Shiva Rajkumar: ಜೈಲರ್‌ ಗೆಲ್ಲುತ್ತಿದ್ದಂತೆ ಶಿವಣ್ಣನ ಘೋಸ್ಟ್ ಚಿತ್ರಕ್ಕೆ ತಮಿಳುನಾಡಿನಲ್ಲಿ ರೆಡ್‌ ಕಾರ್ಪೆಟ್‌ ಸ್ವಾಗತ
Aug 11, 2023 12:55 PM IST
Share
Shiva Rajkumar: ಜೈಲರ್‌ ಗೆಲ್ಲುತ್ತಿದ್ದಂತೆ ಶಿವಣ್ಣನ ಘೋಸ್ಟ್ ಚಿತ್ರಕ್ಕೆ ತಮಿಳುನಾಡಿನಲ್ಲಿ ರೆಡ್‌ ಕಾರ್ಪೆಟ್‌ ಸ್ವಾಗತ
- ಶ್ರೀನಿ ನಿರ್ದೇಶನದ ಘೋಸ್ಟ್ ಚಿತ್ರದ ಶೂಟಿಂಗ್‌ ಮುಗಿದಿದೆ. ಚಿತ್ರತಂಡ ಕುಂಬಳಕಾಯಿ ಒಡೆದು ಪ್ರಚಾರ ಕೆಲಸಕ್ಕೆ ಅಣಿಯಾಗುತ್ತಿದೆ. ಈ ನಡುವೆ ರಜನಿಕಾಂತ್‌ ಜತೆಗಿನ ಶಿವಣ್ಣನ ಜೈಲರ್‌ ಸಿನಿಮಾ ಹಿಟ್‌ ಆಗಿದ್ದೇ ತಡ, ತಮಿಳುನಾಡಿನಲ್ಲೂ ಶಿವರಾಜ್‌ಕುಮಾರ್‌ ಸಿನಿಮಾಕ್ಕೆ ಬೇಡಿಕೆ ಹೆಚ್ಚಾಗಿದೆ.
Shiva Rajkumar: ಸೆಂಚುರಿ ಸ್ಟಾರ್‌ ಶಿವರಾಜ್‌ಕುಮಾರ್‌ ಸದ್ಯ ಟ್ರೆಂಡಿಂಗ್‌ನಲ್ಲಿದ್ದಾರೆ. ರಜಿನಿಕಾಂತ್‌ ಜತೆಗಿನ ಜೈಲರ್‌ ಸಿನಿಮಾ ರಿಲೀಸ್‌ ಆಗಿದ್ದೇ ಬಂತು, ಸೋಷಿಯಲ್‌ ಮೀಡಿಯಾದಲ್ಲಿ ಶಿವಣ್ಣನದ್ದೇ ಹವಾ. ಜೈಲರ್‌ ಸಿನಿಮಾದಲ್ಲಿ ನರಸಿಂಹ ಅನ್ನೋ ಸಣ್ಣ ಪಾತ್ರ ಮಾಡಿರುವ ಶಿವಣ್ಣ, ಆ ಚಿಕ್ಕ ಪಾತ್ರವೇ ಇದೀಗ ಅವರನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ದಿದೆ. ತಮಿಳಿಗರ ಮನಗೆದ್ದಿದೆ ಆ ಪಾತ್ರ. ಈ ಗೆಲುವಿನ ಮೂಲಕ ಶಿವರಾಜ್‌ಕುಮಾರ್‌ ಮತ್ತು ನಿರ್ದೇಶಕ ಶ್ರೀನಿ ಕಾಂಬಿನೇಷನ್‌ನ ಘೋಸ್ಟ್ ಚಿತ್ರಕ್ಕೂ ತಮಿಳುನಾಡಿನಲ್ಲಿ ರೆಡ್‌ ಕಾರ್ಪೆಟ್‌ ಸ್ವಾಗತ ಸಿಕ್ಕಂತಾಗಿದೆ.
ಘೋಸ್ಟ್ ಪ್ಯಾನ್‌ ಇಂಡಿಯಾ ಮಟ್ಟದಲ್ಲಿ ನಿರ್ಮಾಣವಾಗುತ್ತಿರುವ ಸಿನಿಮಾ. ಅತ್ಯಾಧುನಿಕ ತಂತ್ರಜ್ಞಾನ ಬಳಕೆ ಮಾಡಿಕೊಂಡು 60ಪ್ಲಸ್‌ ವಯಸ್ಸಿನ ಶಿವಣ್ಣನನ್ನು 30ರ ವಯಸ್ಸಿನ ಪಾತ್ರಕ್ಕೂ ಕರೆತಂದಿದ್ದಾರೆ ನಿರ್ದೇಶಕರು. ಅದೇ ರೀತಿ ಮೇಕಿಂಗ್‌ ವಿಚಾರದಲ್ಲೂ ಘೋಸ್ಟ್ ಸಖತ್‌ ಸೌಂಡ್‌ ಮಾಡುತ್ತಿದೆ. ಹೀಗಿರುವಾಗಲೇ ಈ ಚಿತ್ರದ ಶೂಟಿಂಗ್‌ ಈಗಷ್ಟೇ ಮುಗಿದಿದೆ. ಚಿತ್ರತಂಡ ಕುಂಬಳಕಾಯಿ ಒಡೆದು, ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸಗಳತ್ತ ಗಮನಹರಿಸಿದೆ.
ಘೋಸ್ಟ್‌ಗೆ ತಮಿಳುನಾಡಿನಲ್ಲಿ ರೆಡ್‌ ಕಾರ್ಪೆಟ್‌
ಜೈಲರ್‌ ಸಿನಿಮಾ ಅಭೂತಪೂರ್ವ ಗೆಲುವು ಸಾಧಿಸುತ್ತಿದ್ದಂತೆ ಕರ್ನಾಟಕದಲ್ಲಿ ಮಾತ್ರವಲ್ಲದೆ ಪಕ್ಕದ ತಮಿಳುನಾಡು ಮತ್ತು ಆಂಧ್ರಪ್ರದೇಶದಲ್ಲೂ ಶಿವಣ್ಣ ಸುದ್ದಿಯಲ್ಲಿದ್ದಾರೆ. ತಮಿಳುನಾಡಿನಲ್ಲಂತೂ ಶಿವಣ್ಣನ ಸ್ಟ್ರೀನ್‌ ಪ್ರೆಸೆನ್ಸ್‌ಗೆ ಅಲ್ಲಿನ ಸಿನಿಮಾ ಪ್ರೇಕ್ಷಕರು ಫಿದಾ ಆಗಿದ್ದಾರೆ. ಇನ್ಮುಂದೆ ನಿಮ್ಮ ಕನ್ನಡ ಸಿನಿಮಾ ನೋಡುವ ಬಗ್ಗೆಯೂ ಅಲ್ಲಿನವರು ಹೇಳಿಕೊಂಡಿದ್ದಾರೆ. ಹೀಗಿರುವಾಗಲೇ ನಿರ್ದೇಶಕ ಶ್ರೀನಿ ಜತೆಗಿನ ಘೋಸ್ಟ್ ಚಿತ್ರದ ಶೂಟಿಂಗ್‌ ಸಹ ಮುಗಿದಿದ್ದು, ಇನ್ನೇನು ದಸರಾ ಹಬ್ಬದ ಪ್ರಯುಕ್ತ ರಿಲೀಸ್‌ ಆಗಲಿದೆ. ಜೈಲರ್‌ ಗೆಲುವಿನಿಂದ ಕರ್ನಾಟಕದ ಜತೆಗೆ ತಮಿಳುನಾಡಿನಲ್ಲೂ ಘೋಸ್ಟ್ ಸಿನಿಮಾಕ್ಕೆ ಒಳ್ಳೆಯ ಓಪನಿಂಗ್‌ ಸಿಗುವ ಸಾಧ್ಯತೆಯಿದೆ.
ಬೀರ್ಬಲ್ ಅವತಾರವೆತ್ತಿದ ಶ್ರೀನಿ
ಘೋಸ್ಟ್ ಚಿತ್ರವನ್ನು ಸಂದೇಶ್ ಪ್ರೊಡಕ್ಷನ್ಸ್ ಬ್ಯಾನರ್‌ನಲ್ಲಿ ಸಂದೇಶ್ ಎನ್ ನಿರ್ಮಾಣ ಮಾಡಿದ್ದಾರೆ. ಇತ್ತೀಚೆಗೆ ಈ ಚಿತ್ರದ ಚಿತ್ರೀಕರಣ ಬೆಂಗಳೂರಿನಲ್ಲಿ ಮುಕ್ತಾಯವಾಗಿದೆ. ಚಿತ್ರದ ಇನ್ನೊಂದು ವಿಶೇಷವೆಂದರೆ ನಿರ್ದೇಶಕ ಶ್ರೀನಿ, ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ಅದೂ ತಮ್ಮ ಈ ಹಿಂದಿನ ಬೀರ್ಬಲ್ ಪಾತ್ರದಲ್ಲಿ ಎದುರಾಗಿದ್ದಾರೆ. ಬೀರ್ಬಲ್ ಪಾರ್ಟ್‌ 2 ಚಿತ್ರಕ್ಕೂ ಇದಕ್ಕೂ ಲಿಂಕ್‌ ಇದೆಯೇ ಎಂಬ ವಿಚಾರ ಮುಂದಿನ ದಿನಗಳಲ್ಲಿಯೇ ಗೊತ್ತಾಗಲಿದೆ.
ಶಿವರಾಜಕುಮಾರ್, ಅನುಪಮ್ ಖೇರ್, ಜಯರಾಂ, ಸತ್ಯಪ್ರಕಾಶ್, ಪ್ರಶಾಂತ್ ನಾರಾಯಣನ್, ದತ್ತಣ್ಣ, ಅಭಿಜಿತ್, ಶ್ರೀನಿ ಮುಂತಾದವರು ಈ ಚಿತ್ರದ ತಾರಾಬಳಗದಲ್ಲಿದ್ದಾರೆ. ಈಗಾಗಲೇ ಘೋಸ್ಟ್ ಫಸ್ಟ್ ಲುಕ್, ಬಿಗ್‌ ಡ್ಯಾಡಿ ಟೀಸರ್ ಅಭಿಮಾನಿಗಳ ಮನ ಗೆದ್ದಿದೆ. ಚಿತ್ರವನ್ನು ತೆರೆಯ ಮೇಲೆ ನೋಡುವ ಕಾತುರ ಅಭಿಮಾನಿಗಳಲ್ಲಿ ಹೆಚ್ಚಿದೆ.
ಮನರಂಜನೆ ಕುರಿತ ಇನ್ನಷ್ಟು ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್‌ ಮಾಡಿ