ಒಂದೇ ಸ್ಪೂನಿನಲ್ಲಿ ಕೇಕ್‌ ತಿಂದ ದರ್ಶನ್‌- ಸುದೀಪ್‌! ಸುಮಲತಾ ಬರ್ತ್‌ಡೇಯಲ್ಲಿ ಹಳೇ ಕುಚಿಕುಗಳ ಮಿಲನ
Aug 27, 2023 10:32 AM IST
Share
ಒಂದೇ ಸ್ಫೂನಿನಲ್ಲಿ ಕೇಕ್‌ ತಿಂದ ದರ್ಶನ್‌- ಸುದೀಪ್‌! ಸುಮಲತಾ ಬರ್ತ್‌ಡೇಯಲ್ಲಿ ಹಳೇ ಕುಚಿಕುಗಳ ಮಿಲನ
- ಕಳೆದ ಆರು ವರ್ಷಗಳಿಂದ ಒಂದೇ ವೇದಿಕೆಯಲ್ಲಿ ಒಟ್ಟಿಗೆ ಕಾಣಿಸಿಕೊಳ್ಳದ ಸುದೀಪ್‌ ಮತ್ತು ದರ್ಶನ್‌, ಸುಮಲತಾ ಅಂಬರೀಶ್‌ ಅವರ ಬರ್ತ್‌ಡೇ ಪಾರ್ಟಿಯಲ್ಲಿ ಕಾಣಿಸಿಕೊಂಡು ಅಚ್ಚರಿ ಮೂಡಿಸಿದರು. ಇಬ್ಬರು ನಟರಿಗೆ ಒಂದೇ ಸ್ಪೂನಿನಲ್ಲಿ ಕೇಕ್‌ ಸಹ ತಿನ್ನಿಸಲಾಯಿತು. ಕಾರ್ಯಕ್ರಮದಲ್ಲಿ ಕುಚಿಕು ಕುಚಿಕು ಹಾಡೇ ಮೇಳೈಸಿತು.
Sudeep Darshan: ಕನ್ನಡ ಸಿನಿಮಾ ಪ್ರೇಮಿಗಳ ಒಂದೇ ಒಂದು ಬಯಕೆ ಅದು ಕಿಚ್ಚ ಸುದೀಪ್‌ ಮತ್ತು ನಟ ದರ್ಶನ್‌ ಒಂದಾಗಬೇಕೆಂಬುದು. ಇದು ಕೇವಲ ಈ ಇಬ್ಬರ ಅಭಿಮಾನಿಗಳ ಧ್ವನಿಯಲ್ಲ. ಇಡೀ ಸ್ಯಾಂಡಲ್ವುಡ್ ಸಿನಿಮಾ ಇಂಡಸ್ಟ್ರಿಯ ಆಸೆ. ಆದರೆ, ಅದ್ಯಾಕೋ ಮುಂದೂಡುತ್ತಲೇ ಬರುತ್ತಿದೆ. ಅದು ಒತ್ತಟಿಗಿರಲಿ, ಈ ಇಬ್ಬರೂ ನಟರು ಪರಸ್ಪರ ಮುಖಾಮುಖಿಯಾಗಿದ್ದರೂ ತುಂಬ ವಿರಳ. ಇದೀಗ ತುಂಬ ದಿನಗಳ ಬಳಿಕ ಇಬ್ಬರೂ ಒಂದೇ ಕಡೆ ಸೇರಿದ್ದಾರೆ. ಅದಕ್ಕೆ ವೇದಿಕೆ ಕಲ್ಪಿಸಿದ್ದು ಹಿರಿಯ ನಟಿ ಸುಮಲತಾ ಬರ್ತ್‌ಡೇ!
ನಟಿ ಸುಮಲತಾ ಅಂಬರೀಶ್‌ ಆಗಸ್ಟ್‌ 26ರಂದು ಬರ್ತ್‌ಡೇ ಆಚರಿಸಿಕೊಂಡಿದ್ದಾರೆ. ಈ ವಿಶೇಷ ದಿನವನ್ನು ಸಿನಿಮಾ ಮಂದಿಯ ಜತೆಗೆ ಕಳೆದಿದ್ದಾರೆ. ಆಪ್ತ ಸಿನಿಮಾ ಮಂದಿಯನ್ನು ಕರೆದು ಪಾರ್ಟಿ ನೀಡಿದ್ದಾರೆ. ಇದೇ ಪಾರ್ಟಿಗೆ ನಟ ಸುದೀಪ್‌ ಮತ್ತು ದರ್ಶನ್‌ ಇಬ್ಬರಿಗೂ ಆಮಂತ್ರಣ ಹೋಗಿತ್ತು. ಅದರಂತೆ ಈ ಇಬ್ಬರೂ ಸ್ಟಾರ್‌ಗಳು ಒಂದೇ ವೇದಿಕೆಯಲ್ಲಿ ನಿಂತು ಸುಮಲತಾ ಅವರಿಗೆ ಬರ್ತ್‌ಡೇ ಶುಭಾಶಯ ಕೋರಿದ್ದಾರೆ. ದರ್ಶನ್‌ ಮತ್ತು ಸುದೀಪ್‌ ಅಕ್ಕ ಪಕ್ಕದಲ್ಲಿಯೇ ನಿಂತಿದ್ದಾರೆ.
ಈ ಬರ್ತ್‌ಡೇ ಪಾರ್ಟಿಯ ಕಿರು ವಿಡಿಯೋ ತುಣುಕು ಸೋಷಿಯಲ್‌ ಮೀಡಿಯಾದಲ್ಲಿ ಹೊರಬೀಳುತ್ತಿದ್ದಂತೆ, ಅಭಿಮಾನಿವಲಯದಲ್ಲಿ ಹಬ್ಬದಾಚರಣೆ ಶುರುವಾಗಿದೆ. ಇಬ್ಬರನ್ನೂ ನೋಡಿದ ಫ್ಯಾನ್ಸ್‌ ಕುಣಿದು ಕುಪ್ಪಳಿಸುತ್ತಿದ್ದಾರೆ. ದಿಗ್ಗಜರು ಸಿನಿಮಾದ ಕುಚಿಕು.. ಕುಚಿಕು.. ಹಾಡನ್ನು ಜೋಡಿಸಿ ಸಂಭ್ರಮಿಸುತ್ತಿದ್ದಾರೆ. ಕಳೆದ ಆರು ವರ್ಷಗಳಿಂದ ಈ ಇಬ್ಬರೂ ಒಟ್ಟಿಗೆ ಮುಖಾಮುಖಿಯಾಗಿರಲಿಲ್ಲ. ಇದೀಗ ಆ ಕ್ಷಣವನ್ನು ಇಡೀ ಅಭಿಮಾನಿ ಬಳಗ ಕಣ್ತುಂಬಿಕೊಂಡು, ಸಾರ್ಥಕ ಕ್ಷಣ ಎಂದೆಲ್ಲ ಜಾಲತಾಣಗಳಲ್ಲಿ ವಿಡಿಯೋ ಹಂಚಿಕೊಳ್ಳುತ್ತಿದ್ದಾರೆ.
ಒಂದೇ ಸ್ಪೂನಿನಲ್ಲಿ ಕೇಕ್‌ ತಿಂದ ಸುದೀಪ್‌, ದರ್ಶನ್‌
ನಟ ಸುದೀಪ್‌ ಮತ್ತು ದರ್ಶನ್‌ಗೆ ನಟಿ ಸುಮಲತಾ ಕೇಕ್‌ ತಿನಿಸಿದ್ದಾರೆ. ಒಂದೇ ಚಮಚದಲ್ಲಿ ಮೊದಲಿಗೆ ಅಲ್ಲೇ ಇದ್ದ ದರ್ಶನ್‌ಗೆ ಕೇಕ್‌ ತಿನಿಸಿ, ಅದೇ ಚಮಚದಿಂದಲೇ ಸುದೀಪ್‌ಗೂ ಕೇಕ್‌ ತಿನಿಸಿದ ವಿಡಿಯೋ ವೈರಲ್‌ ಆಗಿದೆ. ಇದನ್ನು ನೋಡಿದ ಫ್ಯಾನ್ಸ್‌ ಖುಷಿಯಲ್ಲಿ ತೇಲಾಡುತ್ತಿದ್ದಾರೆ. ಆದರೆ, ಹೀಗೆ ಇಬ್ಬರೂ ಒಟ್ಟಿಗೆ ಅಲ್ಲೇ ಇದ್ದರೂ, ಇಬ್ಬರೂ ಪರಸ್ಪರ ಮಾತನಾಡಿಲ್ಲ. ವಿಡಿಯೋದಲ್ಲಿ ದರ್ಶನ್‌ ಸುಮಲತಾ ಹಿಂದೆ ನಿಂತು ಅವರಿವರನ್ನು ತಬ್ಬಿ ಮಾತನಾಡಿಸುತ್ತಿದ್ದರೆ, ಇತ್ತ ಸುದೀಪ್‌ ಸುಮಲತಾ ಅವರ ಮುಂದೆ ನಿಂತು ರಾಕ್‌ಲೈನ್‌ ವೆಂಕಟೇಶ್‌ ಜತೆ ಮಾತನಾಡುತ್ತಿದ್ದಾರೆ.
ಪಾರ್ಟಿಯಲ್ಲಿ ಕುಚಿಕು ಹಾಡೇ ಹೈಲೈಟ್‌
ಇನ್ನು ಸುದೀಪ್‌ ಮತ್ತು ದರ್ಶನ್‌ ಒಂದೇ ಕಡೆ ಸೇರಿದ್ದಾರೆ ಎಂಬ ಕಾರಣಕ್ಕೆ ಬರ್ತ್‌ಡೇ ಪಾರ್ಟಿಯಲ್ಲಿ ದಿಗ್ಗಜರು ಸಿನಿಮಾದ ಕುಚಿಕು ಕುಚಿಕು.. ನೀನು ಚಡ್ಡಿ ದೋಸ್ತು ಕಣೋ ಕುಚಿಕು ಅನ್ನೋ ಹಾಡೇ ಮೇಳೈಸಿದೆ. ಆ ಹಾಡನ್ನೇ ಹತ್ತಾರು ಬಾರಿ ಪ್ಲೇ ಮಾಡಿದ್ದಾರೆ. ಒಟ್ಟಿನಲ್ಲಿ ಅಭಿಮಾನಿಗಳ ಬಯಕೆ ಒಂದೇ ಈ ಇಬ್ಬರು ನಟರು ಮೊದಲಿನಂತಾಗಲಿ ಎಂದು. ನಮ್ಮದೂ ಅದೇ ಆಶಯ.
ಮನರಂಜನೆ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್‌ ಮಾಡಿ