ಮದುವೆಗೆ ಬನ್ನಿ ಅಣ್ಣ, ನಟ ದರ್ಶನ್‌ಗೆ ಮದುವೆಯ ಮಮತೆಯ ಕರೆಯೋಲೆ ನೀಡಿದ ಕಾಟೇರ ನಿರ್ದೇಶಕ ತರುಣ್‌ ಸುಧೀರ್‌, ಯಾವಾಗ ಮದುವೆ?
Jul 19, 2024 01:21 PM IST
Share
ಮದುವೆಗೆ ಬನ್ನಿ ಅಣ್ಣ, ನಟ ದರ್ಶನ್‌ಗೆ ಮದುವೆಯ ಮಮತೆಯ ಕರೆಯೋಲೆ ನೀಡಿದ ತರುಣ್‌ ಸುಧೀರ್‌
- ನ್ಯಾಯಾಂಗ ಬಂಧನಲ್ಲಿರುವ ನಟ ದರ್ಶನ್‌ಗೆ ಕಾಟೇರ ನಿರ್ದೇಶಕ ಮದುವೆ ಆಮಂತ್ರಣ ನೀಡಿದ್ದಾರೆ ಎಂದು ವರದಿಯಾಗಿದೆ. ಕನ್ನಡ ಸಿನಿಮಾದ ಜನಪ್ರಿಯ ನಿರ್ದೇಶಕ ತರುಣ್‌ ಸುಧೀರ್‌ ಮತ್ತು ಜನಪ್ರಿಯ ನಟಿ ಸೋನಾಲ್‌ ಮೊಂತೆರೋ ವಿವಾಹ ಮುಂದಿನ ತಿಂಗಳು ಅಂದರೆ ಆಗಸ್ಟ್‌ 10ರಂದು ನಡೆಯಲಿದೆ.
ಬೆಂಗಳೂರು: ಚಿತ್ರದುರ್ಗದ ರೇಣುಕಾಸ್ವಾಮಿ ಹತ್ಯೆ ಪ್ರಕರಣದಲ್ಲಿ ನ್ಯಾಯಾಂಗ ಬಂಧನಲ್ಲಿರುವ ನಟ ದರ್ಶನ್‌ಗೆ ಕಾಟೇರ ನಿರ್ದೇಶಕ ಮದುವೆ ಆಮಂತ್ರಣ ನೀಡಿದ್ದಾರೆ ಎಂದು ವರದಿಯಾಗಿದೆ. ಕನ್ನಡ ಸಿನಿಮಾದ ಜನಪ್ರಿಯ ನಿರ್ದೇಶಕ ತರುಣ್‌ ಸುಧೀರ್‌ ಮತ್ತು ಜನಪ್ರಿಯ ನಟಿ ಸೋನಾಲ್‌ ಮೊಂತೆರೋ ವಿವಾಹ ಮುಂದಿನ ತಿಂಗಳು ಅಂದರೆ ಆಗಸ್ಟ್‌ 10ರಂದು ನಡೆಯಲಿದೆ. ಮೊದಲ ಆಮಂತ್ರಣ ಪತ್ರವನ್ನು ದರ್ಶನ್‌ಗೆ ತರುಣ್‌ ಸುಧೀರ್‌ ನೀಡಿದ್ದಾರೆ ಎನ್ನಲಾಗಿದೆ. ದರ್ಶನ್ ಜೈಲು ಪಾಲಾದ ಬಳಿಕ ತರುಣ್‌ ಸುಧೀರ್‌ ಒಮ್ಮೆಯೂ ಜೈಲಿಗೆ ಭೇಟಿ ನೀಡಿರಲಿಲ್ಲ.
ನಟ ದರ್ಶನ್ ಇಲ್ಲದೆ ಮದುವೆ ಕಾರ್ಯಕ್ರಮ ಬೇಡ. ಬಿಡುಗಡೆಯಾದ ಬಳಿಕ ಮದುವೆಯಾಗೋಣ ಎಂದು ತರುಣ್‌ ಸುಧೀರ್‌ ಅಂದುಕೊಂಡಿದ್ದರಂತೆ. ಆದರೆ, ಹಿರಿಯರ ಸಲಹೆ ಮೇರೆಗೆ ಮತ್ತು ದರ್ಶನ್ ಸಲಹೆ ಬಳಿಕ ನಿಗದಿತ ದಿನಾಂಕದಂದೇ ಮದುವೆಯಾಗಲು ಕಾಟೇರ ನಿರ್ದೇಶಕರು ಒಪ್ಪಿದ್ದಾರೆ ಎಂದು ವರದಿಗಳು ತಿಳಿಸಿವೆ. ಇದೀಗ ಆಷಾಢ ಕಳೆದ ಬಳಿಕ ಆಗಸ್ಟ್‌ 10ರಂದು ತರುಣ್‌ ಸುಧೀರ್‌ ಮತ್ತು ಸೋನಾಲ್‌ ಮೊಂತೆರೋ ವಿವಾಹ ನಡೆಯಲಿದೆ.
ರೇಣುಕಾಸ್ವಾಮಿ ಕೊಲೆ ಪ್ರಕರಣವಾಗಿ ಜೈಲು ಪಾಲಾಗಿರುವ ದರ್ಶನ್ ಅವರನ್ನು ತರುಣ್‌ ಸುಧೀರ್‌ ಇನ್ನೂ ಯಾಕೆ ಭೇಟಿಯಾಗಿಲ್ಲ ಎಂಬ ಸಂದೇಹ ಬಹುತೇಕರಲ್ಲಿತ್ತು. ಕಾಟೇರ ಸಿನಿಮಾವನ್ನು ತರುಣ್‌ ಸುಧೀರ್‌ ನಿರ್ದೇಶಿಸಿದ್ದರು. ಇದೀಗ ಮದುವೆಯ ಆಮಂತ್ರಣದ ಮೊದಲ ಪ್ರತಿಯನ್ನು ದರ್ಶನ್‌ಗೆ ನೀಡುವ ಮೂಲಕ ಉತ್ತರ ನೀಡಿದ್ದಾರೆ. ಇಂದು ತರುಣ್‌ ಸುಧೀರ್‌ ಮತ್ತು ಶಾಸಕ ದರ್ಶನ್ ಪುಟ್ಟಣ್ಣಯ್ಯ ಅವರು ದರ್ಶನ್‌ನನ್ನು ಭೇಟಿಯಾಗಿದ್ದಾರೆ. ಪರಪ್ಪನ ಅಗ್ರಹಾರ ಜೈಲಿಗೆ ಆಗಮಿಸಿದ ಇವರಿಬ್ಬರು ಪ್ರತ್ಯೇಕ ಕಾರಿನಲ್ಲಿ ಚೆಕ್‌ ಪೋಸ್ಟ್‌ ಒಳಗೆ ಹೋಗಿದ್ದಾರೆ. ಜೈಲಿನ ಪ್ರತ್ಯೇಕ ಕೊಠಡಿಯಲ್ಲಿ ನಟ ದರ್ಶನ್‌ರನ್ನು ಭೇಟಿಯಾಗಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ಕಳೆದ ಹಲವು ದಿನಗಳಿಂದ ತರುಣ್‌ ಸುಧೀರ್‌ ಮತ್ತು ಸೋನಾಲ್‌ ಮದುವೆ ವದಂತಿಗಳಿದ್ದವು. ಇತ್ತೀಚೆಗೆ ಈ ವದಂತಿ ನಿಜ ಎಂದು ತರುಣ್‌ ಒಪ್ಪಿಕೊಂಡಿದ್ದರು.
ನಿರ್ದೇಶಕ ತರುಣ್‌ ಸುಧೀರ್‌ ಕನ್ನಡ ಸಿನಿಮಾ ಉದ್ಯಮದ ಮೋಸ್ಟ್‌ ಬ್ಯಾಚುಲರ್‌. ತರುಣ್‌ ಸುಧೀರ್‌ ನಿರ್ದೇಶನದಲ್ಲಿ ಮೂಡಿಬಂದಿದ್ದ ರಾಬರ್ಟ್‌ ಸಿನಿಮಾದಲ್ಲಿ ಸೋನಾಲ್‌ ನಟಿಸಿದ್ದರು. ಸ್ಯಾಂಡಲ್ವುಡ್ ಸೇರಿದಂತೆ ತುಳು ಸಿನಿಮಾರಂಗದಲ್ಲಿಯೂ ಹೆಸರು ಮಾಡಿರುವ ಸೋನಾಲ್‌ ಮೊಂತೆರೋ ವಿವಾಹ ತರುಣ್‌ ಸುಧೀರ್‌ ಜತೆ ಆಗಸ್ಟ್‌ ತಿಂಗಳಲ್ಲಿ ನಡೆಯಲಿದೆ. ನಟಿ ಸೋನಾಲ್‌ ಮೊಂತೆರೋ ಅವರು ಯೋಗರಾಜ್‌ ಭಟ್‌ ಆಕ್ಷನ್‌ ಕಟ್‌ ಹೇಳಿರುವ ಪಂಚತಂತ್ರ ಸಿನಿಮಾದಲ್ಲಿ ನಟಿಸಿ ಗಾಂಧಿನಗರದಲ್ಲಿ ಗಮನ ಸೆಳೆದಿದ್ದರು.
ಇದಾದ ಬಳಿಕ ಯೋಗರಾಜ್‌ ಭಟ್‌ ನಿರ್ದೇಶನದ ಗರಡಿ ಸಿನಿಮಾದಲ್ಲೂ ನಟಿಸಿದ್ದರು. ಬನಾರಸ್‌ ಸಿನಿಮಾದಲ್ಲಿ ನಟ ಝೈದ್‌ ಖಾನ್‌ ಜತೆ ನಟಿಸಿದ್ದರು. ಗರಡಿಯಲ್ಲಿ ಯಶಸ್‌ ಸೂರ್ಯನ ಜತೆ ನಟಿಸಿದ್ದರು. ಗರಡಿ ಬಳಿಕ ರೋಲೆಕ್ಸ್‌, ಬುದ್ಧಿವಂತ 2, ಶುಗರ್‌ ಫ್ಯಾಕ್ಟರಿ, ಮಾದೇವ, ಮಿ. ನಟವರ್‌ ಲಾಲ್‌, ಸರೋಜಿನಿ, ತಲ್ವಾರ್‌ ಪೇಟೆ, ಭಗವಾನ್‌ ಶ್ರೀ ಕೃಷ್ಣ ಪರಮಾತ್ಮ, ಮಾರ್ಗರೇಟ್‌ ಲವರ್‌ ಆಫ್‌ ರಾಮಚಾರಿ ಮುಂತಾದ ಪ್ರಾಜೆಕ್ಟ್‌ಗಳಿಗೆ ಸಹಿಹಾಕಿದ್ದರು. ಇವುಗಳಲ್ಲಿ ಕೆಲವು ಸಿನಿಮಾಗಳು ಈಗಾಗಲೇ ಬಿಡುಗಡೆಯಾಗಿವೆ. ಇನ್ನು ಕೆಲವು ಸಿನಿಮಾಗಳು ಮುಂದಿನ ದಿನಗಳಲ್ಲಿ ಬಿಡುಗಡೆಯಾಗಲಿವೆ.