Saptami Gowda: ಕನ್ನಡ ಹಿಂದಿ ಬಳಿಕ ತೆಲುಗಿನಲ್ಲಿ ಅವಕಾಶ ಪಡೆದ ಸಪ್ತಮಿ ಗೌಡ; ಕಾಂತಾರ ಚೆಲುವೆ ಈಗ ಬಹುಭಾಷಾ ನಟಿ

ಬೆಂಗಳೂರು: ಕಾಂತಾರ ಸಿನಿಮಾದಲ್ಲಿ ನಟಿಸಿದ ಸಪ್ತಮಿ ಗೌಡ ಅವರ ಮುಂದಿನ ಸಿನಿಮಾ ಯಾವುದು ಎಂಬ ಕುತೂಹಲ ಎಲ್ಲರಿಗೂ ಇತ್ತು. ಬಾಲಿವುಡ್‌ನ ದಿ ವ್ಯಾಕ್ಸಿನ್‌ ವಾರ್‌ನಲ್ಲಿ ಇವರು ಅವಕಾಶ ಪಡೆದಿದ್ದರು. ಇದೀಗ ಇವರಿಗೆ ತೆಲುಗು ಚಿತ್ರರಂಗದಲ್ಲೂ ಅವಕಾಶ ದೊರಕಿದೆ ಎಂದು ಪಬ್ಲಿಕ್‌ ಟಿವಿ ವೆಬ್‌ ಪ್ರಕಟಿಸಿದೆ. ಈ ಹಿಂದೆ ರಶ್ಮಿಕಾ ಮಂದಣ್ಣ ಕೂಡ ಕನ್ನಡ ಸಿನಿಮಾದಲ್ಲಿ ಹಿಟ್‌ ಆದ ಬಳಿಕ ತೆಲುಗು ಚಿತ್ರರಂಗದಲ್ಲಿ ಮಿಂಚಿದ್ದರು. ಸದ್ಯ ಸಪ್ತಮಿ ಗೌಡರ ಕೈಯಲ್ಲಿ ಈ ತೆಲುಗು ಚಿತ್ರ ಮಾತ್ರವಲ್ಲದೆ ಕನ್ನಡ ಪ್ರಾಜೆಕ್ಟ್‌ಗಳೂ ಇವೆ.

ತಮ್ಮುಡು ಸಿನಿಮಾದಲ್ಲಿ ಸಪ್ತಮಿಗೆ ಅವಕಾಶ

ತೆಲುಗು ನಟ ನಿತಿನ್‌ ಜತೆ ಸಪ್ತಮಿ ಗೌಡರಿಗೆ ಅವಕಾಶ ದೊರಕಿರುವುದು ಇದೀಗ ಖಚಿತವಾಗಿದೆ. ತಮ್ಮುಡು ಸಿನಿಮಾದಲ್ಲಿ ಸಪ್ತಮಿ ಗೌಡ ನಟಿಸಲಿದ್ದಾರೆ ಎಂದು ಈ ಹಿಂದೆಯೂ ವದಂತಿಗಳಿದ್ದವು. ಇದು ಶ್ರೀರಾಮ್‌ ವೇಣು ನಿರ್ದೇಶನದ ಚಿತ್ರವಾಗಿದೆ. ಸಪ್ತಮಿ ಗೌಡ ಮಾತ್ರವಲ್ಲದೆ ನಟಿ ಲಯಾ ಕೂಡ ಈ ಚಿತ್ರದಲ್ಲಿ ನಟಿಸುತ್ತಿದ್ದಾರೆ.

ಹೊಂಬಾಳೆ ಫಿಲ್ಮ್ಸ್‌ನಿಂದ ಸರ್‌ಪ್ರೈಸ್‌

ಸಪ್ತಮಿ ಗೌಡ ಅವರು ಕನ್ನಡದ ಯುವ ಸಿನಿಮಾದಲ್ಲೂ ಅವಕಾಶ ಪಡೆದಿದ್ದಾರೆ. ಈ ಚಿತ್ರವು ಹೊಂಬಾಳೆ ಫಿಲ್ಮ್ಸ್‌ ಬ್ಯಾನರ್‌ನಡಿ ನಿರ್ಮಾಣವಾಗುತ್ತಿದೆ. ಈ ಚಿತ್ರಕ್ಕೆ ಕನ್ನಡ ನಟ ಯುವ ರಾಜ್‌ಕುಮಾರ್‌ ನಾಯಕ. ಈ ಸಿನಿಮಾದಲ್ಲಿ ಸಪ್ತಮಿ ಗೌಡ ಅಚ್ಚರಿ ಪಡೆದದ್ದು ಕುತೂಹಲಕಾರಿಯಾಗಿತ್ತು. ವರದಿಗಳ ಪ್ರಕಾರ, ಸಪ್ತಮಿ ಗೌಡ ತನ್ನ ತಾಯಿ ಜತೆ ಕೆಸಿಸಿ ಕಾರ್ಯಕ್ರಮಕ್ಕೆ ಹೋಗುತ್ತಿದ್ದರಂತೆ. ಆ ಸಮಯದಲ್ಲಿ ಹೊಂಬಾಳೆ ಫಿಲ್ಮ್ಸ್‌ ಕಡೆಯಿಂದ ಇವರಿಗೆ ಕರೆ ಬಂದಿತ್ತು. ಕಚೇರಿಗೆ ಬನ್ನಿ , ಮಾತನಾಡೋದು ಇದೆ ಎಂದು ಕರೆದಿದ್ದಾರೆ. ಇದಾದ ಬಳಿಕ ಸಪ್ತಮಿ ಗೌಡ ಭೇಟಿ ನೀಡಿದಾಗ ನಿಜಕ್ಕೂ ಆಶ್ಚರ್ಯಕ್ಕೆ ಒಳಗಾಗಿದ್ದಾರೆ. ಇವರನ್ನು ನಟ ಯುವರಾಜ್‌ಕುಮಾರ್‌ ಪಕ್ಕ ನಿಲ್ಲಿಸಿ ಫೋಟೋ ತೆಗೆಸಿದ್ದಾರೆ. 

ನಟಿ ಸಪ್ತಮಿ ಗೌಡ ಪರಿಚಯ

ಕಾಂತಾರ ಸಿನಿಮಾದಲ್ಲಿ ಖ್ಯಾತಿ ಗಳಿಸುವ ಮೊದಲು ಸಪ್ತಮಿ ಗೌಡ ಪಾಪ್‌ಕಾರ್ನ್‌ ಮಂಕಿ ಟೈಗರ್‌ ಎಂಬ ಸಿನಿಮಾದಲ್ಲಿ ನಟಿಸಿದ್ದರು. ಇದು ದುನಿಯಾ ಸೂರಿ ನಿರ್ಮಾಣದ ಸಿನಿಮಾ. ಇದಾದ ಬಳಿಕ 2022ರಲ್ಲಿ ರಿಷಬ್‌ ಶೆಟ್ಟಿ ನಿರ್ದೇಶನ-ನಟನೆಯ ಕಾಂತಾರ ಸಿನಿಮಾದಲ್ಲಿ ಅವಕಾಶ ಪಡೆದಿದ್ದರು. ಕಾಂತಾರ ಯಶಸ್ಸಿನ ಬಳಿಕ ಇವರಿಗೆ ಬಾಲಿವುಡ್‌ನ ವಿವೇಕ್‌ ಅಗ್ನಿಹೋತ್ರಿಯವರ ದಿ ವ್ಯಾಕ್ಸಿನ್‌ ವಾರ್‌ ಸಿನಿಮಾದಲ್ಲಿ ನಟಿಸುವ ಅವಕಾಶ ದೊರಕಿತ್ತು.

ಯುವ ಎಂಬ ಸಿನಿಮಾದಲ್ಲೂ ಸಪ್ತಮಿ ನಟಿಸಿದ್ದಾರೆ. ಸಂತೋಷ್‌ ಆನಂದ್‌ರಾಮ್‌ ನಿರ್ದಶನದ ಈ ಸಿನಿಮಾದಲ್ಲಿ ಯುವ ರಾಜ್‌ಕುಮಾರ್‌ ನಟಿಸುತ್ತಿದ್ದಾರೆ. ಸಪ್ತಮಿ ಗೌಡ, ಅಚ್ಯುತ್‌ ಕುಮಾರ್‌ ಮತ್ತು ಪ್ರಕಾಶ್‌ ರಾಜ್‌ ಕೂಡ ಈ ಚಿತ್ರದಲ್ಲಿ ನಟಿಸಿದ್ದಾರೆ. ಈ ಸಿನಿಮಾ ಡಿಸೆಂಬರ್‌ 22ರಂದು ಬಿಡುಗಡೆಯಾಗಲಿದೆ ಎನ್ನಲಾಗಿದೆ.