ಟ್ರಕ್‌ನಲ್ಲಿ ಹಸುವಿನ ದೇಹದ ಭಾಗಗಳು; ಪ್ರಧಾನಿ ಮೋದಿಗೆ ವಿಡಿಯೋ ಟ್ಯಾಗ್‌ ಮಾಡಿದ ಐಂದ್ರಿತಾ ರೇ
Sep 06, 2023 10:04 PM IST
Share
ಹಸುವಿನ ದೇಹದ ಭಾಗಗಳನ್ನು ಸಾಗಿಸುತ್ತಿದ್ದ ಟ್ರಕ್‌ ವಿಡಿಯೊವನ್ನು ಪ್ರಧಾನಿ ಮೋದಿಗೆ ಟ್ಯಾಗ್‌ ಮಾಡಿದ ಐಂದ್ರಿತಾ
ಬೆಂಗಳೂರಿನಲ್ಲಿ ಟ್ರಕ್‌ ಒಂದರಲ್ಲಿ ಗೋವಿನ ದೇಹದ ಭಾಗಗಳು ಕಂಡು ಬಂದಿದೆ. ಇದಕ್ಕೆ ಸಂಬಂಧಿಸಿದ ವಿಡಿಯೋವೊಂದು ಸೋಷಿಯಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಹಸುವಿನ ದೇಹದ ಭಾಗಗಳ ಮೇಲೆ ಬಿಳಿ ಬಟ್ಟೆ ಮುಚ್ಚಲಾಗಿದೆ.
ಸ್ಯಾಂಡಲ್ವುಡ್ ನಟಿ ಐಂದ್ರಿತಾ ರೇ, ನಟನೆಯ ಜೊತೆ ಜೊತೆಗೆ ತಮ್ಮ ಸಾಮಾಜಿಕ ಕಾಳಜಿಯಿಂದ ಕೂಡಾ ಕನ್ನಡಿಗರ ಮನ ಗೆದ್ದಿರುವ ಹುಡುಗಿ. ಪಶ್ಚಿಮ ಬಂಗಾಳಕ್ಕೆ ಸೇರಿದ ಈ ಸುಂದರಿ ದಿಗಂತ್ ಅವರನ್ನು ಪ್ರೀತಿಸಿ ಮದುವೆಯಾಗಿ ಈಗ ಅಪ್ಪಟ ಕನ್ನಡತಿಯೇ ಆಗಿದ್ದಾರೆ. ಈ ನಡುವೆ ಐಂದ್ರಿತಾ ಮಾಡಿರುವ ಟ್ವೀಟ್‌ ಒಂದು ಗಮನ ಸೆಳೆದಿದೆ.
ಟ್ರಕ್‌ನಲ್ಲಿ ಗೋವಿನ ದೇಹದ ಭಾಗಗಳು
ಕೇಂದ್ರ ಸರ್ಕಾರ ಭಾರತದಲ್ಲಿ ಗೋಹತ್ಯೆ ನಿಷೇಧ ಕಾಯ್ದೆಯನ್ನು ಜಾರಿಗೆ ತಂದಿದ್ದರೂ ಕೆಲವರು ಯಾವುದೇ ಭಯ ಇಲ್ಲದೆ ಹಸುಗಳನ್ನು, ಎಮ್ಮೆಗಳನ್ನು ಹತ್ಯೆ ಮಾಡುತ್ತಿದ್ದಾರೆ. ಇಂಥದ್ದೇ ಒಂದು ಪ್ರಕರಣ ಬೆಂಗಳೂರಿನಲ್ಲಿ ನಡೆದಿದೆ. ಬೆಂಗಳೂರಿನಲ್ಲಿ ಟ್ರಕ್‌ ಒಂದರಲ್ಲಿ ಗೋವಿನ ದೇಹದ ಭಾಗಗಳು ಕಂಡು ಬಂದಿದೆ. ಇದಕ್ಕೆ ಸಂಬಂಧಿಸಿದ ವಿಡಿಯೋವೊಂದು ಸೋಷಿಯಲ್‌ ಮೀಡಿಯಾದಲ್ಲಿ ಹರಿದಾಡುತ್ತಿದೆ. ಹಸುವಿನ ದೇಹದ ಭಾಗಗಳ ಮೇಲೆ ಬಿಳಿ ಬಟ್ಟೆ ಮುಚ್ಚಲಾಗಿದೆ. ಈ ವಿಡಿಯೋವನ್ನು ಐಂದ್ರಿತಾ ರೇ ಕೂಡಾ ತಮ್ಮ ಟ್ವಿಟ್ಟರ್‌ನಲ್ಲಿ ಹಂಚಿಕೊಂಡು ಈ ವಿಚಾರದ ಬಗ್ಗೆ ಪ್ರಧಾನಿ ನರೇಂದ್ರ ಮೋದಿ ಗಮನ ಸೆಳೆಯಲು ಪ್ರಯತ್ನಿಸಿದ್ದಾರೆ.
''ಕಳೆದ ರಾತ್ರಿ ಬೆಂಗಳೂರಿನಲ್ಲಿ ಒಂದು ಟ್ರಕ್‌ನಲ್ಲಿ ಹಸುಗಳ ದೇಹದ ಭಾಗಗಳಂತೆ ಕಂಡು ಬಂದ ವಸ್ತುಗಳು ಕಂಡು ಬಂದಿದೆ. ಸದ್ಯಕ್ಕೆ ಈ ವಾಹನ ಬೊಮ್ಮನಹಳ್ಳಿಯಲ್ಲಿದೆ. ಆದರೆ ಪೊಲೀಸರು ಇದರ ಬಗ್ಗೆ ಕ್ರಮ ಕೈಗೊಳ್ಳುತ್ತಿಲ್ಲ, ಕನಿಷ್ಠ ದೂರು ಸ್ವೀಕರಿಸಿ ಎಫ್‌ಐಆರ್‌ ದಾಖಲಿಸಿಕೊಳ್ಳಲು ಹಿಂಜರಿಯುತ್ತಿದ್ದಾರೆ'' ಎಂದು ಐಂದ್ರಿತಾ ಬೇಸರ ವ್ಯಕ್ತಪಡಿಸಿದ್ದಾರೆ. ಜೊತೆಗೆ ತಮ್ಮ ಪೋಸ್ಟನ್ನು ಬೆಂಗಳೂರು ಪೊಲೀಸ್‌, ಡಿಸಿಪಿ, ನರೇಂದ್ರ ಮೋದಿಯವರ ಟ್ವಿಟ್ಟರ್‌ಗೆ ಟ್ಯಾಗ್‌ ಮಾಡಿದ್ದಾರೆ.
ಐಂದ್ರಿತಾ ಕಾರ್ಯಕ್ಕೆ ಮೆಚ್ಚುಗೆ
ಐಂದ್ರಿತಾ ಕಾರ್ಯಕ್ಕೆ ಸೋಷಿಯಲ್‌ ಮೀಡಿಯಾದಲ್ಲಿ ಪ್ರಶಂಸೆ ವ್ಯಕ್ತವಾಗುತ್ತಿದೆ. ನಿಮ್ಮ ಸಾಮಾಜಿಕ ಕಾಳಜಿಯನ್ನು ಮೆಚ್ಚಲೇಬೇಕು. ಒಬ್ಬ ಸೆಲೆಬ್ರಿಟಿಯಾಗಿ ಸಮಾಜದ ಮೇಲೆ, ಪ್ರಾಣಿಗಳ ಮೇಲೆ ನಿಮಗಿರುವ ಪ್ರೀತಿ ಕಂಡು ಖುಷಿಯಾಗುತ್ತಿದೆ ಎಂದು ನೆಟಿಜನ್ಸ್‌ ಕಾಮೆಂಟ್‌ ಮಾಡುತ್ತಿದ್ದಾರೆ. ಐಂದ್ರಿತಾ ಪೋಸ್ಟ್‌ ಪ್ರಧಾನಿ ನರೇಂದ್ರ ಮೋದಿ ಅವರ ಗಮನ ಸೆಳೆಯಲಿದೆಯಾ? ಪೊಲೀಸರಿಗೆ ಕ್ರಮ ತೆಗೆದುಕೊಳ್ಳಲು ಸೂಚಿಸಲಿದ್ದಾರಾ ಎಂಬುದನ್ನು ಕಾದು ನೋಡಬೇಕು.
2006ರಲ್ಲಿ ತೆರೆ ಕಂಡ 'ಜಾಕ್‌ಪಾಟ್‌' ಚಿತ್ರದಲ್ಲಿ ಅತಿಥಿ ಪಾತ್ರದಲ್ಲಿ ನಟಿಸುವ ಮೂಲಕ ಐಂದ್ರಿತಾ ಚಿತ್ರರಂಗಕ್ಕೆ ಬಂದರು. ನಂತರ 'ಮೆರವಣಿಗೆ' ಚಿತ್ರದ ಮೂಲಕ ಪೂರ್ಣ ಪ್ರಮಾಣದ ನಾಯಕಿಯಾದರು. ಜಂಗ್ಲಿ, ಮನಸಾರೆ, ವೀರಪರಂಪರೆ, ಪಾರಿತಾಜ, ಕಡ್ಡಿಪುಡಿ, ಚೌಕ, ಪ್ರೇಮಂ ಪೂಜ್ಯಂ, ಕ್ಷಮಿಸಿ ನಿಮ್ಮ ಖಾತೆಯಲ್ಲಿ ಹಣವಿಲ್ಲ ಸಿನಿಮಾಗಳಲ್ಲಿ ಐಂದ್ರಿತಾ ನಟಿಸಿದ್ದಾರೆ. 2022ರಲ್ಲಿ ತೆರೆ ಕಂಡ ತಿಮ್ಮಯ್ಯ & ತಿಮ್ಮಯ್ಯ ನಂತರ ಅವರು ಹೊಸ ಸಿನಿಮಾ ಅನೌನ್ಸ್‌ ಮಾಡಿಲ್ಲ.