ಒಟಿಟಿಯಲ್ಲಿ ರಿಲೀಸ್‌ ಆಯ್ತು ಡಾರ್ಲಿಂಗ್‌ ಕೃಷ್ಣ ಅಭಿನಯದ ಕೌಸಲ್ಯಾ ಸುಪ್ರಜಾ ರಾಮ

ಡಾರ್ಲಿಂಗ್‌ ಕೃಷ್ಣ ನಾಯಕನ ಪಾತ್ರದಲ್ಲಿ ನಟಿಸಿರುವ 'ಕೌಸಲ್ಯಾ ಸುಪ್ರಜಾ ರಾಮ' ಸಿನಿಮಾ 28 ಜುಲೈನಲ್ಲಿ ಚಿತ್ರಮಂದಿರಗಳಲ್ಲಿ ರಿಲೀಸ್‌ ಆಗಿತ್ತು. ಥಿಯೇಟರ್‌ಗಳಲ್ಲಿ ಬಿಡುಗಡೆ ಆಗಿ 48 ದಿನಗಳ ನಂತರ ಒಟಿಟಿಯಲ್ಲಿ ಸ್ಟ್ರೀಮ್‌ ಆಗುತ್ತಿದೆ. ಚಿತ್ರಮಂದಿರದಲ್ಲಿ ಸಿನಿಮಾವನ್ನು ಮಿಸ್‌ ಮಾಡಿಕೊಂಡವರು ಮನೆಯಲ್ಲೇ ಸಿನಿಮಾ ನೋಡಿದ್ದಾರೆ.

ಸಿನಿಮಾಗೆ ಉತ್ತಮ ಪ್ರತಿಕ್ರಿಯೆ

'ಕೌಸಲ್ಯಾ ಸುಪ್ರಜಾ ರಾಮ' ಸಿನಿಮಾಗೆ ಸಿನಿಪ್ರಿಯರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿತ್ತು. ನಾನು ಗಂಡು, ಹೆಣ್ಣಿನ ಮುಂದೆ ತಲೆ ಬಾಗಬಾರದು, ಯಾವುದೇ ಹೆಣ್ಣು ನನ್ನ ಮೇಲೆ ಅಧಿಕಾರ ಚಲಾಯಿಸಬಾರದು, ಹೆಣ್ಣು ಪುರುಷನ ಅಡಿಯಾಳು ಎಂದು ಬಾಲ್ಯದಿಂದಲೇ ಅಹಂನಿಂದ ಬೆಳೆಯುವ ನಾಯಕ ರಾಮ್‌ ಹಾಗೂ ಇತರ ಪಾತ್ರಗಳ ಸುತ್ತುವ ಕಥೆ ಇದು. ರಾಮ್‌, ಕಾಲೇಜಿನಲ್ಲಿ ಶಿವಾನಿ ಎಂಬ ಯುವತಿಯ ಪ್ರೀತಿಯ ಬಲೆಯಲ್ಲಿ ಬೀಳುತ್ತಾನೆ. ಆರಂಭದಲ್ಲಿ ಎಲ್ಲವೂ ಸರಿ ಇರುತ್ತದೆ. ಆದರೆ ಕ್ರಮೇಣ ರಾಮ್‌ ಶಿವಾನಿಯ ಮೇಲೂ ದರ್ಪ ತೋರಲು ಆರಂಭಿಸುತ್ತಾನೆ. ಇದರಿಂದ ಶಿವಾನಿಗೆ ನೋವಾಗಿ ಆತನನ್ನು ಬಿಟ್ಟು ಹೋಗುತ್ತಾಳೆ. ನಂತರ ರಾಮ್‌ ಮತ್ತೊಂದು ಹುಡುಗಿಯನ್ನು ಮದುವೆ ಆಗುತ್ತಾನೆ. ಆಕೆಯ ಮೇಲೂ ರಾಮ್‌ ಅದೇ ರೀತಿ ದರ್ಪ ತೋರಿಸುತ್ತಾನಾ? ಅಥವಾ, ಗಂಡಾಗಲೀ ಹೆಣ್ಣಾಗಲೀ ಸರಿ ಸಮಾನರು ಎಂಬ ನೀತಿ ಪಾಠ ಕಲಿಯುತ್ತಾನಾ? ಎನ್ನುವುದನ್ನು ನೀವು ಸಿನಿಮಾದಲ್ಲಿ ನೋಡಬೇಕು.

ಕೃಷ್ಣ ಮಿಲನಾ ಜೊತೆಯಾಗಿ ನಟಿಸಿರುವ 6ನೇ ಸಿನಿಮಾ

ಚಿತ್ರದಲ್ಲಿ ಡಾರ್ಲಿಂಗ್‌ ಕೃಷ್ಣ ರಾಮ್‌ ಪಾತ್ರದಲ್ಲಿ ಬೃಂದಾ ಆಚಾರ್ಯ ಶಿವಾನಿಯಾಗಿ, ಮಿಲನಾ ನಾಗರಾಜ್‌ ರಾಮ್‌ ಪತ್ನಿ ಮುತ್ತುಲಕ್ಷ್ಮಿ ಆಗಿ ನಟಿಸಿದ್ದಾರೆ. ಉಳಿದಂತೆ ರಾಮ್‌ ತಂದೆ ಸಿದ್ದೇಗೌಡನ ಪಾತ್ರದಲ್ಲಿ ರಂಗಾಯಣ ರಘು, ತಾಯಿ ಕೌಸಲ್ಯಾ ಪಾತ್ರದಲ್ಲಿ ಸುಧಾ ಬೆಳವಾಡಿ ನಟಿಸಿದ್ದಾರೆ. ಅಚ್ಯುತ್‌ ಕುಮಾರ್‌, ನಾಗಭೂಷಣ್‌ ಕೂಡಾ ಚಿತ್ರದಲ್ಲಿದ್ದಾರೆ. ಈ ಚಿತ್ರದ ಮೂಲಕ ಮಿಲನಾ ನಾಗರಾಜ್‌ ಹಾಗೂ ಡಾರ್ಲಿಂಗ್‌ ಕೃಷ್ಣ 6ನೇ ಬಾರಿಗೆ ತೆರೆ ಮೇಲೆ ಜೋಡಿ ಆಗಿ ನಟಿಸಿದ್ದಾರೆ.

ಶಶಾಂಕ್‌ ನಿರ್ಮಿಸಿ ನಿರ್ದೇಶನ ಮಾಡಿರುವ 'ಕೌಸಲ್ಯಾ ಸುಪ್ರಜಾ ರಾಮ'

'ಕೌಸಲ್ಯಾ ಸುಪ್ರಜಾ ರಾಮ' ಚಿತ್ರವನ್ನು ಕೌರವ ಪ್ರೊಡಕ್ಷನ್‌ ಹೌಸ್‌, ಶಶಾಂಕ್‌ ಸಿನಿಮಾಸ್‌ ಬ್ಯಾನರ್‌ ಅಡಿ ಶಶಾಂಕ್‌ ನಿರ್ಮಿಸಿ, ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಹಾಡುಗಳಿಗೆ ಅರ್ಜುನ್‌ ಜನ್ಯಾ ಸಂಗೀತ ನೀಡಿದ್ದಾರೆ. ಸಿನಿಮಾ ಅಮೆಜಾನ್‌ ಪ್ರೈಂ ಒಟಿಟಿಯಲ್ಲಿ ಲಭ್ಯವಿದೆ. ಇನ್ನೂ ಸಿನಿಮಾ ನೋಡಿರದವರು ಒಟಿಟಿಯಲ್ಲಿ ನೋಡಬಹುದು.

ಇದನ್ನೂ ಓದಿ: ಕೋಟಿಗೊಬ್ಬ ಶೂಟಿಂಗ್‌ ವೇಳೆ ನಡೆದ ಘಟನೆ; ವಿಷ್ಣುವರ್ಧನ್‌ ಕಾಲಿಗೆ ನಮಸ್ಕರಿಸಿದ್ದ ಹಫ್ತಾ ವಸೂಲಿಗೆ ಬಂದ ರೌಡಿ

ಇದನ್ನೂ ಓದಿ: ಸಿನಿಮಾಗಳಲ್ಲೂ ದೇವ ಗಣಪತಿಗಿದೇ ವಿಶೇಷ ಸ್ಥಾನ; ಈ ಸಲದ ಚೌತಿಗೆ ಕೇಳಿ ಗಣಪನ 10 ಹಾಡುಗಳು

ಇನ್ನಷ್ಟು ಮನರಂಜನೆ ಸುದ್ದಿಗೆ ಈ ಲಿಂಕ್‌ ಕ್ಲಿಕ್‌ ಮಾಡಿ