Darshan: ದರ್ಶನ್‌ ಮನೆ ಮುಂದೆ ‘ವಿಶೇಷ ಪ್ರಕಟಣೆ’ ಬೋರ್ಡ್‌; ಸೆಲೆಬ್ರಿಟೀಸ್‌ಗೆ ‘ಕಾಟೇರ’ನ ಕಡೆಯಿಂದ ಹೀಗೊಂದು ಮನವಿ

Darshan Birthday: ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಕಾಟೇರ ಸಿನಿಮಾ ಗೆದ್ದ ಖುಷಿಯಲ್ಲಿದ್ದಾರೆ. ಈ ವರೆಗಿನ ತಮ್ಮ ಸಿನಿಮಾ ವೃತ್ತಿ ಜೀವನದಲ್ಲಿ ಅತಿ ಹೆಚ್ಚು ಗಳಿಕೆ ಕಂಡ ಸಿನಿಮಾಗಳ ಸಾಲಿನಲ್ಲಿ ಕಾಟೇರ ಮೊದಲ ಸ್ಥಾನದಲ್ಲಿದೆ. ಬರೋಬ್ಬರಿ 206 ಕೋಟಿ ಗಳಿಸುವ ಮೂಲಕ ಇತಿಹಾಸ ಬರೆದಿದೆ. ಇತ್ತ ಕಾಟೇರ ಗೆದ್ದಿದ್ದಕ್ಕೆ ಅಭಿಮಾನಿ ವಲಯದಲ್ಲೂ ಸಂಭ್ರಮ ಮನೆ ಮಾಡಿದೆ. ಅಷ್ಟೇ ಅಲ್ಲ ಇನ್ನೇನು ಕೆಲ ದಿನಗಳಲ್ಲಿ ಅಂದರೆ ಫೆ. 16ರಂದು ದರ್ಶನ್‌ ಹುಟ್ಟುಹಬ್ಬ. ಆ ವಿಶೇಷ ದಿನಕ್ಕಾಗಿಯೂ ಫ್ಯಾನ್ಸ್‌ ಕಾಯುತ್ತಿದ್ದಾರೆ. ಹೀಗಿರುವಾಗಲೇ ತಮ್ಮ ಸೆಲೆಬ್ರಿಟೀಸ್‌ಗಳಿಗೆ ವಿಶೇಷ ಮನವಿ ಮಾಡಿದ್ದಾರೆ ದಚ್ಚು.

ದರ್ಶನ್‌ ಮಾಡಿದ ಮನವಿಯಲ್ಲೇನಿದೆ?

ಬೆಂಗಳೂರಿನ ರಾಜರಾಜೇಶ್ವರಿ ನಗರದ ಮನೆಯ ಮುಂಭಾಗದಲ್ಲಿ ವಿಶೇಷ ಮನವಿಯೊಂದರ ಪ್ರಕಟಣೆಯನ್ನು ಹಾಕಲಾಗಿದೆ. "ಬ್ಯಾನರ್, ಕೇಕ್ ಹಾಗೂ ಹಾರಗಳನ್ನು ದಯಮಾಡಿ ತರಬೇಡಿ. ಅದೇ ಹಣದಲ್ಲಿ ಈ ವರ್ಷವೂ ಸಹ ನಿಮ್ಮ ಕೈಲಾದ ಅಕ್ಕಿ, ಬೇಳೆ, ಸಕ್ಕರೆ ಹಾಗೂ ಇತರ ದವಸ ಧಾನ್ಯಗಳನ್ನು ದಾನ ನೀಡಿ. ಅದನ್ನು ಒಗ್ಗೂಡಿಸಿ ಸೇರಿಸಬೇಕಾದ ಅನಾಥಾಶ್ರಮ ವೃದ್ಧಾಶ್ರಮಗಳಿಗೆ ಪ್ರಾಮಾಣಿಕವಾಗಿ ತಲುಪಿಸುವ ಜವಾಬ್ದಾರಿ ನನ್ನದು" ಎಂದು ಬ್ಯಾನರ್‌ನಲ್ಲಿ ನಮೂಸಿದಿದ್ದಾರೆ ದರ್ಶನ್‌.

ಇದನ್ನೂ ಓದಿ: ಬಾಕ್ಸ್‌ ಆಫೀಸ್‌ನಲ್ಲಿ ಸುಲ್ತಾನನಾದ ‘ಕಾಟೇರ’! ದರ್ಶನ್‌ ಬತ್ತಳಿಕೆಗೆ ಮೊದಲ 200 ಕೋಟಿ ಕಲೆಕ್ಷನ್‌ ಗರಿಮೆ

ಇತರರಿಗೆ ನಮ್ಮಿಂದ ತೊಂದರೆಯಾಗದಿರಲಿ

"ಈ ಸಂಭ್ರಮಾಚರಣೆಯ ಸಂದರ್ಭದಲ್ಲಿ ನಮ್ಮ ಮನೆಯ ಅಕ್ಕ- ಪಕ್ಕದ ನಿವಾಸಿಗಳಿಗೆ ನಿಮ್ಮಿಂದ ತೊಂದರೆಯಾಗುವುದು, ಪಟಾಕಿ ಹೊಡೆಯುವುದು, ಕಾಂಪೌಂಡ್ ಹತ್ತುವುದು, ಹೂವು ಕುಂಡಗಳನ್ನು ಬೀಳಿಸುವುದು ಹಾಗೂ ಅವರ ಸ್ವತ್ತುಗಳಿಗೆ ಹಾನಿ ಮಾಡುವುದು ಇಂತಹ ಅನುಚಿತ ವರ್ತನೆ ನಡೆಯಬಾರದು. ನನ್ನ ಬಗ್ಗೆ ಇಷ್ಟೆಲ್ಲ ಪ್ರೀತಿ ಅಭಿಮಾನ ಇಟ್ಟಿರುವ ನೀವೆಲ್ಲ ಈ ನನ್ನ ಕೋರಿಕೆಯನ್ನು ನಡೆಸಿಕೊಡುವಿರಿ ಎಂದು ನಂಬಿರುತ್ತೇನೆ. ಸಂಘದ ಕಾರ್ಯಕರ್ತರು ಮತ್ತು ಪೊಲೀಸ್ ಸಿಬ್ಬಂದಿ ವರ್ಗದವರಿಗೆ ಸಹಕರಿಸಬೇಕೆಂದು ವಿನಂತಿಸುತ್ತೇನೆ" ಎಂದು ದರ್ಶನ್‌ ಮನವಿ ಮಾಡಿದ್ದಾರೆ.

ಅನಾಥಾಶ್ರಮಗಳಿಗೆ ಸಹಾಯ

ನಟ ದರ್ಶನ್‌ ಬರ್ತ್‌ಡೇ ಸಮೀಪಿಸುತ್ತಿದ್ದಂತೆ, ಅವರ ಅಭಿಮಾನಿಗಳಲ್ಲೂ ವಿಶೇಷ ಪುಳಕ. ನೆಚ್ಚಿನ ನಟನ ಬರ್ತ್‌ಡೇಯನ್ನು ಅಷ್ಟೇ ಅದ್ಧೂರಿಯಾಗಿ ಆಚರಿಸಬೇಕೆಂದು ನಿರ್ಧರಿಸುತ್ತಿರುತ್ತಾರೆ. ಆದರೆ, ಪ್ರತಿ ಸಲದಂತೆ ಈ ಬಾರಿಯೂ ಅಭಿಮಾನಿಗಳಲ್ಲಿ ಅದೇ ಮನವಿಯನ್ನು ಮಾಡಿದ್ದಾರೆ ದರ್ಶನ್‌. ಹಾರ, ತುರಾಯಿ, ಕೇಕ್‌ ತರುವ ಬದಲು ದವಸ ಧಾನ್ಯ ನೀಡುವಂತೆ ಕೋರಿದ್ದಾರೆ. ಅದರಂತೆ, ಅಭಿಮಾನಿಗಳಿಂದ ಬಂದ ಎಲ್ಲ ದಿನಸಿಯನ್ನು ಅವಶ್ಯಕತೆ ಇರುವವರಿಗೆ ತಲುಪಿಸುವ ಕೆಲಸವನ್ನೂ ಮಾಡಿದ್ದಾರೆ.

ಇದನ್ನೂ ಓದಿ: ತನಿಷಾ ಕುಪ್ಪಂಡ ಎಲಿಮಿನೇಟ್‌; ಜೋರು ಧ್ವನಿ, ಸ್ನೇಹದ ಖನಿ ಹೀಗಿದೆ ಬೆಂಕಿ ತನಿಯ ಬಿಗ್‌ಬಾಸ್‌ ಜರ್ನಿ

ಬಾಕ್ಸ್‌ ಆಫೀಸ್‌ನಲ್ಲಿ 200 ಕೋಟಿ ಬೆಳೆ ತೆಗೆದ ಕಾಟೇರ

ಚಾಲೆಂಜಿಂಗ್‌ ಸ್ಟಾರ್‌ ದರ್ಶನ್‌ ಅವರ ಈ ವರೆಗಿನ ಬೇರಾವ ಸಿನಿಮಾ 200 ಕೋಟಿ ಗಳಿಸಿದ ಉದಾಹರಣೆ ಇರಲಿಲ್ಲ. ಈ ಹಿಂದೆ ರಿಲೀಸ್‌ ಆಗಿದ್ದ ದರ್ಶನ್‌ ಮತ್ತು ತರುಣ್‌ ಸುಧೀರ್‌ ಜೋಡಿಯ ರಾಬರ್ಟ್‌ ಸಿನಿಮಾ 100 ಕೋಟಿ ಪ್ಲಸ್‌ ಗಳಿಸಿದ್ದನ್ನು ಬಿಟ್ಟರೆ, ಈ ಮಟ್ಟದ ಯಶಸ್ಸು ದರ್ಶನ್‌ ಅವರ ಬೇರಾವ ಸಿನಿಮಾಕ್ಕೂ ಸಿಕ್ಕಿರಲಿಲ್ಲ. ಒಂದೇ ವಾರದಲ್ಲಿ 100 ಕೋಟಿ ಗಡಿದಾಟಿದ್ದ ಕಾಟೇರ, ಇದೀಗ ಕೇವಲ 20 ದಿನಗಳಲ್ಲಿ 206 ಕೋಟಿ ಗಳಿಸಿದ್ದಾನೆ. ಟಿಕೆಟ್‌ ಬುಕಿಂಗ್‌ನಲ್ಲೂ ದಾಖಲೆ ಬರೆದ ಕಾಟೇರ ಬರೋಬ್ಬರಿ 1 ಕೋಟಿ ಟಿಕೆಟ್‌ ಮಾರಾಟವಾಗಿವೆ. ಹೊಸ ವರ್ಷದ ಜತೆಗೆ ಸಂಕ್ರಾಂತಿ ಹಬ್ಬವನ್ನೂ ಈ ಸಿನಿಮಾ ಎನ್‌ಕ್ಯಾಶ್‌ ಮಾಡಿಕೊಂಡಿದೆ.