Raymo Title Changed: ರಮ್ಯಾಗಾಗಿ 'ರೇಮೊ' ಟೈಟಲ್‌ ಬದಲಾಯಿಸಲು ಹೊರಟ ಚಿತ್ರತಂಡ..ಈ ವಿಡಿಯೋ ಅಸಲಿಯತ್ತೇನು..?

ಯುವನಟ ಇಶಾನ್‌ ಹಾಗೂ ಪಟಾಕಿ ಪೋರಿ ಆಶಿಕಾ ರಂಗನಾಥ್‌ ನಟನೆಯ ಮ್ಯೂಸಿಕಲ್‌ ಥೀಮ್‌ ಇರುವ 'ರೇಮೊ' ಸಿನಿಮಾ ಇಂದು ರಾಜ್ಯಾದ್ಯಂತ ತೆರೆ ಕಂಡಿದೆ. ಈಗಾಗಲೇ ಟ್ರೇಲರ್‌ ಹಾಗೂ ಮೇಕಿಂಗ್‌ ಬಹಳ ಕ್ರೇಜ್‌ ಕ್ರಿಯೇಟ್‌ ಮಾಡಿದೆ. ಸಿನಿಮಾವನ್ನು ಕಣ್ತುಂಬಿಕೊಳ್ಳಲು ಚಿತ್ರಪ್ರೇಮಿಗಳು ಕಾಯುತ್ತಿದ್ದಾರೆ. ಈ ನಡುವೆ ಚಿತ್ರತಂಡ ಸಿನಿಮಾದ ಟೈಟಲ್‌ ಬದಲಿಸಲು ನಿರ್ಧರಿಸಿದೆ ಎನ್ನಲಾಗಿದೆ.

ಸಿನಿಮಾ ತೆರೆ ಕಾಣುವ ಸಮಯದಲ್ಲಿ ಚಿತ್ರತಂಡ ಹೀಗೆ ಟೈಟಲ್‌ ಬದಲಿಸಲು ಕಾರಣ ಏನು..? ಚಿತ್ರಕ್ಕೆ ಬೇರೆ ಯಾವ ಟೈಟಲ್‌ ಇಡಲಿದ್ದಾರೆ ಎಂದ ಪ್ರಶ್ನೆ ಒಂದೆಡೆ ಆದರೆ, ಮತ್ತೊಂದೆಡೆ ಚಿತ್ರಕ್ಕೆ 'ರೇಮೊ' ಬದಲಿಗೆ ರಮ್ಯಾ ಎಂದು ಹೆಸರಿಡಲಿದ್ದಾರೆ ಎಂಬ ಮಾತು ಕೇಳಿಬರುತ್ತಿದೆ. ಇದನ್ನು ಕೇಳಿ ಸಿನಿಪ್ರಿಯರು ಆಶ್ಚರ್ಯ ವ್ಯಕ್ತಪಡಿಸಿದ್ದಾರೆ. ಚಿತ್ರದಲ್ಲಿ ನಾಯಕ ಇಶಾನ್‌ ರೇಮೊ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಆದರೆ ಇದೀಗ ರಮ್ಯಾ ಎಂದು ಹೆಸರಿಡಬೇಕಾದರೆ ಬಹುಶ: ನಾಯಕಿ ಹೆಸರು ರಮ್ಯಾ ಅಂತ ಇರಬಹುದು ಎನ್ನಲಾಗುತ್ತಿದೆ.! ಆದರೆ ಮತ್ತೊಂದು ಮೂಲಗಳ ಪ್ರಕಾರ, ಸ್ಯಾಂಡಲ್‌ವುಡ್‌ ಮೋಹಕ ತಾರೆ ರಮ್ಯಾ ಅವರಿಗಾಗಿ ಈ ಹೆಸರು ಬದಲಿಸಲಾಗುತ್ತಿದೆ ಎಂಬ ಮಾತು ಕೇಳಿಬರುತ್ತಿದೆ. ಇಷ್ಟೆಲ್ಲಾ ಸುದ್ದಿ ಕೇಳಿ ಜನರು ದಂಗಾಗಿದ್ದಾರೆ. ಆದರೆ ಅಸಲಿ ಕಥೆ ಇಲ್ಲಿದೆ ಕೇಳಿ.

ಹೋಟೆಲ್‌ ರೂಮ್‌ ಒಂದರಲ್ಲಿ ಪವನ್‌ ಒಡೆಯರ್‌ ಕುಳಿತಿರುತ್ತಾರೆ. ಆಗ ಅವರ ಬಳಿ ಬರುವ ನಾಯಕ ಇಶಾನ್‌, ಏನ್‌ ಸರ್‌ ಸಿನಿಮಾ ರಿಲೀಸ್‌ ಇದ್ರೂ ಇಷ್ಟು ಕೂಲ್‌ ಆಗಿ ಕುಳಿತಿದ್ದೀರ ಎನ್ನುತ್ತಾರೆ. ಅದಕ್ಕೆ ಪ್ರತಿಕ್ರಿಯಿಸುವ ಪವನ್‌, ನಿಮಗೆ ರಮ್ಯಾ ಜೊತೆ ನಟಿಸಲು ಅವಕಾಶ ಸಿಕ್ಕರೆ ಏನು ಮಾಡ್ತೀರ ಅಂತ ಕೇಳ್ತಾರೆ. ಈ ಮಾತಿನಿಂದ ಎಕ್ಸೈಟ್‌ ಆಗುವ ಇಶಾನ್‌, ಅವರೊಂದಿಗೆ ಆಕ್ಟ್‌ ಮಾಡಲು ಅವಕಾಶ ದೊರೆತರೆ ಮಿಸ್‌ ಮಾಡ್ಕೊತಿನಾ ಸರ್‌, ಅವರೊಂದಿಗೆ ನಟಿಸಿದ ಎಲ್ಲರೂ ಸೂಪರ್‌ ಸ್ಟಾರ್‌ ಆಗಿದ್ದಾರೆ ಎಂದು ಖುಷಿಯಿಂದ ಅರಚಾಡುತ್ತಾರೆ. ಅವರನ್ನು ಮೀಟ್‌ ಮಾಡೋದಾದ್ರೂ ಹೇಗೆ ಸರ್‌ ಎಂದು ಪವನ್ ಒಡೆಯರ್‌ ಬಳಿ ಕೇಳುತ್ತಾರೆ. ಆಗ ನಿರ್ದೇಶಕ ಪವನ್‌, ಅವರನ್ನು ಮೀಟ್‌ ಮಾಡೋಕೆ ಅಷ್ಟು ಕಷ್ಟ ಅನ್ನೋದಾದ್ರೆ ನಮ್ಮ ಸಿನಿಮಾ ಟೈಟಲನ್ನೇ ಬದಲಾಯಿಸೋಣ ಬಿಡಿ ಎನ್ನುತ್ತಾರೆ. ಈ ವಿಡಿಯೋ ಈಗ ಬಹಳ ವೈರಲ್‌ ಆಗುತ್ತಿದೆ. ಅದರೆ ಇದು ರಿಯಲ್ ಅಲ್ಲ ರೀಲ್ ಅನ್ನೋದು ಕೂಡಾ ಅಷ್ಟೇ ನಿಜ. ಇದು ಸಿನಿಮಾದ ಪ್ರಚಾರಕ್ಕಾಗಿ ಚಿತ್ರತಂಡ ಕ್ರಿಯೇಟ್ ಮಾಡಿರುವ ವೀಡಿಯೋ ಕಟೆಂಟ್ ಆಗಿದೆ.

'ರೆಮೋ' ಸಿನಿಮಾ ಮ್ಯೂಸಿಕಲ್ ಮತ್ತು ಔಟ್ ಅಂಡ್ ಔಟ್ ರೊಮ್ಯಾಂಟಿಕ್ ಸಬ್ಜೆಕ್ಟ್ ಒಳಗೊಂಡಿದೆ. ಚಿತ್ರವನ್ನು ಜಯಾದಿತ್ಯ ಬ್ಯಾನರ್ ನಡಿ ಸಿ.ಆರ್‌. ಮನೋಹರ್ ಅದ್ದೂರಿಯಾಗಿ ನಿರ್ಮಾಣ ಮಾಡಿದ್ದು ಪವನ್‌ ಒಡೆಯರ್‌ ನಿರ್ದೇಶಿಸಿದ್ದಾರೆ. ಸಿ.ಆರ್‌. ಗೋಪಿ ಸಹ ನಿರ್ಮಾಣ ಚಿತ್ರಕ್ಕಿದೆ. ವೈದಿ ಕ್ಯಾಮೆರಾ ವರ್ಕ್, ಕೆ.ಎಂ. ಪ್ರಕಾಶ್ ಸಂಕಲನ, ಮ್ಯಾಜಿಕಲ್ ಕಂಪೋಸರ್ ಅರ್ಜುನ್ ಜನ್ಯ ಸಂಗೀತ ನಿರ್ದೇಶನ ಚಿತ್ರಕ್ಕಿದೆ.

ಪೂರಿ ಜಗ್ಗನಾಥ್ ನಿರ್ದೇಶನದ 'ರೋಗ್' ಸಿನಿಮಾ ಮೂಲಕ ನಾಯಕ ನಟನಾಗಿ ಎಂಟ್ರಿ ಕೊಟ್ಟ ಇಶಾನ್, ಬಿಗ್ ಬ್ರೇಕ್ ನಂತರ ಕಂಬ್ಯಾಕ್ ಮಾಡುತ್ತಿದ್ದಾರೆ. ಈ ಸಿನಿಮಾ ಮೇಲೆ ಇಶಾನ್ ಅಪಾರ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ಚಿತ್ರಕ್ಕಾಗಿ ಅವರ ತಯಾರಿ ಕೂಡಾ ಬಿಡುಗಡೆಯಾಗಿರುವ ಸ್ಯಾಂಪಲ್‌ಗಳಲ್ಲಿ ಎದ್ದು ಕಾಣುತ್ತಿದೆ. ಇಂದು ಬಿಡುಗಡೆ ಆಗಲಿರುವ ಸಿನಿಮಾ ನೋಡಿ ಪ್ರೇಕ್ಷಕರ ರೆಸ್ಪಾನ್ಸ್ ಹೇಗಿರುತ್ತೆ ಎಂಬುದನ್ನು ನೋಡಲು ಚಿತ್ರತಂಡ ಕಾಯುತ್ತಿದೆ.