Kaatera: ‘ಖಂಡಿತ, ದರ್ಶನ್‌ ‘ಕಾಟೇರ’ ಸಿನಿಮಾ ನಾನೂ ನೋಡ್ತಿನಿ!’ ಕಿಚ್ಚ ಸುದೀಪ್‌ ಕಡೆಯಿಂದ ಬಂತು ಸಿಹಿ ಸುದ್ದಿ

Kaatera: ಕರುನಾಡಿನಲ್ಲೀಗ ಕಾಟೇರ ಸಿನಿಮಾದ್ದೇ ಹವಾ. ಬಿಡುಗಡೆಯಾದ ಕೇವಲ ಏಳೇ ದಿನಕ್ಕೆ ದಾಖಲೆಯ ಗಳಿಕೆ ಕಂಡು, ಇಡೀ ಸ್ಯಾಂಡಲ್‌ವುಡ್‌ ಸಿನಿಮಾ ಇಂಡಸ್ಟ್ರಿಯ ತಾಕತ್ತು ಪ್ರದರ್ಶಿಸಿದೆ ಕಾಟೇರ ಸಿನಿಮಾ. ಬಿಡುಗಡೆಗೂ ಮುನ್ನ ದೊಡ್ಡ ಮಟ್ಟದ ಹೈಪ್‌ ಕ್ರಿಯೆಟ್‌ ಮಾಡಿದ್ದ ಕಾಟೇರ, ರಿಲೀಸ್‌ ಬಳಿಕ ಅದನ್ನು ಇನ್ನಷ್ಟು ಎತ್ತರಕ್ಕೆ ಏರಿಸಿದೆ. ಪ್ಯಾನ್‌ ಇಂಡಿಯಾ ಸಲಾರ್‌ ಸಿನಿಮಾದ ಎದುರೂ ಕಾಟೇರ ಕರ್ನಾಟಕದಲ್ಲಿ ಗೆದ್ದು ಬೀಗಿದೆ. ಕರುನಾಡಲ್ಲಿ ಕನ್ನಡಿಗನೇ ಸಾರ್ವಭೌಮ ಎಂದೂ ಸಾರಿ ಹೇಳಿದೆ ಕಾಟೇರ. ಇದೀಗ ಇದೇ ಕಾಟೇರ ಬಳಗದಿಂದ ಹೊಸ ಸುದ್ದಿ ಹೊರಬಂದಿದೆ.

ಕಳೆದ ಎರಡು ದಿನಗಳ ಹಿಂದಷ್ಟೇ ಇಡೀ ಸ್ಯಾಂಡಲ್‌ವುಡ್‌ಗೆ ಕಾಟೇರ ಸಿನಿಮಾ ವೀಕ್ಷಣೆಗೆ ಆಮಂತ್ರಣ ನೀಡಿದ್ದರು ರಾಕ್‌ಲೈನ್‌ ವೆಂಕಟೇಶ್‌. ಹಿರಿ ಕಿರಿ ಕಲಾವಿದರೂ ಆಗಮಿಸಿ ದರ್ಶನ್‌ ಸಿನಿಮಾ ಕಣ್ತುಂಬಿಕೊಂಡು, ಹೌದೌದೆಂದು ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಆಮಂತ್ರಣದ ಮೇರೆಗೆ ಬಹುತೇಕ ಎಲ್ಲ ಸೆಲೆಬ್ರಿಟಿಗಳು ಆಗಮಿಸಿ ಕಾಟೇರನನ್ನು ಕಣ್ತುಂಬಿಕೊಂಡಿದ್ದರು. ಅದೇ ರೀತಿ ಕಾಟೇರ ಸಿನಿಮಾ ವೀಕ್ಷಣೆಗೆ ಕಿಚ್ಚ ಸುದೀಪ್‌ ಅವರಿಗೂ ಇನ್ವಿಟೇಷನ್‌ ಹೋಗಿದೆ ಎಂದು ಸ್ವತಃ ನಿರ್ದೇಶಕ ತರುಣ್‌ ಸುಧೀರ್‌ ಹೇಳಿದ್ದಾರೆ.

ಇದನ್ನೂ ಓದಿ: ‘ಕಾಟೇರ’ ಸೆಲೆಬ್ರಿಟಿ ಶೋ ಹೌಸ್‌ಫುಲ್‌; ಮೆಟ್ಟಿಲ ಮೇಲೆ ಕುಳಿತು ಸಾಮಾನ್ಯನಂತೆ ಸಿನಿಮಾ ವೀಕ್ಷಿಸಿದ ದರ್ಶನ್‌

ಕಾಟೇರನನ್ನು ಕಣ್ತುಂಬಿಕೊಳ್ಳಲಿದ್ದಾರೆ ಕಿಚ್ಚ

ಕಿಚ್ಚ ಸುದೀಪ್‌ ಸದ್ಯ ಮ್ಯಾಕ್ಸ್‌ ಸಿನಿಮಾದ ಕ್ಲೈಮ್ಯಾಕ್ಸ್‌ ಶೂಟಿಂಗ್‌ನಲ್ಲಿ ಬಿಜಿಯಾಗಿದ್ದಾರೆ. ತಮಿಳುನಾಡಿನ ಮಹಾಬಲಿಪುರಂನಲ್ಲಿ ಆ ಚಿತ್ರದ ಚಿತ್ರೀಕರಣ ನಡೆಯುತ್ತಿದ್ದು, ಸುದೀಪ್‌ ಭಾಗವಹಿಸಿದ್ದಾರೆ. ಅವರಿಗೂ ರಾಕ್‌ಲೈನ್‌ ವೆಂಕಟೇಶ್‌ ಅವರ ಕಡೆಯಿಂದ ಆಮಂತ್ರಣ ತಲುಪಿದೆ. ಕಾಟೇರ ಚಿತ್ರಕ್ಕೆ ಒಳ್ಳೆಯ ಪ್ರತಿಕ್ರಿಯೆ ಸಿಗುತ್ತಿರುವುದಕ್ಕೆ ಶುಭಾಶಯ ತಿಳಿಸಿದ್ದಾರೆ. ರಾಕ್‌ಲೈನ್‌ ಅವರ ಮಾತಿಗೆ ಉತ್ತರಿಸಿದ ಸುದೀಪ್, "ಖಂಡಿತ, ನಾನೂ ಕಾಟೇರ ಸಿನಿಮಾ ನೋಡ್ತಿನಿ. ಆದರೆ, ಸದ್ಯ ನಾನು ಶೂಟಿಂಗ್‌ನಲ್ಲಿದ್ದೇನೆ. ಅದು ಮುಗಿಸಿ ಬಂದ ಮೇಲೆ ನೋಡುತ್ತೇನೆ" ಎಂದು ನಮ್ಮ ನಿರ್ಮಾಪಕರ ಮುಂದೆ ತಿಳಿಸಿದ್ದಾರೆ ಎಂದು ನಿರ್ದೇಶಕ ತರುಣ್‌ ಕಿಶೋರ್‌ ಸುಧೀರ್‌, ನ್ಯೂಸ್‌ 18ಗೆ ನೀಡಿದ ಸಂದರ್ಶನದಲ್ಲಿ ಹೇಳಿಕೊಂಡಿದ್ದಾರೆ.

ಸಂಭ್ರಮದಲ್ಲಿ ಅಭಿಮಾನಿಗಳು..

ಸುದೀಪ್‌ ಮತ್ತು ದರ್ಶನ್‌ ದೂರವಾಗಿ ಕೆಲ ವರ್ಷಗಳೇ ಕಳೆದಿವೆ. ಇವರಿಬ್ಬರನ್ನು ಒಟ್ಟಿಗೆ ಮೊದಲಿನಂತೆ ಜತೆಯಾಗಿ ನೋಡಬೇಕು ಎಂದು ಅವರ ಕೋಟಿ ಕೋಟಿ ಅಭಿಮಾನಿಗಳು ಕಾಯುತ್ತಲೇ ಇದ್ದಾರೆ. ಆದರೆ, ಆ ಕ್ಷಣ ಮಾತ್ರ ಇನ್ನೂ ಆಗಮಿಸಿಲ್ಲ. ಸುಮಲತಾ ಅಂಬರೀಶ್‌ ಕಾರ್ಯಕ್ರಮದಲ್ಲಿ ಇಬ್ಬರೂ ಒಂದೇ ವೇದಿಕೆ ಹಂಚಿಕೊಂಡಿದ್ದರೂ, ಇಬ್ಬರೂ ಮಾತನಾಡಿರಲಿಲ್ಲ. ಇದೀಗ ಸ್ನೇಹಿತ ದರ್ಶನ್‌ ಅವರ ಕಾಟೇರ ಸಿನಿಮಾ ನೋಡುವುದಾಗಿ ಸುದೀಪ್‌ ಹೇಳಿದ್ದಾರೆ. ಈ ವಿಚಾರ ಈ ಇಬ್ಬರ ಅಭಿಮಾನಿ ವಲಯದಲ್ಲಿ ಕುತೂಹಲ ಮೂಡಿಸಿದೆ.

ಇದನ್ನೂ ಓದಿ: ದುನಿಯಾ ವಿಜಯ್ ಅವ್ರಿಂದ ದೂರವಾದ್ರಾ ಎರಡನೇ ಪತ್ನಿ? ಕೀರ್ತಿ ಪಟ್ಟಾಡಿ ಕೊಟ್ಟ ಉತ್ತರ ಹೀಗಿದೆ

ಸೆಲೆಬ್ರಿಟಿ ಶೋನಲ್ಲಿ ತಾರೆಯರ ದಂಡು

ರಮೇಶ್‌ ಅರವಿಂದ್‌, ಬಿ ಸರೋಜಾದೇವಿ, ನಟಿ ಶ್ರುತಿ, ಮಾಲಾಶ್ರೀ, ಧನಂಜಯ್‌, ವಿನೋದ್‌ ಪ್ರಭಾಕರ್, ಸತೀಶ್‌ ನೀನಾಸಂ, ಅಮೂಲ್ಯ, ಮೇಘಾ ಶೆಟ್ಟಿ, ಧನ್ವೀರ್‌ ಗೌಡ, ಅರವಿಂದ್‌ ಕೆಪಿ ಮತ್ತು ದಿವ್ಯಾ ಉರುಡುಗ, ರಕ್ಷಿತಾ ಪ್ರೇಮ್, ಕುಮಾರ್‌ ಗೋವಿಂದ್‌, ವಿಕ್ರಂ ರವಿಚಂದ್ರನ್‌, ಮನುರಂಜನ್‌ ರವಿಚಂದ್ರನ್‌, ನಿರ್ದೇಶಕರಾದ ಯೋಗರಾಜ್‌ ಭಟ್‌, ಚೇತನ್‌ ಕುಮಾರ್‌, ಕೃಷ್ಣ, ನಿಶ್ವಿಕಾ ನಾಯ್ಡು, ಎಸ್‌ ನಾರಾಯಣ್, ಮೇಘನಾ ಗಾಂವ್ಕರ್‌, ವಸಿಷ್ಠ ಸಿಂಹ, ಹರಿಪ್ರಿಯಾ, ಪ್ರಿಯಾಂಕಾ ಉಪೇಂದ್ರ, ಸುಮಲತಾ, ಅಭಿಷೇಕ್‌ ಅಂಬರೀಶ್‌, ಸಾಧುಕೋಕಿಲ, ದೊಡ್ಡಣ್ಣ ಸೇರಿ ಇನ್ನೂ ಸಾಕಷ್ಟು ಮಂದಿ ಕಾಟೇರ ಸೆಲೆಬ್ರಿಟಿ ಶೋಗೆ ಆಗಮಿಸಿದ್ದರು.

ಇದನ್ನೂ ಓದಿ: ಒಂದೇ ವಾರದಲ್ಲಿ ಶತಕೋಟಿಗೆ ಮುತ್ತಿಕ್ಕಿದ ಕಾಟೇರ! ದರ್ಶನ್‌ ಸಿನಿ ಕೆರಿಯರ್‌ನಲ್ಲಿ ಹೊಸ ದಾಖಲೆ ಸೃಷ್ಟಿ