ಯಶ್‌ ಸ್ಪೂರ್ತಿದಾಯಕ, ವಿರಾಟ್‌ ಕೊಹ್ಲಿ ಕಿಂಗ್‌, ಬಿ ಯುವರ್‌ ಸೆಲ್ಫ್‌ ನೀವು ನೀವಾಗಿಯೇ ಇರಿ ಎಂದು ಫ್ಯಾನ್ಸ್‌ಗೆ ಕಿಚ್ಚ ಸುದೀಪ್‌ ಸಲಹೆ

ಕಿಚ್ಚ ಸುದೀಪ್‌ ತನ್ನ ಅಭಿಮಾನಿಗಳ ಹಲವು ಪ್ರಶ್ನೆಗಳಿಗೆ ಉತ್ತರಿಸಿದ್ದಾರೆ. ಮ್ಯಾಕ್ಸ್‌ ಸಿನಿಮಾ ವಿಳಂಬವಾಗಿರುವುದಕ್ಕೆ ಕಾರಣ ತಿಳಿಸುತ್ತ ಸುದೀಪ್‌ "ನಾನು ವಿಮಾನ ಹತ್ತುವವರೆಗೆ ಸಮಯವಿದ್ದು, ನಿಮಗೆ ಪ್ರಶ್ನೆಗಳೇನಾದರೂ ಕೇಳುವುದಿದ್ದರೆ ಕೇಳಿ" ಎಂದು ಟ್ವೀಟ್‌ ಮಾಡಿದ್ದರು. ಇದಕ್ಕೆ ಪ್ರಶ್ನೆಗಳ ಸುರಿಮಳೆಯೇ ಆಗಿದ್ದು, ಸಾಕಷ್ಟು ಪ್ರಶ್ನೆಗಳಿಗೆ ಸುದೀಪ್‌ ಸಾವಧಾನವಾಗಿ ಉತ್ತರಿಸಿದ್ದಾರೆ. ಅಭಿಮಾನಿಗಳು ಕಿಚ್ಚ ಸುದೀಪ್‌ ವ್ಯಕ್ತಿತ್ವ, ಸ್ಪೂರ್ತಿದಾಯಕ ವ್ಯಕ್ತಿಗಳು, ಕ್ರೀಡೆ ಸೇರಿದಂತೆ ಹಲವು ವಿಷಯಗಳ ಕುರಿತು ಪ್ರಶ್ನೆಗಳನ್ನು ಕೇಳಿದ್ದಾರೆ. ಕಾಟೇರ ಸಿನಿಮಾ ಯಾವಾಗ ನೋಡ್ತಿರಿ ಎಂಬ ಪ್ರಶ್ನೆಗೆ "ನಾನು ನೋಡಿಲ್ಲ ಎಂದು ನಿಮಗ್ಯಾರು ಹೇಳಿದ್ದು?" ಎಂದು ಉತ್ತರಿಸಿದ್ದಾರೆ. ಕಿಚ್ಚ ಸುದೀಪ್‌ಗೆ ಅಭಿಮಾನಿಗಳು ಕೇಳಿದ ಪ್ರಶ್ನೆಗಳು ಮತ್ತು ಅದಕ್ಕೆ ಸುದೀಪ್‌ ನೀಡಿರುವ ಉತ್ತರಗಳನ್ನು ತಿಳಿಯೋಣ.

ಮ್ಯಾಕ್ಸ್‌ ಸಿನಿಮಾ ಬಿಡುಗಡೆ ಯಾವಾಗ?

ಸುದೀಪ್‌ ಇಂದು ಬೆಳಗ್ಗೆ ಮ್ಯಾಕ್ಸ್‌ ಸಿನಿಮಾದ ಅಪ್‌ಡೇಟ್‌ ನೀಡಿದ್ದಾರೆ. "ಸಂಕ್ರಾಂತಿ ಬಳಿಕ ಮ್ಯಾಕ್ಸ್‌ ಸಿನಿಮಾದ ಕ್ಲೈಮ್ಯಾಕ್ಸ್‌ ಶೂಟಿಂಗ್‌ ಮತ್ತೆ ಆರಂಭಿಸುತ್ತಿದ್ದೇವೆ. ಈಗಾಗಲೇ ಶೂಟಿಂಗ್‌ ಆಗಿರುವ ಎಲ್ಲಾ ದೃಶ್ಯಗಳಿಗೂ ಧ್ವನಿ ನೀಡಲಾಗಿದೆ. ಉಳಿದ ಭಾಗಗಳ ಚಿತ್ರೀಕರಣ ಮಾಡಲಾಗುತ್ತಿದೆ. ನವೆಂಬರ್‌ನಲ್ಲಿ ಮಳೆಯಿಂದಾಗಿ ಶೂಟಿಂಗ್‌ಗೆ ಅಡೆತಡೆ ಉಂಟಾಯಿತು. ಡಿಸೆಂಬರ್‌ನಲ್ಲೂ ಕೆಲವೊಂದು ತೊಂದರೆಗಳು ಉಂಟಾದವು. ಈಗ ಮತ್ತೆ ಶೂಟಿಂಗ್‌ಗೆ ತೆರಳುತ್ತಿದ್ದೇನೆ" ಎಂದು ಸುದೀಪ್‌ ಮಾಹಿತಿ ನೀಡಿದ್ದಾರೆ. ವಿಮಾನ ಬರೋದಕ್ಕೆ ಸ್ವಲ್ಪ ಸಮಯ ಇದೆ. ಫ್ಯಾನ್ಸ್‌ ಏನಾದರೂ ಪ್ರಶ್ನೆ ಕೇಳಬಹುದು ಎಂದು ಸುದೀಪ್‌ ಹೇಳಿದರು.

ಇದನ್ನು ಓದಿ: ಬಾಕ್ಸ್‌ ಆಫೀಸ್‌ನಲ್ಲಿ ಕಾಟೇರನಿಗೆ ಗೆಲುವು, ಇನ್ನೊಂದೆಡೆ ದರ್ಶನ್‌ ತಾಯಿ ಮೀನಾ ತೂಗುದೀಪಗೂ ಭರ್ಜರಿ ಜಯಭೇರಿ

ಕಿಚ್ಚ ಸುದೀಪ್‌ಗೆ ಪ್ರಶ್ನೆಗಳ ಸುರಿಮಳೆ

ಎಕ್ಸ್‌ನಲ್ಲಿ ಸುದೀಪ್‌ ಇಂದು ಅಭಿಮಾನಿಗಳ ಹಲವು ಪ್ರಶ್ನೆಗಳಿಗೆ ಉತ್ತರಿಸಿದ್ದಾರೆ. ಆಸ್ಕ್‌ ಕಿಚ್ಚ ಟ್ರೆಂಡಿಂಗ್‌ನಲ್ಲಿದ್ದು ಅಭಿಮಾನಿಗಳು ಕೇಳಿದ ಕೆಲವು ಪ್ರಶ್ನೆಗಳು ಮತ್ತು ಸುದೀಪ್‌ ನೀಡಿದ ಉತ್ತರಗಳು ಇಲ್ಲಿವೆ.

ಪ್ರಶ್ನೆ: ಭಾರತದ ಯಾವ ಕ್ರೀಡಾಪಟು ನಿಮಗೆ ಸ್ಪೂರ್ತಿದಾಯಕ

ಕಿಚ್ಚನ ಉತ್ತರ: ಎಲ್ಲರೂ.

ಪ್ರಶ್ನೆ: ವಿರಾಟ್‌ ಕೊಹ್ಲಿ ಕುರಿತು ಒಂದು ಪದದಲ್ಲಿ ಹೇಳಿ

ಕಿಚ್ಚನ ಉತ್ತರ: ಕಿಂಗ್‌

ಪ್ರಶ್ನೆ: ಬಾಸ್‌ ಯಾವಾಗಲೂ ನೀವು ಹೊಸಬರಿಗೆ ಬೆಂಬಲ ನೀಡುವಿರಿ, ಅಭಿಮಾನಿಗಳನ್ನು ಹೊರತುಪಡಿಸಿ ಬೇರೆ ಯಾರೂ ನಿಮ್ಮ ಜತೆ ನಿಲ್ಲುವುದಿಲ್ಲ. ನಿಮ್ಮ/ನಮ್ಮ ಸಿನಿಮಾ ಉದ್ಯಮದವರಿಂದಲೇ ತೊಂದರೆಗೆ ಒಳಗಾಗುತ್ತದೆ? ಇದಕ್ಕೆ ನಿಮ್ಮ ಉತ್ತರ

ಕಿಚ್ಚನ ಉತ್ತರ: ಎಲ್ಲರೂ ನನ್ನ ಸ್ನೇಹಿತರು. ನನ್ನನ್ನು ಯಾರು ಯಾವ ರೀತಿ ನಂಬುತ್ತಾರೋ ಆ ರೀತಿ ನಾನು ಮುಂದಕ್ಕೆ ಕೊಂಡೊಯ್ಯುವೆ.

ಪ್ರಶ್ನೆ: ನಿಮ್ಮ ಫಿಟ್ನೆಸ್‌ ಬಗ್ಗೆ ಎಲ್ಲರಿಗೂ ಗೊತ್ತು. ನೀವು ಯಾವ ಸ್ಮಾರ್ಟ್‌ ವಾಚ್‌, ಸ್ಮಾರ್ಟ್‌ ಬ್ಯಾಂಡ್‌ ಬಳಸ್ತಿರಿ?

ಕಿಚ್ಚನ ಉತ್ತರ: ಫಿಟ್ನೆಸ್‌ಗೆ ಸ್ಮಾರ್ಟ್‌ ವಾಚ್‌ಗಿಂತ ವರ್ಕೌಟ್‌ ಮಾಡುವುದು ಅಗತ್ಯ.

ಪ್ರಶ್ನೆ: ನಿಮ್ಮ ಪ್ರಮುಖ ಸ್ಟ್ರೆಂಥ್‌ ಏನು?

ಉತ್ತರ: ನೀವೆಲ್ಲ ನನ್ನ ಮೇಲೆ ಇಟ್ಟ ಪ್ರೀತಿ ಮತ್ತು ನಂಬಿಕೆ.

ಪ್ರಶ್ನೆ: ಯಶ್‌ ಸರ್‌ ಬಗ್ಗೆ ಕೆಲವು ಪದಗಳನ್ನು ಹೇಳಿ

ಉತ್ತರ: ಸ್ಫೂರ್ತಿದಾಯಕ.

ಪ್ರಶ್ನೆ: ನೀವು ನನಗೆ ರೋಲ್‌ ಮಾಡೆಲ್‌. ನಿಮ್ಮ ಸ್ಟೈಲ್‌, ಆಟಿಟ್ಯೂಡ್‌ ಅನುಸರಿಸುವೆ. ನನಗೆ ನಿಮ್ಮ ಸಲಹೆ ಏನು?

ಉತ್ತರ: ಬಿ ಯುವರ್‌ಸೆಲ್ಫ್‌. ನಿಮ್ಮತನ ಹೊಂದಿರಿ.

ಪ್ರಶ್ನೆ: ತಳಪತಿ ವಿಜಯ್‌ ಕುರಿತು ಒಂದು ಪದದಲ್ಲಿ ಹೇಳಿ.

ಉತ್ತರ: ಫೋಕಸ್ಡ್‌

ಪ್ರಶ್ನೆ: ಪ್ರತಿದಿನ ನಿಮ್ಮನ್ನು ನೀವು ಹೇಗೆ ಮೋಟಿವೇಟ್‌ ಮಾಡಿಕೊಳ್ಳುವಿರಿ?

ಉತ್ತರ: ಈ ರಹಸ್ಯವನ್ನು ನೀವೇ ಕ್ರ್ಯಾಕ್‌ ಮಾಡಿ.

ಪ್ರಶ್ನೆ: ಸಲ್ಮಾನ್‌ ಖಾನ್‌ ಬಗ್‌ಗೆ ಒಂದು ಪದದಲ್ಲಿ ಹೇಳಿ.

ಉತ್ತರ: ಹಮಾರ ಬಾಯ್‌, ಹಮಾರ ಜಾನ್‌.

ಪ್ರಶ್ನೆ: ಅಲ್ಲು ಅರ್ಜುನ್‌ ಬಗ್ಗೆ ಹೇಳಿ

ಉತ್ತರ: ಮಿಸ್ಟರ್‌ ಪರ್ಫೆಕ್ಟ್‌.

ಪ್ರಶ್ನೆ: ರಾಜಮೌಳಿ ಈಗಲೂ ನಿಮ್ಮ ಫೇವರೆಟ್‌ ನಿರ್ದೇಶಕರ?

ಉತ್ತರ: ಅವರು ಎಲ್ಲಾ ಸಿನಿಮಾ ಪ್ರೇಮಿಗಳಿಗೆ ಅಚ್ಚುಮೆಚ್ಚು.

ಪ್ರಶ್ನೆ: ಮಹೇಶ್‌ ಪ್ರಭು ಬಗ್ಗೆ ಒಂದು ಪದದಲ್ಲಿ ಹೇಳಿ.

ಉತ್ತರ: ಪ್ರಿನ್ಸ್‌.

ಇದು ಕಿಚ್ಚ ಸುದೀಪ್‌ಗೆ ಅಭಿಮಾನಿಗಳು ಕೇಳಿರುವ ಕೆಲವು ಪ್ರಶ್ನೆಗಳು ಮತ್ತು ಸುದೀಪ್‌ ನೀಡಿರುವ ಉತ್ತರಗಳ ಸ್ಯಾಂಪಲ್‌ ಅಷ್ಟೇ. ಇದೇ ಸಮಯದಲ್ಲಿ ಅಭಿಮಾನಿಯೊಬ್ಬರು "ಕಾಟೇರ ಯಾವಾಗ ನೋಡ್ತೀರ ಸರ್‌" ಎಂದು ಪ್ರಶ್ನೆ ಕೇಳಿದ್ದರು. "ನಾನು ಈಗಾಗಲೇ ನೋಡಿಲ್ಲ ಎಂದು ನಿಮಗೆ ಯಾರಾದರೂ ಹೇಳಿದ್ದಾರೆಯೇ?" ಎಂದು ಈ ಪ್ರಶ್ನೆಗೆ ಮರುಪ್ರಶ್ನೆಯ ರೂಪದಲ್ಲಿ ಸುದೀಪ್‌ ಉತ್ತರ ನೀಡಿದ್ದಾರೆ. ಕಾಟೇರ ಕುರಿತು ದರ್ಶನ್‌ ಉತ್ತರ ತಿಳಿಯಲು ಇಲ್ಲಿ ಕ್ಲಿಕ್‌ ಮಾಡಿ.