ಡಿಸೆಂಬರ್‌ನಲ್ಲಿ ಒಟಿಟಿಗೆ ಬರಲಿರುವ ಕನ್ನಡ ಸಿನಿಮಾಗಳು; ಭೈರತಿ ರಣಗಲ್, ಮರ್ಫಿ ಜೊತೆಗೆ ಮತ್ತೊಂದು ಚಿತ್ರ
Nov 30, 2024 03:27 PM IST
Share
ಭೈರತಿ ರಣಗಲ್, ಮರ್ಫಿ ಸೇರಿದಂತೆ ಡಿಸೆಂಬರ್‌ನಲ್ಲಿ ಒಟಿಟಿಗೆ ಬರಲಿರುವ ಕನ್ನಡ ಸಿನಿಮಾಗಳು ಹೀಗಿವೆ.
- ಒಟಿಟಿ ಪ್ಲಾಟ್‌ಫಾರ್ಮ್‌ಗಳಲ್ಲಿ ಡಿಸೆಂಬರ್‌ನಲ್ಲಿ ಬಿಡುಗಡೆಯಾಗಲಿರುವ ಹೊಸ ಹೊಸ ಕನ್ನಡ ಸಿನಿಮಾಗಳು ಯಾವುವು ಎಂಬುದನ್ನು ನೋಡೋಣ. ಶಿವಣ್ಣ ನಟನೆಯ ಭೈರತಿ ರಣಗಲ್ ಹಾಗೂ ಮರ್ಫಿ ಚಿತ್ರದ ಜೊತೆಗೆ ಇನ್ನೊಂದು ಸಿನಿಮಾ ಒಟಿಟಿಗೆ ಬರಲಿದೆ.
ಇನ್ನೇನು 2024ರ ವರ್ಷ ಮುಕ್ತಾಯಗೊಳ್ಳುತ್ತಿದೆ. ನಾಳೆಯಿಂದ ವರ್ಷದ ಕೊನೆಯ ತಿಂಗಳು ಡಿಸೆಂಬರ್ ಆರಂಭವಾಗುತ್ತಿದೆ. ಹಾಗಂತಾ ಮನರಂಜನೆಗೆ ಏನೂ ಕೊರತೆಯಾಗಲ್ಲ. ವರ್ಷದ ಕೊನೆಯ ತಿಂಗಳಲ್ಲಿ ಸಿನಿಪ್ರಿಯರು ಒಟಿಟಿ ಮೂಲಕ ಹಲವು ಹೊಸ ಹೊಸ ಚಲನಚಿತ್ರಗಳನ್ನು ಕಣ್ತುಂಬಿಕೊಳ್ಳಬಹುದು. ಕೆಲವು ಬಹು ನಿರೀಕ್ಷಿತ ಕನ್ನಡ ಚಲನಚಿತ್ರಗಳು ಒಟಿಟಿ ವೇದಿಕೆಗೆ ಬರಲಿವೆ. ಭೈರತಿ ರಣಗಲ್ ಚಿತ್ರದಿಂದ ಹಿಡಿದು ಗೌರಿಯವರೆಗೆ, ವರ್ಷದ ಕೊನೆಯಲ್ಲಿ OTTಯಲ್ಲಿ ನೋಡಬಹುದಾದ ಹೊಸ ಚಿತ್ರಗಳನ್ನು ನೋಡೋಣ.
Prime Video, Disney + Hotstar, Netflix, Zee5 ಸೇರಿದಂತೆ ಇತರ ಒಟಿಟಿ ಪ್ಲಾಟ್‌ಫಾರ್ಮ್‌ಗಳ ಮೂಲಕ ಡಿಸೆಂಬರ್‌ನಲ್ಲಿ ನೋಡಬಹುದಾದ ಕನ್ನಡ ಚಿತ್ರಗಳನ್ನು ನೋಡೋಣ.
ಭೈರತಿ ರಣಗಲ್ (Zee5)
ಶಿವರಾಜ್ ಕುಮಾರ್, ರುಕ್ಮಿಣಿ ವಸಂತ್, ರಾಹುಲ್ ಬೋಸ್, ಛಾಯಾ ಸಿಂಗ್, ಶಬೀರ್ ಕಲ್ಲರಕ್ಕಲ್ ಮತ್ತು ಮಧು ಗುರುಸ್ವಾಮಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ಚಿತ್ರ ಭೈರತಿ ರಣಗಲ್. ಇತ್ತೀಚೆಗೆ ಬಿಡುಗಡೆಯಾದ ಚಿತ್ರದ ಕಥೆಯು ಗ್ಯಾಂಗ್‌ಸ್ಟರ್‌ನ ಸುತ್ತ ಹೆಣೆಯಲಾಗಿದೆ. ನವೆಂಬರ್ 15ರಂದು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾದ ಚಿತ್ರ, 14 ದಿನಗಳಲ್ಲಿ ಬಾಕ್ಸ್ ಆಫೀಸ್‌ನಲ್ಲಿ 17.4 ಕೋಟಿ ರೂ ಕಲೆಕ್ಷನ್ ಮಾಡಿದೆ. ವರದಿಗಳ ಪ್ರಕಾರ, ಡಿಸೆಂಬರ್ ತಿಂಗಳ ಕೊನೆಯಲ್ಲಿ ಅಥವಾ ಜನವರಿ ಆರಂಭದಲ್ಲಿ ಚಿತ್ರ Zee5ನಲ್ಲಿ ಸ್ಟ್ರೀಮ್‌ ಆಗಲಿದೆ.
ಮರ್ಫಿ (ಪ್ರೈಮ್ ವಿಡಿಯೋ)
ಅಕ್ಟೋಬರ್ 18ರಂದು ಥಿಯೇಟರ್‌ಗಳಲ್ಲಿ ಬಿಡುಗಡೆಯಾದ ಮರ್ಫಿ, ಡಿಸೆಂಬರ್ ಆರಂಭದಲ್ಲಿ ಪ್ರೈಮ್ ವಿಡಿಯೋದಲ್ಲಿ ಬಿಡುಗಡೆಯಾಗಲಿದೆ. ಪ್ರೀತಿ ಭಾವನೆ, ನೆನಪುಗಳ ಸುತ್ತ ಸಾಗುವ ರೊಮ್ಯಾಟಿಂಕ್ ಪ್ರೇಮ ಕಥಾಹಂದರಕ್ಕೆ BSP ವರ್ಮಾ ಕಥೆ ಬರೆದು ನಿರ್ದೇಶದ ಮಾಡಿದ್ದಾರೆ. ಪ್ರಭು ಮುಂಡ್ಕೂರ್ ವರ್ಮಾ ಚಿತ್ರಕಥೆ ಬರೆಯುವುದರ ಜೊತೆಗೆ ನಾಯಕನಾಗಿಯೂ ನಟಿಸಿದ್ದಾರೆ. ರೋಶಿನಿ ಪ್ರಕಾಶ್ , ಇಳಾ ವೀರಮಲ್ಲ ಜೊತೆಗೆ ದತ್ತಣ್ಣ, ಅಶ್ವಿನಿ ರಾವ್ ಪಲ್ಲಕ್ಕಿ ಸೇರಿದಂತೆ ಹಲವರು ಚಿತ್ರದಲ್ಲಿ ನಟಿಸಿದ್ದಾರೆ.
ಗೌರಿ (ಸನ್ NXT)
ಬೆಟ್ಟದಷ್ಟು ಕನಸುಗಳನ್ನು ಹೊತ್ತ ಗ್ರಾಮೀಣ ಯುವಕನ ಜೀವನವನ್ನು ಈ ಕಥೆ ಒಳಗೊಂಡಿದೆ. ಸಿಟಿ ಹುಡುಗಿಯನ್ನು ಭೇಟಿಯಾದ ನಂತರ ಆತನ ಜೀವನಕ್ಕೆ ಅನಿರೀಕ್ಷಿತ ತಿರುವು ಸಿಗುತ್ತದೆ. ಇದು ಗ್ರಾಮೀಣ ನಗರ ಭಾಗದ ವಿಭಜನೆಯನ್ನು ಅನ್ವೇಷಿಸುತ್ತದೆ. ಚಿತ್ರದಲ್ಲಿ ಪ್ರಿಯಾಂಕಾ ಉಪೇಂದ್ರ, ಮಾನಸಿ ಸುಧೀರ್, ರಾಜೀವ್ ಪಿಳ್ಳೈ, ಯೋಗೇಶ್, ಸನ್ಯಾ ಅಯ್ಯರ್ ಮತ್ತು ಸಂಪತ್ ಮೈತ್ರೇಯ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಗೌರಿ ಚಿತ್ರವು ಶೀಘ್ರದಲ್ಲೇ Sun NXTಯಲ್ಲಿ ಬಿಡುಗಡೆಯಾಗಲಿದೆ. OTTಯಲ್ಲಿ ಚಿತ್ರದ ಅಧಿಕೃತ ಬಿಡುಗಡೆ ದಿನಾಂಕ ಇನ್ನಷ್ಟೇ ಘೋಷಣೆಯಾಗಬೇಕಾಗಿದೆ.