ಕಾಟೇರ ಸಿನಿಮಾದ ಫಸ್ಟ್‌ ಶೋ ಟಿಕೆಟ್‌ಗಳು ಸೋಲ್ಡೌಟ್‌; ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಸಿನಿಮಾ ಬಿಡುಗಡೆಗೆ ಮುನ್ನವೇ ಹೌಸ್‌ಫುಲ್‌
Dec 25, 2023 05:32 PM IST
Share
ಕಾಟೇರ ಸಿನಿಮಾದ ಫಸ್ಟ್‌ ಶೋ ಟಿಕೆಟ್‌ಗಳು ಸೋಲ್ಡೌಟ್‌
- Kateera Kannada Movie: ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ನಟನೆಯ ಕಾಟೇರ ಸಿನಿಮಾ ಬಿಡುಗಡೆಗೆ ದಿನಗಣನೆ ಆರಂಭವಾಗಿದೆ. ಬುಕ್‌ಮೈಶೋ ಸೇರಿದಂತೆ ಟಿಕೆಟ್‌ ಬುಕ್ಕಿಂಗ್‌ ಮಾಡುವ ಆನ್‌ಲೈನ್‌ ತಾಣಗಳಲ್ಲಿ ಈಗಾಗಲೇ ಸೀಟು ಖಾಲಿ ಇಲ್ಲ ಎಂಬ ಸಂದೇಶಗಳು ಕಾಣಿಸುತ್ತಿವೆ.
ಬೆಂಗಳೂರು: ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ನಟನೆಯ ಈ ವರ್ಷದ ಬಹುನಿರೀಕ್ಷಿತ ಸಿನಿಮಾ ಇದೇ ಡಿಸೆಂಬರ್‌ 29ರಂದು ಬಿಡುಗಡೆಯಾಗಲಿದೆ. ಈ ಸಿನಿಮಾ ಬಿಡುಗಡೆಗೆ ಮುನ್ನವೇ ಹೌಸ್‌ಫುಲ್‌ ಆಗಿದೆ. ಶುಕ್ರವಾರ ಬೆಳಗ್ಗೆ 5 ಗಂಟೆಯಿಂದಲೇ ಕಾಟೇರ ಸಿನಿಮಾ ಪ್ರದರ್ಶನ ಆರಂಭವಾಗಲಿದೆ. ಸದ್ಯ ಆನ್‌ಲೈನ್‌ನಲ್ಲಿ ಸಿನಿಮಾದ ಪ್ರಿಟಿಕೆಟ್‌ ಬುಕ್ಕಿಂಗ್‌ ಅವಕಾಶ ದೊರಕಿರುವುದರಿಂದ ಡಿಬಾಸ್‌ ಅಭಿಮಾನಿಗಳು ಕಾಟೇರ ಸಿನಿಮಾದ ಟಿಕೆಟ್‌ ಬುಕ್ಕಿಂಗ್‌ಗೆ ಮುಗಿ ಬೀಳುತ್ತಿದ್ದಾರೆ. ಬಹುತೇಕ ಎಲ್ಲಾ ಥಿಯೇಟರ್‌ಗಳಲ್ಲಿ, ಮಲ್ಟಿಪ್ಲೆಕ್ಸ್‌ಗಳಲ್ಲಿ ಕಾಟೇರ ಸಿನಿಮಾದ ಟಿಕೆಟ್‌ಗಳು ಸೋಲ್ಡೌಟ್‌ ಆಗಿದೆ. ಕೆಲವೊಂದು ಥಿಯೇಟರ್‌ಗಳಲ್ಲಿ ಬೆಳಗ್ಗಿನ ಪ್ರದರ್ಶನದ ಮೊದಲ ಸಾಲಿನ ಹತ್ತಿಪ್ಪತ್ತು ಟಿಕೆಟ್‌ಗಳು ಖಾಲಿ ಉಳಿದಿದ್ದು, ಸದ್ಯದಲ್ಲಿ ಅದೂ ಫಿಲ್‌ ಆಗೋ ಸೂಚನೆಯಿದೆ.
ವಿಶೇಷವಾಗಿ ಬೆಂಗಳೂರಿನ ಬಹುತೇಕ ಚಿತ್ರಮಂದಿರಗಳಲ್ಲಿ ಡಿಬಾಸ್‌ ಸಿನಿಮಾದ ಟಿಕೆಟ್‌ಗಳು ಸೋಲ್ಡೌಟ್‌ ಆಗಿವೆ. ಬೆಂಗಳೂರಿನ ವೈಭವಿ ಚಿತ್ರಮಂದಿರ, ಮೋಹನ್‌ ಚಿತ್ರಮಂದಿರ, ಪ್ರಸನ್ನ ಥಿಯೇಟರ್‌, ಅನುಪಮಾ ಥಿಯೇಟರ್‌ಗಳಲ್ಲಿ ಬಹುತೇಕ ಸೀಟುಗಳು ಸೋಲ್ಡೌಟ್‌ ಆಗಿವೆ. ಈ ಕುರಿತು ಡಿಬಾಸ್‌ ಅಭಿಮಾನಿಗಳು ಸೋಷಿಯಲ್‌ ಮೀಡಿಯಾದಲ್ಲಿ ಖುಷಿ ಪಡುತ್ತಿದ್ದಾರೆ.
ಈ ಕುರಿತು ಹಿಂದೂಸ್ತಾನ್ ಟೈಮ್ಸ್ ಕನ್ನಡ ರಿಯಾಲಿಟಿ ಚೆಕ್‌ ನಡೆಸಿದೆ. ಶುಕ್ರವಾರದ ಫಸ್ಟ್‌ ಡೇ ಶೋಗಳಿಗೆ ಬುಕ್‌ ಮೈ ಶೋನಲ್ಲಿ ಗಿರಿನಗರದ ಶ್ರೀ ವೆಂಕಟೇಶ್ವರ ಥಿಯೇಟರ್‌ನಲ್ಲಿ ಬೆಳಗ್ಗೆ 6 ಗಂಟೆಯ ಶೋ ಆಲ್‌ಮೋಸ್ಟ್‌ ಸೋಲ್ಡೌಟ್‌ ಆಗಿದೆ. ಉಳಿದ ಶೋಗಳಿಗೆ ಕೆಲವು ಸೀಟುಗಳು ಲಭ್ಯ ಇವೆ. ಬನಶಂಕರಿಯ ಕಾಮಕ್ಯ ಥಿಯೇಟರ್‌ನಲ್ಲಿ ಈ ಸುದ್ದಿ ಬರೆಯುವ ಸಮಯದಲ್ಲಿ ಫಸ್ಟ್‌ ಶೋದ ಬಹುತೇಕ ಟಿಕೆಟ್‌ಗಳು ಸೋಲ್ಡೌಟ್‌ ಆಗಿದ್ದವು. ಬೆಳಗ್ಗೆ 8.15 ಗಂಟೆಯ ಶೋಗೆ ಸಾಕಷ್ಟು ಟಿಕೆಟ್‌ಗಳು ಲಭ್ಯ ಇದ್ದವು.
ಮೈಸೂರು ರಸ್ತೆಯ ಗೋಪಾಲನ್‌ ಸಿನಿಮಾಸ್‌ನ ಬಹುತೇಕ ಟಿಕೆಟ್‌ಗಳು ಸೋಲ್ಡೌಟ್‌ ಆಗಿವೆ. ತಾವರೆಕೆರೆಯ ಲಕ್ಷ್ಮಿ ಸಿನಿಮಾದಲ್ಲಿ ರಾತ್ರಿ 12.6 ಗಂಟೆಯ, ಬೆಳಗ್ಗೆ 3.30 ಗಂಟೆಯ ಮತ್ತು 6.30 ಗಂಟೆಯ ಶೋಗಳು ಬಹುತೇಕ ಭರ್ತಿಯಾಗಿವೆ. ಒಂದೆರಡು ಮುಂದಿನ ಸಾಲಿನ ಸೀಟುಗಳು ಮಾತ್ರ ಖಾಲಿ ಉಳಿದಿವೆ. ಜಾಲಹಳ್ಳಿಯ ರಾಕ್‌ಲೈನ್‌ ಸಿನಿಮಾಸ್‌ನ ಬೆಳಗ್ಗಿನ ಶೋಗಳು ಫಿಲ್ಲಿಂಗ್‌ ಫಾಸ್ಟ್‌ ಬೋರ್ಡ್‌ ಹಾಕಿವೆ.
ಬಹುತೇಕ ಚಿತ್ರಮಂದಿರಗಳಲ್ಲಿ ಬೆಳಗ್ಗಿನ ಶೋಗಳು ಭರ್ತಿಯಾಗಿವೆ. ಆದರೆ, ಸಾಕಷ್ಟು ಸಿನಿಮಾ ಮಂದಿರಗಳಲ್ಲಿ ಒಂದಿಷ್ಟು ಸೀಟುಗಳಿವೆ. ಸದ್ಯ ಕಾಟೇರ ಹವಾ ಆರಂಭವಾಗಿದ್ದು, ಇನ್ನು ಒಂದೆರಡು ದಿನಗಳಲ್ಲಿ ಎಲ್ಲಾ ಸೀಟುಗಳು ಭರ್ತಿಯಾದರೆ ಅಚ್ಚರಿಯಿಲ್ಲ. ಬೆಂಗಳೂರು ಮಾತ್ರವಲ್ಲದೆ ಮಂಡ್ಯ, ತುಮಕೂರು ಸೇರಿದಂತೆ ಹಲವು ಕಡೆಗಳಲ್ಲಿ ಫಸ್ಟ್‌ ಶೋಗಳು ಭರ್ತಿಯಾದ ಕುರಿತು ಟ್ವಿಟ್ಟರ್‌ನಲ್ಲಿ ಟ್ರೆಂಡ್‌ ಆಗುತ್ತಿದೆ.
ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಅಭಿನಯದ ಕಾಟೇರ ಸಿನಿಮಾ ಡಿಸೆಂಬರ್‌ 29ರಂದು ಬಿಡುಗಡೆಯಾಗಲಿದೆ. ಈ ಸಿನಿಮಾದ ಟಿಕೆಟ್‌ ಪ್ರಿಬುಕ್ಕಿಂಗ್‌ ಅವಕಾಶವನ್ನು ಮೊನ್ನೆ ಶನಿವಾರವೇ ಆರಂಭಿಸಲಾಗಿತ್ತು. ಈ ಚಿತ್ರದಲ್ಲಿ ದರ್ಶನ್‌ ಜೋಡಯಾಗಿ ಕನ್ನಡದ ಸೂಪರ್‌ಸ್ಟಾರ್‌ ನಟಿ ಮಾಲಾಶ್ರೀ ಮಗಳು ಆರಾಧನಾ ರಾಮ್‌ ನಾಯಕಿ. ರಾಕ್‌ಲೈನ್‌ ಪ್ರೊಡಕ್ಷನ್‌ನಲ್ಲಿ ಕಾಟೇರ ಸಿನಿಮಾ ನಿರ್ಮಾಣವಾಗಿದೆ.
ಕಾಟೇರ ಸಿನಿಮಾ ಬಿಡುಗಡೆಗೆ ದಿನಗಣನೆ ಆರಂಭವಾಗಿದೆ. ಆ ಹಿನ್ನೆಲೆಯಲ್ಲಿ ಭರ್ಜರಿ ಪ್ರಮೋಷನ್‌ ಕೆಲಸದಲ್ಲೂ ಚಿತ್ರತಂಡ ತೊಡಗಿಸಿಕೊಂಡಿದೆ. ಈ ನಡುವೆ ಹುಬ್ಬಳ್ಳಿಯ ಬಳಿಕ, ಮಂಡ್ಯದಲ್ಲಿಯೂ ಅದ್ಧೂರಿ ಕಾರ್ಯಕ್ರಮ ಆಯೋಜಿಸಿತ್ತು ಕಾಟೇರ ಬಳಗ. ಈ ಕುರಿತು ಚಿತ್ರ ಮಾಹಿತಿ ಓದಲು ಮುಂದಿನ ಲಿಂಕ್‌ ಕ್ಲಿಕ್‌ ಮಾಡಿ.