Rakshit Shetty: ಸಪ್ತಸಾಗರದಾಚೆ ಎಲ್ಲೋ ಸೈಡ್‌ ಬಿ ರಿಲೀಸ್ ದಿನಾಂಕ ಫಿಕ್ಸ್‌; ಮನು ರಿವೇಂಜ್‌ ಸ್ಟೋರಿ ನೋಡಲು ಕಾಯುತ್ತಿರುವ ಸಿನಿಪ್ರಿಯರು
Oct 21, 2023 01:46 PM IST
Share
ರಕ್ಷಿತ್‌ ಶೆಟ್ಟಿ ನಟನೆಯ ಸಪ್ತಸಾಗರದಾಚೆ ಎಲ್ಲೋ ಸೈಡ್‌ ಬಿ ನವೆಂಬರ್ 17ಕ್ಕೆ ರಿಲೀಸ್
Sapta Saagaradaache Ello Side B: ರಕ್ಷಿತ್‌ ಶೆಟ್ಟಿ ನಿರ್ಮಿಸಿ ಹೇಮಂತ್‌ ರಾವ್‌ ನಿರ್ದೇಶನದ ಸಪ್ತಸಾಗರದಾಚೆ ಎಲ್ಲೋ ಸೈಡ್‌ ಬಿ ನವೆಂಬರ್ 17ಕ್ಕೆ ತೆರೆ ಕಾಣಲಿದೆ. ಈ ವಿಚಾರವನ್ನು ಸ್ವತ: ರಕ್ಷಿತ್‌ ಶೆಟ್ಟಿ ತಮ್ಮ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.
Sapta Saagaradaache Ello Side B: ಸೆಪ್ಟೆಂಬರ್‌ 1 ರಂದು ಚಿತ್ರಮಂದಿರದಲ್ಲಿ ತೆರೆ ಕಂಡಿದ್ದ ರಕ್ಷಿತ್‌ ಶೆಟ್ಟಿ ಅಭಿನಯದ ಸಪ್ತಸಾಗರದಾಚೆ ಎಲ್ಲೋ ಸಿನಿಮಾ ಸೆಪ್ಟೆಂಬರ್‌ 28ಕ್ಕೆ ಒಟಿಟಿಯಲ್ಲಿ ಕೂಡಾ ಸ್ಟ್ರೀಮಿಂಗ್‌ ಆರಂಭಿಸಿತ್ತು. ಸೈಡ್‌ ಎ ನೋಡಿ ಮೆಚ್ಚಿದ್ದ ಸಿನಿಪ್ರಿಯರು ಸೈಡ್‌ ಬಿ ನೋಡಲು ಕುತೂಹಲದಿಂದ ಕಾಯುತ್ತಿದ್ದಾರೆ. ಸೈಡ್‌ ಬಿ ರಿಲೀಸ್ ಆಗುವುದು ಲೇಟ್‌ ಎಂಬ ಸುದ್ದಿ ಹರಿದಾಡಿತ್ತು. ಇದರ ನಡುವೆ ಚಿತ್ರತಂಡ ಅಧಿಕೃತವಾಗಿ ಸೈಡ್‌ ಬಿ ರಿಲೀಸ್ ಡೇಟ್‌ ಅನೌನ್ಸ್‌ ಮಾಡಿದೆ.
ಮನು ಪ್ರಿಯಾ ಲವ್‌ ಸ್ಟೋರಿ
ಮನು ಹಾಗೂ ಪ್ರಿಯಾ ಪ್ರೇಮಿಗಳು. ಮನು ಕಾರ್‌ ಡ್ರೈವರ್‌ ಆಗಿ ಕೆಲಸ ಮಾಡುತ್ತಿದ್ದರೆ, ಪ್ರಿಯಾ ಒಂದು ಗ್ರೂಪ್‌ನಲ್ಲಿ ಸಿಂಗರ್‌ ಆಗಿ ಗುರುತಿಸಿಕೊಂಡಿರುತ್ತಾಳೆ. ಮಧ್ಯಮ ವರ್ಗದ ಕುಟುಂಬಕ್ಕೆ ಸೇರಿದ ಪ್ರೇಮಿಗಳಿಗೆ ನೂರಾರು ಕನಸು. ನಾವೂ ಕಾರು ಖರೀದಿಸಬೇಕು, ಸಮುದ್ರದ ತಟದಲ್ಲಿ ಮನೆ ಮಾಡಿ ಪುಟ್ಟ ಸಂಸಾರದೊಂದಿಗೆ ಖುಷಿಯಾಗಿ, ಪ್ರಿಯಾ ದೊಡ್ಡ ಸಿಂಗರ್‌ ಆಗಬೇಕು ಎಂಬ ಆಸೆ. ಆದರೆ ತಮಗೆ ಬರುವ ಸಂಬಳದಲ್ಲಿ ಕನಸು ಕಾಣುವುದೂ ಕಷ್ಟ ಎನ್ನುವಂತಾಗಿರುತ್ತದೆ. ಅದೇ ಸಮಯಕ್ಕೆ ನಾಯಕ ಮನು ಕೆಲಸ ಮಾಡುತ್ತಿರುವ ಯಜಮಾನರ ಮಗನ ಕಾರು ಅಪಘಾತದಲ್ಲಿ ವ್ಯಕ್ತಿಯೊಬ್ಬರು ಪ್ರಾಣ ಕಳೆದುಕೊಳ್ಳುತ್ತಾರೆ.
ಮಾಡದ ತಪ್ಪಿಗೆ ಶಿಕ್ಷೆ ಅನುಭವಿಸುವ ಮನು
ಮಗನನ್ನು ಕಾಪಾಡುವ ಉದ್ದೇಶದಿಂದ ದುಡ್ಡು ಕೊಟ್ಟು ಆ ಕೇಸ್‌ನಲ್ಲಿ ಬೇರೆಯವರನ್ನು ಒಳಗೆ ಕಳಿಸುವ ಪ್ಲಾನ್‌ ಮಾಡುತ್ತಾರೆ. ಇದೆಲ್ಲಾ ತಿಳಿದ ಮನು ದುಡ್ಡಿಗಾಗಿ ತಾನು ಆರೋಪಿ ಸ್ಥಾನದಲ್ಲಿ ನಿಲ್ಲಲು ಒಪ್ಪಿಕೊಳ್ಳುತ್ತಾನೆ. ಜೈಲಿಗೆ ಹೋಗುತ್ತಿದ್ದಂತೆ ಆತನನ್ನು ಬೇಲ್‌ ಮೇಲೆ ಬಿಡಿಸುತ್ತೇನೆ ಎಂದು ಪ್ರಾಮಿಸ್‌ ಮಾಡಿದ್ದ ಶಂಕರೇಗೌಡ ಹೃದಯಾಘಾತದಿಂದ ಸಾವನ್ನಪ್ಪುತ್ತಾರೆ. ನಂತರ ಮನುವನ್ನು ಜೈಲಿನಿಂದ ಹೊರತರಲು ಯಾರೂ ಮುಂದೆ ಬರುವುದಿಲ್ಲ. ನನ್ನಿಂದ ಪ್ರಿಯಾ ಕಷ್ಟಪಡಬಾರದು ಎಂಬ ಕಾರಣಕ್ಕೆ ಮನು, ಜೈಲಿಗೆ ತನ್ನನ್ನು ನೋಡಲು ಬರುವ ಪ್ರಿಯಾಳನ್ನು ದೂರ ಇಡುತ್ತಾನೆ. ಮನುವಿಗಾಗಿ ಕಾದು ಸೋತ ಪ್ರಿಯಾ ಬೇರೆ ಮದುವೆ ಆಗಲು ಒಪ್ಪಿಕೊಳ್ಳುತ್ತಾಳೆ. ಮಾಡದ ತಪ್ಪಿಗೆ ಮನು 10 ವರ್ಷ ಜೈಲುಶಿಕ್ಷೆ ಅನುಭವಿಸುತ್ತಾನೆ. ಜೈಲಿನಿಂದ ಹೊರಬಂದ ಮನು ಮತ್ತೆ ಪ್ರಿಯಾಳನ್ನು ಭೇಟಿ ಆಗುತ್ತಾನಾ? ಬೇರೆ ಮದುವೆ ಆಗುತ್ತಾನಾ? ತನಗೆ ಈ ಗತಿ ತಂದವರ ವಿರುದ್ಧ ಸೇಡು ತೀರಿಸಿಕೊಳ್ಳುತ್ತಾನಾ ಎಂಬುದನ್ನು ಸೈಡ್‌ ಬಿಯಲ್ಲಿ ನೋಡಬಹುದು.
ನವೆಂಬರ್ 17ಕ್ಕೆ ಸೈಡ್‌ ಬಿ ರಿಲೀಸ್
ಸಪ್ತಸಾಗರದಾಚೆ ಎಲ್ಲೋ ಸೈಡ್‌ ಬಿ ನವೆಂಬರ್ 17ಕ್ಕೆ ತೆರೆ ಕಾಣಲಿದೆ. ಈ ವಿಚಾರವನ್ನು ಸ್ವತ: ರಕ್ಷಿತ್‌ ಶೆಟ್ಟಿ ತಮ್ಮ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ. ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ ಚಿತ್ರ ಇದೇ ನವೆಂಬರ್ 17ಕ್ಕೆ ಕನ್ನಡ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ಬಿಡುಗಡೆಯಾಗಲಿದೆ. ಎಂದಿನಂತೆ ನಿಮ್ಮೆಲ್ಲರ ಪ್ರೀತಿಯಿರಲಿ ಎಂದು ರಕ್ಷಿತ್‌ ಬರೆದುಕೊಂಡಿದ್ದಾರೆ. ಇದು ಸಿನಿಪ್ರಿಯರಿಗೆ ಖುಷಿ ನೀಡಿದೆ. ಮನುವಿನ ರಿವೇಂಜ್‌ ನೋಡಲು ಸಿನಿಮಾಭಿಮಾನಿಗಳು ಕಾಯುತ್ತಿದ್ದಾರೆ. ಸಪ್ತಸಾಗರದಾಚೆ ಎಲ್ಲೋ ಚಿತ್ರವನ್ನು ಪರಮ್ವಃ ಸ್ಟುಡಿಯೋಸ್‌ ಬ್ಯಾನರ್‌ ಅಡಿ ರಕ್ಷಿತ್‌ ಶೆಟ್ಟಿ ನಿರ್ಮಿಸಿದ್ದು ಹೇಮಂತ್‌ ರಾವ್‌ ಆಕ್ಷನ್‌ ಕಟ್‌ ಹೇಳಿದ್ದಾರೆ. ಚಿತ್ರದಲ್ಲಿ ರಕ್ಷಿತ್‌ ಶೆಟ್ಟಿ , ರುಕ್ಮಿಣಿ ವಸಂತ್‌ ಜೊತೆ ಅಚ್ಯುತ್‌ ಕುಮಾರ್‌, ಚೈತ್ರಾ ಆಚಾರ್‌, ಪವಿತ್ರಾ ಲೋಕೇಶ್‌, ಅವಿನಾಶ್‌, ಶರತ್‌ ಲೋಹಿತಾಶ್ವ, ರಮೇಶ್‌ ಇಂದಿರಾ ಹಾಗೂ ಇನ್ನಿತರರು ನಟಿಸಿದ್ದಾರೆ.