಿತ್ರಕ್ಕೆ ರವಿ ಬಸ್ರೂರ್ ಅವರನ್ನೇ ಆಯ್ಕೆ ಮಾಡಿದ್ದಾರಂತೆ. 'ಕಭಿ ಈದ್ ಕಭಿ ದಿವಾಲಿ' ಚಿತ್ರಕ್ಕೆ ರವಿ ಬಸ್ರೂರು ಈಗಾಗಲೇ ಕೆಲಸ ಆರಂಭಿಸಿದ್ದಾರೆ. ಈ ಚಿತ್ರಕ್ಕೆ ಇದಕ್ಕೂ ಮುನ್ನ ಖ್ಯಾತ ಸಂಗೀತ ನಿರ್ದೇಶಕ ದೇವಿ ಶ್ರೀ ಪ್ರಸಾದ್ ಆಯ್ಕೆಯಾಗಿದ್ದರಂತೆ. ಕಾರಣಾಂತರಗಳಿಂದ ಅವರು ಚಿತ್ರತಂಡದಿಂದ ಹೊರ ಹೋದ ಕಾರಣ, ಆ ಜಾಗಕ್ಕೆ ರವಿ ಬಸ್ರೂರು ಅವರನ್ನು ಕರೆತರಲಾಗಿದೆ.

2014 ರಲ್ಲಿ 'ಉಗ್ರಂ' ಚಿತ್ರಕ್ಕೆ ಸಂಗೀತ ನಿರ್ದೇಶನ ಮಾಡುವ ಮೂಲಕ ಚಿತ್ರರಂಗಕ್ಕೆ ಬಂದ ರವಿ ಬಸ್ರೂರು​ ಎಕ್ಕಾ ಸಕ್ಕಾ, ರಿಂಗ್ ಮಾಸ್ಟರ್, ಪ್ಲಸ್, ಟೈಸನ್, ಅಂಜನಿ ಪುತ್ರ, ಮಫ್ತಿ, ಕಟಕ, ಸಂಹಾರ ಕೆಜಿಎಫ್​, ಮದಗಜ, ಬಜಾರ್, ಗಿರ್ಮಿಟ್, ಕೆಜಿಎಫ್ 2 ಚಿತ್ರಗಳಿಗೆ ಸಂಗೀತ ನೀಡಿದ್ದಾರೆ. ಸದ್ಯಕ್ಕೆ ಅವರ ಕೈಯಲ್ಲಿ ಸಲಾರ್, ಕಬ್ಜ, ಸೀತಾ ಮನೋಹರ ಶ್ರೀ ರಾಘವ, ಕಭಿ ಈದ್ ಕಭಿ ದಿವಾಲಿ, ಕಾಳಿಯನ್ ಸಿನಿಮಾಗಳಿವೆ. ರವಿ ಬಸ್ರೂರು ಗರ್ ಗರ್ ಮಂಡ್ಲ, ಬಿಲಿಂಡರ್, ಕಟಕ, ಗಿರ್ಮಿಟ್ ಸಿನಿಮಾಗಳನ್ನು ನಿರ್ದೇಶಿಸಿದ್ದಾರೆ.